Informacione Sportive

Skela, "sherr" me Rangelovin për penalltinë




Ai cilësohet lideri i Kotbusit, por kjo shpeshherë ngjall xhelozi, madje edhe brenda skuadrës. Sipas medias gjermane, ky është shkaku që Ervin Skela, mesfushori i përfaqësueses shqiptare ka pasur një debat me shokun e tij të skuadrës, Dimitar Rangleov, gjatë ndeshjes kundër Mënshengladbahut, të cilën ekipi i tij e fitoi me rezultatin 3-0. Të tre golat Kotbusi i shënoi me penallti, fillimisht Rangelov (1) dhe më pas Skela (2). Ka qenë penalltia e fundit që është bërë shkak për një zënkë mes tij dhe sulmuesit bullgar. 11-metërshin e ka fituar Rangelov, por trajneri kishte përcaktuar se goditjet e penalltive t'i gjuante Skela. Rangelov nuk e ka respektuar vendimin e trajnerit në penalltinë e parë të akorduar nga gjyqtari në favor të Kotbusit dhe ka preferuar të gjuajë vetë, duke shënuar. Penalltinë e dytë e ka ekzekutuar Skela, ndërsa penalltinë e tretë në minutën e 89-të, të cilën e ka fituar sërish Rangelov, ka dashur ta gjuajë vetë ky i fundit. Mesfushori shqiptar nuk ka qenë dakord dhe ia ka marrë topin nga duart sulmuesit bullgar, e ka gjuajtur vetë dhe ka shënuar gol duke thelluar shifrat në 3-0. Kjo nuk i ka pëlqyer aspak Rangelovit, i cili pas ndeshjes është larguar tejet i nervozuar për në dhomat e zhveshjes. I pyetur për këtë debat mes lojtarëve, kapiteni i Kotbusit, Timo Rost, ka dalë në mbrojtje të fantazistit shqiptar duke thënë: "Të gjithë e dimë se penalltitë i gjuan Skela, ndaj nuk kam se çfarë të them më tepër. Megjithatë e rëndësishme është fitorja".

Serie A, Interi fluturon në krye

Zikaltërit e Interit gjatë javës së katërt të kampionatit të Serisë A, arrijnë të gjejnë kreun e klasifikimit falë një goli të argjentinasit Hulio Kruz. Zikaltërit e nisin takimin menjëherë furish duke krijuar raste të pastra për gol, të cilat nuk konkretizohen siç duhet nga Adriano, ndërsa Ibrahimoviç në minutën e 25-të trondit traversën nga një goditje dënimi, por ka mjaftuar futja në fushë e argjentinasit Hulio Kruz për ti dhënë zikaltërve fitoren e merituar me rezultatin 1-0, njëkohësisht edhe vendin e parë në klasifikimin e Serisë A. Tashmë zikaltërit shikojnë nga lart Milanin dhe Juventusin.

shume dobet partizani simjet.. :inat:

ehh i shkreti PARTIZON shum keq jemi katandis sivjet ene Roma anej nga fundi esht ishalla 009 na e ngre koken si ekipeve te mia ashtu ene mua :merzitur:

Duro vishet si “bomber”

Klodian Duro është i papërmbajtshëm. Mesfushori i përfaqësueses shqiptare ka shënuar sërish dje në kampionatin qipriot, duke arritur në kuotën e katër golave në dy ndeshjet e fundit. Skuadra e tij, Omonia Nikosia, shkatërroi 7-1 ekipin e Enosis Paralimnin. Mesfushori shqiptar ka shënuar në minutën e 70-të, duke thelluar diferencën e golave. Ai ishte padyshim një ndër më të mirët e takimit, pasi ka dhënë edhe asistin e golit të dytë të shënuar në minutën e 18-të nga Kaiafas. Ky ishte goli i shtatë sezonal për të dhe i pesti në kampionat. Dy golat e tjerë 32-vjeçari i ka realizuar në Kupën UEFA. Duro i ka bërë një dhuratë të bukur vetes për ditëlindje (mbushi 32 vjeç më 21 dhjetor), duke shënuar sërish gola. Një javë më parë ai realizoi tre gola kundër APOK-ut. Omonia kryeson kampionatin qipriot me 36 pikë të grumbulluara në 14 ndeshje.

Olimpiakosi kërkon Beqajn

Portieri i Kombë-tares shqiptare, Arjan Beqaj, ka shumë mundësi të kthehet në kampionatin helen, në një prej skuadrave më të mira të këtij vendi, Olimpiakosi. Media greke të martën ka publikuar lajmin se Beqaj gjatë miniafatit kalimtar të dimrit mund të ndërrojë fanellën e Anorthosis Famagustas me atë të Olimpiakosit. Kampionët e Greqisë i kanë bërë një ofertë portierit të Fenerbahçes dhe të Kombëtares turke, Volkan Demirel, por ai nuk ka pranuar. Sipas uebsajtit www.typos.com, një nga menaxherët e skuadrës kampione të Greqisë ka qenë dy ditë më parë në Qipro dhe ka biseduar me krerët e klubit të Anorthosit, por gjithçka është ndërprerë për shkak të festës së Krishtlindjes. Paraqitja e shkëlqyer e treguar nga Beqaj gjatë këtij viti, si me Kombëtaren ashtu edhe me Anorthosisin, ka kthyer vëmendjen e shumë skuadrave. Mediat greke njoftojnë se gjatë ditëve të ardhshme pritet të bëhet edhe oferta zyrtare nga klubi grek për shërbimet e Beqajt. Aktualisht Beqaj po kurohet nga një dëmtim që pësoi pak javë më parë. Në fakt, Olimpiakosi e njeh mirë portierin e përfaqësueses shqiptare. Kosovari u bë barrierë e pakalueshme për skuadrën greke në fazën eliminatore, duke i mohuar Olimpiakosit të hynte në grupe në Ligën e Kampionëve. Beqaj me Anorthosisin ishin gati për të bërë befasinë e vitit dhe për pak sa nuk u kualifikuan në fazën e dytë të Championsit. Në ndeshjen vendimtare, Beqaj u zëvendësua për shkak të një dëmtimi dhe zëvendësuesi i tij pësoi një gol qesharak nga Panathinaikosi.
Kjo humbje e la pa gara evropiane Anorthosisin e Beqajt. Portieri i Kombëtares shqiptare paraqitje të mira ka treguar edhe me fanellën e Shqipërisë në kualifikimet për Botërorin 2010. Shqipëria renditet e treta në Grupin e parë me pesë pikë në katër ndeshje. Beqaj 33-vjeçar ka kontratë me skuadrën qipriote Anorthosis deri në qershorin e vitit 2011. Kartoni i tij vlerësohet rreth një milion euro. Ai tek Anorthosis është transferuar në verën e vitit 2006 nga skuadra greke Ionikos. Në Greqi, kosovari Beqaj ka veshur fanellën e OFI Kretas. Beqaj është ndër portierët e huaj me më shumë paraqitje në ligën elite të Greqisë dhe i vetmi që ka arritur të shënojë gol gjatë një ndeshjeje. Gjatë kësaj vere pati një interesim edhe nga Olimpiku i Marsejës për Arjan Beqajn, ku padyshim ndërmjetës ishte Lorik Cana, kapiteni i skuadrës franceze.

Laze super-ofertë, por Dede frenohet

Elbasani është futur fuqishëm në valle për të marrë shërbimet e mbrojtësit Nevil Dede. Presidenti i verdhebluve, Arben Laze, ka kontaktuar dje me lojtarin dhe sipas tij marrëveshja është 99% e arritur: Dede në janar vishet verdheblu. Megjithatë, ka qenë vetë futbollisti, ai që ka frenuar entuziazmin duke thënë se nuk është vendosur asgjë deri tani. Laze ka pohuar se i ka bërë një super-ofertë e cila duket se e ka bindur Deden të pranojë parimisht ofertën e bërë nga Elbasani. Sipas presidentit të klubit, ajo që e pengon Nevil Deden të pranojë zyrtarisht ofertën e ekipit të Elbasanit është skuadra kineze ku është aktivizuar Dede, e cila pritet që t'i bëjë një tjetër ofertë futbollistit të spikatur që është aktivizuar në radhët e Elbasanit për dy sezone në kohën kur ky ekip shpallej nën kampion dhe kampion i vendit. Nevil Dede ka pohuar se ka pasur kontakte ditën e djeshme me drejtuesit e klubit të Elbasanit, por ai është treguar i përmbajtur duke thënë se ende nuk ka dhënë një përgjigje përfundimtare, pasi ka disa oferta, të cilat po i vlerëson me kujdes. "Po është e vërtetë, që kam pasur kontakte me presidentin e klubit të Elbasanit, të cilin e kam mik dhe e respektoj - ka thënë Dede për "Panorama Sport" - Megjithatë, unë ende nuk kam vendosur, pasi më parë duhet të zgjidh disa çështje të tjera". Dede aktualisht ka një ofertë joshëse nga një klub kinez dhe po e vlerëson me seriozitet rikthimin në kampionatin aziatik. "Menaxheri im në Kinë është në bisedime me një skuadër e cila më ka bërë një ofertë të mirë dhe pa zgjidhur më parë këtë çështje, nuk mund t'i jap përgjigje as Elbasanit dhe as klubeve të tjera shqiptare që kanë shprehur interesim për mua. Padyshim që Elbasani është një skuadër e dashur, në të cilën ndihem mjaft mirë, por unë ende nuk kam vendosur ndonjë gjë. Oferta e Lazes? Po, ishte vërtet e mirë", ka thënë Dede.

Kievo kërkon të largojë me çdo kusht Bogdanin

Aventura e Erjon Bogdanit te Kievo mund të përfundojë në muajin janar. Sipas medias italiane, klubi veronez është në kërkim të një sulmuesi tjetër dhe menaxherët e skua-drës verdheblu janë në bisedime me disa klube të huaja për të sistemuar Bogdanin në merkaton e janarit. Sipas gazetës lokale në Veronë "L'Arena", drejtori sportiv i verdhebluve, Xhovani Sartori, është në bisedime me disa klube edhe jashtë Italisë për të larguar sulmuesin shqiptar. Ai ka pohuar se interesohet për Makinuan dhe Bonacolin, dy sulmues që sipas Sartorit, do të mund të jenë më produktivë dhe mund të shënojnë më shumë gola. Ky i fundit nuk ka pasur një ecuri të mirë, kjo edhe për shkak të problemeve fizike, të cilat nuk i kanë lejuar të bëjë maksimumin e tij. Megjithatë, Bogdani ka shprehur dëshirën që ta respektojë deri në fund kontratën që ka me Kievon, por ka bërë të qartë gjithashtu, se nëse do të largohet, atëherë nuk do ta pranonte kurrë formulën e huazimit.
Përplasjet
Lëvizjet e drejtorit sportiv të Kievos, Xhovani Sartori, nuk korrespondojnë me dëshirën që ka trajneri i kësaj skuadre, Domeniko Di Karlo. Tekniku dëshiron që sulmuesi shqiptar të qëndrojë në ekip dhe ka besim maksimal tek aftësitë e tij, por fakti që Bogdani nuk ka mundur të shënojë asnjë gol deri tani, e ka bindur drejtuesin e klubit që të veprojë edhe pa miratimin e trajnerit. Bogdani, ndërkaq nuk e ka përjashtuar mundësinë e largimit nga skuadra veroneze. Në një intervistë të dhënë për "Panorama" pak ditë më parë, bomberi ka pohuar se mund të lëvizë në merkaton e janarit. "Unë dëshiroj të qëndroj te Kievo, pasi tani jam rikuperuar plotësisht dhe e ndjej se mund të bëj shumë, por nuk e di se çfarë do të ndodhë në merkato. Nuk mund të them me bindje se do të qëndroj te Kievo, por një gjë është e sigurt: nëse largohem, këtë do ta bëj për të shkuar në një ekip akoma më të mirë, në të kundërt do të qëndroj aty", është shprehur futbollisti.

Zenit do 20 mln sterlina për Arshavin

Klubi rus i Zenit Shën Petersburgut, shpreson që në merkaton e janarit të largojë fantazistin e tij, Andrej Arshavin dhe destinacioni më i mundshëm është Arsenali. Pas dëmtimit të rëndë të Çesk Fabregas, dy janë emrat që drejtuesit e "topçinjve" kanë lakuar më shpesh: Ksavi Alonso, i Liverpulit dhe Andrej Arshavin. Ndërkohë që mundësia për transferimin e spanjollit mbetet tepër e vogël, pasi mesfushori po kalon një formë të jashtëzakonshme në muajt e fundit, pista për afrimin e mesfushorit rus, duket më konkrete. 27-vjeçari, i etur për lavdi në Ligën e Kampioneve, kërkon të largohet një orë e më parë nga klubi me të cilin triumfoi një vit më parë në kupën UEFA. "Çmimi i Arshavinit është 20 milion sterlina. Shpresojmë se Arsenali do t'i përgjigjet pozitivisht një kërkese të tillë, së shpejti", tha Mitrofanov.

Bazile: Po shqyrtoj ofertat e Sitit

Alfio Bazile ndjek me vëmendje të madhe Premier Ligën angleze. Ish trajneri i Argjentinës, tregoi javën e shkuar se është duke studiuar një ofertë të ardhur nga Mançester Siti, që për momentin po përballet me vështirësi të mëdha në kampionat. "Kam oferta nga Mançester Siti që mbështetet financiarisht nga manjatët arabë," deklaroi Bazile në kanalin televiziv "TyC Sports", pa dashur të japë hollësirë të mëtejshme. I kthyer në një nga klubet më të pasur në botë, Mançester Siti, kërkon të kapë majat e suksesit britanik dhe atij kontinental. Pas blerjes së Robinjos, me një shifër rekord, drejtuesit e këtij klubi duan të bëjnë të tjera goditje të mëdha në janar. "Siti është një mundësi e mirë për mua, që të bind publikun se jam profesionist", tha 64-vjeçari.

Kapllani: Vetëm sedra më mban te Karlsruhe

Ky është një nga momentet më të çuditshme që po kalon. Nëse më parë arrinte të shënonte në çdo pozicion, tani dërgimi i topit në rrjetë duket një mision shumë i vështirë. E megjithatë Edmond Kapllani nuk dorëzohet. Bundesliga 1 është një bast që nuk dëshiron ta humbasë dhe shpreson se në fazën e dytë situata do të përmbyset. Sulmuesi i Kombëtares shqiptare pohon se shumë vetë i kanë sugjeruar të ndërrojë skuadër, pasi te Karlsruhe gjërat nuk po i shkojnë mirë, por lojtari dëshiron të qëndrojë, për të treguar se shkëlqimin në Bundesligën 2 mund ta përsërisë edhe në elitën e futbollit gjerman. Në një intervistë të dhënë për “Panorama”, bomberi kuqezi pohon se mund të largohet nga Karlsruhe vetëm për ndonjë ekip të Serisë A.
Kapllani e mbyll pjesën e parë të sezonit pa asnjë gol. Çfarë po ndodh me ju?
As vetë nuk mund t’i jap një shpjegim logjik. Fillimisht nuk kam luajtur rregullisht, por në javët e fundit jam aktivizuar si titullar. Kam bërë paraqitje të mira, të pakën kështu mendoj unë, por është e vërtetë, më ka munguar shumë goli dhe padyshim që ky është një problem për një sulmues. Por mendoj se nuk kam pasur edhe fat.
Është vetëm çështje fati, sipas jush?
Duke marrë parasysh situatat që janë krijuar, unë mendoj se është vetëm çështje fati. Kur shënova 17 gola në Bundesligë, shpeshherë realizoja edhe gola që mua më dukeshin shumë të lehtë, kjo sepse kisha edhe fat. Tani më ka munguar shansi. Ju jap një shembull: para disa javësh kundër Hanoverit topi ishte në vijë fatale, por një nga mbrojtësi bëri një roveshatë të pabesueshme dhe e largoi topin. Nuk u besova syve kur e pashë. Dua të them se ky lloj ngërçi është edhe punë fati. Megjithatë, unë jam në një formë të mirë dhe kjo më ngushëllon. Kam besim se në fazën e dytë do të arrij të zhbllokohem dhe të shënoj. Kështu mund të ndihmoj Karlsruhen në objektivat e saj dhe të jem në formë për ndeshjen me Kombëtaren kundër Maltës.
Nëse ju do të vazhdoni të jeni te Karlsruhe, sepse kjo nuk është shumë e sigurt apo jo?
Shikoni, unë e di që tani është kohë merkatoje dhe hidhen shumë hipoteza, por unë dua të qëndroj në këtë skuadër e të tregoj se jam i aftë të përballoj edhe një kampionat të vështirë si Bundesliga 1. Gjithsesi nuk i dihet.
Thuhet që ju kërkon Nurenbergu dhe disa skuadra jashtë Gjermanisë. A keni pasur oferta konkrete?
Është folur shumë, por nuk kam pasur asnjë ofertë konkrete. Këtë punën e Nurenbergut e kam dëgjuar edhe unë, por deri tani nuk ka pasur asnjë bisedim konkret. Pas disa ditësh do të takohem me trajnerin dhe drejtuesit e klubit dhe do të vendosim. Nëse ata më thonë se kanë besim te unë, atëherë do të qëndroj. Pastaj Nurenbergu është një ekip i Bundesligës 2 dhe unë nuk kam dëshirë të kthehem në këtë kampionat, pasi dua ta tregoj veten këtu, në Bundesligën 1. Që të jem i sinqertë, disa vetë më kanë sugjeruar të ndryshoj ekip, e ndoshta do të ishte më mirë kështu, por unë kam sedër dhe nuk dua të largohem që këtu pa treguar se sa vlej vërtetë.
Nëse do t’ju kërkojë një ekip i Serisë A, do ta merrni në konsideratë ofertën?
Sigurisht që po. Të gjithë kanë dëshirë të luajnë në Serinë A. Megjithatë, varet se çfarë kushtesh do të më ofrojnë dhe se sa garanci do të kem për të luajtur rregullisht.

Beqajn e josh ideja Olimpiakos

Suksesi historik i skuadrës qipriote Anorthosis dhe rezultatet e fundit të Kombëtares së Shqipërisë kanë një emërues të përbashkët - portierin kosovar Arjan Beqajn. Viti 2008 shënoi në të vërtetë kulmin e karrierës së portierit 33-vjeçar, të atij që për vite ishte aktivizuar në disa skuadra inferiore greke dhe mbahej në stol te skuadra kuqezi. “Të paktën të ishim në UEFA. Por, në Ligën e Kampionëve lëshimet kushtojnë shumë. Megjithatë, kemi bërë gjëra të mëdha, kemi sfiduar skuadra të mëdha evropiane. Anorthosisi tani shikohet me sy tjetër në Evropë”, ka thënë Beqaj për “Koha Ditore”. Pritjet e tij vunë në siklet edhe sulmues të përfaqësueseve me të cilat Kombëtarja e Shqipërisë lufton për një vend në botërorin “Afrika 2010”. Madje, nga provimi përballë tij ranë sulmues të mëdhenj si Kristiano Ronaldo e Zllatan Ibrahimoviç. Më të dy përfaqësueset favorite, Shqipëria ka nxjerrë barazim pa gola. Shqipëria zë vendin e katërt në Grupin 1 me pesë pikë në katër ndeshje. “Ne jemi angazhuar shumë në të gjitha ndeshjet. Ende jemi në lojë, kemi vetëm dy pikë më pak se vendi i parë në grup”, ka shtuar Beqaj. Performanca e shkëlqyer e ka bërë atë mjaft të kërkuar në merkato. Ndër skuadrat që interesohen është edhe Olimpiakosi i Greqisë, që prej Beqajt u eliminua në turin e dytë të Ligës së Kampionëve nga Anarthosisi. Ai nuk e pohon, por as nuk e mohon ofertën e skuadrës greke. “Olimpiakosi është një klub shuam i mirë, por nuk mund të flas asgjë rreth kësaj çështjeje, sepse kam kontratë edhe dy vjet e gjysmë me Anorthosisin. Nëse gjërat lëvizin në drejtim të transferimit, atëherë do të shprehem publikisht”, ëhstë shprehur ai. Beqaj deri tani ka regjistruar 35 paraqitje në fanellën e Kombëtares së Shqipërisë.