Informacione Sportive

Vlonjatët kanë programuar dy takime këtë javë me Bylisin, një në Ballsh dhe një në Vlorë

Ndërsa kampionati tashmë është ndërprerë për shkak të ndeshjeve të kombëtares, te Flamurtari synimi është evidentimi i mangësive të shfaqura në ndeshjen e fundit në kampionat ndaj Elbasanit, takim i cili u humb në minutat e fundit. Jo vetëm stërvitjet, të cilat nga trajneri Kovaçiç dhe stafi teknik po kryhen me dy seanca në ditë, por edhe takimet miqësore, është ajo që kanë menduar drejtuesit e Flamurtarit për të shfrytëzuar në mënyrën më të mirë periudhën e ndërprerjes së kampionatit. Pikërisht do të jetë Bylisi ekipi që Flamurtari do të gjejë përballë në këtë periudhë, ndërsa konfirmohet që do të jenë dy takime miqësore që vlonjatët do të luajnë brenda një jave me ekipin që drejtohet nga trajneri Faruk Sejdini. Fillimisht do të jenë vlonjatët mysafirë në Ballsh, pastaj një tjetër ndeshje, këtë radhë në Vlorë, e parashikuar në fundjavë. Korrigjimi i mangësive të shfaqura, por edhe konsolidimi i formacionit për takimin e radhës në kampionat ndaj Lushnjës në transfertë është dhe qëllimi që trajneri kroat i Flamurtarit ka kërkuar edhe zhvillimin e testeve të tilla miqësore. Ndaj Lushnjës në ndeshjen e radhës vlonjatët do të kenë sërish mungesa, si Alvizh dhe Begaj, lojtarë të dënuar me kartonë të kuq në takimin ndaj Elbasanit në Vlorë, ndërsa vetë stafi teknik pret tashmë edhe rikthimin e disa prej lojtarëve të dëmtuar, si Mema apo Guga, lojtarë të cilët do t’i jepnin më shumë mundësi zgjedhjeje trajnerit vlonjat. Ndërkohë, pranë ekipit kanë munguar edhe Arifaj, Zeqiri dhe Çaushaj, lojtarë që janë thirrur për takimet e ekipit Shpresa, me Kroacinë dhe Azerbajxhanin, ku takimi i fundit do të luhet pikërisht në Vlorë të mërkurën e datës 10 shtator. Ndërkohë konfirmohet që gjatë këtyre përgatitjeve do të shihen me kujdes edhe dy lojtarët më të fundit, një sulmues dhe një mbrojtës, të mbërritur në ditën e fundit të merkatos verore te Flamurtari nga Ada, lojtarë që stafi teknik pritet t’i shohë me kujdes, për të bërë pse jo të mundur edhe përfshirjen e tyre në ekip, duke nisur nga takimi i ardhshëm në Lushnjë. Duke u ndalur te ndeshja me Elbasanin, ditën e djeshme stafi teknik dhe lojtarët kanë parë edhe një herë kasetën e ndeshjes të zhvilluar të dielën në Vlorë. Krahas faktit që ndoshta gjyqtarët kanë vepruar me tendencë në dhënien e kartonëve, trajnerët, me në krye Kovaçiçin, kanë konstatuar ndërkohë edhe mangësitë e shfaqura nga lojtarë të veçantë. Fakt i cili duhet të riparohet qysh në takimin e së shunës së 13 shtatorit në Lushnjë, edhe pse është një takim delikat. Gjithsesi, në Vlorë kanë nisur tashmë të mendojnë pikërisht për këtë përballje, ku vlonjatët synojnë një paraqitje ndryshe, ndërsa gjithçka konfirmohet nga vetë programi i përgatitur, i cili përmban jo vetëm seanca stërvitore, por edhe ndeshje miqësore.

Vajtja në Itali për zhvillimin e ndeshjes së kthimit ndaj Napolit u ka vlejtur shumë shkodranëve në shumë drejtime, përveç zhvillimit të takimit në “San Paolo”. Kështu, gjatë këtyre ditëve të qëndrimit në Napoli, në ambientet e hotel “La Costiera”, ku ka qenë i akomodur ekipi shkodran, kanë mbërritur disa specialistë të njohur të futbollit të moshave. Arsyeja ka qenë arritja e një marrëveshjeje për bashkëpunim mes palëve sa i takon punës me moshat. Drejtori i akademisë së futbollit pranë klubit “Vllaznia”, Kujtim Shaba, e ka mirëpritur këtë gjë. Ndërkohë, Mario Sommella, një emër i njohur i futbollit napolitan dhe drejtues i akademisë së futbollit në këtë qytet, së bashku me një homologun e tij që kishte të njëjtin funksion në Novara, kanë shprehur gatishmërinë për të nisur një bashkëpunim mes palëve. Ata janë shprehur të gatshëm për të mbërritur në Shkodër në fund të muajit shtator bashkë me specialistë të tjerë për të dhënë kontributin e tyre për zhvillimin dhe rritjen e nivelit cilësor të këtyre grup-moshave. Bashkëpunimi mes palëve mund të vazhdojë më pas edhe me marrjen e elementëve më të mirë të moshave të vogla nga klubi “Vllaznia” për të nisur një karrierë në futbollin italian.

Dje, kombëtarja e Suedisë ka pësuar një goditje të madhe, pasi ka humbur shërbimet e dy mesfushorëve. Kristian Vilhelmson (28 vjeç) dhe Andreas Svenson (32 vjeç) nuk do të luajnë në dy eliminatoret ndaj Shqipërisë dhe Hungarisë, për shkak dëmtimesh. Mjeku i kombëtares suedeze, Andreas Valentin, tha: “Vilhelmsoni do të ketë nevojë për tri javë pushim. Dëmimi i tij ishte i papritur, ndërsa Svenson ka kohë që vuan dhe do t’i ishte më mirë që të pushonte për këto dy ndeshje.” Ndërkohë, trajneri Lars Lagerbak pohoi: “Nuk është diçka e mirë të humbasësh dy titullarë katër ditë para ndeshjes. Do të përpiqemi t’i zëvendësojmë, edhe pse nuk do të jetë e lehtë.” Sot Lagerbaku do të bëjë të ditur emrat e dy zëvendësuesve, që do t’u bashkohen nordikëve për ndeshjen e Tiranës.

Trajneri Lars Lagerbak ende i pavendosur për mënyrën se si do të luajnë ndaj Shqipërisë

Trajneri i Suedisë, Lars Lagerbak, ka diskutuar gjatë me futbollistët e tij për vendosjen taktike 3 5 2, të cilën e ka përdorur kohët e fundit, por nuk ka dashur të bëjë publike mënyrën se si do të luajë në eliminatoren e së shtunës, ndaj Shqipërisë. Qendërmbrojtësi Olaf Melberg nuk jep garanci me sistemin e ri, ndërsa Andres Svenson dhe Henrik Larson përshtaten më së miri në rolet, që u janë caktuar. Gazeta suedeze “Sportbladet” ka pyetur Lagerbakun në lidhje me këtë problem: “Nuk mund të flasim saktësisht për modulin e ri të lojës. Kohët e fundit janë bërë shumë komente në lidhje me gjërat që funksionojnë dhe ato që janë për t’u ndrequr. E kam lënë në dorën e futbollistëve dhe gjithsecili prej tyre duhet të kuptojë se çfarë ishte e mirë dhe çfarë jo në miqësoren ndaj Francës. Eshtë e qartë se për ndeshjen me Shqipërinë, ende nuk e kemi një ide të përcaktuar se si do të luajmë, se çfarë strategjie do të ndjekim.”
Më pas, Lagerbaku ka sqaruar edhe çështjen “Ibrahimoviç”. Sulmuesi i Interit ka pasur probleme me sponsorin teknik të përfaqësuses, por trajneri i Suedisë thotë: “Futbollistët tanë kanë të drejtë të zgjedhin markën e këpucëve që duan të përdorin, për të gjithë veshjet e tjera (tuta+uniforma) janë të detyruar të veshin ato që u japim ne. Kjo është një çështje që nuk më përket mua, por vetëm Zllatanit.” Kombëtarja e Suedisë ka sponsor teknik “Umbron”, ndërsa sulmuesi i Interit ka një kontratë me firmën “Nike”.

Mediat suedeze kanë thënë se ekipi i Lagerbakut është shqetësuar nga koha e nxehtë në vendin tonë

Koha e nxehtë që po kalon vendi ynë, duket se e ka shqetësuar kombëtaren e Suedisë. Sipas mediave vendëse, “frika” e ekipit të Lars Lagerbakut janë temperaturat disa gradë celsius më të larta në Shqipëri, krahasuar me vendin nordik. Problemi është te futbollistët, për të cilët nuk dihet nëse do të mund të përshtaten me këto temperatura. Në këtë moment, temperatura më e lartë e regjistruar në Suedi është 20 gardë celsius, ndërsa në Shqipëri varion nga 30 deri në 32 gradë. Ndryshimi i klimës nuk është i mirë, prandaj ky është parë si një problem serioz në Suedi. Por sikur të mos mjaftojë klima e ngrohtë, për Suedinë është kundër edhe orari i ndeshjes. Eliminatorja e parë do të luhet të shtunën në 18:45, pra jo si zakonisht, kur ndeshjet janë zhvilluar më 20:45. Ky orar mund të ishte gjysma e së keqes për nordikët, pasi në darkë koha freskohet. Kombëtarja e “yllit” Zlatan Ibrahimoviç do të mbërrijë në kryeqytetin shqiptar të premten paradite. Pasi të sistemohet në hotel “Sheraton”, në 18:45 do të zhvillojë seancën zyrtare në stadiumin “Qemal Stafa”. Por trajneri Lars Lagerbak nuk do të mjaftohet vetëm me këtë seancë. Sipas kërkesës së Federatës së Suedisë drejtuar FSHF-së, bëhet e ditur që të shtunën paradite, ekipit t’i vihet në dispozicion një fushë në kryeqytet. Burime në federatë pohojnë se nordikët do ta kryejnë këtë stërvitje të lehtë në kompleksin “Dinamo”. Kjo kërkesë shtesë ndoshta ka ardhur nga pala suedeze si pasojë e problemit të kohës.

Fantazisti vlonjat rrëfehet për karrierën e tij në kombëtare dhe ndeshjen e së shtunës me nordikët

I ulur në verandën e “15-katëshit”, Ervin Skela pranon me kënaqësi të rrëfehet për “Sportin shqiptar”, në prag të ndeshjes së rëndësishme me Suedinë. Një hapje e krahëve në stërvitjen e djeshme i ka shkaktuar dhimbje në kurriz, por me ndihmën e masazhatorit Ylli Mihali (shok i ngushtë i vlonjatit) çdo gjë kalon shpejt për 31-vjeçarin. “Kur je ulur këtu në verandën e hotelit dhe shikon qendrën e Tiranës, të vijnë nëpër mend shumë momente. Edhe me çunat po e diskutonim dje këtë gjë, pasi gjithë bulevardi në fitoret tona ishte me ngjyrë të kuqe. Pse të mos e kthejmë në festë edhe këtë herë pas ndeshjes me Suedinë. Na ka marrë vërtet malli,”- nis bisedën Ervin Skela. Por për t’ia arritur vlonjati e ka recetën gati. “Suksesi arrihet kur të gjithë bashkë jemi të bashkuar. Të tillë ne si shqiptarë bëhemi vetëm kur luajmë me Greqinë.”
Duke folur për ndeshjen me Suedinë, fantazisti kuqezi kujton vitin 2004, kur shënoi në portën e nordikëve. Për këtë, por jo vetëm, Ervin Skela tregon në intervistën e mëposhtme:

- I keni shënuar Suedisë në miqësore. Çfarë kujtoni nga ajo ndeshje?
- Kemi qenë një ekip shumë i mirë, me lojtarë të shkëlqyer. Shpresoj që në të ardhmen t’i vijnë edhe më cilësorë Shqipërisë. Ishte një ndeshje e bukur për ne dhe e merituam atë fitore, edhe pse duhet të pranojmë që në fushë për Suedinë luante ekipi B. Tani katër vjet më vonë, kohët kanë ndryshuar, pasi edhe kombëtarja jonë nuk është më me ata lojtarë, të cilët për kohën ishin në formën maksimale. Ndiej keqardhje, sepse në atë kohë kemi pasur mundësi edhe për rezultate më të larta, por kuptohet që në futboll duhet edhe pak fat. Mbaj mend që me Irlandën kemi pësuar gol në sekondat e fundit, apo me Zvicrën ku bëmë një ndeshje të bukur, për të mos përmendur atë ndaj Gjeorgjisë, ku humbëm gati 15 raste.

- Ju, Beqaj, Bogdani dhe Lala keni mbetur nga “veteranët”. Si ju duket kjo kombëtare?
- Janë afruar emra të rinj, të cilët tani duhet të tregojnë se sa vlejnë. Me ndihmën tonë ata duhet të bëjnë të pamundurën. Duhet të dimë që ndryshojnë ndeshjet miqësore nga ato zyrtare. Eshtë shumë më e vështirë të luash për ekipin kombëtar, sesa me klubin ku je. Në klub ke mundësi të rikuperosh javë për javë, ndërsa në kombëtare vjen dhe është një ndeshje e vetme ku mund të vlerësohesh. Pra, është shumë e vështirë të veshësh fanellën kuqezi dhe të luash me dinjitet për ta merituar. Nga të rinjtë duhet të presim se si do t’i përballojnë këto eliminatore. Janë shumë pak ndeshje dhe gjithçka duhet të nisë nga Suedia.

- Atëherë, në “syrin” e Skelës, si mposhtet kjo Suedi?
- Po punojmë për këtë dhe trajneri është munduar të na fusë stilin e tij të të luajturit. Unë mendoj se duhet të dimë një herë se ku i kemi forcat dhe mangësitë. Nuk kemi qenë asnjëherë një ekip, që të mposhtim kundërshtarin me lojën tonë, si të thuash ta vëmë me shpatulla pas murit. Të shtunën duhet të jemi një ekip punëtor, ku secili lojtar të vrapojë dhe të jetë i disiplinuar në rolin e vet. Kjo mendoj se mund të jetë “arma” jonë. Duhet ta kërkojmë fatin me punë në fushë, duke u përpjekur gjatë gjithë 90-minutëshit. Ndonjëherë ndeshjet i nxjerr edhe me lojë jo të bukur.

- Nga bisedat që keni zhvilluar me trajnerin, ç’mund të na thoni?
- Qëllimi kryesor i trajnerit është që ne të jemi gjithnjë në kontakt me topin dhe, kur e kemi atë, të hapim zonat, duke mos e lënë kundërshtarin të vrapojë. Ngaqë jemi një ekip “i vogël”, duhet të japim më shumë se 100% për të arritur rezultatin. Pasqyrë e kësaj mund të them se është loja që kemi zhvilluar në Bullgari edicionin e kaluar. Edhe Erion Bogdani, i cili është sulmues, punoi fort për skuadrën. Sa më pak zona të lira për Suedinë, aq më mirë për ne. Nuk duhet të hapemi, pasi po pësuam nuk kemi forca të rikuperojmë. Çdo minutë që kalon pa pësuar, është në favorin tonë.
Pastaj, nëse na jepet rasti nëpërmjet goditjeve standarde, duhet t’i shfrytëzojmë në maksimum. Mbrojtja është kryesorja, gjithashtu dalja e shpejtë në veprimet sulmuese.

- Kur bëhet fjalë për Suedinë gjithçka fokusohet tek Ibrahimoviçi…?
- Ne kemi një shprehje të bukur popullore: Ujku, ujku, por çakalli po bën kërdinë. Nuk ka nevojë për komente, pasi dihen vlerat e Ibrahimoviçit, por e mira është që të mos fokusohemi vetëm tek ai. Edhe me Ukrainën, kur ishte një Shevçenko në kohën e tij të artë, ndodhi që më të rëndësishëm rezultuan lojtarë si Voronin.

- Keni ndonjë mesazh për tifozët kuqezinj?
- Po, patjetër. Duhet të jenë realistë, sepse edhe ne njerëz jemi, kështu që e ndiejmë shumë kur humbim një ndeshje. Shqipëria duhet të jetë e bashkuar në çdo ndeshje. Ndodh që kur pësojmë gol, ne ofendohemi, siç ndodhi me Bjellorusinë. Tifozët duhet të na përkrahin fuqishëm, sepse vetëm duke qenë bashkë mund të arrijmë tek suksesi. Eshtë ndeshja e parë dhe ne jemi nën presion, por do të mundohemi që nga minuta e parë e deri tek e fundit, për të dhënë maksimumin. Me ndihmën e tifozëve, çdo gjë do të bëhet më e lehtë për ne.

- Jeni pjesë e kombëtares që prej tetë vitesh. Cili mbetet momenti më i paharruar për ju?
- Pa dyshim, janë dy fitoret me Greqinë, ku unë kam qenë pjesë e suksesit. Në ndeshjen e vitit 2000, ishte ndeshja ime e parë si titullar. Eshtë një kënaqësi e madhe, kur të gjithë, fëmijë, pleq, burra, gra ishim të bashkuar, duke festuar.

- Në cilën ndeshje jeni ndier më keq?
- Momenti më i keq i karrierës sime është penalltia e humbur me Bullgarinë. Kam kaluar disa ditë vërtet të rënda dhe ai moment shpesh më linte dhe pa gjumë. Më erdhi shumë keq, për faktin se në atë ndeshje isha në formë shumë të mirë, plus që nëse shënoja kalonim në avantazh. Me humbjen e penalltisë çdo gjë u zhvlerësua. Megjithatë, futbolli ky është. Ka momente të mira dhe të këqija. Unë i kam kaluar të dyja, por e rëndësishme është që tani ndihem mirë, edhe pse kam mbushur 31 vjeç.

- Mos ndoshta keni filluar të mendoni se kur do ta mbyllni karrierën?
- Sinqerisht nuk e kam menduar një gjë të tillë. Do të isha i kënaqur po të luaja të paktën edhe për tre vite.

- Shikoni ndonjë nga lojtarët e rinj si pasardhësin tuaj?
- Kur u thirra në kombëtare, dëgjoja për veten sikur isha pasardhësi i Bledar Kolës. Dua të theksoj se jam i lumtur që kam luajtur me futbollistë si Kola, Xhumba, Vata, Tare, Bellai etj. Nuk është sekret ta them, por nga të rinjtë më pëlqen Jahmir Hyka. Ka veti shumë të mira, por duhet të durojë. Ka kaluar në një ekip të mirë dhe është një provë e vërtetë për të. Ai nuk duhet të dekurajohet nëse nuk aktivizohet. Këto gjëra i kam hequr vetë në kurriz. Ne jemi shqiptarë dhe karakteri ynë është i tillë që nervozohemi shpejt. Që të bëhesh futbollist i mirë, duhet të jesh profesionist dhe të respektosh vendimet e trajnerit. Hykës i them që të shfrytëzojë në maksimum ato minuta që do t’i jepen.

Holandezi ka praktikuar një stërvitje me lojëra në zona të ngushta. Mbajtja e topit, inati i trajnerit kuqezi

Trajneri i kombëtares Ari Han kërkon që ta mposhtë Suedinë, duke i besuar lojës teknike të kuqezinjve dhe manovrimeve të tyre në zona të ngushta. Të paktën këtë e ka treguar stërvitja e paradites në “Skënder Halili”, ku holandezi ka vendosur në një sipërfaqe të vogël fushe 19 lojtarë, me përjashtim të Isli Hidit, që stërvitej nga trajneri i portierëve, Nikolas De Bre. Thirrjet e shpeshta të Hanit drejt lojtarëve, “mos e mbani topin”, nuk ishin të vështira për t’u dëgjuar. “Dua pasime të sakta,”- thoshte shpesh trajneri kuqezi. Kombinacionet e shpejta dhe kundërsulmi janë dy “armët” kryesore ku do të bazohet loja e kuqezinjve. Duke pasur parasysh që Suedia është një ekip fizik, Hani është i bindur që shpejtësia në manovrën sulmuese mund të rezultojë triumfuese. Po sa do të jenë në gjendje t’i zbatojnë detyrat e holandezit kuqezinjtë? Kjo ngelet për t’u parë, por për t’u admiruar ishte serioziteti në stërvitje i futbollistëve, sa që në pak metra katror kishte vend edhe për ndërhyrje me sparkatë, dhe jo vetëm nga mbrojtësit.

Mbrojtja e njëjtë, Bogdani zgjidhja e sulmit
Pas lojës për rreth 30 minuta me pasime në zona të ngushta, trajneri kuqezi pjesën tjetër të seancës e kreu me një test kontrolli në gjysmën e fushës. Nisur nga rreshtimi, ekipi A ose i titullarëve ishte ky: Hidi në portë, në mbrojtje Dallku nga e djathta, Teli dhe Curri në qendër, ndërsa Vangjeli në të majtë. Mesfusha ishte me Lalën, Canën dhe Skelën, ndërsa në sulm Bogdani i vetëm. Beqaj dhe Duro, të cilët mendohet të jenë titullarë, nuk ishin të pranishëm, pasi u janë bashkuar kuqezinjve në drekë. Nisur nga varianti i përdorur në stërvitje, Hani “zbuloi” që sulmuesi Erion Bogdani, pas mungesës në miqësoren e fundit, pritet të jetë alternativa e parë. Gjithsesi, një gjë e mirë për kombëtaren është se ekziston konkurrenca. Kapiteni Altin Lala dhe fantazisti Ervin Skela po kalojnë një formë të mirë, ndërkohë që në stërvitjen e djeshme u dalluan edhe lëvizjet e Vangjelit, Kapllanit apo Bulkut, të cilët arritën gjithashtu të shënonin. Reparti mbrojtës duket se do të jetë i pandryshuar, teksa Hanit i pëlqen rreshtimi me katër, duke u besuar nga krahët daljeve të Dallkut dhe Vangjelit. Gjatë lojës, një fanellë titullari holandezi i dha Hykës, i aktivizuar si mesfushor i majtë, gjithashtu qendërmbrojtësit Elvin Beqiri. Ndërkohë, seanca e pasdites u zhvillua në stadiumin “Selman Stërmasi”, ku grupi i kuqezinjve ishte i plotë pas ardhjes së portierëve Beqaj dhe Lika, si dhe mesfushorit Duro. Në këto dy ditë stërvitje, i vetmi që ka qenë jashtë grupit është Elis Bakaj, i cili vuan dëmtimin e pësuar në ndeshjen ndaj Vllaznisë.

Disa nga shërbimet e rezidencës së kombëtares që shërbejnë më shumë për pushuesit, shfrytëzohen nga futbollistët

Komoditetet e rezidencës së re të kombëtares duket se u bëjnë dëm kuqezinjve. Sikur të mos mjaftojnë njerëzit që kalojnë natën në hotel “Tirana”, edhe futbollistët e kombëtares më shumë të japin përshtypjen e një ekipi “turistësh”. Nëse kalon në katin e gjashtë të të famshmit “15-katësh”, vihet re një zhurmë e veçantë, e cila krijohet nga përplasja e tastierës së kompjueterit. Kohën e lirë kuqezinjtë e kalojnë duke eksploruar në internet. Chati dhe shikimi i uebsajeteve të ndryshme, as më pak e as më shumë, por zënë pjesën më të madhe të kohës së lirë të futbollistëve. Në pamje të parë, kjo duket sikur nuk përbën ndonjë problem, por duke parë se si veprohet në ekipet kombëtare të shteteve të tjera, këto shërbime nuk lejohen. Duke u marrë me internet, lojtarët nuk bëjnë gjë tjetër, por veçse shpërqendrojnë veten, aq më tepër që janë para një ndeshjeje të rëndësishme, si ajo me Suedinë. Trajneri Ari Han me siguri e di që shërbimi “Ëirles” funksionon edhe në katin e gjashtë, por ndoshta nuk e di që futbollistët rinë me orë të tëra përpara kompjuterit. Një pushuesi të thjeshtë i takon të bëjë një gjë të tillë, por jo futbollistëve, të cilët duhet të mbajnë një regjim të rreptë, ashtu siç i ka hije një ekipi kombëtar. Eshtë nevojshme që trajneri holandez i kuqezinjve të urdhërojë për heqjen e shërbimit të internetit. Ndërkohë, në lidhje me kohën e lirë të futbollistëve ka shumë histori. Më e veçanta është ajo e kombëtares italiane, ku trajneri Marçelo Lipi u lejonte futbollistëve të tij në dhoma, play-station. Në lojërat midis tyre, Aleksandro Nesta nga shtypja e butonave të tastierës dëmtoi dorën, teksa kjo histori komike mori përmasat e një barcalete në Itali.

————————
Ja si qëndrojnë kuqezinjtë

Janë 19 dhoma të të famshmit “15-katësh”, të cilat janë vënë në dispozicion të kombëtares. Futbollistët janë ndarë nga dy veta për dhomë. Nga shpërndarja vihet re që futbollistët kosovarë janë bashkë, dhe ai që bën përjashtim është Beqaj, i cili si zakonisht qëndron me shokun e tij ngushtë, Erion Bogdani. Edhe shkodranët Salihi-Teli janë në një dhomë, gjithashtu futbollistët që aktivizohen në Gjermani, Ervin Skela dhe Edmond Kapllani. Për më tej, ja lista e kuqezinjve në rezidencën e re:

Dhoma 505 - Trajneri Ari Han
Dhoma 506 - Zv\trajneri Theodorus De Jong
Dhoma 507 - Trajneri i portierëve Nikolas De Bre
Dhoma 602 - Ajet Xeka dhe Armend Çeliku
Dhoma 603 - Ylli Mihali dhe Fatos Kademi
Dhoma 605 - Fizioterapisti Stijn Vandebruke
Dhoma 606 - Hamdi Salihi dhe Admir Teli
Dhoma 607 - Altin Lala dhe Kristi Vangjeli
Dhoma 608 - Ansi Agolli dhe Ilion Lika
Dhoma 609 - Ervin Bulku dhe Isli Hidi
Dhoma 610 - Elis Bakaj dhe Andi Lila
Dhoma 611 - Endri Vrapi dhe Elvin Beqiri
Dhoma 612 - Ervin Skela dhe Edmond Kapllani
Dhoma 613 - Jahmir Hyka dhe Klodian Duro
Dhoma 710 - Lorik Cana dhe Besart Berisha
Dhoma 711 - Erion Bogdani dhe Arjan Beqaj
Dhoma 712 - Debatik Curri dhe Armend Dallku

“Të eliminojmë Ibrahimoviçin! I bie që të vendosim një mur me tulla (kapiteni e thotë duke qeshur). Ai është një ndër lojtarët më të mirë në botë dhe është në gjendje të shfrytëzojë çdo rast që i jepet. Sa më pak zona për të, aq më mirë do të jetë për ne. Megjithatë, nuk duhet të bëhemi naivë. Dy qendërmbrojtësit duhet të jenë pranë tij. Për mua, Curri, duke qenë se është trupgjatë, mund t’ia dalë.”

Futbollisti brazilian Robinjo i surprizoi të gjithë kur pranoi të transferohej te Mançester Siti, por duket se surprizat nuk përfundojnë me kaq. Duket se lojtari e ka mendjen ende te Çelsi, klubi ku ai dëshiroi të transferohej, por nuk e bëri dot. Gjatë prezantimit me Sitin nuk munguan edhe gafat. Në deklaratën e tij ai tha: - “Më erdhi një ofertë shumë e mirë nga Çelsi dhe unë e pranova menjëherë, pa pikë hezitimi. Jam i kënaqur me vendimin që mora.” Por, pas pak erdhi edhe korrigjimi. “Më falni, e kisha fjalën për Mançester Sitin”, tha Robinjo, duke nënkuptuar se transferimi i tij tek anglezët nuk ka qenë edhe aq i dëshiruar, pasi gjithë kohës ka menduar për të kaluar te Blutë e Londrës.

Ervin Skela ruan kujtime të dyfishta nga ndeshja e fundit me Suedinë 4 vjet më parë, ku kontrasti është bardhezi: shënoi gol, por humbi në fund një penallti në miqësoren e fituar 2-1. Fantazisti ka dhënë kontributin e tij për 11 klube gjatë karrierës së tij 15-vjeçare (2 në Shqipëri, 1 në Itali e 8 në Gjermani), qysh kur luajti për herë të parë me Flamurtarin në 1992. Ai dëshiron të shënojë sërish e këtë herë golin t’ia dedikojë djalit të tij. “Nëse shënoj do të doja t’ia kushtoja golin djalit tim, Krisit, (1-vjeçar) golin”, tha mesfushori për albania-sport.com. Megjithatë ai s’harron pjesën tjetër të familjes nënën e tij, Alfreda, të atin, Vironin e vëllanë Ardianin.

Sulmuesi i Suedisë, Zlatan Ibrahimoviç, do të jetë në formacionin titullar, që do të zbresë në “Qemal Stafa” ndaj Shqipërisë të shtunën. Lajmi është konfirmuar nga vetë sulmuesi në një deklaratë për median suedeze. Ndërkaq, ylli i përfaqësueses suedeze, Ibrahimoviç, e ka vlerësuar Shqipërinë, duke e cilësuar si një ekip të vështirë për t’u mundur, sidomos në fushën e saj. “Shqipëria është një skuadër mjaft e vështirë për t’u përballur, veçanërisht në fushë të vet. Shpresoj ta fitojmë këtë ndeshje, të tjerat nuk kanë rëndësi”, ka thënë Ibrahimoviç. Sulmuesi i mungoi Suedisë në miqësoren e 20 gushtit ndaj Francës, pikërisht për shkak dëmtimi, ndërkohë që u aktivizua në ndeshjen e Superkupës italiane Inter-Roma. Për çudinë e të gjithëve, Ibrahimoviç luajti për 120 minuta, ndërsa Interi u shpall fitues vetëm pas gjuajtjeve të 11-metërshave. Kjo gjë shkaktoi polemika në Suedi, pasi Ibrahimoviç kishte braktisur grumbullimin e përfaqësueses për shkak të dëmtimit, ndërkohë që katër ditë më pas ishte ndër më të mirët në fushë për Interin. Gjithsesi, sulmuesi u justifikua kështu: “Sigurisht, unë mund të luaja ndaj Francës, por dilema qëndronte në faktin për sa minuta mund të qëndroja në fushë, - tha Ibra në konferencën për shtyp. – Mbase mund të kisha luajtur 20-30 minuta në miqësore dhe mund ta kisha përkeqësuar dëmtimin. E ç’vlerë do të kishte kjo pastaj? Nuk doja që të rrezikonim. Ndihem më mirë tani dhe po e konstatoj gjatë seancave të fundit stërvitore, - thotë suedezi, teksa konfirmon se ndjen dhimbje në gju. - Po, kam ende pak dhimbje, por nuk është diçka shqetësuese, aq sa të më pengojë për të luajtur”.

I ka quajtur të ngathët mbrojtësit suedezë, madje kapiteni i Shqipërisë, Altin Lala, nuk është mjaftuar me kaq, por ka lëshuar një tjetër shigjetë në adresë të skuadrës së drejtuar nga Lagerbak, duke thënë se do të jetë më e lehtë të fitohet kundër tyre se sa kundër Maltës.

“Do ta kemi më të lehtë të fitojmë ndaj Suedisë se sa ndaj Maltës. Mbrojtësit suedezë janë shumë të aftë në lojën në ajër, por në veprimet teknike dhe në shpejtësi janë të ngathët. Këtu bën përjashtim vetëm mbrojtësi i Juventusit, Olof Melberg, i cili është vërtet një lojtar i kompletuar”, ka thënë Lala. Kaq ka mjaftuar që të acarojë suedezët, madje ka qenë pikërisht mbrojtësi i Juventusit, Olof Melberg, ai që u është kundërpërgjigjur ironikisht deklaratave të Altin Lalës. “Ata (shqiptarët), thonë se jemi të ngathët? Unë mendoj se kundër Shqipërisë do të shkojmë për të ekperimentuar skemën 3-5-2. Si ndeshja e parë që është, duhet të japim më të mirën, por gjithsesi me një kundërshtar të tillë lejohen edhe ndonjë eksperimentim. Jam i bindur se do të dominojmë gjatë gjithë ndeshjes sepse ata nuk janë ndonjë skuadër e pathyeshme, madje mendoj se në karahasim me ndonjë ekip tjetër, mund të thuhet se janë një skuadër e dobët”, ka thënë gjiganti i mbrojtjes së Suedisë, për të përditshmen suedeze, “Aftonblater”. Shtypi sportiv në Suedi i ka cilësuar tepër të guximshme deklaratat e kapitenit të Shqipërisë, madje nuk ka nguruar t’u vërë në dukje lojtarëve të përfaqësueses skandinave, se Lala është një nga shumë lojtarët e Shqipërisë që luan prej vitesh në një nga kampionatet më të forta të Evropës, siç është Bundesliga. “Shqipëria, ndryshe nga disa vende të vogla të Ballkanit, ka shumë futbollistë që luajnë në klube të njohura evropiane. Pika më e fortë e tyre është padyshim mesfusha, ku kanë lojtarë me shumë eksperiencë si Lala, Skela, apo Cana, të cilët luajnë në Gjermani dhe në Francë prej vitesh”, shkruhej në të përditshmen suedeze “Express”.

“Te Suedia më shqetëson disiplina taktike e tyre si dhe përgatitja e lartë fizike. Për të marrë një rezultat pozitiv në këtë ndeshje, Kombëtarja duhet të japë gjithçka në fushë dhe të menaxhojë energjitë deri në fund të takimit”. Ky është komenti i ish-kapitenit të Shqipërisë, Igli Tare në lidhje me ndeshjen e nesërme. Ai shpreson që kuqezinjtë ta nisin sa më mirë këtë edicion, por njëkohësisht përkrah trajnerin Ari Han. Han ka të drejtë kur shpreh pakënaqësi për mënyrën e organizimit – ka thënë Tare – Atij i nevojitej një kundërshtar i fortë në miqësoren e datës 20 gusht dhe nuk i shërbente aspak një test me një ekip si Lihteshtejni, sepse ai nuk mund të quhej test”.

Duket se paraqitja me Qipron e ka vënë në mendime trajnerin Marçelo Lipi. Ai do të prezantohet para përfaqësueses së Gjeorgjisë me disa ndryshime, nga cilat shpreson që të vijnë edhe sinjale pozitive. Kështu, në krahun e majtë të mbrojtjes ai do të hedhë që nga minuta e parë Andrea Dosenën. Por ky nuk do të jetë i vetmi ndryshim në formacion. Ndryshime, madje, priten edhe në vetë skemën e lojës. Këtë herë trajneri italian synon të luajë me tre sulmues: që nga minuta e parë do të luajnë Luka Toni dhe Alberto Xhilardino. Në balotazh për të luajtur si titullar janë Del Piero e Di Natale.

Franca në kërkim të reagimit

Trajneri i Kombëtares franceze, Raimond Domenek, kërkon nga futbollistët e tij që në ndeshjen e ditës së mërkurë, kundër Serbisë, të luajnë vetëm për fitore. Pasi vetëm kështu do të mund ta harrojnë atë humbje të turpshme të pësuar në Vjenë, të shtunën, me rezultatin 3-1. “Ky kompeticion është më i gjatë se një ndeshje. Nuk diskutohet që do kishim preferuar të merrnim tri pikë nga sfida jonë e parë, por kush thotë se ne duhet t’i fitojmë patjetër të gjitha ndeshjet?! Tani ne do të përgatitemi për t’u ndeshur me Serbinë, gjë të cilën do ta bëjmë gjer në takimin e fundit të këtyre eliminatoreve”.

Zidane:Ronaldo, më i miri

Legjenda e futbollit francez dhe atij botëror, Zinedine Zidane, ka vlerësuar maksimalisht talentin e portugezit të Mançester Junajtid, Kristiano Ronaldos. Ai e ka cilësuar këtë të fundit si futbollistin më të mirë në botë për momentin. “Kristiano Ronaldo është lojtari më i mirë i botës aktualisht. E ka merituar këtë status, pasi ka zhvilluar një sezon të shkëlqyer. Ka fituar trofetë më të rëndësishëm me Mançesterin, ka shënuar 40 gola në sezon dhe ka dhuruar spektakël. Ndaj, ka mjaft mundësi që ai të fitojë edhe çmimet më prestigjioze për një futbollist”, është shprehur Zinedine zidane, i cili nuk ka asnjë detyrë në futboll.

Tani media gjermane krenohet edhe me... Altin Lalën


“Altin Lala ndal Ibrahimoviçin”. Kështu shkruhej në të përditshmen gjermane “Bild”, ku i thureshin elozhe kapitenit të Shqipërisë për paraqitjen që bëri të shtunën përballë Suedisë. “Ibrahimoviç është lojtari më i paguar në botë, por nuk mund ta kalojë dot Altin Lalën. Një sukses i madh për futbollistin e Hanoverit, i cili kundër Suedisë dhe Ibrës, që fiton 12 milionë euro në vit të Interi, ka arritur një barazim 0-0 në ndeshjen që është luajtur të shtunën në Tiranë”, vijonte më tej shkrimi i prestigjiozes gjermane “Bild”. Kapiteni i Shqipërisë është një nga idhujt e tifozerisë së Hanoverit dhe padyshim një ndër mesfushorët më të mirë në rolin e tij në Bundesligën 1. “Trajneri dhe tifozët e Hanoverit mund të jenë të qetë në mesfushë, sepse kanë ende një luftëtar të vërtetë në skuadër. Lala tregoi të shtunën se vitet që mban mbi shpatulla nuk përbëjnë problem për të dhe se është ende një lider te Shqipëria, ku prej më shumë se një viti mban edhe shiritin e kapitenit”, shkruhej në gazetën gjermane. Mesfushori shtatshkurtër i Shqipërisë njihet për karakterin e tij impulsiv, por edhe për grintën që shfaq në fushën e lojës. Ai luan prej 10 sezonesh te skuadra e Hanoverit dhe ky është një rekord për një futbollist shqiptar që luan jashtë vendit të tij. Lala është gjithashtu lojtari me më tepër eksperiencë në Bundesligën 1, sepse pas largimit të portierit gjerman, Oliver Khan, nga futbolli, është aktualisht lojtari me më shumë ndeshje të luajtura në Bundesligën 1 gjermane, pasi ka luajtur deri tani 267 takime në kampionatin gjerman.

Ari Han: Dua një fitore me shumë gola


Trajneri i Kombëtares shqiptare, Ari Han ka thënë se Shqipëria do të luajë një lojë sulmuese sot kundër Maltës, sepse ai pret vetëm fitoren në këtë ndeshje. Madje edhe nëse tre pikët merren pas një fitoreje minimale (1-0), ai nuk do të ishte aspak i kënaqur. Në konferencën e djeshme për shtyp ai ka bërë të ditur se do të luajë vetëm me një sulmues, por kjo sipas tij nuk do të thotë se kuqezinjtë do të zhvillojnë të njëjtën lojë ashtu si kundër Suedisë, pra të përqendrohen më tepër në mbrojtje. “Kundër Maltës do të luajmë për fitore. Do të jetë një ndeshje komplet ndryshe, pra do të jemi në ata që do të sulmojmë. Kundërshtari ynë ka të ngjarë të jetë një skuadër që edhe mund të luajë me 8-9 lojtarë në mbrojtje, kështu që duhet të përpiqemi të krijojmë raste për të shënuar të paktën një gol. Do të bëjmë një lojë tërësisht sulmuese, por mbrojtja jonë nuk duhet të humbasë vëmendjen. Të njëjtën skemë ne e kemi aplikuar në stërvitje. Do të bëjmë të njëjtën lojë sulmuese si kundër Lihteshtejnit”, ka thënë Ari Han.
Si do të luajë Shqipëria kundër Maltës, me një apo me dy sulmues?
Ajo çka mund t’u them unë është se Shqipëria do të zhvillojë një lojë krejt tjetër nga ndeshja me Suedinë, çka do të thotë se do të luajë më tepër në sulm. Për ta fituar ndeshjen na duhet të shënojmë gola dhe për ta bërë një gjë të tillë nuk do të jetë e lehtë nëse nuk përqendrohemi dhe nëse nuk zbatojmë si duhet detyrat taktike.
Shqipëria ka treguar se e ka të vështirë të bëjë 2 ndeshje të mira radhazi. Çfarë keni ndërmend të bëni për ta thyer këtë tabu?
Po, jam në dijeni të këtij fakti dhe po ju them se pas Suedisë e kam kritikuar skuadrën që në pjesën e dytë luajti tepër e frikuar dhe thuajse totalisht e përqendruar në mbrojtje. Ne duhet ët guxojmë më tepër sepse vetëm kështu mund të shpresojmë te fitorja. Jemi përgatitur maksimalisht për këtë ndeshje dhe do të bëjmë disa ndryshime edhe në formacion, të cilat sipas meje do të prodhojnë një lojë më ofensive.
Kjo do të thotë se do të luajmë me dy sulmues?
Jo, nuk do të thotë këtë. Edhe Holanda luan një lojë ofensive, por luan vetëm me një sulmues, Nistëlroin, apo ndonjë tjetër. Kur them se do të luajmë në sulm, kjo nuk do të thotë se do të luajmë patjetër me dy sulmues. Ekipi sulmon në grup dhe mbrohet në grup. Dhe po ju them se do të luajmë sërish me një sulmues, por ndryshe nga Suedia.
Sa njohuri keni mbi Maltën?
E di shumë mirë se si luajnë dhe se me çfarë skeme do të luajnë kundër nesh.
Për mediat holandeze keni thënë se mund të renditemi të 2-tët?
Nuk është e vërtetë. Kam thënë se Portugalia është favoritja e vetme në këtë grup dhe se të gjitha skuadrat e tjera mund të renditen në vendin e dytë ose në vendin e pestë apo të gjashtë.
Po provoni Canën në mbrojtje, përse ky ndryshim?
Unë jam trajneri dhe kam të drejtë të bëj prova apo jo? Cana është një lojtar që luan në shumë role dhe unë dua ta shoh atë edhe në qendër të mbrojtjes. Ka shumë mundësi që ai të luajë në qendër të mbrojtjes nesër (sot), por kjo nuk është përfundimtare.
Ka pasur një përplasje dje mes Kapllanit dhe Curri...
Po, por nuk ishte për t’u ekzagjeruar aq shumë sa e keni bërë ju (gazetarët), pasi gjëra të tilla edhe ndodhin në stërvitje. Megjithatë, ne do të marrim masa që kjo të mos ndodhë më.
Pas barazimi me Suedinë, si është gjendja psikologjike e ekipit?
Shumë e mirë. Ju e keni vënë re këtë në stërvitje apo jo.
A i druheni euforisë?
Unë mendoj se janë të gjithë profesionistë dhe do të dinë të sillen si duhet në fushën e lojës.
A i druheni gjyqtarit austriak? Shpeshherë Shqipëria u ndëshkua nga gjyqtarët?
Po, është e vërtetë se ndonjëherë skuadrat penalizohen nga gjyqtarët, por kjo s’do të thotë se duhet të jetë patjetër Shqipëria që penalizohet çdo ndeshje. Unë kam besim te gjyqtari, sepse ai si çdo njeri tjetër do të përpiqet të bëjë më të mirën.
Si do të konsideronit një humbje të mundshme kundër Maltës?
As që e imagjinoj dot. Nuk di çfarë të them për këtë.

Trajneri i Maltës kërkon pikë në Tiranë

Malta shpreson që të marrë një rezultat pozitiv në ndeshjen e sotme kundër Shqipërisë. Këtë e ka pohuar trajneri i kësaj skuadre Dushan Fitzel, i cili ka thënë se ekipi i tij nuk ka asgjë për të humbur në këtë ndeshje, ndaj do të tentojë të bëjë gjithçka. “E dimë që do të jetë një ndeshje e vështirë ajo përballë Shqipërisë – ka thënë tekniku i maltezëve - por ne nuk kemi asgjë për të humbur. Do të japim maksimumin tonë për të provuar të marrim pikë në Tiranë”. Ndërkaq edhe portieri i Maltës, Xhastin Haber ka thënë se kundër Shqipërisë skuadra e tij i ka të gjitha mundësitë që të marrë një rezultat pozitiv. “Shqipëria do të jetë testi i ardhshëm për skuadrën tonë. Ne duhet ta lëmë pas humbjen me Portugalinë sa më shpejt që të jetë e mundur. Sigurisht që do ta analizojmë takimin me portugezët dhe besoj se nga ajo humbje e thellë, ne mund të nxjerrim diçka pozitive nga paraqitja jonë aspak e mirë”, tha portieri maltez.

Shqipëria fiton, del e para në grup


Shqipëria ngjitet në vendin e parë në grup, me katër pikë e me golaverazh më të mirë se Suedia, falë fitores së mbrëmshme 3-0 kundër Maltës dhe humbjes së Portugalisë me Danimarkën.Megjithatë, ishte një fitore e vuajtur përballë ishullorëve modestë, të cilët në disa raste u paraqitën të frikshëm përpara portës së Arjan Beqajt. Skuadra mike, e ndërgjegjshme për forcën e vendasve, e nisi takimin tepër e vendosur dhe me presing në çdo sektor të fushës. Megjithatë, kuqezinjtë mund ta kishin zgjidhur që në fillim rezultatin, kur Bogdani u tregua altruist në zonë dhe pasoi me kokë te Klodian Duro, gjuajtja e të cilit krijoi iluzionin e golit por në të vërtetë doli jashtë. Mbulimi i ashpër i maltezëve në shumë minuta e asfiksoi mesfushën shqiptare, e cila u tregua e pazonja të organizonte sulme. Të njëjtin fat patën edhe përpjekjet individuale, ndërkohë që në ato raste kur arrihej të gjuhej në kuadrat, atje ishte i gatshëm portieri Haber, befasues me pritjet e tij. Fundi i pjesës së parë ishte i lumtur për Shqipërinë, kur krosimi i Duros nga e djathta u shfrytëzua më së mirë nga Bogdani. Sulmuesi i Kievos e devijoi topin me kokë aq sa duhej për të mposhtur Haberin dhe tundi rrjetën. U mendua se goli do ta çlironte Shqipërinë dhe në pjesën e dytë do të shihej lojë më e rrjedhshme, por nuk ndodhi kështu. Malta vazhdoi me të njëjtin qëndrim, e ardhur ndoshta me pretendimin që e pakta të mos pësonte goleadën e dëshiruar nga Ari Han. Në fushën e “Qemal Stafës” u pa i njëjti futboll i mërzitshëm, me shumë gabime të pasakta, ndërkohë që Malta herë pas here na kujtonte se edhe ajo fitore minimale nuk ishte e sigurt. Në dy raste u deshën ndërhyrjet e Beqajt, në një rast tjetër Mifsud gjuajti jashtë, i lirë para zonës. Frika e të gjithë përfundoi në minutën e 85-të, kur Klodian Duro shënoi golin e dytë. Pas një tentative të dështuar të Salihit, mbrojtësi maltez gabon rëndë, duke mos larguar topin nga zona. Duro vepron me shpejtësi dhe gjuan duke shënuar golin e dytë. Fitorja tani është e sigurt, por ndërkohë fillon edhe ajo që prisnin të gjithë: spektakli kuqezi. Aktivizimi i Berishës, hapësirat e krijuara dhe entuziazmi bëjnë që shqiptarët të luajnë rrjedhshëm dhe ka disa raste për shënim. Haber grushton në goditje nga këndi gjuajtjen e Berishës dhe pas krosimit është Dallku që vulos fitoren 3-0. Tri pikë që priteshin dhe që, pavarësisht lojës jo të mirë, i kanë dhënë Shqipërisë startin e ëndërruar.


Shqipëri – Maltë 3 - 0
Golat: 46’ Bogdani, 83’ Duro, 89’ Dallku
Shqipëria: Beqaj, Dallku, Cana, Curri, Agolli, Lala, Bulku (Beqiri 55’), Duro (Berisha 86’), Hyka, Bogdani (Salihi 72’)
Trajner: Ari Han
Malta: Haber, Xuereb, Bajada, Barbara, Dinech, Agius (Slicuna 46’), Brifa, Sammut, Mifsud, Schembri.
Trajner: Dushan Fitzel
Gjyqtar: Robert Schoergenhofer (Austri)
Kartonë të verdhë: Beqiri, Dallku, Cana/Frendo

Danimarka-Portugali, surpriza në minutat e fundit

Janë luajtur mbrëmë tre takimet e radhës në Grupin 1 të eliminatoreve të Botërorit 2010, ku bën pjesë edhe Shqipëria. Kuqezinjtë kanë fituar 3-0 ndaj Maltës, duke u renditur për herë të parë në historinë futbollit shqiptar në vendin e parë në grup pas dy ndeshjeve eliminatore. Shqipëria ka katër pikë, po aq sa edhe Suedia, por ka golaverazh më të mirë. Favoritja kryesore e grupit Portugalia është thyer mbrëmë në fushën e saj, pasi u mund nga Danimarka me rezultatin e ngushtë 3-2. Minutat e fundit të takimit kanë qenë dramatike, teksa danezët kanë përmbysur disvantazhin 2-1, për të shënuar tre gola. Edhe Suedia fitoi mbrëmë në Stokholm me rezultatin 2-1 ndaj Hungarisë. Golat e Kallstrom e Holmen mjaftuan për triumfin e parë të nordikëve në eliminatore.

renditja

PORTUGALI - DANIMARKË 2 - 3
42’ Nani, 86' Deko (11m)/ 84' Bendtner, 90’ Poulsen, 91’ Jensen
Suedi – Hungari 2 - 1
55’ Kallstrom, 64’ Holmen/ 90’ Rudolf
Shqipëri – Maltë 3 - 0
46’ Bogdani, 83’ Duro, 89’ Dallku
Renditja
Ekipi N F B H Gola P
1. Shqipëria 2 1 1 0 3-0 4
2. Danimarkë 2 1 1 0 3-2 4
3. Suedi 2 1 1 0 2-1 4
4. Portugali 2 1 0 1 6-3 3
5. Hungari 2 0 1 1 1-2 1
6. Malta 2 0 0 2 0-7 0

Deklaratat

Ari Han
“Skuadra e meritoi fitoren, e cila duhet të ishte më e thellë. Them kështu sepse për gjetjen e golit ekipi u nervozua shumë në pjesën e parë. Krijuam shumë raste, nga të cilët morëm vetëm mundësitë minimale. Ata (maltezët) kanë luajtur shumë fort, mbi mundësitë e tyre. Por në pjesën e dytë u lodhën dhe ishin shumë të çorganizuar në të gjitha drejtimet. Në këtë hapësirë të lojës erdhën edhe dy golat tanë”.

Dushan Ficel
“Mendoj se skuadra tregoi karakter ndaj një kundërshtari që mund ta quaj edhe rival me ne për renditjen. E dinim që do të ishte një ndeshje e vështirë dhe u munduam që taktikisht të luanim më shumë me topin për të gjetur hapësira të shpejta në mbrojtjen shqiptare. Por skuadra pati një mangësi të madhe, sepse nuk mundi të finalizonte rastet që krijoi, duke shkuar deri tek pika e penalltisë, dhe jo më tej në zonën shqiptare”.

Debatik Curri
“Sulmuesit e tyre ishin shumë problematikë, sepse ishin të shkurtër dhe shumë të lëvizshëm. Luanin mirë dhe shumë më fortë se sa suedezët ndaj mund të them se pata më tepër vështirësi se sa më ndeshjen kundër Suedisë. Megjithatë jam i kënaqur për tre pikët sepse ky është një fillim vërtet shumë i mirë. Shpresojmë të ruajmë këtë ritëm edhe në dy ndeshjet e ardhshme kundër Hungarisë dhe Portugalisë”.

Shqipëria e mbyll e 4-ta


Kombëtarja shqiptare U-21 e ka mbyllur fazën eliminatore të Euro 2009 me 12 pikë në vendin e katërt, duke lënë pas vetëm Azerbajxhanin dhe Ishujt Faraoe. Shpresat kuqezi nuk kanë shkuar më shume se një barazim pa gola në ndeshjen e fundit eliminatore për Euro 2008 kundër modestëve të Azerbajxhanit. Skuadra e drejtuar nga Artan Bushati zhvilloi një ndeshje të vakët në stadiumin e qytetit të Vlorës, duke mos arritur të shkundë rrjetën e kundërshtarëve. Me vetëm gjashtë lojtarë nga barazimi 1-1 në Baku, Shqipëria U-21 nuk reflektoi asnjë autokritikë në barazimin e dytë me Azerbajxhanin.

Kuqezinjtë si anglezët, alkool, muzikë e disko


Sukseset festohen gjithmonë, por këtë radhë lojtarët e Kombëtares e kanë miksuar mënyrën e tyre të të dëfryerit duke u bazuar te "recetat e anglezëve": alkool, muzikë të lartë dhe kokteje nga më të ndryshmet.

Bashkë me disa lojtarë të përfaqësueses ka qenë edhe trajneri i Shqipërisë, Ari Han dhe të gjithë së bashku kanë kaluar disa orë relaksi deri në orët e para të mëngjesit të djeshëm, pas fitores 3-0 kundër Maltës të mërkurën. Bogdani, Berisha, Curri, Hidi, Teli, trajneri Ari Han, asistenti i tij Teo De Jong dhe përkthyesi i tij Ajet Xeka kanë preferuar të festojnë dje në pub "Mai Tai" ku ia kanë lejuar vetes edhe konsumin e pijeve alkoolike. Pak pasi ka mbaruar ndeshja kanë preferuar të festojnë dhe duhet thënë se trajneri i kuqezinjve Ari Han është specialist në mënyrën e të shijuarit të jetës. Ai i ka dhënë fund disiplinës së hekurt të mbajtur gjatë grumbullimit të këtyre ditëve dhe ka pranuar të festojë bashkë me futbollistët, me të cilët ka qëndruar afërisht deri në orën 04.00 të ditës së djeshme. Holandezi për të hequr stresin e dy ndeshjeve që u luajtën, ka konsumuar uiski gjatë gjithë kohës bashkë me asistentin e tij De Jong. Këtë të fundit disa të pranishëm e mburrën se e mbante mjaft mirë pijen, sepse ndonëse kishte rrëkëllyer disa gota të mira me uiski, e mbajti veten dhe ashtu si në stërvitje, nuk kishte buzëqeshur për asnjë moment. Për sa i përket lojtarëve, nuk kanë dashur të bien në sy për keq, por as nuk janë privuar nga pijet alkoolike. Pjesa dërrmuese e tyre preferuar kokteje nga më të ndryshmet, madje edhe nga ato me përmbajtje alkooli, ndërsa disa të tjerë janë mjaftuar me ndonjë shishe birrë. Padyshim një gjë e tillë nuk kishte ndodhur kurrë gjatë kohës që kuqezinjtë drejtoheshin nga kroati Oto Bariç, jo se atëherë nuk shkonin në disko, por sepse 75-vjeçari asnjëherë nuk kishte qenë pjesë e festave që organizonin lojtarët. Ari Hani, pohojnë lojtarët, është ndryshe, është më liberal në këtë aspekt, por shumë më i rreptë gjatë orarit të punës. Ndoshta kjo shpjegon edhe faktin që tani në Kombëtare ka më shumë harmoni dhe më pak qejfmbetje apo klane. "E megjithatë gjatë ditëve të grumbullimit ai është një diktator i vërtetë", pohojnë njerëz të afërt të stafit të Kombëtares.