Informacione Sportive

Bogdani drejt Bolonjës së serbit Mihajloviç

Erjon Bogdani mund të jetë pjesë e skuadrës së serbit Sinisha Mihajloviç pas merkatos së janarit. Ky është lajmi më i fundit që vjen nga media italiane. Kievo dhe Bolonja po projektojnë një shkëmbim mes Bernaçit dhe sulmuesit shqiptar. Sipas të përditshmes italiane “L’Arena”, drejtuesit e klubit kuqeblu kanë nevojë për një qendërsulmues të mirëfilltë dhe kanë vënë në dispozicion Bernaçin dhe Adailton. Ky i fundit nuk preferohet shumë nga trajneri i Kievos, Di Karlo, ndaj ka vendosur që në vend të Bogdanit të marrë Bernaçin.
Titullar
Kjo mund të jetë një rokadë me leverdi edhe për sulmuesin e përfaqësueses shqiptare, i cili padyshim që do të kishte më shumë hapësira te Bolonja dhe do të mund t’i jepte fund shterpësisë së golave të këtij sezoni. Për kalimin e tij te skuadra e Bolonjës ka dhënë OK-in edhe trajneri serbin i kësaj skuadre, Sinisha Mihajloviç, i cili nuk është se shquhet për raporte të mira me shqiptarët. Përkundrazi, tre vite më parë kur ishte ende futbollist dhe luante me Interin, ka pasur një përplasje të ashpër mes ish-kapitenin e Shqipërisë, Igli Taren, asokohe, sulmues i Lacios. Ata patën debate në fushë, por më pas nuk munguan edhe konfrontimet fizike në dhomat e zhveshjes.
Kërkesat
Nëse Bogdani transferohet drejt Bolonjës, kjo padyshim do të ndodhë vetëm nëse nuk përdoret formula e huazimit, pra klubi kuqeblu do të jetë i detyruar të blejë kartonin e tij. Sulmuesi i përfaqësueses shqiptare ka thënë se nuk do të pranojë kurrë që të transferohet në një skuadër në formë huazimi, kjo pasi pati një eksperiencë aspak të mirë në radhët e Livornos një vit më parë. Lojtari ka thënë se dëshiron të respektojë kontratën që ka me Kievon, e cila skadon pas një viti e gjysmë, por nëse do të vendosë të largohet, atëherë këtë do ta bëjë për të shkuar në një skuadër më të mirë. Bolonja është një mundësi shumë e mirë për të, pasi jo vetëm që është një skuadër më me traditë se Kievo, por me fanellën verdheblu, do të kishte mundësi që të luante edhe si titullar. Bolonja renditet në vendin e 16-të me 15 pikë, ndërsa Kievo renditet në vendin e fundit (20) me 9 pikë.

Sulmi kuqezi, i gjithi në merkato

Të katër sulmuesit e përfaqësueses shqiptare janë tejet të përfolur në merkaton e janarit. Bogdani kërkohet nga disa klube italiane dhe të huaja, ndonëse ai dëshiron të qëndrojë te Kievo. Për Edmond Kapllanin, qëndrimi te Karlsruhe nuk është i sigurt, pasi mund të transferohet në një ekip tjetër gjatë muajit janar. Për të interesohet Nurenbergu. Hamdi Salihi që luan te Riedi ka gjithashtu disa oferta nga klube jashtë Austrisë. Vetë sulmuesi ka shumë dëshirë që t’i japë fund aventurës te skuadra aktuale. Besart Berisha ka pohuar ndërkaq se në janar do të transferohet në një ekip tjetër, pasi te anglezët e Barnleit e ka të vështirë të sigurojë një vend titullari.

Duro fiton derbin me Hidin

Klodian Duro nuk ka falur as Isli Hidin, duke fituar kështu derbin kuqezi në kampionatin qipriot. Skuadra e Omonia Nikosias fitoi dje minimalisht 1-0 në transfertë ndaj Alki Larnakës. Të dy futbollistët e Kombëtares shqiptare janë aktivizuar si titullarë në këtë takim. Golin që vendosi fatin e ndeshjes e shënoi Kristofi që në minutën e parë të takimit. Isli Hidi kishte premtuar se do të bënte të pamundurën që të ndalte marshimin e skuadrës së Klodian Duros, por nuk ka mundur ta bëjë nj gjë të tillë, ndonëse ka bërë pritje disa të shkëlqyera gjatë takimit. Omonia Niksoia renditet në vendin e parë me 39 pikë të grumbulluara, ndërsa AEK Larnaka gjendet në vendin e 11-të me 14 pikë të grumbulluara.

Xherrard kalon nga festa,në pranga

Vetëm pak orë pas paraqitjes heroike në “St. James Park” përballë Njukasëllit, ikona e Liverpulit Stiven Xherrard përjetoi momente të errëta dhe gjeti veten pas hekurave të policisë. Sipas “BBC”, mesfushori anglez u arrestua ditën e djeshme nga policia lokale, pas një incidenti të shkaktuar në orët e para të ditës në një restorant të Sauthportit. Kapiteni i të kuqve u akuzua si dhunues ndaj një 34-vjeçari që përfundoi në spital me disa dëmtimeve në fytyrë. Gjashtë vetë u shoqëruan në polici, përfshirë këtu edhe futbollistin, i cili u kap pak metër larg vendngjarjes. Mosha e të arrestuarve, të cilët vinin nga Hujton, Formbi dhe Litherlendi, varionin nga 18 në 33 vjeç.

Rekord për kartonin e kuq më të shpejtë

David Prat, tashmë ka hyrë në historinë e “Rekordeve Gines” përsa i takon sportit botëror. Futbollisti amator anglez luan me Çipenham Taun dhe gjatë një ndeshjeje të kampionatit për të tij, është dëbuar nga gjyqtari pas vetëm 3 sekondash nga vërshëllima e fillimit të sfidës ndaj Bashlit. Arsyeja e kartonit të kuq ka qenë një “ndërhyrje vrasëse” ndaj kundërshtarit Kris Nouls. Një rekord thuajse i pathyeshëm i fiksuar nga Prat, i cili në jetën e përditshme ka profesionin hidraulik dhe nga ata që e njohin, cilësohet si një djalë i butë. Rekordi i mëparshëm rezultonte t’i takonte një italiani. Ishte viti 1990, kur sulmuesi i Bolonjës, Xhuzepe ‘Pino’ Lorenzo doli nga loja, pas vetëm 10 sekondave.

Platini ‘kurorëzon’ Del Pieron

Goli më i bukur i vitit 2008? Për presidentin e UEFËS,Mishel Platini, golin më të bukur për këtë vit e ka shënuar Alesandro Del Piero me rastin e sfidës së vlefshme për Ligën e Kampionëve, Juventus-Real Madrid. “Isha në ‘Olimpiko’ të Torinos kur Del Piero goditi fuqishëm në portën e Kasias – ka treguar francezi në një intervistë për shtyp – U ngrita në këmbë jo vetëm prej faktit që unë jam tifoz i Juventusit, por sepse ai gol ishte i shkëlqyer”. Platini ka bërë një koment lidhur me sfidën e rradhës që do ta dërgojë skuadrën bardhezi në Angli: “Kam vënë re se ka një ekuilibër të habitshëm përsa i përket këtyre dy skuadrave. Çelsi dhe Juventusi janë shumë të ngjashme me njëra-tjetrën. Pastaj kampionati italian është përmirësuar shumë”.

Dyseldorf shpreson te Kastrati

Skuadra e Fortuna Dyseldorf, ku aktivizohet sulmuesi shqiptar Bekim Kastrati, ka shumë shpresa që të ngjitet në Bundesligën 2 pasi ndodhet në vendin e katërt me 34 pikë, katër më pak se Kiker Emden e vendit të tretë. “Nuk duhet që të krijojmë panik. Na duhen disa përforcime, por nuk duhet të jemi nervozë. Ja kam thënë Bekim Kastratit se 2009-ta është viti yt dhe këtu s’ka asgjë të keqe”, sqaron trajneri i skuadrës, i cili shpreson që ardhja e lojtarëve të tjerë në ekip nuk do të shkaktoj panik, por do ta bëjë skuadrën më cilësore. Bekim Kastrati është një nga sulmuesit kryesor të skuadrës, por ka zhvilluar vetëm 3 ndeshje këtë sezon, një si titullar, pasi pësoi një dëmtim të rëndë që e mbajti 6 muaj larg fushave.

Partizani, Duro: Zgjidhja, çështje ditësh

Viti i ri, normalisht po nis si viti i vjetër. Nuk ka asgjë të re, pasi është dita e parë e përgatitjeve”. Ata që prisnin se te Partizani mund të ndryshonte diçka që dje, duhet të presin ende. Gjithçka për 2009-n ka filluar me një mbledhje të stafit teknik, që ka dashur t’i japë mesazhin skuadrës se situata s’ka ndryshuar, por maksimumi në fillimin e javës së ardhshme gjërat mund të marrin për mirë. E natyrisht, përderisa kanë pasur forcën të durojnë deri tani, futbollistët e kuq kanë pranuar të rifillojë stërvitjen, megjithëse nuk dihet edhe përsa kohë. “Mund të them se gjatë ditëve të fundit kam pasur një kontakt me presidentin, i cili është me punë në Greqi dhe më ka garantuar se do t’i zgjidhë problemet shumë shpejt – ka shpjeguar tekniku Duro për mediat. Stërvitja, natyrisht duhet të vazhdojë, deri në një moment kur futbollistët kanë të drejtën e tyre të vendosin për të ardhmen”.
Garancitë
Duro është bërë thjesht një transmetues i fjalës së Xhanit, ndërkohë që nuk duket se dëshiron të shkojë më shumë se kaq: “Unë e kam thënë se do të vazhdoj punën, deri në një moment kur presidenti shpresoj të zgjidhë problemet financiare, pasi në këtë drejtim është ai më i rëndësishmi. Do të shikojmë situatën në vazhdim. Mund të them se zgjidhja e problemeve është punë ditësh”. Po a ka pasur ndonjë afat të vënë nga futbollistët, gjatë bisedës me teknikun? “Ata mund të flasin me ju – ka sqaruar Duro -, por me mua kanë pasur gjithmonë një marrëdhënie profesionale. Gjatë takimit fola vetëm unë, duke i sqaruar situatën. Futbollistët janë pjesë teknike e skuadrës dhe sigurisht unë kam për të thënë fjalët më të mira për ata. Gjatë drejtimit tim prej tre muajsh kanë qenë korrektë në të gjithë aspektet, me gjithë problemet e hasura. Sidoqoftë, e theksoj se është periudhë merkatoje dhe secili futbollist ka të drejtë të bëjë zgjedhjen e vet”.

Besart Berisha, drejt rikthimit tek danezët e AC Horsens

Besart Berisha është drejt rikthimit te skuadra daneze e AC Horsens, ku ka luajtur 31 ndeshje në sezonin 2005-2006 dhe ka shënuar 11 gola. Ky është edhe sezoni më i mirë i sulmuesit të Kombëtares shqiptare gjatë karrierës së tij. Edhe në atë periudhë ai luante si i huazuar, pasi kartonin e tij e zotëronte Hamburgu. Biondi i përfaqësueses kuqezi e ka nuhatur se e ka shumë të vështirë të gjejë hapësira te skuadra angleze e Barnleit, pasi ekipi ka ecur mjaft mirë, ndaj ka vendosur që të shikojë për ndonjë skuadër tjetër. 23-vjeçari e ka pasur të vështirë të përshtatet në skuadrën angleze. Pas transferimit te Bërnlei një vit e gjysmë më parë, pësoi një dëmtim që e mbajti jashtë fushave gjatë gjithë sezonit, por edhe kur u kthye në verën e kaluar, u detyrua të shkonte si u huazuar te Rozenborgu, ku qëndroi deri në nëntor dhe shënoi 3 gola. AC Horsens mund të jetë një mundësi e mirë për sulmuesin, që të kthehet në nivelet e mëparshme dhe sipas medieve angleze, transferimi i tij në skuadrën daneze pritet të bëhet gjatë këtyre ditëve.

Fati i Xhafës zgjidhet të shtunën

Do të jetë apo jo sulmuesi Daniel Xhafa pjesë e Tiranës për pjesën e mbetur të sezonit, mbetet të saktësohet ditën e shtunë, kur nga klubi iranian të vijë një përgjigje zyrtare për të. Vlonjati ka qenë në provë te një klub i vendit islamik dhe sipas zërave të parë, ka lënë një shije të mirë. Megjithatë, burime pranë klubit bëjnë të ditur se të shtunën do të bëhet një zgjidhje përfundimtare e këtij problemi, pra ku do të mësohet nëse Xhafaj do të lihet i lirë për të kaluar në Iran, apo do të vazhdojë të luajë për Tiranën deri në qershor. Në të vërtetë, 31-vjeçari ka pasur disa oferta nga klube të huaja dhe kjo ka qenë në vazhdimësi, por për të mësuar “fatin” e tij pritet e shtuna, ku nga klubi iranian është premtuar të sillet një përgjigje. Gjasat deri tani janë të mira dhe Xhafaj mund të bëhet shqiptari i parë që luan në kampionatin iranian. Përflitet se oferta ndaj tij kap shifrën e 300 mijë dollarëve, një vlerë mjaft e lartë për kushtet e futbollit të këtij vendi. Nëse do të bëhet realitet, atëherë Tirana do ta lerë të lirë sulmuesin, që në pjesën e parë të sezonit ka shënuar katër gola.

Lipi: Juve? Kurrë mos thuaj kurrë

“Nëse do rikthehesha tek Juventusi? Kam qëndruar në atë skuadër për dhjetë vjet. Kur punohet kaq gjatë në një ambient, respekti e harmonia ndërmjet lojtarëve dhe klubit do të ekzistojnë gjithmonë, kështu që si mund të përjashtosh një mundësi të tillë?”. Ky është mendimi i Marçelo Lipit, trajnerit të përfaqësueses së Italisë, në një intervistë të dhënë për mediat italiane. Një tjetër temë e prekur nga tekniku është Zhoze Murinjo, kolegu i tij portugez që drejton Interin: “Kam një simpati të madhe për të. Përveçse një trajner i përgatitur, është edhe komunikues i jashtëzakonshëm. Mjafton të mendosh që flet plot pesë gjuhë të huaja, për të kuptuar pasionin që ai ndjen ndaj këtij sporti, duke theksuar këtu edhe personalitetin e hekurt”.

Morati, ëndërron edhe Kasanon
Kasano, Baloteli, Adriano: këta janë tre emrat më të diskutueshëm, përsa i përket merkatos së Interit. Masimo Morati, presidenti i klubit zikaltër, ka shprehur mendimin e tij për lëvizjet e mundshme që priten të ndodhin gjatë merkatos dimërore. Talenti i Sampdorias është shënjestra e radhës së skuadrës zikaltër, por koha e transferimit të tij në Milano nuk është përcaktuar ende. Konfirmimi për këtë fakt vjen nga vetë Morati: “Është një lojtar shumë i mirë, por më duhet ta pranoj se bëhet fjalë për një pistë mjaft të vështirë. Unë dhe Murinjo jemi tepër të kënaqur nga ajo që po jep Interi në këto momente dhe nuk kemi vendosur ende përfundimisht se çfarë do të bëjmë”.

Hënes: Milani, si pasarelë Hollivudi
“Transferta e Milanit në Dubai dukej si një set, ku po xhirohej një film i Hollivudit”. Në mënyrë krejt të papritur, drejtori i përgjithshëm i Bajernit të Mynihut, Uli Hënes, ka lëshuar kunja për kuqezinjtë italianë, me të cilët klubi gjerman ka ndarë një pjesë të grumbullimit dimëror në Emiratet e Bashkuara Arabe. Si motiv për ta bërë të shpërthejë ironinë e drejtuesit gjerman ka shërbyer zgjedhja për të afruar për disa muaj Devid Bekhamin, ish-yllin e Mançester Junajtid dhe Real Madridit, i cili ka ardhur në formë huazimi nga Los Anxheles Galaksi. Kështu, Hënes ka përfituar nga rasti, për të bërë një krahasim midis periudhës së kaluar nga dy skuadrat në grumbullimin e Dubait.

Reali me 527 mln euro borxhe
Futbolli spanjoll duket se është përfshirë me të vërtetë në një krizë financiare. Edhe pse klubet në dukje gëzojnë një formë të mirë profesionale, duke qenë se janë gjithnjë në kërkim të suksesit në kompeticionet më të rëndësishme, në fakt situata nuk është edhe aq pozitive. Një studim i bërë nga disa specialistë të Universitetit të Barcelonës kanë publikuar listën e vërtetë të borxheve që kanë klubet e vendit iberik. Shifra është me të vërtetë astronomike dhe kap kuotën e plot 3 miliardë eurove. Nga kjo shumë, 1 miliard e 332.1 milionë janë vetëm për shkak të blerjeve që kanë bërë skuadrat gjatë merkatos. Klubet që kanë shpenzuar në merkato janë të shumta, e duke qenë se kanë dështuar në realizimin e objektivave, kjo ka sjellë probleme në financa.

Sheiku i Sitit rrëzon Abramoviç
Roman Abramoviç është i detyruar të lëshojë “skeptrin” e njeriut më të pasur të futbollit anglez. Revista “FourFourTwo” ka publikuar listën dhe pronari i Mançester Sitit, sheiku Mansour bin Zayed Al Nahyan, ka arritur të dalë mbi kreun e Çelsit. Faktikisht, Lakshmi Mital, i cili zotëron 20% të aksioneve të skuadrës së Çampionship, QPR, renditet i dyti, përpara pronarit të bluve. Supremacia e Sitit ende nuk është dukur në fushën e futbollit, megjithatë sheiku duket se shpreson të sigurojë disa përforcime gjatë merkatos së këtij muaji, teksa deri tani ka blerë Uejn Brixh, pikërisht nga Çelsi. Sipas renditjes së publikuar, Abramoviç ka humbur rreth 3 miliardë sterlina nga kriza financiare që ka përfshirë merkaton botërore.

Kapiten Altin Lala do të mungojë ndaj Maltës

Ndeshja në transfertë kundër Maltës më 11 shkurt e vlefshme për eliminatoret e Botërorit 2010, është shumë e rëndësishme për Shqipërinë. Kjo jo vetëm për faktin që kuqezinjtë kanë shanse të kualifikohen, por edhe për shkak se Malta cilësohet në grupin 1 si kundërshtari më i lehtë për t’u mundur, të paktën në letër. Në këtë sfidë mund të mungojë kapiteni Altin Lala, i cili pas operacionit në shpinë për shkak të një hernie diskale, ka gjasa të mos jetë i gatshëm. Ai ka filluar të stërvitet, por për shkak edhe të disa problemeve gripale dhe gjithashtu për shkak të një infeksioni të lehtë në stomak, përgatitjet fizike nuk kanë ecur me ritmin e duhur. Sipas uebsajtit “sueddeutsche.de”, Lala mund të jetë gati për të zbritur në fushat e lojës vetëm pas një muaji e gjysmë. Kjo do të thotë, se pavarësisht dëshirës së mirë të kapitenit, ka shumë mundësi që ai të mos jetë në gjendje të luajë kundër Maltës. Megjithatë, ka ende shpresa se shtatshkurtri shqiptar mund t’i thyejë parashikimet dhe të jetë në dispozicion të teknikut në ndeshjen e 11-shkurtit. Gjendja e kuqezinjve nuk është aspak shpresëdhënëse para kësaj sfide. Beqaj vazhdon të jetë i dëmtuar, ndërsa sulmuesit, Bogdani, Salihi, Kapllani e Berisha e mbyllën sezonin me një bilanc tejet negativ golash.
Fushatë kundër racizmit
Mesfushori shqiptar i është bashkuar fushatës “Hannover Open” që po organizohet nga bashkia e qytetit Hanover për të zhdukur diskriminimin ndaj të huajve, përcjell “Hannoverische Allgemeine Zeitung” të enjten. Fushata do të zgjasë katër javë, ndërsa do të përqendrohet më shumë në diskoteka dhe në klube të ndryshme, ku mblidhet rinia. “Ne nuk kemi marrë përshtypjen se gjërat po përmirësohen. Në muajt e kaluar shumë persona kanë ardhur dhe janë ankuar se nuk janë lejuar të futen nëpër diskoteka për shkak të ngjyrës së lëkurës. Ky është turp për Hanoverin”, ka thënë kryebashkiaku i qytetit të Hanoverit, Stephan Veil. Lala është një nga shumë të huajt që luajnë për këtë skuadër të elitës gjermane. Ndryshe nga qytetarët e rëndomtë, të huaj, Lala ka fituar reputacion të madh me skuadrën. Ai është pjesë e Hanoverit që nga vera e vitit 1998 kur kaloi nga Borusia Fulda si lojtar i lirë. Mesfushori 33 vjeç është njëri prej lojtarëve më të dashur të skuadrës, për katër vite ka qenë edhe kapiten i saj. Me Hanoverin ka kontratë deri në verë të këtij viti, mirëpo pritet ta rinovojë kontratën edhe për dy sezone, e më pas ta mbyllë karrierën si lojtar aktiv.

Besart Berisha, zyrtarisht tek AC Horsens

Besart Berisha është zyrtarisht futbollist i skuadrës së Ac Horsens. Sulmuesi i Kombëtares shqiptare është paraqitur dje në klubin danez, madje ka bërë edhe prezantimin me fanellën e kësaj skuadre. Berisha është shprehur i kënaqur për rikthimin e tij në këtë skuadër, pasi e njeh mjaft mirë ambientin, pasi është aktivizuar aty edhe në sezonin 2005-2006. “Këtu ndihem shumë mirë. Drejtuesit më kanë dhënë besim dhe unë shpresoj që të luaj sa më shumë dhe të ndihmoj skuadrën që të shkëputet nga vendi i fundit”, ka thënë 23-vjeçari kuqezi gjatë prezantimit të tij dje. Biondi i përfaqësueses kuqezi e kishte nuhatur se do ta kishte shumë të vështirë të gjente hapësira te skuadra angleze e Bërnleit, pasi ekipi ka ecur mjaft mirë, ndaj edhe ka vendosur që të transferohet në një skuadër tjetër. 23-vjeçari e ka pasur të vështirë të përshtatet në skuadrën angleze. Pas transferimit te Bërnlei një vit e gjysmë më parë, pësoi një dëmtim që e mbajti jashtë fushave gjatë gjithë sezonit, por edhe kur u kthye në verën e kaluar, u detyrua të shkonte si i huazuar te Rozenborgu, ku qëndroi deri në nëntor dhe shënoi 3 gola. AC Horsens mund të jetë një mundësi e mirë për sulmuesin, që të kthehet në nivelet e mëparshme dhe sipas mediave angleze transferimi i tij në skuadrën daneze pritet të bëhet gjatë këtyre ditëve. AC Horsens renditet në vendin e fundit (12) në kampionatin danez me 11 pikë të grumbulluara në 17 javë. Te skuadra daneze e AC Horsens, ku ka luajtur 31 ndeshje në sezonin 2005-2006 dhe ka shënuar 11 gola.

Ançeloti, trajneri i vitit 2008
Karlo Ançeloti është trajneri që ka grumbulluar më shumë pikë nga 1 janari deri më 31 dhjetor të vitit 2008, nën drejtimin e të njëjtës skuadër. Ai e ka mbyllur vitin në kuotën e 75 pikëve, që faktikisht do të ishin 79, nëse do llogariteshin ato tre ndeshje ndaj (Livornos, Atalantës dhe Rexhinës) që Milani duhet t’i luante gjatë vitit 2007, po të mos ishte i impenjuar në Kupën e Botës për klube. Si rrjedhojë duke qenë kalendari i vitit tjetër, ato 4 pikë nuk janë numëruar. Milani e ka mbyllur vitin me -9 pikë larg Interit si vjet, po ashtu edhe sivjet. Pra në të njëjtën periudhë të vitit 2007, Milani ka qenë 9 pikë prapa zikaltërve, të cilët atëherë drejtoheshin nga Roberto Mançini.

UEFA i thotë “jo” kërkesës së Realit
Reali i Madridit nuk ka marrë një përgjigje pozitive nga UEFA, përsa i përket kërkesës për të lejuar federimin e dy futbollistëve të tjerë, praktikisht një më shumë seç i lejohet. Ndërkohë që klubi spanjoll ka kërkuar nga UEFA tolerim për këtë çështje, pasi e kishte të nevojshme federimin e një futbollisti më shumë, për shkak të dëmtimeve të shumta, organi drejtues i futbollit ka bërë të ditur zyrtarisht se Reali i Madridit do t’i nënshtrohet rregullores dhe nuk ka përjashtime për asnjë klub. Pra, tashmë trajneri Huande Ramos duhet të përzgjedhë një midis dy blerjeve të fundit, mesfushorit Lasana Diarra dhe sulmuesit holandez Klas-Jan Huntelar.

Barça, 50 mln euro për Van Persi-Fabregas
Barcelona mund të jetë një nga skuadrat më në formë të momentit, e cila ka arritur të zhvillojë paraqitje të shkëlqyera këtë sezon. Gjithsesi, drejtuesit e klubit katalanas po mendojnë vetëm për të pasur një ekip sa më të fortë dhe janë gjithmonë në kërkim të elementëve cilësorë. Duket se këtë herë shënjestra e tyre është me të vërtetë e majme, pasi bëhet fjalë për një shifër prej 50 milionë eurosh. Sipas medias britanike dhe asaj spanjolle, Barcelona ka gati një ofertë të tillë për dyshen e Arsenalit, Cesk Fabregas dhe Robin van Persi. Të dy janë lojtarët më në formë të “topçinjve” dhe problemi i marrëveshjes qëndron pikërisht te trajneri Arsen Venger.