Informacione Sportive

Trajneri tregon për suedezët aventurën e tij në krye të kuqezinjve


Ari Han, holandezi i matur dhe fjalëpakë, duket se nuk lë t‘i shpëtojë asgjë nga ato që ai sheh e dëgjon. Pragndeshja me Suedinë e ka bërë atë protagonist në faqen e medias në vendin nordik www.aftonbladet.se, ku përveç aventurës së tij në krye të Shqipërisë, ka rrëfyer edhe paradokset e çuditshme shqiptare, që ka hasur gjatë periudhës që po drejton Kombëtaren kuqezi.

Hera e parë

Vizita e parë e Han në Shqipëri daton në vitin 1970, kur me Ajaksin është ndeshur me Tiranën (2-2 në vendin tonë dhe 2-0 në Holandë). Krahasimi me Shqipërinë që ka gjetur si trajneri, është i ndryshëm. "Atëherë nuk kishte asnjë makinë në rrugë. Dukej që edhe ushqim nuk kishte shumë - kujton trajneri aktual i shqiptarëve. - Nuk mund të merrnim vesh shumë, sepse ikëm menjëherë, por sot është shumë më ndryshe. Rrugët janë plot me makina, duket ushqimi italian, amerikan. Sidoqoftë, këto janë vende të veçanta, ku duhet bërë ndryshim, ndaj edhe unë po punoj këtu". Kjo e çudit pak, pasi nuk e shikon për herë të parë një gjë të tillë. "Unë kam punuar në vende si Irani, Kameruni dhe Kina dhe jam në gjendje të gjej ngjashmëri. Por unë i adhuroj këto raste të vështira".

Paradoksi

Ndryshimi është edhe motoja e tij në drejtimin e përfaqësues tonë. Ka besim tek eksperienca dhe mendon se do të mund të përmirësojë, por në tentativën e tij ka mbetur edhe i çuditur nga disa reagime të shqiptarëve. "Para ndeshjes me Lihtenshtejnin - rrëfen Han - para tri stërvitjeve me skuadrën, pashë se kishte gjëra që nuk shkonin mirë. Njerëzit erdhën dhe më thanë: ‘Ne duhet të gabojmë, ndryshe nuk jemi në Shqipëri‘. Unë duhet ta ndryshoj këtë mendim". Por një tjetër gjë të cilën e ka të vështirë ta kuptojë është konflikti i deri pak muajve më parë mes FSHF-së e shtetit shqiptar, i cili e pezulloi Kombëtaren për më shumë se dy muaj nga FIFA dhe UEFA.

Defekti

Duke treguar për momentet e punës së tij si trajner i kuqezinjve, Han thekson se i ka bërë përshtypje edhe një defekt, të cilin ai e konsideron si "të trashëguar" nga shqiptarët: pikërisht vështirësia e madhe për të luajtur në skuadër. "Këtu puna është njëlloj si kudo në Ballkan - shpjegon holandezi. - Ka potencial të madh dhe mund të gjesh lojtarë shumë të mirë, por janë me zakonin e vjetër. Ata duhet të mësojnë të mos luajnë individualisht, por në mënyrë kolektive". Ai pranon se, nëse do të bëhet një krahasim, Shqipëria është krejt e kundërta e Suedisë. Por Suedia është Suedi. Sado që të ketë probleme, mbetet e organizuar. Por ju (suedezët) keni 30 vjet që luani kështu, ndërsa këtu nuk mund të ndryshohet menjëherë".

Anti-Ibrahimoviç

Suedia nuk do të ketë disa lojtarë nga Evropiani si Allbek, Aleksanderson, Ljungberg e Vilhelmson. Ky i fundit merr edhe komplimentet e Hanit, por ai që e frikësin trajnerin e shqiptarëve është Zllatan Ibrahimoviç, ylli i Interit. "Atij iu prish ëndrra për në Evropian, ndaj do të jetë edhe më i rrezikshëm. Por shpresoj të mos ketë shumë fat. Nëse mbrojtja ia del ta ndalë dy herët e para, ndoshta ai kalon një ditë të keqe". Por sërish e di se plani i tij vështirë do ta ndalë Ibrën. "Ju nuk mund të përgatiteni kurrë siç duhet për të përballuar një si Ibrahimoviçi. Nëse ai do të jetë në 100 për qind, nuk do të dalin as dy mbrojtës për ta mbuluar".

Objektivi

I pyetur nga suedezët se a do të ishte i kënaqur me barazimin 1-1, Han ka dhënë një përgjigje krejt ndryshe nga ajo që dha pak ditë më parë për gazetarët shqiptarë. Madje ai ka tentuar edhe të bëjë llogaritë e kundërshtarit. "Barazimi do të ishte një rezultat i favorshëm për ne, por jo i pranueshëm për Suedinë. Ky është një grup i vështirë dhe ata besojnë se që të shkojnë në Afrikën e Jugut duhet të fitojnë në Shqipëri". Në vitin 1978 ka shënuar dy gola me goditje nga 35-40 metra në Kampionatin Botëror. Por ai zbulon se nuk i ushtron skuadrës goditjet nga distancat e largëta. "Jo, sot do të ishte shumë e rrezikshme". Suedezët janë interesuar edhe për të ardhmen e teknikut tonë, kur të jetë në moshë më të madhe, por Han nuk pëlqen të mendojë aq larg. "Më shumë më pëlqen të mendoj për ndeshjen më të afërt".