Informacione Sportive

Shtypi i huaj, elozhe Shqipërisë dhe Hanit


Shtypi ndërkombëtar e ka përcjellë me nota pozitive ecurinë e përfaqësueses së Shqipërisë në ndeshjet eliminatore të Grupit 1 të vlefshme për Botërorin 2010. "Shqipëria e Bogdanit likuidon pa probleme Maltën. Skuadra e drejtuar nga Ari Han fitoi 3-0 kundër Maltës dhe aktualisht kryeson Grupin 1, duke lënë pas Portugalinë e Suedinë", shkruante prestigjiozja italiane "La Gazzetta dello Sport". Media malteze e ka përjetuar me pikëllim të madh humbjen e thellë 3-0 me Shqipërinë në Tiranë. "Kapitullimi i Maltës përballë Portugalisë në ndeshjes hapesë të Grupit 1 kualifikues të shtunën, mund të ketë krijuar panik e frikë për një tjetër shkatërrim në ferrin e stadiumit "Qemal Stafa" mbrëmjen e kaluar (të mërkurën)", shkruan gazeta malteze "Times of Malta". Websajti goal.com i ka kushtuar një titull të fortë fitores së kuqezinjve.

“Tani u bindët se Shqipëria është e fortë”


Lars Lagerbak, trajneri i Suedisë, ka pohuar për mediat se skuadra e tij kishte hasur më pak vështirësi kundër Hungarisë se sa kundër Shqipërisë. "E nisëm keq garën për këtë kompeticion, por mendoj se kundër Hungarisë reflektuam si duhet. Me Shqipërinë e patëm shuam të vështirë, madje më tepër nga sa e kishim parashikuar. Ua kisha thënë lojtarëve se atje do ta kishim të vështirë të merrnim tre pikët, por në fakt ata arritën të na bllokonin dhe të mos na lejonin të dilnim në lojën tonë", ka thënë Lagerbak. "Ju e quajtët një disfatë barazimin në transfertë me Shqipërinë, por mos harroni se ky ekip kryeson grupin aktualisht dhe nuk ka pësuar asnjë gol, ndaj duhet të jemi më realistë, sepse skuadra të tilla mund të bëjnë surpriza ndonjëherë", ka thënë Lagerbak për "The Local Sweden".

Lipi: Fitoret e vuajtura, të stilit tim

Ndonëse në dy sfidat e para të këtyre eliminatoreve 'Italia e re' e Marçelo Lipi nuk dhuron ndonjë emocion të madh, e rëndësishme është që ajo fiton dhe avancon e sigurt drejt kupës së botës 2010. "Fitoret e vuajtura janë edhe ato më të bukurat, që sigurisht nuk i mungojnë repertorit tim si trajner. Gjithsesi, kemi arritur të marrim gjashtë pikë në dy ndeshjet e para, që bashkuar me numrin e madh të lojtarëve të dëmtuar gjatë kësaj jave, janë një arritje për t'u përgëzuar nga ana jonë. Tashmë, kemi kohë të rikuperojmë këta lojtarë dhe sigurisht dhe ju siguroj që pas një muaji, kur do të zhvillohen edhe sfidat e tjera të eliminatoreve, do të shihni Italinë e vërtetë".

Hicfeld: Humbja më e turpshme e karrierës

Për ish-trajnerin më të suksesshëm të Bundesligës, Otmar Hicfeld, humbja 2-1 me Kombëtaren zvicerane e pësuar të mërkurën në mbrëmje kundër Kombëtares modeste të Luksemburgut ka qenë më e hidhura në karrierën e tij të gjatë si trajner. "Ne jemi turpëruar në maksimum. Kjo ishte një nga humbjet më të shëmtuara të miat. Jam i mendimit se ishte një moment dobësie që nuk do të përsëritet më", është shprehur ish-trajneri i skuadrës së Bajernit të Mynihut, tashmë tekniku i përfaqësueses Zvicerane, Otmar Hicfeld. Për 59-vjeçarin Hicfeld, ky nuk ka qenë një start i mirë në eliminatoret e kampionatit botëror ku në dy ndeshje ka arritur të marrë vetëm një pikë.

Brazili e Argjentina barazojnë

Zhgënjejnë Brazili e Argjentina në sfidat eliminatore të Botërorit 2010. Përfaqësuesja verdhegjelbër ka barazuar në fushën e vet kundër Bolivisë modeste, gjë që ka sjellë kontestimin e Dungës. Kurse për latinët bardhekaltër nuk ka mjaftuar një gol i Kambiasos, pasi Peruja ka gjetur barazimin në minutat shtesë. Ndërkaq, në krye të grupit kualifikues për Amerikën e Jugut rrit avantazhin Paraguaji, fitimtar edhe kundrejt Venezuelës. Dunga ngushëllohet: "E rëndësishme është që gjendemi mes katër të parave të turneut".

Sipas së përditshmes franceze “La Provence”, dyshohet për evazion fiskal nga ana e futbollistit, i cili sipas medias franceze ka kryer lëvizje bankare në Monako, me qëllim që të evitojë taksat e larta që përcaktojnë ligjet franceze. Policia franceze ka dyshime në lidhje me derdhjen e një shume prej 480 mijë eurosh në një bankë të Monakos, nën emrin e një prej të afërmve të futbollistit. Mirëpo, megjithëse ky hetim ka nisur që në mars të vitit 2006, deri dje nuk ishte gjetur asnjë provë konkrete që të mund të vërtetonte se kapiteni aktual i Marsejës, apo menaxherët e tij, kanë shkelur ligjet franceze. Në gazetën “La Provence” thuhet se transferimi i parave në Monako është bërë nëpërmjet një shoqërie transferimesh me qendër në Liezh të Belgjikës. Mësohet se me këtë agjenci transferimesh ka pasur lidhje edhe menaxheri i disa futbollistëve, Zhan Pier Berne, për të cilin Prokuroria franceze ka kërkuar të merret në pyetje në lidhje me këtë gjë. Aktualisht Berne jeton në Belgjikë dhe organet e drejtësisë franceze iu kanë kërkuar homologëve belgë që të nisin një hetim për këtë çështje dhe gjithashtu të merret në pyetje menaxheri Berne. Me këtë po merret aktualisht gjykatësja Elizabet Levi, e cila shpreson ta zbardhë këtë çështje, që deri dje dukej e mbyllur. Sipas medias franceze, në rast se marrja në pyetje e menaxherit Berne nuk do të sjellë ndonjë fakt konkret, atëherë çështja do të mbyllet.
Drogba
Një tjetër transferim që po hetohet nga Prokuroria franceze dhe që përfshin sërish klubin e Marsejës, është transferimi i Didier Drogbasë në vitin 2004, nga Marseja te Çelsi, për shumën e 37 milionë eurove. Edhe në këtë rast dyshimet janë për evazion fiskal, sepse ende nuk është zbardhur rruga se si i ka tërhequr Marseja paratë e përfituara nga shitja e sulmuesit, prandaj mendohet se janë transferuar sërish nëpërmjet Montekarlos me qëllim që të evitohen taksat. Një tjetër çështje është edhe fakti që Marseja nuk ka deklaruar pagesën e 2.8 milionë eurove për tetë futbollistë të saj, për të drejtat e imazhit të tyre.

Tersi për Kapllanin, koncerti i Madonës shtyn ndeshjen e Karlsruhes



Më shumë se i mërzitur e bëri udhëtimin e kthimit të tij në Gjermani sulmuesi i Kombëtares shqiptare, Edmond Kapllani. Asnjë minutë në dy ndeshjet ndërkombëtare kundër Suedisë e Maltës, edhe pse kishte shënuar në miqësoren e fituar 2-0 kundër Lihteshtejnit. Por tersllëku i mosaktivizimit nuk iu nda as në Gjermani. “Do të luanim kundër Eintrahtit në Frankfurt për Bundesligën 1 në Gjermani, por ndeshja është shtyrë për shkak se fusha ishte dëmtuar nga koncerti që kishte zhvilluar aty Madona”, - tha sulmuesi i Karlsruhes, Edmond Kapllani në linjë telefonike nga Gjermania. Koncerti i yllit të muzikës Madona, zhvilluar ditën e martë në stadiumin e Frankfurtit, ka prishur barin e fushës dhe kjo ka bërë që ndeshja midis skuadrave të Frankfurtit dhe Karlsruhes, e cila do të luhej të premten në mbrëmje, të shtyhet. Mirëpo me këtë vendim të gjyqtarit të takimit nuk ka qenë tërësisht dakort trajneri i skuadrës së Karlsruhes, Edmund Beker. “Ky vendim është një budallallëk, pasi kjo ndeshje mund të pezullohej që ditën e enjte e jo vetëm pak orë përpara fillimit të saj”, ka kritikuar kreu i pankinës së Karlsruhes, Edmund Beker, këtë vendim të marrë nga gjyqtari i takimit, Torsten Kinhëfer. Me Eintrahtin e Frankfurtit luan talenti kosovar Faton Toski, i konsideruar si Mikael Balaku i ri.

Fabregas nuk shitet as për 135 mln

Trajneri i Arsenalit, Arsen Venger, ka vendosur t’i paralajmërojë të gjithë presidentët e klubeve të tjera në lidhje me yllin e tij, Cesk Fabregas: “Unë nuk do t’i shes lojtarët e mi, nëse nuk dua. Fabregas do qëndrojë me Arsenalin edhe nëse vjen një ofertë prej 135 milionë sterlinash. Nuk është e drejtë që kur një futbollist është nën kontratë, një klub tjetër i ofron atij një pagë marramendëse, duke prishur kështu ekuilibrin e ekipit. Këto mund të jenë taktika për të dobësuar kundërshtarin, por nuk janë aspak të ndershme”.

Skolari: Pata ofertë nga Mançester Siti

Trajneri i Çelsit, braziliani Luis Felipe Skolari, ka zbuluar prapaskenat e merkatos së verës. Pasi u largua nga pankina e Portugalisë, ai ka marrë mjaft oferta. Një nga të cilat e ka pohuar edhe vetë. Dhe bëhet fjalë për një ofertë ardhur nga klubi i Mançester Sitit, ku presidenti Shinavatra e kërkonte si zëvendësuesin e Eriksonit. “Është e vërtetë që pata një ofertë për të drejtuar Mançester Sitin gjatë verës, por unë nuk e pranova. Ishte oferta e Çelsit ajo që më joshi më shumë”, ka rrëfyer Skolari.

Klinsman: Në Këln, fitore për renditjen

Trajneri i kampionëve në fuqi të Gjermanisë, Jurgen Klinsman, e ka cilësuar ndeshjen e sotme të skuadrës së tij ndaj asaj të Këlnit si mjaft të rëndësishme. Përveç tri pikëve, që janë të domosdoshme për renditjen në Bundesligë, kjo përballje do të shërbejë edhe si një provë për ndeshjen e Ligës së Kampioneve kundër Steauas së Bukureshtit në mesjavë. “Ne do të shkojmë në Këln shumë të angazhuar dhe me vetëm një synim, për të marrë pikët e plota nga kjo ndeshje. Ne duhet të vazhdojmë po aty ku e lamë përpara dy javësh kundër Hertës së Berlinit”, tha Klinsman.

Mesi: Maradona? Të thotë ç’të dojë

Talenti argjentinas, Lionel Mesi, vetëm disa ditë më parë mori kritikat e para nga legjenda Diego Armando Maradona. Ky i fundit e cilësoi futbollistin e Barcelonës si egoist dhe një lojtar që luan veç për vete, duke mos pasuar e mos ndihmuar shokët e skuadrës. “Diego Armando Maradona mund të shprehet si të dojë. Ai mund të ketë shumë gjëra për të thënë dhe unë do e dëgjoj. Gjithsesi, të gjitha këto nuk kanë kurrfarë ndikimi tek unë. Unë jam i sigurt te loja ime dhe e di se çfarë bëj në fushë. Prandaj, do vazhdoj të luaj ashtu siç di”, u shpreh Mesi.

Dështimi, Milani “blof” edhe në Xhenoa

Vazhdon të dhurojë emocione të mëdha ky fillimsezoni i kampionatit italian. Ashtu si në javën e parë, edhe dje, kryefjala e Serisë A është dështimi i skuadrës së Milanit në shifrat 2-0 kundër Xhenoas së Gasperinit, e cila falë golave të Skulit e Militos gjen fitoren e parë për këtë sezon. Ndërkohë, në krye të klasifikimit konfirmohen formacionet e Lacios dhe Atalantës së Del Nerit me nga gjashtë pikë. Pavarësisht meritës së këtyre dy formacioneve në këto dy ndeshje të para, 0 pikët në tabelën e renditjes së Milanit janë sigurisht surpriza më “e bukur” e këtij fillimsezoni. Sigurisht që këto dy humbje kanë vënë në diskutim të ardhmen e Ançelotit, ku çdo ditë e më shumë po bëhet gjithmonë e më i fortë emri i Frenk Rajkard.

Shevçenko:Na mungon përqendrimi

“Është një moment i vështirë për ne, - është shprehur Shevçenko shumë i dëshpëruar pas humbjes me Xhenoan. - Ne jemi munduar shumë në këtë ndeshje dhe kemi dhënë më të mirën, por ka diçka që na pengon të çlirohemi. Me pak fjalë, na duhet një fitore. Duhet të fitojmë patjetër sfidën e ardhshme. Ndoshta duhet të përqendrohemi pak më tepër. Sulmi, mbrojtja dhe mesfusha po kalojnë një moment negativ. Duhet të punojmë pak më shumë, të reflektojmë dhe ta ndryshojmë këtë situatë. Asnjë nga ne nuk mendon se Ançeloti rrezikon; gjithmonë ka humbje e fitore, të cilat i kalojmë të gjithë bashkë. Tani është një moment i vështirë për të gjithë dhe sa më të bashkuar të jemi, aq më shpejt do ta kapërcejmë këtë situatë”, ka përfunduar sulmuesi ukrainas i Milanit.

Juventusit i mjafton një gol i Amaurit

Juventusi kërkonte të harronte sa më shpejt suksesin e munguar në ndeshjen e parë të Serisë A kundër Fioretinës, vetëm një minutë nga fundi i takimit, me një fitore në përballjen e dytë ndaj Udinezes, dhe ashtu ka ndodhur. “Zonja e Vjetër” ka marrë tri pikët e para për këtë sezon në sfidën e mbrëmjes së djeshme kundër Udinezes, në stadiumin “Olimpiko” të Torinos. Protagonisti kryesor i kësaj ndeshjeje, Amauri, i cili me një gol në minutën e 67-të e çon Juventusin në vendin e tretë të klasifikimit me katër pikë, së bashku me Interin, Napolin e Torinon. Bardhezinjtë zhvillojnë një sfidë bindëse përballë një Udinezeje shumë të rrezikshme në sulm, por gjithsesi djemtë e drejtuar nga Klaudio Ranieri janë shumë të përpiktë në mesfushë dhe në mbrojtje, duke mos i lënë shumë hapësira kundërshtarëve.

Haxhiaj e Sejdini, japin dorëheqje


Në fund të konferencës për shtyp, gjatë së cilës dha opinionin e tij për ndeshjen e përfunduar, trajneri fierak i Besës, Iljaz Haxhiaj, ka bërë të ditur dorëheqjen e tij të parevokueshme. Një vendim ky, që kurrsesi nuk ishte pritur. I pyetur në lidhje me arsyet e kësaj dorëheqjeje kaq të papritur, ai përgjigjet: “Kjo është dita ime e fundit tek Besa. Unë kam vendosur të jap dorëheqje të parevokueshme nga detyra e trajnerit. Arsyet janë personale dhe nuk dua që t’i bëj publike, por mund të them se Besa është një skuadër e ndërtuar për të fituar titullin kampion, veçse nuk është fati im që ta çoj atë ekip gjer atje. I uroj suksese Besës”. Menjëherë pas hapit fals në “Ruzhdi Bizhuta”, Faruk Sejdini nuk ka vonuar shumë për të bërë publike dorëheqjen nga kreu i stolit ballshiot. “Largohem nga drejtimi i ekipit të Bylisit, pasi kështu mendoj se i hap rrugën një tjetër drejtuesi që do të drejtojë ekipin e Ballshit në vazhdim. Unë mendoj se mungesa e pikëve në këto tri ndeshje të para bie mbi mua, pasi në çdo lloj situate të tillë, trajneri është i pari që mban përgjegjësinë”.

Milani, vjen për miqësore në Tiranë më datë 14 tetor


Skuadra e Milanit do të mbërrijë në Shqipëri më 14 tetor dhe do të luajë një ndeshje miqësore kundër Tiranës. Lajmin e kanë konfirmuar burime pranë zyrës për shtyp të Milanit dhe gjithashtu burime pranë kompanisë së karburanteve “Taçi Oil”. Drejtuesit e kësaj të fundit janë organizatorët e kësaj ndeshjeje dhe pas bisedimesh të gjata me krerët e klubit italian, kanë arritur një marrëveshje për të sjellë skuadrën kuqezi në Shqipëri. Skuadra e Milanit ka shumë fansa në Shqipëri dhe është folur prej kohësh se klubi me më shumë tituj në Botë mund të zbarkonte një ditë në Tiranë, por kjo nuk kishte ndodhur tani.
Yjet
Është e sigurt se në Tiranë do të vijë skuadra e parë e Milanit dhe të pranishëm do të jenë shumë nga yjet e kësaj skuadre. Mund të mungojnë disa nga lojtarët që aktivizohen me Kombëtaret e tyre, por gjithsesi do të ketë shumë futbollistë të njohur dhe një ndër ta pritet të jetë kapiteni legjendar i kuqezinjve, Paolo Maldini, i cili nuk luan më me përfaqësuesen italiane. Nuk përjashtohet gjithashtu mundësia që të jenë të pranishëm edhe yjet brazilianë si Kaka e Ronaldinjo, por prezenca e tyre ende nuk konfirmohet për shkak se përfaqësuesja e ‘seleçaos’ do të jetë e impenjuar në ndeshje eliminatore të Botërorit 2010 nga data 11 deri në 15 tetor. Megjithatë burime pranë kompanisë “Taçi Oil” që po merret me organizimin e kësaj ndeshjeje, bënë të ditur për “Panorama” se tashmë është nënshkruar një kontratë me klubin e Milanit dhe është 100 për qind e sigurt se ndeshja do të luhet më 14 tetor në stadiumin kombëtar “Qemal Stafa”. Burime pranë kompanisë “Taçi Oil” bënë të ditur se me shumë mundësi skuadra shqiptare që do të luajë kundër Milanit do të jetë Tirana, por kjo do të vendoset përfundimisht sot. Parimisht është arritur një akord me drejtuesit e bardhebluve, por sot pritet që të zyrtarizohet akordi mes tyre.
Galiani
I pranishëm në stadium ditën e ndeshjes që do të luhet në Tiranë do të jetë edhe zv/presidenti i Milanit, Adriano Galiani. Burime pranë “Taçi Oil” bënë të ditur se ka qenë vetë drejtuesi i lartë i klubit kuqezi, ai që ka kërkuar të ndjekë skuadrën në Shqipëri. Mësohet gjithashtu se përgatitjet për këtë ndeshje nga organizatorët e “Taçi Oil” do të fillojnë që sot. Ka qenë presidenti i kësaj kompanie, Rezart Taçi, ai që ka bindur presidentin e Milanit, Silvio Berluskoni që të mund të lejojë ekipin e tij të zhvillojë një ndeshje miqësore në Tiranë.

Cana sfidon Torresin: Luajmë për të fituar



Kapiteni i Marsejës, shqiptari Lorik Cana, ka paralajmëruar kundërshtarët e Liverpulit dhe ka motivuar shokët e tij para përballjes me skuadrën angleze. Në një intervistë për mediat franceze, asi ka thënë se Marseja mund të fitojë sot kundër skuadrës së Benitezit.
Do të përballeni sërish me Liverpulin. Do luani për të marrë hak për atë humbje 4-0?
Jo, aspak. Ne do të zbresim në fushë për të fituar dhe mund t’ia dalim mbanë. Do kemi përballë një kundërshtar shumë të fortë, por do të jemi kompaktë në lojën tonë dhe do të marrim një rezultat pozitiv.
Pse e keni këtë bindje? Çfarë ndryshimi ka ekipi me vitin e kaluar?
Jemi më të fortë. Kanë ardhur futbollistë mjaft cilësorë dhe tashmë ka dy lojtarë për çdo pozicion. Kjo na jep shansin për të pasur mundësinë e zgjedhjes së taktikave që do përdorim.
Liverpuli ka emra të mëdhenj të futbollit. Mendoni se do arrini t’i ndalni?
Është e vërtetë që ka futbollistë shumë të mirë dhe këtu mjafton të përmendësh Torres apo Xherrard, por e thashë dhe më parë që ne do luajmë kompakt. Jo vetëm ata, por edhe ne kemi futbollistë mjaft cilësorë dhe nëse luajmë të bashkuar, atëherë mund t’i bëjmë ballë çdo kundërshtari.

Rishfaqet Myrtaj, gol Peruxhias

Florian Myrtaj, ish-sulmuesi i Kombëtares shqiptare që aktivizohet te skuadra e Sorrentos në Serinë C1 B, ka shënuar të dielën kundër Peruxhias, duke ndëshkuar kështu ish-skuadrën e tij. Vlonjati ka shënuar golin e dytë në minutën e 31-të, duke vulosur fitoren 2-0 të Sorrentos. Sulmuesi vlonjat, Myrtaj, i cili është aktivizuar edhe me skuadra të njohura në Serinë B, është cilësuar si një nga më të mirët e ndeshjes.

Çudia, klubet pa rregullore

Federata Shqiptare e Futbollit ende nuk ua ka dhënë klubeve rregulloren e re të sezonit 2008-2009. Zyrtarë të këtij institucioni kanë pohuar vazhdimisht se brenda pak ditësh do t’u dorëzohet klubeve rregullorja e aktivitetit, e cila për hir të së vërtetës ka pësuar disa ndryshime të rëndësishme, por deri tani akoma nuk ka ndodhur kjo gjë. Vetë drejtuesit e klubeve pohojnë se mosshpërndarja e rregullores së aktivitetit futbollistik është një fakt i paprecedent, sepse tashmë janë luajtur tri javë të kampionatit.

Shulku mbron Pezën: Gjykoi mirë

Evis Peza është ndoshta emri më i urryer për të gjithë tifozët dhe drejtuesit e Partizanit, për shkak se gjykimi që ai bëri në derbin kundër Tiranës (2-1). Mirëpo, shefi i sektorit të garave në FSHF, Ilir Shulku, është kundër këtij vlerësimi. “Unë e kam parë ndeshjen dhe pa dashur t’i dal në mbrojtje gjyqtarit, them se ai bëri një gjykim të mirë dhe nuk mendoj se u tregua i njëanshëm. Kjo puna e gjyqtarëve është bërë e modës tashmë dhe, me apo pa të drejtë, të gjithë iu vërsulen atyre”.

U-17/ Shorti kuqezi i Euro 2009

Është hedhur dje shorti për eliminatoret e kampionatit Evropian për Kombëtaret U-17. Shqipëria ndodhet në grupin 10 bashkë me Finlandën, Bjellorusinë dhe Maqedoninë. Turi i parë eliminator do të luhet në Portugali gjatë datave 23 dhe 28 shtator. Janë gjithsej 52 skuadra që do të luftojnë për të shkuar në finalet e këtij evropiani që do të zhvillohen në Gjermani nga 16 deri më 18 maj. Ndërkohë dje FSHF ka komunikuar se trajneri i përfaqësueses U-17, Shpëtim Duro, është pezulluar nga detyra me një vendim të drejtuesve të federatës.

Tre shqiptarë në Champions

Tre janë futbollistët shqiptarë që do të marrin pjesë në Ligën e Kampioneve këtë sezon me klubet e tyre. Ata janë Lorik Cana (Marsejë), Arjan Beqaj (Anorthosis) dhe Jurgen Gjasula (Bazel). Ata pritet të zbresin që të tre sot në fushë. Skuadra e Canës do të luajë kundër Liverpulit, Anorthosisi i Beqajt kundër Verder Bremenit, ndërsa Bazeli i Gjasulës do të luajë me Shahtjor Donjeckun.

Murinjo: Portugalia zor të fitojë me Shqipërinë


Debutimi në Champions me zikaltërit e Interit e solli Murinjon përballë Panathinaiokosit

Ashtu si gjithnjë i pasionuar pas uniformës sportive që tregon punën e tij të palodhur stërvitore, Murinjo bëri pak relaks në një nga lokalet e stadiumit “Olimpik” të Athinës. I ulur në një nga tavolinat qendrore, tekniku portugez, me një lëng frutash portokall para, pranon të japë një intervistë për gazetën “Panorama”. Personeli i shërbimit ishin të gjithë në gatishmëri të tij, por Murinjo preferon që lëngu të ishte nga gazetari shqiptar i “Panoramës” për ta ruajtur si kujtim faktin se shqiptari i parë të cilin takoi e qerasi.
Ardhja juaj tek Interi ka sjellë një entuziazëm të madh te interistët shqiptarë. Madje jeni një idhull për ta dhe të gjithë shqiptarët që bëjnë tifo për Interin...
Më gëzon fakti që kam fansa dhe tifozë edhe në Shqipëri. Zakonisht tifozllëku është për lojtarët sepse janë të paktë trajnerët që pëlqehen për faktin se në karrierën e tyre i lidh dhe dështimi. Por me sa duket qenkam një trajner i mirë dhe shqiptarët dinë kë pëlqejnë, pra në rastin konkret kanë zgjedhur trajnerët që duan vetëm suksesin. Sjella e tifozëve karshi meje më nxit akoma më shumë dhe dua qe t’ju sjell vetëm suksese me punën time tek Interi, që ti mbaj akoma me entuziazmin e fillimit të një trajneri që u sjell vetëm gëzim dhe fitore tek ekipi i tyre i zemrës.
Siç dihet pas një muaji Shqipëria do të ndeshet me Portugalinë. Cili është mendimi juaj për këtë ndeshje?
Jam thuajse totalisht i shkëputur nga ndeshjet e kombëtares, por nuk do të thotë se jam shkëputur nga emocionet që sjellin këto ndeshje në prag të Botërorit 2010. Për sa i përket Shqipërisë, mund të them vetëm se kjo skuadër ka një rritje të ndjeshme në nivel loje, por edhe në rezultate dhe në mos gabohem kryesojnë edhe renditjen në grupin 1 të eliminatoreve të Botërorit. Duhet theksuar se ky është vetëm fillimi dhe është herët të bëhen parashikime se kush do të kualifikohet, por çdo ndeshje duhet vlerësuar. Prandaj dhe portugezët duhet ta vlerësojnë shumë Shqipërinë në ndeshjen e radhës. Unë di që ekipi shqiptar ka lojtarë që luajnë në ekipe të rëndësishme të Evropës dhe luajnë një futboll agresiv, madje kanë treguar se në fushën e tyre janë të papërmbajtshëm dhe synojmë rezultatin që ju duhet. Sidoqoftë, në ndeshjen e radhës presim një ndeshje shumë të bukur dhe të fuqishme sepse portugezet vijnë me një psikologji të rënduar pas një humbje që pësuan nga Danimarka dhe do t’u duhet patjetër rezultat pozitiv, ose më saktë duhet të fitojnë patjetër. Por dhe shqiptarët vijnë si kryesues te grupit dhe do të luajnë pa ankth. Vetëm për të bërë një paraqitje dinjitoze dhe kjo mund të jetë një vështirësi më shumë për Portugalinë, sepse kur një ekip luan pa frikë dhe pa tension është për t’u pasur shumë kujdes. Në shumë raste kjo i ka bërë ekipe të tilla që të marrin rezultatin që ata kërkojnë.
A njihni ndonjë futbollist shqiptar?
Di vetëm se janë lojtarë të rëndësishëm në kubet ku luajnë dhe mos gabohem Shqipëria ka një lojtar edhe në kampionatin italian... (mendohet për emrin).... Megjithatë emrin e lojtarit të vetëm shqiptar që më kujtohet tani, është ai i futbollistit të Marsejës, Cana i cili me sa di unë është një futbollist lider në ekipin ku luan dhe paraqitja e tij është shumë e kënaqshme. Për të tjerët nuk kam shumë njohuri.

Cana, gol Liverpulit në Champions, por Marseja humbet ndeshjen 2-1


Lorik Cana e ka mbajtur fjalën pasi i ka shënuar gol Liverpulit në ndeshjen e djeshme e cila përfundoi me rezultatin...Kapiteni i Marsejës kishte sfiduar yjet e skuadrës angleze duke thënë se nuk ua kishte frikën, madje do të jepte gjithçka për ta fituar këtë ndeshje dhe vërtet dje ka bërë më të mirën, ndonëse skuadra e tij nuk arriti të merrte një rezultat pozitiv. Ishte ylli i përfaqësueses shqiptare, ai që zhbllokoi rezultatin e ndeshjes në minutën e 23-të, teksa pas një pasimi të saktë të M’Bamisë ka mposhtur portierin Reina dhe me një gjuajtje potente ka kaluar Marsejën në avantazh. Megjithatë epërsia e skuadrës franceze nuk zgjati shumë sepse ka qenë kapiteni i skuadrës së Liverpulit, Stiven Xherrard ai që ka shënuar dy gola në minutat 26’ dhe 32’ (pen), ai që ka përmbysur gjithçka. Ka qenë një duel mes kapitenëve të dy skuadrave mbrëmja e djeshme, por në fund ka fituar Liverpuli, i mbushur me yje. Lorik Cana ka zhvilluar dje një nga ndeshjet e tij më të mira, por kjo nuk e ka ndihmuar Marsejën që të merrte një rezultat pozitiv në këtë përballje. 25-vjeçari shqiptar tregoi edhe dje se është në formë të shkëlqyer dhe se është një ndër lojtarët kyç të skuadrës së Marsejës. Ky ishte goli i parë për të në Ligën e Kampioneve. Ndërkaq, portieri i Kombëtares shqiptare, Arjan Beqaj shndërrohet në një hero edhe në Gjermani, teksa i mbyll portën Verder Bremenit në takimin e mbyllur 0-0. Një sukses i madh i skuadrës qipriote të Anorthosis Famagusta në aventurën e parë në Ligën e Kampioneve.

Ronaldo-Siti, anglezët përgënjeshtrojnë


Ngrijnë bisedimet

Nga Brazili, ku po stërvitet me Flamengon, Ronaldo ëndërron pikërisht të ardhmen e tij. “Mançester Siti po shndërrohet në një realitet të rëndësishëm. Premier Liga më tërheq dhe me Robinjon do të formoja një dyshe sulmi që siguron 50 gola në sezon. Oferta e Sitit është më e mira që kam.” Por nuk ka munguar replika e klubit anglez që, përmes një komunikate zyrtare, e kanë ngrirë “Fenomenin”: “Në të shkuarën kemi folur me Ronaldon, por sot nuk na intereson më”. Lista e pasur e shpenzimeve të pronarit të ri të Sitit, sheikut Sulejman Al Fahim, në të vërtetë është mbushur me emra të rinj dhe me objektiva më të përshtatshme. Pasi ia kanë marrë Realit të Madridit (duke mundur konkurrencën e Çelsit të Abramoviçit) Robinjon, menaxherët e sheikut të artë vazhdojnë të afrojnë miliona dollarë për futbollistë të kalibrit të Fernando Torresit, Çeks Fabregasit dhe Kristiano Ronaldos, duke shpresuar t’i bëjnë të nënshkruajnë për klubin e dytë të Mançesterit.