Ngjarjet me te fundit nga fusha e aktualitetit

I sëmuri mendor në burg për kultivim droge

Historia e Feride Bakos është vetëm një por shumë gra e burra të moshuar vuajnë dënime në burgjet shqiptare për një krim që ndoshta nuk e kanë kryer. Disa kohë më parë “Shekulli” ju tregoi për një fshat në Vlorë ku banorët e vetëm ishin disa të moshuar.

Të gjithë ishin të kërkuar për kultivim bimësh narkotike dhe të gjithë ishin mbi 80 vjeç. Këtë herë do t’ju tregojmë për rastin e një personi të dënuar nga gjykata e Vlorës për kultivim bimësh narkotike. Ai quhet Shefqet Musaraj dhe është shpallur nga mjekët si i sëmurë mendor.
Historia e tij ka nisur në fund të vitit 2006 kur është dënuar me tre vjet burgim nga Gjykata e Vlorës. Edhe pse avokatët kanë treguar se ai vuan nga çrregullimet mendore, gjykata ka vendosur ta lërë në qeli. Çështja ka arritur në Apel por sërish gjykata e ka dënuar Musarajin me tre vjet burgim. Vendimi i dytë është dhënë në korrik të këtij viti por ai shoqërohet edhe me procesverbalin e mjekëve që tregojnë gjendjen e tij.

Në një prej pasazheve të procesverbalit shkruhet: Shefqet Musaraj njihet si i sëmurë mendor që vuan nga çrregullimi afektiv bipolar maniak-depresiv. Shqetësimet e para mendore i ka manifestuar në vitin 1973, kur edhe shtrohet në spital. Deri në vitin 1995 shtrohet nëntë herë duke pasur përsëritje të psikozës”.

Moti i keq “pushton” Korçën dhe Gjirokastrën




Moti i keq i shoqëruar me temperatura të ulëta vazhdon të mbajë mbërthyer prej më shumë se 48 orësh rajonin juglindor të vendit. Rrugë të bllokuara nga dëbora, temperatura të ulëta -4 gradë celsius si dhe probleme në qarkullimin e mjeteve kanë qenë gjithçka ka ndodhur gjatë të shtunës në qarkun e Korçës.

Sipas të dhënave zyrtare të Shtabit të Emergjencave Civile pranë institucionit të prefektit gjatë kësaj dite e gjithë puna është përqendruar në segmentin Korçë-Kolonjë në Qafën e Qarrit, në segmentin tjetër nacional Korçë-Kapshticë si dhe në atë Korçë-Pogradec që është dhe më problematiku njëherësh, për shkak se kjo rrugë prej më shumë se një viti është në rikonstruksion.

Kështu situata mjaft serioze vazhdon të jetë prezente në aksin Korçë-Pogradec në Qafë-Plloçë, ku gati 10 kilometra të kësaj rruge janë tejet të rënduara, teksa trashësia e dëborës ka kaluar dhe 30 centimetrat. Kjo rrugë është e kalueshme vetëm me zinxhirë ashtu si dhe akset e lartpërmendura ku kalimi i të gjitha automjeteve këshillohet në mënyrë të pashmangshme me zinxhirë.

Por sipas autoriteteve zyrtare pranë prefekturës së Korçës edhe me zinxhirë në disa akse kalimi është bërë gati i pamundur si në Qafën e Qarrit në segmentin Korçë-Kolonjë, rrugë e cila ka qenë e bllokuar për disa orë gjatë paradites të së shtunës.

Ndërkaq segmenti Korçë-Kapshticë, më i qarkulluari i ditëve të fundit të këtij viti, është gjithashtu i rënduar nga reshjet e dëborës, ndërkohë që vështirësi të njëjtë kanë pasur dhe mbi pesë mijë emigrantë që kanë hyrë nëpërmjet pikës kufitare të Kapshticës në 24 orët e fundit. Ndërkaq situata pritet të rëndohet gjatë orëve të natës ku pritet të ketë sërish reshje dëbore të shumta.

Por ajo që është më shqetësuese lidhet me zonat e thella malore ku pesë fshatra në rrethin e Korçës prej afro 24 orësh rezultojnë të bllokuara nga dëbora. Sipas informacioneve zyrtare fshatrat Dardhë, Arzë, Nikolicë, Sinicë dhe Qytezë janë të izoluara totalisht nga reshjet e dëborës të cilat kanë kaluar trashësinë prej 40 centimetrash.
Një situatë e ngjashme është vënë re dje edhe në Gjirokastër. Reshje të dendura dëbore kanë përfshirë të gjithë qarkun. Bora e parë e këtij dimri, që ka vijuar përgjatë gjithë së shtunës ka sjellë probleme, veçanërisht në qarkullimin e automjeteve.

Kështu, në qytetin e Gjirokastrës vështirësitë më të mëdha kanë qenë në pjesën e sipërme e veçanërisht në rrugët me kalldrëm. Punonjës të ndërmarrjes komunale kanë punuar për largimin e borës, ndërsa efektivë të policisë bashkiake, kanë qenë në gatishmëri për të mos lejuar lëvizjen e automjeteve pa zinxhirë.

Më e rënduar situata ka qenë në dy komuna, përkatësisht në komunën Zagori në rrethin e Gjirokastrës dhe atë të Frashërit në rrethin e Përmetit ku trashësia e shtresës së dëborës ka shkuar në 20 centimetër dhe në akset që lidhin këto zona me pjesët e tjera lëvizja kryhet me mjaft vështirësi dhe vetëm me zinxhirë. Informacionet e marra pranë Drejtorisë Rajonale të Rrugëve Kombëtare bëjnë të ditur se të gjithë akset nacionale të qarkut janë të kalueshme.

Të vetmet probleme kanë qenë ato të krijuara në Qafën e Muzinës në rrugën Gjirokastër- Sarandë, ku është hedhur kripë dhe skorje dhe gjithashtu lëvizja e automjeteve është kryer vetëm me zinxhirë. Vështirësitë nga dëbora i kanë ndjerë edhe emigrantët shqiptarë që kthehen në atdhe për të festuar Vitin e Ri.

Aksi rrugor që lidh Pikën e Kalimit Kufitar të Kakavijës me qytetin e Janinës (Greqi) ka qenë mjaft i vështirë për t’u kaluar dhe për këtë arsye policia greke nuk ka lejuar asnjë emigrant të qarkullojë pa zinxhirë. Ndërkaq, nga ana e Drejtorisë së Policisë së Qarkut janë dyfishuar postblloqet në rrugë, për të shmangur ndonjë problem të mundshëm.

Vëllai i Arben Lazes merr përsipër drogën




Fatjon Laze ngre alibi për të vëllanë. Prokuroria: Presidenti i Elbasanit e Arben Prifti janë krerët e trafikut të heroinës

TIRANË- Vëllai i presidentit të Elbasanit, Arben Lazes, ka marrë përsipër gjithçka në lidhje me drogën e kapur pak ditë më parë. Fatjon Laze ka pohuar në gjykatë se ai ishte njeriu që kishte bërë trafikun e drogës dhe se i vëllai nuk kishte asnjë lidhje. Ndërsa dy kushërinjtë Arben Prifti e Shkëlqim Hyzmo kanë kërkuar lirimin e tyre me masën e sigurisë arrest shtëpie kundrejt garancisë pasurore. Por asnjë nga kërkesat e të arrestuarve nuk është pranuar dhe gjykata i ka lënë të katër nën masën e sigurisë arrest me burg pa afat.
Laze
Gjatë shqyrtimit të kësaj kërkese, të katër të arrestuarit dolën para togave të zeza duke dhënë pretendimet e alibinë e tyre në lidhje me dyshimet për trafikimin e një kg heroinë. I pari që doli para Gjykatës së Krimeve të Rënda për vlerësimin e arrestit dhe caktimin e masës së sigurisë ka qenë shtetasi Fatjon Laze, vëllai i presidentit të ekipit të Elbasanit Arben Laze. Gjatë fjalës së tij para gjyqtarit Hasneziri, 30- vjeçari Laze pranoi se droga ishte e tij dhe ia kishte dorëzuar kundrejt një shume të caktuar shtetasit Shkëlqim Hyzmo. Ai shtoi se vëllai i tij nuk ka të bëjë me këtë histori. “Droga është e imja. Atë e kam blerë unë dhe ia kam dorëzuar Shkëlqim Hyzmos. Pasi, ia kam blerë disa kohë më parë një makinë këtyre dhe nuk i kam shlyer paratë, i kam pasur 6 mijë euro borxh dhe për këtë mendova t’i jepja drogën. Vëllai im nuk ka lidhje në këtë histori dhe as këtë Arben Priftin nuk e njoh”- mësohet të këtë thënë Fatjon Laze në fjalën e tij, duke kërkuar masë sigurie 15- ditore kohë kjo që mjafton për ekspertimin e drogës së sekuestruar. Por prokuroria ka hedhur poshtë alibinë e ngritur nga Fatjon Laze, duke u shprehur se “nga hetimi tremujor na rezulton se dy organizatorët e këtij trafiku janë shtetasit Arben Laze dhe Arben Prifti”. Më pas gjyqtari ka shqyrtuar kërkesën e presidentit të ekipit të Elbasanit Laze, i cili ka pretenduar se nuk ka dijeni për çfarë akuzohet. “Nuk kam lidhje unë me këtë drogë që më akuzon prokuroria. Nuk e di me çfarë është marrë vëllai im, por unë nuk kam lidhje në këtë mes”,-është shprehur presidenti Laze duke kërkuar me ndihmën e avokatit edhe ky caktimin e masës së sigurisë “arrest me burg” me afat 15- ditor për ekspertimin e drogës.
Prifti
Seanca më pas ka vazhduar me dëgjimin e pretendimeve të dy kushërinjve Arben Prifti e Shkëlqim Hyzmo, ku ky i fundit gjatë fjalës së tij ka pranuar dhe pretenduar të njëjtin version që ka shprehur para gjykatës Fatjon Laze dhe ka pranuar se drogën e kishte porositur ai. Ndërsa vetë Prifti ka mohuar akuzat duke u shprehur se “të gjitha akuzat janë trillime, pasi unë nuk kam lidhje me këtë drogë”. Më pas fjalën e ka marrë avokati mbrojtës i të dy kushërinjve, i cili ka kërkuar nga gjykata që ndaj dy të arrestuarve Hyzmo dhe Prifti të caktojë masën e sigurisë “arrest shtëpie” kundrejt garancisë pasurore, duke mos përcaktuar shumën të cilën e la në vlerësim të gjykatës. Pas pretendimeve të palës mbrojtëse, ishin prokurorët të cilët shprehën pretendimet e tyre, duke kërkuar nga gjykata caktimin e masës së sigurisë “arrest me burg” për katër të arrestuarit, pasi sipas akuzës, ndaj tyre ka prova të pakontestueshme dhe ligjore që i implikojnë në organizimin e trafikut të drogës nga Maqedonia drejt Shqipërisë dhe më pas dy fierakët drejt Greqisë. Gjyqtari Hasneziri pasi dëgjoi palët u tërhoq për vendim, ku pas 45 minuta këshillim me ligjet në fuqi, vendosi që të katër të arrestuarit të qëndrojnë në qeli me masën e sigurisë “arrest me burg” deri në përfundim të hetimeve.

Gazi, Tirana në rrezik nga 14 "bomba"

Dhjetëra pika të shitjes së naftës, gazit të lëngshëm, si edhe nënprodukteve të këtyre lëndëve në Tiranë, paraqesin rrezik eventual për jetën e popullatës ku janë shpërndarë pika të tilla aktiviteti. Lajmi konfirmohet nga Inspektorati Qendror Teknik i Ministrisë së Ekonomisë, i cili ka kaluar në "sitë" të gjitha pikat e tregtimit dhe shitjes së këtyre lëndëve në Qarkun e Tiranës. Gjithë kontrolli, që ka përfunduar me evidentimin e pikave problematike dhe me marrjen e masave përkatëse ndaj tyre, e ka marrë fillesën nga një rekomandim i Avokatit të Popullit bërë më 10 nëntor të vitit 2008. Duke marrë shkas nga ngjarja e Gërdecit dhe për shmangien e ngjarjeve të tjera të ngjashme, institucioni i AP-së kërkoi nga të gjitha njësitë e qeverisjes vendore, informacion për identifikimin e të gjitha pikave të tilla dhe verifikimin e standardeve të kërkuara të sigurisë.
REKOMANDIMI
Të gjendur para një situate kur shumë aktivitete të tilla ndodheshin shumë afër banesave, ose në katet e para të pallateve, Avokati i Popullit i rekomandoi ministrisë përkatëse marrjen e masave të menjëhershme organizative për kontrollin e verifikimin e normave dhe kushteve teknike të përcaktuara në lejet dhe autorizimet përkatëse të sigurisë, të mbrojtjes nga zjarri dhe shpëtimit të jetës së njerëzve. Gjithashtu në rekomandim përmendej edhe marrja e masave të rrepta administrative ndaj kundravajtësve dhe në rastet kur formojnë vepër penale, denoncimin e tyre në organet e ndjekjes penale.
INSPEKTIMI
Në përgjigje të rekomandimit, Inspektorati Qendror Teknik i Ministrisë së Ekonomisë ka kontrolluar gjithë aktivitetin e tregtimit të naftës, gazit dhe nënprodukteve të tyre që kryhet në Tiranë, duke lënë për çdo rast aktkontrolli dhe aktndalesë për shkeljet me rrezikshmëri për jetën e njerëzve. Bëhet e ditur së është kërkuar ndjekje penale për 4 subjekte të tregtimit të bombolave të gazit në rrugën "Ali Demi", për shkak të moszbatim të detyrave dhe akteve të lëna nga IQT. Në Njësinë Bashkiake nr. 3 janë lënë nga ana e inspektoratit 5 aktndalesa. Gjithashtu edhe për 4 subjekte të shitjes së bombolave të gazit janë lënë aktndalesa për shkelje të rregullave teknike dhe të sigurisë. Në minibashkinë nr. 4 është ndërtimi i shtëpive pa leje shumë pranë një pike të rregullt të mbushjes së gazit, ajo që vë në rrezik jetën e tyre. Ndërsa mangësitë e pajisjeve me autorizim në disa pikave të shitjes është parë nga IQT si problem i Bashkisë së Tiranës. "Deri tani Bashkia e Tiranës nuk ka pajisur asnjë subjekt tregtimi të karburanteve dhe GLN-se me autorizim", thuhej në përgjigjen e IQT-së për Avokatin e Popullit.


Zonat problematike

Rr. A.Demi përballë shkollës "Kushtrimi i Lirisë"
Rr. A.Demi, mes pallateve nr.157 dhe 165.
Rr. A.Demi, përballë rajonit të policisë.
Rr. "Shemsi Haka"
Rr. Niko Avrami, pranë fushës së druve në Allias
Rr. Qemal Stafa , nr. 33 ( dyqan ushqimor )
Rr. Bardhyl, nr. 20/1 ( dyqan veglash )
Rr. 4 Dëshmorët ( dyqan bombolash )
Rr. 4 Dëshmorët ( dyqan ushqimor )
Rr. 4 Dëshmorët (Dyqan Bombolash)
Subjekt në Rr. M. Shyri.
Subjekt në Rr. M. Shyri.
Subjekt në Rr. N. Mjeda
Subjekt në Rr. Bab Rexha

Aksidentohet për vdekje gruaja, i gjendet në brez pistoleta

SHKODER - Mjekët e Spitalit të Shkodrës njoftuan mbrëmë policinë për një grua të aksidentuar, së cilës iu gjet në trup një pistoletë. Ngjarja ndodhi mbrëmë rreth orës 18:15 në Bushat, kur 58-vjeçarja, nga fshati Kosmaç i kësaj komune, Fatbardha Mustafa është përplasur nga një kamionçinë. Drejtuesi i mjetit ndaloi dhe pasi i dha ndihmën e parë të aksidentuarës e çoi në gjendje të rëndë në spital. Bluzat e bardha nxituan t'i jepnin ndihmën e shpejtë gruas, e cila ishte rëndë dhe kishte pak shpresa për jetën. Kur e aksidentuara është dërguar në sallën e urgjencës dhe po kontrollohej për dëmtimet e mundshme që kishte marrë, mjekët konstatuan se gruaja ishte e armatosur. Ajo kishte të fshehur në brez një armë, pistoletë. Pas këtij konstatimi, mjekët sinjalizuan policinë e cila sekuestroi armën. Por armatimi i gruas mbeti i dyshimtë, pasi policia nuk arriti ta marrë atë në pyetje. Gruaja gjeti vdekjen rreth 1 orë më vonë. Policia bëri të ditur se ka nisur hetimet në lidhje me motivin që e ka çuar gruan të qarkullonte e armatosur. Nga verifikimet paraprake rezultoi se familja e saj nuk ishte në hasmëri dhe nuk kishte konflikte të ditura. Sipas burimeve të policisë, dyshohet se viktima lëvizte e armatosur për shkak të mungesës së ndriçimit në këtë zonë, larg nga qendra e komunës. Ky ishte edhe një motiv që e pengoi drejtuesin e mjetit që të dallojë të aksidentuarën që lëvizte në këmbë. Policia bëri të ditur se po heton ngjarjen.

Oketa: Hetim shpërthimit në Poliçan

Dhe pse e ka cilësuar pakujdesi njerëzore shpërthimin në Poli-çan, ministri i Mbroj-tjes, Gazmend Oketa, pohoi dje se Prokuroria do të hedhë dritë mbi shkeljet e rregullave të sigurimit teknik. Ai ka mbërritur në ish-kombinatin ushtarak, një ditë pas ngjarjes që i mori jetën punëtores 45-vjeçare dhe plagosi dy të tjerë. Oketa ka hyrë në ambientet e kombinatit, duke parë nga afër vendin ku shpërtheu djegorja mëngjesin e së martës. Ndërsa pak kohë më parë kishte vizituar e shprehur ngushëllimet në familjen e viktimës Suzana Kapxhiu.

Oketa: Të zbatohet rregullorja
Në masa të rrepta sigurie të marra nga Policia Ushtarake dhe pa praninë e mediave, ministri i Mbrojtjes ka kryer një inspektim në këtë kombinat. Mësohet se ai i ka tërhequr vëmendjen drejtuesve të kombinatit që nuk kanë zbatuar rregullat e sigurimit teknik, duke lejuar ndezjen e një vatre zjarri në një zonë tejet të rrezikshme. Sipas specialistëve në këtë ambient, nuk duhet të lejohet as pirja e cigares e jo më të ndizet një zjarr, ashtu siç ndodhi duke provokuar humbjen e një jete. Burime jozyrtare nga brenda kombinatit pohojnë se ministri Oketa ka kërkuar nga drejtuesit e kombinatit që të dalin me një konkluzion përfundimtar në lidhje me ngjarjen e ndodhur. Sipas tyre, brenda kombinatit punojnë rreth 25 punëtorë, një pjesë e të cilëve nuk janë të specializuar për demontimin e predhave. Ministri Oketa është shprehur në takimin që ka pasur me drejtuesit e kombinatit, se kërkon një zbatim të rregullores ushtarake dhe një disiplinë të lartë pune, për qëllimin e vetëm, shmangien e incidenteve apo tragjedive. Në këtë kombinat pritet që të nisë çmontimi i të gjithë municioneve që janë mbledhur në vend. Por, ndonëse sipas Ministrisë së Mbrojtjes, ky proces do të niste më vonë, punëtorë të kombinatit konfirmojnë se asnjëherë këtu nuk është ndërprerë demontimi i djegoreve të predhave.

Akuzat e ish-përgjegjësit
Kryetari i Sindikatës së Pavarur të Punëtorëve të kësaj uzine, njëkohësisht ish-përgjegjës i sigurimit teknik, Fatos Mançe, ka pohuar për gazetën se në atë poligon është punuar rregullisht, pa asnjë ditë ndërprerjeje për çmontimin e djegoreve, edhe me 2 punëtorë të vetëm, gjë që nuk lejohet sipas rregullores. Sipas Mançes, në atë poligon me rrezikshmëri të lartë për jetën duhet të punonin të gjithë ata specialistë që kanë vite që merren me prodhimin, montimin dhe mbylljen e djegoreve. Ai ka hedhur akuza mbi drejtuesit e kombinatit, duke pohuar se ushtarët dhe administrata nuk komandohen nga Ministria e Mbrojtjes, por nga civilë. Në deklaratën e tij, ish-përgjegjësi në vitet 2003-2007 akuzon direkt drejtorin e Kombinatit, Myqerem Xhaferri.
“Më vjen shumë keq që drejtori i ujësjellësit gjatë kohës që shpërtheu epidemia e ujit në qytetin e Poliçanit vihet drejtor kombinati dhe përfundon me një vrasje tragjike në qytetin e Poliçanit”, tha dje Fatos Mançe. Një tjetër punëtor i vjetër i kësaj uzine ka pohuar se ngjarja e ndodhur nuk mund të kalohet pa nxjerrë përgjegjësit e saj, duke filluar nga drejtoria e deri tek përgjegjësit e sigurimit teknik. Ai është shprehur se janë flakur në rrugë të gjithë specialistët e vjetër të kësaj uzine, të cilët janë zëvendësuar me punonjës të paspecializuar.
Pas ngjarjes së rëndë në Poliçan, fjala e fundit i ka mbetur Prokurorisë, në lidhje me rrethanat në të cilat ndodhi shpërthimi dhe nëse ishin zbatuar apo jo rregullat e vendosura për kushtet teknike.


Guri: Të largohet drejtori
Një tjetër reagim publik pas ngjarjes në Poliçan erdhi dje nga Presidenti i Sindikatës së Pavarur të Mbrojtjes dhe Rendit të Shqipërisë, Vladimir Guri. Sipas Gurit, shkaku i tragjedisë së ndodhur është mungesa e sigurisë teknike, sepse në një uzinë ushtarake është e ndaluar rreptësisht të krijohet një vatër zjarri. “Duhet patjetër të zbardhen përgjegjësit e kësaj tragjedie”, deklaroi Guri. Sipas tij, drejtori i Kombinatit duhet të kishte dhënë dorëheqjen, ndërkohë që organi i drejtësisë të hetojë përgjegjësit e kësaj ngjarjeje tragjike. “Ne si sindikatë i jemi drejtuar me një shkresë zyrtare Ministrisë së Mbrojtjes, rreth 2 muaj më parë, ku kemi kërkuar largimin e drejtorit Myqerem Xhaferri, por kjo kërkesë nuk është marrë parasysh”, pohoi Guri.



Ngushëllime në familjen e viktimës, ministri Oketa premton mbështetje

POLIÇAN – Vizita e parë e ministrit të Mbrojtjes, Gazmend Oketa, paraditen e djeshme ishte në shtëpinë e viktimës së tragjedisë në Poliçan, Suzana Kapxhiu. Ajo ka lënë jetimë 2 fëmijë, pas vdekjes së të shoqit disa muaj më parë. Punonjësja e Kombinatit të Armëve mbeti e vdekur në vend nga shpërthimi i djegores së predhës, në momentin kur bashkë me kolegë të saj ndezi një zjarr për t’u ngrohur. I shoqëruar në këtë vizitë ngushëllimi, Oketa shoqërohej nga prefekti Beratit, Thoma Rumniçi dhe kryetari i Bashkisë së Poliçanit, Adriatik Zotka. Pasi u ka shprehur familjarëve të viktimës ngushëllimet për humbjen e njeriut të tyre, Oketa pohoi se kjo ngjarje ka shqetësuar institucionin e ministrisë dhe të qeverisë dhe do të ketë hetim për të zbardhur nëse ka pasur shkelje të rregullave të sigurimit teknik. Ministri ka premtuar mbështetje financiare për familjen e viktimës dhe të të plagosurve. Ditën e tragjedisë, Bashkia e Poliçanit vendosi akordimin e një fondi të posaçëm për familjen e Suzana Kapxhiut dhe Adriatik Hysenbelliut. Gjithashtu, bashkia ka mbuluar të gjithë shpenzimet mortore të familjes Kapxhiu.

Telefonatë kreut të ujësjellësit: Këtë javë do të të ekzekutojmë!

ELBASAN - Drejtori i Ujësjellësit të Elbasanit me origjinë maqedonase denoncon në polici, se persona ende të paidentifikuar e kanë kërcënuar se do ta vrasin. Sipas policisë, drejtori i kompanisë “Elber” shpk, Atila Gjyladin, ka deklaruar se e kishin kërcënuar nëpërmjet telefonit se këtë javë do ta ekzekutonin. I trembur nga ky fakt, Gjyladin i është drejtuar për ndihmë uniformave blu, ku bëri edhe kallëzimin. Drejtori i përgjithshëm i “Elber” pas telefonatës është marrë në pyetje nga ana e agjentëve të krimeve ndaj personit. Ai ka pohuar se rreth orës 12:30 të së hënës, nga një telefonatë me një numër privat, personi e kërcënonte atë se do ta vriste gjatë kësaj jave. Pas denoncimit të bërë në polici, mësohet se Gjyladin është larguar menjëherë drejt Ohrit, aty ku banon edhe familja e tij. Policia bëri të ditur se dyshohet se shkak i telefonatës kërcënuese mund të jetë detyra e drejtorit, të cilën ai e mban prej shtatë vitesh. Policia dhe Prokuroria po bashkëpunojnë edhe me kompaninë celulare, abonent i të cilit është denoncuesi, me qëllim identifikimin e telefonuesit dhe vendosjen e tij përpara drejtësisë. Gjyladin mësohet se ka mohuar të ketë pasur konflikte të mëparshme në qytetin e Elbasanit. Ai është emëruar në këtë detyrë që në kohën kur “Elber” shpk., e menaxhonte një kompani gjermane, e cila pas vendimit të Këshillit të Ministrave u largua nga Shqipëria. Ujësjellësi i Elbasanit vijon të jetë në varësi të ministrisë përkatëse pas refuzimit, që i bëri bashkia për ta marrë gjatë vitit 2008.

Gjykata e Lartë fal gjyqtarët e Delijorgjit

Gjykatësit e “Delijorgjit” rikthehen në detyrë. Plot dy muaj pas pushimit të tyre prej KLD-së, më 28 tetor të vitit të kaluar, Gjykata e Lartë vendosi dje të rrëzonte vendimin për shkarkimin e tyre duke i kthyer sërish në vendet e tyre të punës në Apelin Ushtarak. Vendimi i Kolegjeve të Bashkuara u shpall rreth orës 15:00 të pasdites së djeshme, ndërsa për tre orë me radhë, tre gjyqtarët, Shaqir Gradica, Ylli Minka dhe Naum Pejo, së bashku me avokatin e tyre mbrojtës Marash Ibraj, paraqitën para 16 togave të zeza të Gjykatës së Lartë, pretendimet e tyre për prishjen e vendimit të KLD-së që i pushoi nga detyra. Gradica, Minka dhe Pejo, gjykatës të Apelit Ushtarak, u gjetën të kishin kryer shkelje procedurale gjatë gjykimit si të komanduar, të çështjes së pafajësisë së Delijorgjit, më 27 dhjetor 2007 në Shkallën e Dytë, Durrës. Gjykata e Lartë shpalli dje vetëm dispozitivin e vendimit, ndërsa pritet që pas disa ditësh, t’iu vërë në dispozicion palëve vendimin e arsyetuar të zbardhur. Paraprakisht pohohet se gjykata argumentoi se nuk mund të nisej procedimi disiplinor ndaj gjykatësve pa u shqyrtuar vendimi “Delijorgji” nga Gjykata e Lartë. Të paktën në këtë rast, sipas gjykatës, duhej të pezullohej shkarkimi i tyre. Më tej mësohet se është argumentuar se nuk mund të paragjykoheshin dhe shkarkoheshin gjykatësit për një vendim që ende ndodhej në proces gjykimi, në Shkallën e Tretë. Avokati i tre gjyqtarëve, Marash Ibraj, i cili mori fjalën i pari, pohoi se para se të niste procedimi disiplinor ndaj tre klientëve të tij, çështja duhej gjykuar nga Gjykata e Lartë dhe jo nga KLD, e cila sipas tij nuk është kompetente të shqyrtojë të njëjtin procedim për një vendim të formës së prerë. Sipas avokatit, vendimi i KLD-së është zbardhur pas 61 ditësh, ndërsa në lidhje me çështjen “Delijorgji”, Ibraj tha se nuk kemi të bëjmë me dëm, por me një përllogaritje të gabuar të 7 doganierëve të Durrësit, të cilët u morën në përgjegjësi penale dhe në përfundim tre prej tyre u shpallën të pafajshëm. “Në asnjë rast gjyqtarët nuk kanë shkelur ligjin. KLD-ja ka gabuar kur gjykon mbi një vendim të formës së prerë. Vendimi i KLD-së është i padrejtë e i pa bazuar në ligj. Për tre gjyqtarët nuk ka asnjë ankesë nga individë apo subjekte që të ketë vënë në lëvizje inspektoratin e KLD, në këtë rast ata kanë shkelur ligjin dhe vendimet kushtetuese. KLD bën sofizma mbi dëmin ekonomik që ka shkaktuar dhënia e këtij vendimi. Motivi i shkarkimit të tyre nuk është as ligjore e as kushtetues. Secili prej tyre ka shumë vite punë si gjyqtar dhe asnjëri nuk ka marrë ndonjë vërejtje gjatë karrierës. Për këtë kërkojmë anulimin e vendimit për shkarkimin nga detyra të tyre”, përfundoi avokati. Gjykatësi Gradica tha se mendonte se vendimi për shkarkimin e tyre nuk ishte marrë për shkeljet ligjore por për motive të tjera politike. Sipas tij, nënkryetari i KLD-së ka ndikuar te anëtarët e tjerë për shkarkimin, pasi ai, para se ta propozonte këtë masë në mbledhje, e kishte deklaruar atë publikisht në media. Kurse gjykatësi Minka tha se në vendimin e KLD-së ka shumë pasaktësi. “Unë di që KLD mbron dhe jo ndëshkon gjyqtarët”, tha ai. Më tej gjykatësit pohuan se një prej tyre i kishte thënë njërit prej anëtarëve të KLD-së, gjatë mbledhjes së tetorit: “Po na vini në pozitë të vështirë me këto argumente që po jepni për motivet e shkarkimit. Po na çoni drejt paragjykimit të kësaj çështje”.


Pafajësia e dhjetorit ‘07 i hapi rrugë kontratës për “Gërdecin”

TIRANE – Pafajësia që Mihal Delijorgji mori më 27 dhjetor 2007 në Apelin e Durrësit, i hapi rrugën kontratës që shkaktoi katastrofën e Gërdecit. Vetëm 30 minuta pasi u deklarua i pafajshëm në Durrës, tashmë me dëshmi penaliteti të pastër, biznesmeni i arrestuar për tragjedinë e 15 marsit 2008, do të nënshkruante me kompaninë shtetërore MEICO, kontratën e demontimit të predhave të artilerisë në një fabrikë të sajuar në mjediset e ish-repartit ushtarak Gërdec. Shpërthimi i kësaj “fabrike” artizanale, shkaktoi vdekjen e 26 personave, plagosjen e rreth 300 të tjerëve si dhe shkatërrimin e fshatit Gërdec dhe banesave të fshatrave përreth. Aktualisht Delijorgji, së bashku me drejtorin e firmës së tij, Dritan Minxolli dhe kreun e MEICO Ylli Pinari, ndodhen të paraburgosur nën akuzën e “vrasjes masive”. Problemet e Delijorgjit me drejtësinë kishin nisur prej kohësh, pas denoncimeve të Doganës së Durrësit, por do të bëheshin serioze kur prokuroria e këtij qyteti e arrestoi atë në maj 2004. Pas pak ditësh në qeli, Apeli i dha atij lirinë në këmbim të një garancie pasurore prej një milionë USD, shifër kjo rekord në drejtësinë shqiptare. Më 28 dhjetor 2006, Gjykata e Durrësit e gjeti fajtor atë për kontrabandë, nëpërmjet 26 deklaratave doganore të viteve 1999-2000, duke bërë deklarim të rremë të hekurit të importuar për ndërtim, si hekur lëndë e parë për prodhim gozhde etj,. Për këtë ai u dënua me 8 milionë lekë të reja gjobë. Po kështu, për të njëjtën vepër penale, kontrabandë, të kryer në vitin 2004, duke bërë deklarim të rremë të hekurit të importuar për ndërtim, si hekur produkt kompensues skrapit të eksportuar nën regjimin e përpunimit pasiv, Delijorgji u dënua me tre milionë lekë të reja gjobë. Ndërsa nga bashkimi i dënimeve, atij iu vendos një gjobë 10 milionë lekë dhe shpenzimet gjyqësore. Po kështu gjykata pranoi padinë civile në kuadër të këtij procesi penal, duke detyruar shoqërinë e Delijorgjit, “Përparimi” për të dëmshpërblyer Doganën e Durrësit me 122.668.851 lekë. Po kjo gjykatë i dha pafajësi Delijorgjit për falsifikim të formularëve doganorë. Shqyrtimi i kërkesave të shumta penale dhe civile të Delijorgjit nga Apeli i Durrësit bëri që gjykatësit të kishin pengesa ligjore për gjykimin e tij, duke detyruar KLD-në që të komandonte në këtë institucion tre gjykatësit e Apelit Ushtarak; Shaqir Gradica, Ylli Minka dhe Naum Pejo. Këta, më 27 dhjetor 2007, vendosën t’i jepnin pafajësi Delijorgjit për akuzën penale, duke e pushuar atë, ndërsa duke vazhduar në këtë linjë argumentuan rrëzimin e padisë civile të Doganës kundër “Përparimit”. Në të dyja gjykatat, prokuroria kishte kërkuar dënimin e Mihal Delijorgjit, ndërsa tashmë çështja është dërguar në Gjykatën e Lartë, ku ndodhet në pritje të gjykimit.


KLD: Flasim pasi të zbardhet vendimi
TIRANE – “KLD nuk do të shprehet derisa të njihet me vendimin e zbardhur të Kolegjeve të Bashkuara, pasi ende nuk dihen shkaqet dhe arsyet”. Ky ishte pohimi i djeshëm i KLD-së, pas vendimit të Gjykatës së Lartë për kthimin në punë të tre gjykatësve, që i dhanë pafajësinë Delijorgjit. Në vendimin e shkarkimit të tyre, KLD-ja argumentoi se mbi bazën e një ankese të bërë publike nga mediat, inspektorati i KLD-së kontrolloi dosjen “Delijorgji” dhe pas evidentimit të shkeljeve, Ministri i Drejtësisë kërkoi procedimin disiplinor të gjykatësve, të cilët u shkarkuan më pas. Biznesmeni, tashmë i burgosur për Gërdecin, Mihal Delijorgji ishte marrë në përgjegjësi penale për “falsifikim të formularëve”, si dhe “kontrabandë”. Në procesin e gjykuar nga Gradica, Minka dhe Pejo, veç pafajësisë penale, për Delijorgjin është vendosur rrëzimi i padisë civile të Doganës Durrës kundër shoqërisë tregtare “Përparimi”, me objekt detyrimin për dëmshpërblimin e 122 milionë lekëve të reja. Pikërisht në këtë arsyetim është mbështetur KLD-ja, kur ka pohuar se është evidentuar shkelje të ligjit procedural penal nga gjyqtarët Gradica, Minka dhe Pejo, e në mënyrë të veçantë të nenit 68, paragrafi 2 të Kodit të Procedurës Penale. Sipas kësaj dispozite, kur ndaj të pandehurit vendoset pushimi i çështjes penale, padia civile në procesin penal lihet e pashqyrtuar. KLD argumentoi më tej se rrëzimi i padisë civile, në një proces penal, në përfundim të të cilit është vendosur pushimi i çështjes penale në ngarkim të të pandehurit, vjen në kundërshtim të hapur me ligjin dhe në të njëjtën kohë ka sjellë pasoja të rënda për shtetin shqiptar, duke i hequr mundësinë e pretendimit para një gjykate, të shpërblimit të dëmit të konsiderueshëm prej 122 milionë lekësh.

Kushërinjtë e Bollanos, akuza për terror në Athinë

Dy shqiptarë kanë marrë pjesë në grupet anarkiste, që shkaktuan atentatin ndaj policit në Athinë. At e bir nga Himara janë cilësuar nga mediat greke se janë të afërm të kryebashkiakut të këtij qyteti Vasil Bollano. Sipas burimeve të agjencive greke bëhet i ditur emri i Ari Bollanos, i cili bashkë me të atin u ndaluan pas hetimeve të kryera nga Prokuroria greke, si pjesë e grupeve të personave që provokuan protestat e dhunshme në kryeqytetin helen, më e fundit sulmi ndaj punonjësve të policisë. Rreth 1 muaj nga nisja e valës anarkiste e shkatërruese në Athinë dhe vetëm pak ditë nga plagosja e një punonjësi të policisë greke, 10 persona u arrestuan, në lagjen “Eksarqia”. Duke iu referuar mediave nga shteti fqinj mësohet prej tyre, 5 i përkasin forcave të majta politike në Greqi, ndërsa 5 të tjerët akuzohen se bëjnë pjesë në bandat e krijuara për të shkaktuar trazira e pasiguri në shtetin anëtar të Bashkimit Evropian. Mësohet se të 10 të dyshuarit janë marrë në pyetje për 3 ditë me radhë në Prokurorinë e Athinës, ku vetëm dje është bërë i ditur se mes tyre ndodhen dhe dy shqiptarë. “Shtetasi shqiptar Ari Bollano nga Himara dhe babai i tij kanë lidhje familjare me një drejtues pushteti në një zonë në jug të Shqipërisë”, pohohet në agjencitë e lajmeve. Ndërsa citohet policia greke, shkruhet se Ari Bollano akuzohet për përfshirje në vjedhje të ndryshme në Athinë, si dhe është identifikuar si një ndër personat pjesëmarrës në aktet e fundit të dhunshme në Athinë. Pa e deklaruar publikisht se cili ka qenë pozicioni i Bollanos në këto protesta, që përfshinë qytetet kryesore të Greqisë, Prokuroria helene ka çuar dosjen e dy shqiptarëve në gjykata. Megjithë dyshimet se dy himarjotët kishin lidhje të elementë apo grupe terroriste, në gjykatë ndaj tyre janë ngritur akuza për vepra të tjera penale, por nuk është lënë në fuqi zyrtarisht ajo e implikimit në bandat me synim aktet terroriste. Akuzat e ngritura ndaj 5 personave, mes të cilëve dy shqiptarët janë: “armëmbajtje dhe përdorim të materialeve ushtarake pa leje”, “shkatërrim të pronës private”, “kundërshtim me forcë të punonjësve të rendi”, etj. Për këto akuza ata nuk janë mbajtur në burg, por janë lënë të lirë, me kusht që çdo dy muaj të paraqiten në rajonin e policisë. Sipas vendimit të gjykatës, asnjë prej tyre nuk ka të drejtë të lërë territorin grek, pasi hetimet po vazhdojnë. Pas lënies së lirë të këtyre personave kanë reaguar forcat e opozitës dhe mediat mbështetëse të tyre, sipas të cilave qeveria dhe shërbimet policore po dështojnë sërish për të zbardhur autorët e ngjarjes së rëndë. Një punonjës policie mbeti i plagosur rëndë, pasi u qëllua me armë zjarri nga persona, që ende nuk janë identifikuar plotësisht.

Vetëvaret gruaja, kapet i shoqi

TIRANE - Policia arrestoi dje një 44-vjeçar nga Bathorja, i cili akuzohet se ka shtyrë gruan e tij në vetëvrasje. Besnik Hasa, 44 vjeç, ra në pranga me akuzën e shkaktimit të vetëvrasjes. Tri ditë më parë, bashkëshortja e tij E. Hasa, 27 vjeçe, nënë e tre fëmijëve, është gjetur e vetëvarur në dhomën e saj. Vetë i arrestuari e ka gjetur bashkëshorten të varur në shtëpi, ndërsa vetëm pak orë më parë ata kishin debatuar mes tyre, e madje gruaja sipas policisë ishte dhunuar nga i akuzuari. Shkak për konfliktet dhe grindjet mes tyre, sipas burimeve të policisë ka qenë xhelozia e vazhdueshme e Besnik Hasës, i cili dyshonte se bashkëshortja e tij e dytë kishte një lidhje jashtë martesore. Më parë çifti, sipas burimeve të policisë, ka pasur grindje të vazhdueshme pikërisht për këtë shkak. Madje mësohet se policia kishte plotësuar edhe një urdhër mbrojtjeje, që në fakt nuk e ndihmoi shumë për të shpëtuar.

Tonin Vocaj emërohet drejtor i ri i policisë së kryeqytetit

TIRANE - Katër muaj pas largimit të Muhamet Rrumbullakut nga drejtimi i Policisë së Tiranës, kreu i Përgjithshëm i Policisë, Ahmet Prençi, ka zyrtarizuar dje zyrtarin nr.1 të policisë së kryeqytetit. Drejtues i Parë Tonin Vocaj, që prej ditës së djeshme është kryepolici i njësisë më të madhe vendore të policisë në vend, duke zëvendësuar në këtë detyrë drejtorin e komanduar Hamdi Fiora. Ky i fundit është rikthyer në funksionin që kryente para se të komandohej në krye të Drejtorisë së Policisë së Tiranës, duke rimarrë funksionin e drejtorit të Forcave Speciale. Kryepolici i ri i Tiranës, Tonin Vocaj, së fundi ka drejtuar hetimet për vdekjen e biznesmenit Kosta Trebicka, ndërsa ka marrë pjesë në dhjetëra raste të tjera hetimesh për ngjarjet më të bujshme e më të rënda në vend. Pas zyrtarizimit të kryepolicit të ri të kryeqytetit, Drejtori i Përgjithshëm, Ahmet Prençi, ka firmosur edhe ndryshime të tjera në radhët e Policisë së Shtetit dhe kryesisht të strukturave vendore. Zëvendësdrejtor i Policisë së Tiranës është emëruar Artan Cuku, i cili do të drejtojë Departamentin e Hetimit të Krimeve në Tiranë. Deri dy ditë më parë, Cuku kryente të njëjtin funksion në Berat, ndërsa më parë ka qenë zëvendësdrejtor i Policisë së Qarkut të Vlorës dhe Fierit. Ai ka punuar edhe në Policinë e Tiranës në Komisariatin 5 dhe 4, ndërsa në këtë të fundit ka pasur një incident me vetëvrasjen e një të ndaluri. Arben Caka është rikthyer në detyrën e Shefit të Operacioneve Speciale dhe Kërkimit. Vendin e lënë vakant nga Tonin Vocaj në krye të Drejtorisë së Luftës ndaj Krimeve të Rënda e ka zënë ish-drejtori i Policisë së Shkodrës, Drejtues i Parë, Nikolin Bala. Ndryshimet nuk kanë lënë pa prekur edhe disa nga komisariatet e Tiranës, ndër të cilët Dorian Muça është emëruar në krye të Komisariatit nr.1, ndërsa paraardhësi i tij Nikollë Vatnika është transferuar në të njëjtin funksion në Komisariatin nr.2. Adnand Shehu pas një periudhe gati 2-vjeçare është transferuar në komisariatin e rrethit të Krujës. Ndryshime të tjera ka pasur në qarkun e Lezhës, ku zëvendësdrejtori Artan Mehmeti është transferuar në të njëjtin funksion në Vlorë, ndërsa është zëvendësuar nga Çezar Keçi. Bashkë me Keçin në Lezhë është emëruar Asllan Shyti, i cili ka zëvendësuar Ferdinand Dushën, i cili është transferuar shef komisariati në Gjirokastër. Shefi i Komisariatit nr.3, Marjan Laca, ka këmbyer postin me atë të komisariatit të Elbasanit, Ali Allaraj. Po kështu edhe shefi i komisariatit të Dibrës, Sajmir Shehu, ka këmbyer vendin me atë të shefit të Kukësit, Aljedin Omuri.


Emërimet e reja në polici

Tonin Vocaj, Drejtor i Policisë së Qarkut Tiranë
Hamdi Fjora, Drejtor i Forcave Speciale
Nikolin Bala, Drejtor Hetimi i Krimeve të Rënda
Artan Cuku, zv/drejtor i Hetimit të Krimeve në Tiranë
Artan Mehmeti, zv/drejtor Hetimit të Krimeve në Vlorë
Artan Hasani, komandohet drejtor në Shkodër
Çezar Keçi, zv/drejtor i Hetimit të Krimeve në Lezhë
Nikoll Vatnikaj, shef i Komisariatit nr.2 në Tiranë
Dorian Muça, shef i Komisariatit nr.1 në Tiranë
Ferdinant Dusho, shef komisariati në Gjirokastër
Asllan Shyti, shef komisariati në Lezhë
Atnan Shehu, shef komisariati në Krujë
Ali Allaraj, shef i Komisariatit nr.3 në Tiranë
Nazmi Shuli, shef sektori në Drejtorinë Tiranës
Marjan Laca, shef Komisariati në Elbasan
Saimir Shehu, shef Komisariati në Kukës
Alejdin Omuri, shef Komisariati në Dibër

Trafikoi njerëz, në gjyq prifti i Karavastasë

TIRANE – Ish-prifti i fshatit Karavasta në Lushnjë, Mihal Shuli, së bashku me nëntë persona të tjerë dërgohen të pandehur në gjykatë me akuzën e “dhënies së ndihmës në kalim të paligjshëm të kufirit” për katër grupe me 20 klandestinë, që janë trafikuar nga Shqipëria në drejtim të Greqisë. Lajmi konfirmohet nga burime zyrtare të Prokurorisë së Tiranës, sipas të cilave Njësia Task-Force Antikorrupsion përfundoi hetimet dhe vendosi të dërgojë në gjykatë dosjen penale në të cilën akuzohet ish-prifti i fshatit Karavasta, tre ish-efektiva policie si dhe gjashtë persona të tjerë të konsideruar bashkëpunëtorë në trafikimin e klandestinëve nga Shqipëria në drejtim të Greqisë. Sipas rrugës që ndiqej për kalimin në Greqi, nga Korça, Gjirokastra apo Saranda, trafikantët vendosnin edhe kuotën që duhej të paguanin klandestinët, nga 250 deri në 3000 euro për person. Prifti i Karavastasë akuzohet se ka grumbulluar në zonën e Lushnjës persona që ishin të interesuar për të kaluar si klandestinë në Greqi dhe më pas i ka transportuar ata në drejtim të Gjirokastrës dhe Sarandës, ku ndodheshin bashkëpunëtorë të tjerë të grupit që përcillnin klandestinët për në Greqi. Grupi ku bënte pjesë prifti i Karavastasë së bashku me tre punonjës të policisë, që akuzohen se kundrejt ryshfetit kanë lejuar kalimin e klandestinëve në drejtim të Greqisë, është zbuluar dhe hetuar nga Shërbimi i Kontrollit të Brendshëm në Ministrinë e Brendshme. Pas hetimeve disamujore, SHKB-ja ka dërguar dosjen në Prokurori, ku hetimet kanë vazhduar bashkë me Njësinë Task-Force, derisa më 17 korrik 2008 dhjetë anëtarët e grupit ranë në prangat e policisë. Sipas burimeve zyrtare nga Prokuroria, mësohet se gjatë hetimeve të përbashkëta me SHKB-në me anë të metodave speciale, përgjimeve dhe vëzhgimeve është arritur të provohet se të akuzuarit e dosjes penale në fjalë, në bashkëpunim mes tyre, kanë organizuar trafikimin e 20 klandestinëve të ndarë në katër grupe me nga pesë persona secili. Prokuroria tha se të pandehurit e dosjes janë Leonard Belortaja, Artur Likollari, Edmond Tollkuçi, G.Vllazëria, Altin Qatipi, I.Dalipaj, Mihal Shuli, Manol Xhamia, Rajmondi Duro dhe Ilir Çipi, të gjithë të arrestuar.

Shkon të vrasë kushëririn,ekzekutohet me armën e tij

Shkon të vrasë, por mbetet viktimë e armëve që mbante me vete. Indrit Çela, 28 vjeç u qëllua për vdekje paraditen e djeshme, në fshatin Arameras të Fushë-Krujës, nga kushëriri i tij 21-vjeçar, Lulzim Çela. Burime nga policia e qytetit bënë të ditur se ngjarja e rëndë ndodhi pranë një lokali, në hyrje të qytetit. Mësohet se viktima kishte shkuar i armatosur me kallashnikov dhe dy granata në xhepa, në vendin ku ndodhej 21-vjeçari. Ai ka hyrë brenda me armë, duke i kërcënuar klientët, që asnjë të mos lëvizte se nuk kishte punë me ta, por vetëm me Lulzimin. Duke i mbajtur armën të drejtuar ai e ka nxjerrë Lulzimin nga lokali i mbushur me njerëz. Por, sapo kanë dalë jashtë, Lulzim Çela ka mundur t'i tërheqë armën nga dora. I ndjerë i rrezikuar Indrit Çela ka nxjerrë nga xhepi një granatë, por pa arritur t'ia hedhë kushëririt, pasi ky i fundit e qëllon me 3 plumba kallashnikovi, duke e lënë të vdekur në vend. Gjithçka ka ndodhur brenda pak sekondash. Pas shkrehjes së armës së zjarrit, atentatori është larguar me shpejtësi, për të mos rënë në duart e policisë. Forcat e policisë së Fushë-Krujës, Krujës e Durrësit arritën me shpejtësi në vendngjarje, duke e arrestuar 21-vjeçarin brenda një kohe të shkurtër e bllokuar armën e krimit. Lulzim Çela ka qenë në gjendje të tronditur disa orë pas arrestimit, derisa më vonë ka shpjeguar se vrasjen e ka kryer në kushtet e vetëmbrojtjes, pasi do të ishte vetë viktimë. Ai bashkë me viktimën jetonin në të njëjtin fshat dhe ishin kushërinj të largët mes tyre. Vetë ai nuk ka rrëfyer shkaqet pse Indrit Çela kishte planifikuar ta vriste. Hetimet e kryera nga policia kanë zbardhur se ngjarja e rëndë mund të ketë pasur si shkak ngacmimet, që Lulzim Çela i kishte bërë një kushërirës së viktimës. Kjo pistë është ende e dyshuar, pasi autori nuk ka mundur të bëjë një rrëfim të plotë për konfliktin me 28-vjeçarin. Policia ka marrë në pyetje dëshmitarë dhe familjarë të dy djemve për të mësuar mbi marrëdhëniet e tyre para se të ndodhte krimi.

Dyfishohen biletat e furgonëve

KORÇE - Drejtuesit e furgonëve, të cilët transportojnë çdo ditë udhëtarë në linjën Korçë-Tiranë dhe anasjelltas po abuzojnë hapur me çmimin e biletës. Pasagjerët janë detyruar të paguajnë sa dyfishi i tarifës së mëparshme, ndonëse çmimi i karburanteve ka ardhur në zbritje. Drejtuesit e furgonëve e justifikojnë këtë fakt me kushtet e vështira të udhëtimit nga moti dhe terreni i vështirë në segmentin Korçë-Qafë Plloçë. Kështu, nga 800 lek që ishte bileta Korçë-Tiranë, gjatë dhjetë ditëve të fundit kjo tarifë ka arritur në 1000-1500 lekë. Pasagjerët ankohen se kjo ngritje e çmimit nuk iu bëhet e ditur atyre që në fillim të udhëtimit, por gjatë ose në fund të tij. "Atë ditë që kishte rënë dëborë ne udhëtuam deri në Elbasan me zinxhirë dhe për shkak të mosshkeljes së dëborës e patëm të vështirë. Ishin vetë pasagjerët që ranë dakord ta paguanin rrugën 1200 lekë u shpreh Asllan Beqiri, drejtues i njërit prej furgonëve linjës.

Kapet peshkaqeni gjigant në Sazan

VLORE - Një peshkaqen rreth 370 kilogramë ra në rrjetat e peshkatarëve të Vlorës paraditen e djeshme. Sipas peshkatarëve, gjahu ra në rrjeta gjatë peshkimit në veri të ishullit të Sazanit. Ky është peshkaqeni i parë i kapur për vitin 2009 në ujërat e Vlorës, ndërkohë që pritet që mishi i kësaj specie gjigante të detit të përfundojë në kuzhinat e restoranteve të qytetit. Sipas peshkatarëve, ata ishin nisur në det të hapur dje që në orët e para të mëngjesit me peshkarexhën "Melisa". Në orët e pasdites, kur ndodheshin në veri të ishullit të Sazanit, ata kanë nisur të mbledhin rrjetat. Por teksa po kryenin këtë punë, ata kanë hasur në një peshë të rëndë. "Fillimisht dyshuam se rrjeta mund të kishte kapur ndonjë objekt apo hekur. Por kur doli rrjeta në sipërfaqe pas rreth 30 minutash, pamë se ishte kapur një peshkaqen. Me vështirësi të madhe e hodhëm në peshkarexhë e më pas me mjete rrethanore e vramë", u shpreh njëri prej peshkatarëve, që kapi dje peshkaqenin e rrezikshëm. Peshkaqeni është 4 metra i gjatë dhe peshon rreth 370 kg. Ai i përket llojit me emrin "Pëllumb", ndërsa mësohet se është një specie e rrezikshme për njerëzit. Peshkatarët pohuan se gjahu i tyre ishte kapur në një thellësi prej 120 metra. Gjatë vitit 2008 janë kapur 3 peshkaqenë në ujërat e Vlorës, ku më i madhi ishte rreth 500 kilogramë. "Peshkaqeni ishte përpjekur të dilte nga rrjetat duke dëmtuar një pjesë të saj. Ndërsa thuajse gjithë peshkun që ishte në rrjetë e kishte dëmtuar", tha peshkatari i "Melisa" i cili ishte mjaft i kënaqur me gjahun e ditës së djeshme.

Hakerat vodhën 80 milionë lekë

Prej mëse pesë vitesh në secilën nga grabitjet me armë të ndodhura në bankat e Tiranës, hajdutët nuk kanë arritur të marrin më shumë se 10 mijë euro.
Rasti me sasinë më të madhe financiare të grabitur, ka qenë 8 mijë euro në autostradë në gusht 2008, ndërsa precedentët e tjerë kanë mbetur në 5 mijë apo 3 mijë euro. Megjithatë, një grup të rinjsh që tashmë pritet të përballen me drejtësinë, pa armë, pa maska dhe pa përdorimin e dhunës, kanë arritur të vjedhin plot 80 milionë lekë nga bankat e ndryshme në Tiranë, Durrës, Fier dhe Vlorë. Është fjala për grupin prej 15 të rinjsh, të njohur si hakerat e bankomateve për nga mënyra si operonin gjatë kryerjes së krimit. Ata ranë në prangat e policisë gjatë një aksioni të zhvilluar në Tiranë në korrik 2008, ndërsa kapja dhe zbulimi i tyre do të evidentohej më pas nga zyrtarët më të lartë të Qeverisë si një nga arritjet e policisë për vitin që lamë pas. Banda e hakerave sipas hetimeve të Njësisë Task-Force në Prokurorinë e Tiranës është drejtuar nga Endrit Gjergjani (Laro), një i ri i cili kishte grupuar rreth vetes disa bashkëmoshatarë të cilëve u shpërndante karta krediti të klonuara, me të cilat bëheshin tërheqje nga bankomatet. Dosja penale ndaj Gjergjanit dhe 14 anëtarëve të tjerë të bandës, përfshirë edhe babain e vetë kapos, është dërguar për gjykim pak ditë më parë. Në kuadër të hetimit për grupin e hakerave, Prokuroria zhvilloi një ekspertizë kontabël për të matur ligjërisht sasinë e parave, që hakerat kishin vjedhur gjatë gjithë aktivitetit të tyre, duke kryer mbi 400 tërheqje nga bankomate të ndryshme në qytetet kryesore të vendit.
Banda “Matrix”
Në mesin e vitit 2008 disa filiale të bankave të nivelit të dytë denoncuan në polici rastet e para të vjedhjes. Zbulimi ishte i thjeshtë. Pothuajse çdo ditë bëheshin tërheqje nga bankomatet në Tiranë, Durrës, Fier apo Vlorë, ndërkohë që llogaritë nga merreshin paratë u përkisnin shtetasve të ndryshëm nga vendet të Evropës dhe Kanadasë. Me anë të komunikimit në internet me hakera rusë dhe anglezë, kapoja i bandës së arrestuar gjatë aksionit “Matrix” blinte kodet dhe numrat serikë të kartave të kreditit, që u përkisnin shtetasve të ndryshëm evropianë apo kanadezë. Endrit Gjergjani kishte blerë një pajisje elektronike me anë të së cilës, të dhënat e marra nga hakerat rusë dhe anglezë i shkruante në karta krediti të boshatisura, që pasi klonoheshin ktheheshin në karta identike me ato që zotëronte pronari i vërtetë i llogarisë. Pas kësaj, Endrit Gjergjani i shpërndante kartat e klonuara tek anëtarët tjerë të grupit, të cilët kryenin më pas tërheqje nga bankomatet. Gjatë tërheqjeve të para me secilën prej kartave të klonuara, Endrit Gjergjani ndante mënjanë 500 dollarë nga paratë e përfituara dhe këtë shumë me anë të agjencive të posaçme ua transferonte hakerave rusë dhe anglezë të cilëve më parë u kishte blerë informacionin e kartave, që përdoreshin në Tiranë. Një skemë e tillë veprimi u konsiderua nga policia dhe prokuroria si mjaft e sofistikuar, ndërsa më parë ishin shënuar vetëm tentativa për skenarë të tilla vjedhjesh, por asnjë prej tyre nuk ishte realizuar.

Arrestohet studenti shqiptar, vrau italianin

ITALI – Arrestohet në Trento të Italisë një 22-vjeçar shqiptar i dyshuar për vrasje. Lorenc Smoqi, është prangosur dje nga forcat e rendit të vendit fqinj, pasi është i dyshuar si autori i ngjarjes së ndodhur tre ditë më parë në Grinjo të Trentos, ku ka mbetur i vrarë me thikë Luigi del Percio, 30 vjeç. Gjatë marrjes në pyetje, pas arrestimit i riu shqiptar nuk ka pranuar të ketë qëlluar me thikë 30-vjeçarin, por sipas policisë italiane një dëshmitar okular ka parë atë teksa ka kryer krimin. Dëshmitari i ngjarjes ka treguar se ka parë pak para orës 14:00 të së mërkurës përpara hyrjes së bibliotekës së Grinjos, dy të rinj teksa ishin duke debatuar ashpër. Sipas dëshmitarit, që e ka parë skenën nga një distance prej 30 metrash, pas pak momentesh njëri prej të rinjve e ka mbërthyer tjetrin dhe ka nxjerrë nga xhaketa që kishte veshur një send të shndritshëm dhe e ka drejtuar drejt rivalit. I sulmuari është shembur përtokë, ndërsa agresori është larguar. Mësohet se te tjerë persona e kanë parë më pas të lëvizte në një nga rrugët e qytetit me një çantë shpine me ngjyrë të errët në dorë, të njëjtë me një çantë të studentit të vrarë dhe me një kapelë të kuqe në kokë. Bazuar edhe në përshkrimin fizik të dhënë nga dëshmitarët e tjerë pas ngjarjes forcat e rendit kanë shkuar në shtëpinë ku banonin gjyshërit e shqiptarit të arrestuar. Pas një kontrolli fizik të banesës, përveç një kapeleje të kuqe, kanë gjetur në lavatriçe një pale xhinse me njolla gjaku. Menjëherë pas kësaj i riu është dërguar në rajonin e policisë ku është marrë për një kohë të gjatë në pyetje. Mësohet se ai nuk ka pranuar asgjë në lidhje me krimin, duke thënë se nuk kishte qenë në bibliotekë, por ai nuk ka arritur të ketë një alibi të qëndrueshme për harkun kohor mes orës 13:30 dhe 15:00. Sipas dëshmive të siguruara nga policia, në këtë kohë i riu Smoqi është parë të largohej nga biblioteka me një çantë të zezë në dorë, ajo që i përkiste studentit italian. Sipas policisë së vendit fqinj, ende nuk janë zbuluar motivet e vërteta të ngjarjes. Ndërsa nuk mohohet ajo e grabitjes, pasi çanta me të cilën është parë të largohet i riu shqiptar nuk është gjetur ende. Luigi del Percio u gjet i plagosur rëndë me armë të ftohtë në shkallët e bibliotekës së Grinjos pak pas orës 14:00 të së mërkurës nga disa kalimtarë. Ai vdiq nga plagët e marra pas mbërritjes në spital.

Droga, kapet shpërndarësi në gjimnaze

TIRANE- Prangoset shpërndarësi drogës së shkollave, pranë gjimnazit “Partizani”. Policia i gjen në banesë dhe i sekuestron një sasi droge me vlerë më tepër se 1 milionë lekë të vjetra. Brunis Shaqja, 23 vjeç, banues në Tiranë, është ndaluar nga oficerët e zyrës së Antidrogës së Policisë së Tiranës, pas gati një jave hetimi dhe mbajtje nën vëzhgim nga agjentët e antidrogës. Shaqja, është ndaluar në rrugën “4 Dëshmorët”, sapo kishte dalë nga banesa e tij me një sasi prej 7 doza marijuane. Kjo, sipas burimeve të policisë, ishte e vetmja mënyrë për ta ndaluar, duke qenë se vazhdimisht ai e linte drogën në vende të fshehta dhe të mbyllura. Sapo e kanë kapur, blutë i kanë gjetur në trup në pjesën e përparme 7 qese me marijuanë. Më pas, gjatë kontrollit të një shtëpie në pronësi të tij, të përshtatur për mbajtjen e drogës, blutë kanë gjetur edhe mallin. Sipas tyre, droga ishte fshehur në një dollap e paketuar në 265 doza të futura në qese farmaceutike. Nga vëzhgimi i kryer nga agjentët e policisë, është mësuar se shpërndarësi e dërgonte marijuanën tek përdorues të ndryshëm, nxënës shkollash kryesisht të mesme. Një prej tyre ishte edhe gjimnazi “Partizani”, jo shumë larg banesës së tij. Vetë i arrestuari ka pretenduar se mallin e kishte gjetur rastësisht një ditë, kur kishte qenë në Gjirokastër. “Pashë një qese rastësisht e mora dhe pashë që kishte marijuanë”, ka pohuar i arrestuari. Ndërkaq blutë dyshojnë se i arrestuari ka edhe disa bashkëpunëtorë të tjerë, me të cilët mendohet se shpërndante mallin. Shaqja tashmë akuzohet për shitje dhe posedim të lëndëve narkotike.