Ngjarjet me te fundit nga fusha e aktualitetit

Ketu mund te postoni ngjarjet e aktualitetit Shqipetar

Festat, gjysmë pule dhe birra për të burgosurit

Sport, muzikë, argë-tim, gjysmë pule dhe nga një shishe birrë, jo më shumë 250 mililitra. Kjo është gjithçka që kanë ofruar burgjet për të dënuarit që do të kalojnë pas hekurave të qelive natën e ndërrimit të viteve. Ndërsa ata që pretendojnë më shumë se kaq mund të marrin nga familjet gjelin e detit dhe ëmbëlsirat tradicionale, ushqime, të cilat nuk do të censurohen nga autoritetet e burgjeve. Po kështu, të gjithë të burgosurve iu është lejuar një takim i shkurtër shtesë me familjarët si dhe e drejta për të kryer telefonata nga kabinat brenda institucioneve, për t'iu uruar miqve dhe familjarëve festën e Vitit të Ri. Personat më me fat do të jenë ata që kanë arritur të përfitojnë leje shpërblyese për të kaluar pranë familjeve festën e Vitit të Ri 2009. Institucioni që është treguar më "dorëlëshuar" në këtë drejtim është burgu i sigurisë së ulët 325. Plot 30 të burgosur të këtij institucioni, burra dhe gra, kanë përfituar deri në një javë leje shpërblim për të kaluar pranë familjarëve të tyre festën e ndërrimit të viteve. Por ajo që pritet më së tepërmi në këtë burg është falja tradicionale që mund të dekretojë këto ditë Presidenti i Republikës. E kontaktuar me telefon drejtoresha e këtij institucioni, pohoi se edhe ata të burgosur që do të presin në qeli festën, do ta kalojnë atë në mënyrën më të mirë të mundshme. Sipas saj është parashikuar të organizohen aktivitete të ndryshme, përfshi këtu aktivitete me fëmijët e grave të burgosura si dhe të stafit. Fëmijët e të dënuarave janë sjellë në ambientet e burgut nga shtëpitë e fëmijës ku jetojnë si dhe organizatat e ndryshme fetare e bamirëse. Po kështu drejtori i burgut të Peqinit pohoi dje se veç aktiviteteve të shumta që janë organizuar ditët e fundit në këtë institucion, ka vendosur të japë 20 leje shpërblyese. Sipas tij priten edhe të tjera aktivitete të organizuara nga bashkia e Peqinit dhe skuadra e futbollit e qytetit. Më tej ai tha se autoritetet e burgut kishin lejuar takime shtesë të të dënuarve me familjarët si dhe dërgimin në qeli të ushqimeve tradicionale të kësaj feste. Ndërsa drejtori i burgut të Vaqarit pohoi se institucioni i tij ka lejuar 15 të burgosur për të kaluar natën e Vitit të Ri pranë familjeve, krahas atyre të burgosurve, të cilëve radhën për leje ua jepte lista që kanë përpiluar vetë të burgosurit.

Shpërblimi, policët e burgjeve: Duam rrogën e 13-të

TIRANE - Drejtoria e Përgjithshme e Burgjeve u jep gardianëve nga 9 mijë lekë shpërblim për festën e Vitit të Ri. Shpërblimi që iu është dhënë uniformave blu të burgjeve pak ditë më parë ka sjellë reagimin e tyre, të cilët kanë pretenduar rrogën e 13-të për shkak të rezultateve të mira në punë. Mjaft prej policëve të burgjeve, mesditën e djeshme janë shprehur të pakënaqur nga sasia e shpërblimit që kanë marrë, duke pohuar se kjo shumë ishte e pamjaftueshme për të blerë gjelat e detit apo ushqime të tjera tradicionale, në raport kjo edhe me çmimet e "kripura" të këtij fundviti, stimuluar edhe nga kriza ekonomike globale. Duke shpjeguar arsyet, pse kërkonin një sasi më të madhe shpërblimi me rastin festave, gardianët pohojnë se në përgjithësi burgjet kanë shënuar rezultate të mira në punë gjatë vitit që po mbyllet. Sipas tyre situata në burgje ka qenë më e qetë në krahasim me vitet më parë, ndërsa incidentet apo ngjarjet e rënda kanë qenë të pakta dhe pa pasoja. Më tej policët pohojnë se disa prej tyre kanë paraqitur ankesë autoriteteve të burgjeve në mënyrë individuale, pas të cilave presin të përfitojnë ndonjë shtesë. Ndërkohë, burime nga burgjet pohojnë se veç shpërblimit dhe rrogave, punonjësve të institucioneve të qelive iu janë paguar edhe pagesat e ndryshme suplementare, shpeshherë të prapambetura në mënyrë që punonjësit e tyre të përballojnë shpenzimet e festës. Sipas tyre, edhe Policia e Shtetit ka dhënë të njëjtin shpërblim për efektivët e vet, me përjashtim të disa rasteve kur institucione të ndryshme kanë shfrytëzuar fonde rezervë.

Vrasja për drogën, zhduken kamerat

Autorët e vrasjes së Elton Deliut bashkë me nënën e tij, kanë zhdukur pamjet filmike të regjistruara nga kamerat e sigurisë së pallatit ku jetonte 32-vjeçari i skeduar në trafik narkotikësh.I gjithë sistemi i cili mësohet se ishte instaluar një javë më parë në pallat nga vetë viktima, është gjetur i dëmtuar ndërsa kasetat e regjistrimeve janë zhdukur gjatë ndërhyrjes së vrasësve në kutinë që ndodhej brenda apartamentit të Elton Deliut ku ndodhi edhe vrasja e tij. Një fakt i tillë u zbulua pas verifikimeve në kutinë e komandës së kamerave ku ishin vjedhur disqet që regjistronin filmimet e marra nga kemarat që ishin vendosur në hyrje të pallatit, në garazh, në korridor dhe tek dera e shtëpisë së familjes Deliu. Mekanizmi i vrasjes i cili po hetohet nga policia është se autorët mund të jenë më tepër se dy persona, të cilët kanë kryer krimin e rëndë në familjen Deliu në bashkëpunim mes tyre. Ekspertët dhe specialistët e hetimit kanë gjetur një rrëmujë totale në banesën e viktimave, ndërsa kriminalistët, mjekët ligjorë dhe hetuesit në vendin e ngjarjes kanë gjetur gjurmë të shumta gishtërinjsh dhe shenja të tjera. Rrëmuja e krijuar në banesë është argumentuar me faktin se autorët kanë kërkuar të gjejnë vendin se ku ishte instaluar qendra e regjistrimit të kamerave vëzhguese. Instalimi i një sistemi të tillë sigurie nga viktima është bërë shkak që policia të dyshojë se Elton Deliu e kishte ndjerë rrezikun dhe kishte marrë masa të forta mbrojtëse. Gjurmët e gjetura në rrëmujën e krijuar, janë administruar nëpërmjet proces-verbaleve përkatëse të ekspertëve. Ndërkaq sipas burimeve të policisë autorët ende të paidentifikuar të ngjarjes, kanë hyrë në banesën e familjes Deliu, duke trokitur ose duke përdorur çelësa të kopjuar. Madje nuk përjashtohet mundësia që personat të kenë qenë të njohur në familjen e viktimës. Ata kanë hyrë në banesë dhe aty kanë vrarë nënën e Elton Deliut, Flutura Deliun, 52 vjeçe. Më pas ekzekutorët kanë qëndruar në shtëpi deri sa aty ka mbërritur Elton Deliu, 32 vjeç. Pasi ai ka hyrë në banesë autorët kanë qëlluar atë duke e lënë të vdekur në vend. Më pas autorët janë munduar të largohen qetësisht pa rënë në sytë e banorëve të pallatit apo të njerëzve që mund të lëviznin në shkallë apo në ashensor. Kjo me qëllim që të kishte sa më pak dëshmitarë apo persona që t’i shihnin ata duke qarkulluar. Diferenca kohore në vdekjen e dy viktimave të ngjarjes është konfirmuar nga mjekët ligjorë që realizuan autopsinë.

Hetimet
Hetimi i vrasjes e dyfishtë ndodhur dy ditë më parë në rrugën “Perlat Rexhepi”, në kryeqytet, ka bërë që policia të kërkojë dëshmi nga më tepër se 20 persona gjatë ditës së djeshme. Ata janë marrë në pyetje nga policia në lidhje me ngjarjen e ndodhur mesditën e të shtunës në katin e gjashtë të një pallati pranë presidencës. Personat e marrë në pyetje mësohet se janë njerëz të njohur të viktimës, si dhe njerëz me të cilët ai ka pasur konflikte dhe përplasje. Po kështu sipas burimeve të policisë, hetuesit e Zyrës së Vrasjeve të Drejtorisë së Tiranës kanë marrë dëshmi edhe të të njohurve të Elton Deliut.



Deliu i shpëtoi atentatit në 1998, miku i tij vdiq në makinën e qëlluar
TIRANE- Elton Deliu i ka shpëtuar vrasjes në disa raste, ndërsa atentati më i rrezikshëm ka qenë ai i vitit 1998. Në atë kohë, miku i Elton Deliut, Ilir Mëzezi, mbeti i vrarë, ndërsa 32-vjeçari u plagos pas një sulmi të organizuar ndaj tyre me armë zjarri. Një tjetër atentat ndaj Elton Deliut është ai i vitit 2005, kur viktima u sulmua me armë nga disa persona. Ngjarja e parë sipas burimeve të policisë ka ndodhur në mesin e vitit 1998, kur persona të paidentifikuar në atë kohë qëlluan në automjetin në pronësi të tij, Ilir Mëzezin, duke e lënë atë të vdekur në vend. Mëzezi me banim në Kombinat, sipas policisë dyshohej se ishte vrarë me motive hakmarrjeje. Veç tij nga ngjarja mbeti i plagosur rëndë edhe vetë Elton Deliu, në atë kohë 22-vjeçar. Pas atentatit Deliu mbërriti në gjendje të rëndë shëndetësore në spitalin ushtarak, ku pas mjekimit të marrë gjendja e tij u përmirësua. Nga hetimi i kryer nga policia në atë kohë u ngrit dyshimi se vrasja mund të ketë ndodhur me qëllim të larjes së hesapeve. Shumë kohë pas atentatit, Elton Deliu mësohet se u largua nga vendi në drejtim të Italisë, ku ka qëndruar disa vite, ndërsa në vitin 2005, ndaj tij një grup prej katër personash organizuan një atentat me armë zjarri. Ata qëlluan në drejtim të automjetit të tij të markës “BMË”, në rrugën “Ramazan Shijaku”. Për fatin e tij, Elton Deliu shpëtoi edhe këtë herë pa dëmtime. Disa muaj më vonë policia arrestoi fillimisht dy prej të dyshuarve dhe disa kohë më pas në Kavajë u kapën të tjerët.



Ceremonia familjare
Dje në mesditë, familja dhe të afërmit e Elton dhe Flutura Deliut, i kanë dhënë lamtumirën njerëzve të tyre të afërt. Kjo nuk qe fatkeqësia e parë për këtë familje, që mësohet se kishte pasur edhe të tjera më parë. Dje të afërmit kanë pritur ngushëllimet në Yrshek pranë hotel “Eifel”, ndërsa trupat e nënë e bir, janë dërguar për t’u prehur në varrezat e Tufinës.


Precedentët me konfliktet e pronësisë
TIRANE - Përveç konflikteve për prishje të pazareve të drogës dhe përfshirje në krime të tjera, policia po heton edhe versionin e konflikteve të pronësisë mes Elton Deliut dhe banorëve vendas të zonës së Kasharit. Një pjesë e mirë e këtyre të fundit kanë qenë të dëmtuar në skandalin e manipulimit dhe grabitjes së trojeve në këtë zonë, nga ish-krerët e komunës që prej vitit 1996. Një prej krerëve të komunës që ka qenë i përfshirë në skandalin e manipulimit dhe falsifikimit të akteve të pronësisë ka qenë edhe Faik Fejza. Ky i fundit, sipas burimeve të policisë, është pandehur i lidhur në arrest se është përfshirë në këtë histori si një prej organizatorëve të manipulimeve, bashkë me disa nga krerët e komunës ndër vite. Policia dyshon se një prej personave që kanë përfituar nga kjo aferë ka qenë edhe Elton Deliu, 32-vjeçari i vrarë të shtunën e javës së kaluar. Tashmë policia ka administruar në dosjet e saj hetimore fashikuj të kësaj historie, me qëllim zbardhjen e një konflikti të mundshëm që mund të ketë precipituar deri në këtë situatë. Edhe pse është një nga pistat e hetimit që policia ka shtruar mbi tavolinën e saj, konflikti për motive pronësie duket më pak i mundshmi në vijën e hetimit që policia ka verifikuar deri më tani. Edhe pse është më pak i mundshmi, policia po ecën me teorinë e përjashtimit, duke verifikuar dhe përjashtuar fillimisht pistat më pak të mundshme deri në mbërritjen tek versioni më i mundshëm i krimit.

Vrasja e Deliut, pyeten bodigardët

Grupit hetimor i ngritur për vrasjen e dyfishtë të Elton Deliut dhe nënës së tij, kërkon të administrojë në dosje dëshmitë e bodigardëve të 32-vjeçarit të skeduar në trafiqe të paligjshme.Burime zyrtare nga hetimi i çështjes pohuan dje për gazetën “Panorama”, se të paktën dy persona ishin angazhuar javët e fundit në ruajtjen fizike të Elton Deliut. Gjatë lëvizjeve të tij në Tiranë, të cilat kohët e fundit ishin reduktuar dukshëm, 32-vjeçari shoqërohej nga të paktën dy persona që e ruanin kudo. Hetuesit thanë se ende nuk e kanë të qartë nëse personat që ruanin Elton Duliun kanë qenë bodigardë të punësuar mirëfilli për këtë qëllim, apo miq e të njohur të tij që i qëndronin pranë falë lidhjeve shoqërore me viktimën e atentatit të dyfishtë. Sapo janë vënë në dijeni të këtij fakti, hetuesit kanë vendosur të thërrasin në polici dy personat që ruanin Elton Deliun, me shpresën se ata duhet të kenë qenë në afërsi të pallatit ku u vra viktima, në kohën që vrasësit kanë hyrë aty. Pasi kanë mbledhur deklarime nga banorë të pallatit dhe të zonës, por edhe nga vetë të afërmit e viktimës, hetuesit e çështjes kanë mësuar se dy persona shoqëronin Elton Deliun pothuajse në të gjitha lëvizjet e tij. Në deklarimet e tyre, banorët e zonës dhe të pallatit ku ndodhi krimi, nuk kanë mundur të zbardhin detaje që ndihmojnë hetimin. Ata kanë pohuar se nuk kanë parë persona të panjohur apo të dyshimtë në pallAatin që ndodhet në zemër të ish-bllokut në Tiranë. Duke besuar se edhe të shtunën, rojat personale të Elton Deliut kanë qenë diku në afërsi të zonës, hetuesit kanë kërkuar t’i marrin ata në pyetje nëse kanë parë persona të dyshimtë të hynin apo të dilnin në pallat, në kohën kur 32-vjeçari dhe nëna e tij u ekzekutuan brenda në shtëpinë e tyre.

Dosja Kashari
Prej tri ditësh, agjentët e policisë që janë angazhuar në hetimin e vrasjes së Elton Deliut, kanë hartuar një listë me emra të dyshuar si armiq të viktimës. Bazuar në precedentët penalë të mëparshëm, por edhe në informacionet policore, hetuesit kanë listuar emra që lidhen me Elton Deliun si pasojë e implikimit të dyshuar në trafik narkotikësh, por edhe në konflikte pronësie. Konkretisht dyshohet se vetë 32-vjeçari ishte në konflikt me disa persona nga zona e Kasharit, për shkak se emri i Elton Deliut ishte përdorur për një pjesë të mirë të tokave që ish-kryekomunarët e kësaj zone, akuzohen se ua kanë marrë banorëve. Hedhja e disa trojeve në zonën e Kasharit në emër të Elton Deliut nga kryekomunarët, kur në fakt sipërfaqet e tokave u përkisnin personave të tjerë, dyshohet se ka qenë një shkak i fortë për konflikt me 32-vjeçarin. Burimet zyrtare nga policia thanë se nga këqyrja e telefonit të viktimës kanë arritur të mësojnë disa detaje në interes të hetimit, por hetuesit refuzuan të bëjnë publike elementë të tjerë lidhur me këtë fakt. Sipas tyre, aparati celular i Elton Deliut po verifikohet me kujdes për zbulimin e telefonatave apo mesazheve kërcënuese, por edhe për ndonjë informacion që vetë viktima mund të ketë ruajtur aty në lidhje me konfliktet apo rivalët e tij. Pasi kanë mësuar se 32-vjeçari lëvizte prej kohësh me makina të blinduara, madje ai kishte instaluar edhe një sistem kamerash vëzhgimi në pallat e së fundi kishte punësuar siç pretendojnë dëshmitarët, disa roja private, hetuesit dyshojnë se Elton Deliu duhet të ketë pasur sinjale apo presione të drejtpërdrejta, që e kanë detyruar të marrë masa për shmangien e rrezikut që mund t’i kanosej. tr.so

Armët dhe gjurmët e krimit, dalin të paskeduara

TIRANE – Gjurmët dhe shenjat e gjetura në banesën e Elton Deliut, aty ku ndodhi vrasja e dyfishtë, rezultojnë të paskeduara në arkivat e Policisë së Shtetit. Lajmi është bërë i ditur për gazetën “Panorama” nga burime të Drejtorisë së Policisë së Tiranës. Sipas tyre, krahasimi i gjurmëve të gjetura në vendin e ngjarjes si dhe krahasimi balistik i gëzhojave dhe predhave të sekuestruara ka rezultuar negativ. Gjurmët e daktiloskopike të futura në sistem dhe të krahasuara në mënyrë automatike nga vetë sistemi, kanë dhënë rezultat negativ. Po e njëjta gjë ka rezultuar edhe me gëzhojat dhe predhat e qitura nga së paku dy armë të ndryshme ndaj viktimave. Prania e dy armëve të ndryshme në skenën e krimit, është hedhur si hipotezë në vendin e ngjarjes nga ekspertët që kanë marrë pjesë në hetimet paraprake. Më tej një fakt i tillë është konfirmuar nga ekspertët specialistë në Institutin e Policisë Shkencore, të cilët kanë pohuar se gëzhojat e gjetura ishin qitur nga dy armë të ndryshme. Pas përfundimit të këtij veprimi, policia pritet të kryejë edhe procesin e përjashtimit të shenjave të gishtave të vendit të ngjarjes me ato të familjarëve të viktimave, me qëllim që më pas të ekspertohen shenjat që mund të kenë lënë ekzekutorët. d.b

Emri i Deliut, kërkohet në dosjen “Kashari”
TIRANE – Pjesa kryesore e abuzimeve me tokat në Kashar është zbardhur nga Prokuroria e Tiranës gjatë hetimeve ndaj ish-krerëve të komunës që u arrestuan një vit më parë gjatë aksionit “Kashari”. Dyshimet për konflikte pronësie të Elton Deliut në këtë zonë, janë bërë shkak që grupi i hetimit të hapë dosjen “Kashari” dhe të kërkojë aty të dhëna për 32-vjeçarin e vrarë bashkë me nënën e tij. Burime zyrtare nga hetimi thanë se po kërkojnë të dhëna në dosjen “Kashari” për pronarët e tokave, të cilat me anë të falsifikimeve dhe manipulimit të dokumenteve ishin hedhur në emër të Elton Deliut. Prokuroria tha se do të verifikojë këta persona, madje do t’i marrë në pyetje ata lidhur me atentatin e dyfishtë ndaj 32-vjeçarit, i cili mësohet se kishte lidhje familjare në komunën problematike në periferi të kryeqytetit.

Iku nga shtëpia pas sherrit me nënën, 14-vjeçarja seks me tre adoleshentë

TIRANE – Tre të rinj kanë kryer marrëdhënie seksuale me radhë me një vajzë 14 vjeçe në një hotel pranë Doganës së Tiranës. Vajza ishte larguar nga shtëpia pas një mosmarrëveshje me prindërit dhe ka takuar të dashurin e saj. Adoleshentja me inicialet K.P., u ka treguar prindërve aventurën që kishte kaluar gjatë mungesës 3-ditore. Sapo kanë mësuar ngjarjen, prindërit kanë vendosur të denoncojnë në polici. Pasi ka marrë kallëzimin e nënës së vajzës, policia filloi hetimet për zbardhjen e abuzimit me 14-vjeçaren. Fillimisht hetuesit e krimeve kanë shoqëruar të dashurin e vajzës, një 17-vjeçar nga Lapraka, ndërsa pas tij janë shoqëruar edhe dy shokë të adoleshentit, gjithashtu banorë në të njëjtën lagje. Pas veprimeve paraprake, policia ka mësuar historinë e “krimit” të kryer nga të dyshuarit. Ata kanë rrëfyer se veprimet e tyre nuk kanë ndeshur në asnjë moment në kundërshtimin e vajzës 14-vjeçare. Mosha e vogël e saj vetëm 14 vjeçe, gjithsesi i ka penalizuar të rinjtë. Ndaj tre adoleshentëve policia referoi në Prokurori dosjen penale me akuzën e marrëdhënieve seksuale me të mitura. Krimi për të cilin akuzohet i dashuri i 14-vjeçares dhe dy shokët e tij mësohet se ka ndodhur më 26 dhjetor të këtij viti në rrugën e Durrësit, pranë doganës së Tiranës. Sipas burimeve të policisë, ngjarja ka ndodhur në dhomat e një hoteli të zonës, ku vajza kishte shkuar me të dashurin e saj. Këtij të fundit policia nuk i ka bërë të ditur emrin, por mësohet se 14-vjeçarja atë ditë ishte larguar nga banesa e saj në kryeqytet. Shkak për këtë largim mësohet të ketë shërbyer një grindje mes vajzës dhe nënës së saj. Pas kësaj grindjeje e mitura ka braktisur shtëpinë dhe familjen, ndërsa është takuar me të dashurin e saj. Më pas të dy ata, sipas policisë, kanë mbërritur në hotelin që ndodhet në rrugën e Durrësit në hyrje të kryeqytetit. Aty për vajzën ishte ruajtur një “surprizë” e papritur. Fillimisht ajo ka kryer marrëdhënie seksuale me partnerin e saj, por më pas ka vijuar radha me dy shokët e tij. Pas adoleshentit 17-vjeçar, në dhomën e hotelit ka mbërritur edhe një shok tjetër i tij dhe më vonë edhe një person i tretë. Këtë histori adoleshentja është detyruar t’ua rrëfejë prindërve dhe më pas hetuesve të Drejtorisë së Policisë së Tiranës. Këta të fundit, pasi kanë regjistruar denoncimin e prindërve dhe deklarimin e vajzës mbi rrethanat e ngjarjes, kanë thirrur në polici edhe tre personat e dyshuar. I dashuri i vajzës mësohet se ka pranuar faktin se ka kryer marrëdhënie seksuale me të miturën, por me dëshirën e saj. Pas marrjes së deklarimeve të adoleshentëve, policia i ka dërguar tre të rinjtë për ndjekje penale në prokurori me akuzën e kryerjes së marrëdhënieve seksuale me të mitur.

Vdes nga vetëhelmimi 21-vjeçarja

KAVAJE - Një vajzë 21-vjeçare nga fshati Kryevidh, ndërroi jetë në urgjencën e spitalit të këtij qytetit, pas komplikacioneve që kishte paraqitur në banesën e saj si pasojë e vetëhelmimit. Vajza e re është dërguar në spital nga të afërmit, të cilët e kanë gjetur në banesë pa ndjenja dhe në gjendje të pashpresë. Menjëherë të afërmit e kanë nisur 21-vjeçaren me iniciale D.K., në drejtim të spitalit të qytetit të Kavajës, me shpresën se mund t’i shpëtonte vdekjes. Me gjithë ndihmën e të afërmeve, të cilët e kanë transportuar me urgjencë në spitalin e Kavajës, 21-vjeçarja ka mbërritur në spital pa puls dhe në gjendje të rënduar. Sapo mjekët e kanë futur në sallën e urgjencës për t’i dhënë ndihmën e parë, vajza ka qenë në gjendje të rëndë dhe pa asnjë reagim jetësor. Edhe pas përpjekjeve të personelit mjekësor, 21-vjeçarja nga fshati Kryevidh nuk ka dhënë shenja jete.

Zihen për radhën, thikë të miturit

Një fëmijë 13 vjeç është bërë viktimë e agresionit të një 44-vjeçari për radhën në një dyqan ushqimor. Ngjarja e rëndë ndodhi rreth orës 14:00 të së dielës në lagjen nr.10 në Korçë. Në dyqanin e kësaj lagjeje, Naxhip Mustafaj është konfliktuar me minorenin, pasi 13-vjeçari “i pabindur” nuk pranoi t’i lironte radhën. Atëherë, Mustafaj nxori një thikë që mbante me vete dhe e qëlloi dy herë në pjesën e barkut fëmijën, njëkohësisht fqinjin. Ngjarja shokoi klientët e shumtë dhe pronarin e dyqanit P.Prifti. Ata i dhanë ndihmën e parë 13-vjeçarit të përgjakur, ndërsa sinjalizuan edhe prindërit e tij. Këta të fundit çuan në spital në gjendje të rëndë minorenin me inicialet K.S. Mësohet se pas ngjarjes, Naxhip Mustafaj është larguar në shtëpinë e tij, madje ka marrë edhe disa ushqime në qyqan. Nga frika e thikës që mbante në dorë, shitësi i është bindur duke i dhënë asortimentet që ai donte. Sipas dëshmitarëve okularë dhe shitësit, ata kanë mbetur të shtangur kur panë fëmijën që ra përtokë. Alarmi u dha kur e panë të gjakosur, ndërsa kishte humbur ndjenjat. Policia e sinjalizuar për ngjarjen arrestoi në kushtet e flagrancës në banesën e tij 44-vjeçarin. Ai mësohet se ka shfaqur pendesë për krimin e kryer, ndërsa ka pohuar se gjithçka kishte ndodhur në gjaknxehtësi e sipër dhe në gjendje të dehur. Sipas burimeve, Mustafaj e kishte komshi fëmijën. Ai njihej në lagje si problematik, pasi në të shumtën e rasteve ishte i alkoolizuar. Policia tha se i arrestuari nuk rezulton të jetë me precedentë të mëparshëm. Ai u akuzua për vrasje me dashje të mbetur në tentativë. Blutë më pas morën në pyetje edhe pronarin e dyqanit si dhe disa klientë, të cilët u bënë dëshmitarë okularë të kësaj ngjarjeje. Sipas dëshmisë së tyre, fëmija kishte mbërritur i pari në dyqan. Pas tij ishte futur 44-vjeçari, i cili kishte tentuar të blinte para fëmijës. Por i mituri nuk pranoi t’i lironte radhën. Kaq është dashur që Mustafaj t’i kthehej atij me tone të ashpra, duke e akuzuar madje se ai i “tallte” nënën e moshuar kur e ndeshte në rrugë. “Unë do të blej para teje. Ti mos u ndiej që të më kthesh mua fjalët, pasi të njëjtën gjë bën edhe me nënën time. Ajo është e moshuar, por ti e ngacmon dhe tallesh sa herë që ndeshesh me të”. Kështu mësohet t’i jetë drejtuar 44-vjeçari fëmijës. Më pas ai ka nxjerrë nga xhepi thikën dhe e qëlloi duke e lënë pa ndjenja. Mësohet se i mituri është çuar me urgjencë në spitalin e Korçës. Sipas mjekëve, gjendja e tij është e rëndë për shkak të komplikacioneve. “Është goditur dy herë me thikë. Njëra prej tyre është tepër e rëndë, pasi i ka prekur organet jetësore, ndërsa goditja tjetër është më e lehtë, thuajse sa një gërvishtje”, bënë të ditur mjekët.

Aksionet tek "Elbasani", në hetim pronat e Arben Lazes

Prokuroria e Krimeve të Rënda fillon verifikimin e pasurive të Presidentit të klubit të futbollit Elbasani, pas arrestimit të tij me akuzën e trafikut të drogës. Lajmi u konfirmua nga burime zyrtare të organit të akuzës, sipas të cilave, shkresat zyrtare për verifikime, u janë nisur bankave të nivelit të dytë, sektorit të tatim-taksave dhe hipotekave. Të gjitha këtyre institucioneve u është kërkuar informacion nga Prokuroria, për të evidentuar aktivitetet e biznesit të Arben Lazes, llogaritë dhe depozitat e tij bankare si dhe pronat e paluajtshme. Një shkresë e tillë për verifikimin e pasurive, mësohet se u është dërguar edhe autoriteteve përkatëse të sportit, me qëllim verifikimin e aksioneve që Arben Laze zotëron pranë klubit të futbollit Elbasani. Lajmi konfirmohet nga burime zyrtare të Prokurorisë, sipas të cilave verifikimet e pronave dhe pasurive të Arben Lazes po bëhen për të sqaruar burimin e tyre. Duke e konsideruar aktivitetin e trafikut të drogës si një veprimtari fitimprurëse, Prokuroria e Krimeve të Rënda bazuar edhe në ndryshimet e viteve të fundit në legjislacion, kryen edhe verifikimin e pasurisë së personave të arrestuar. Procedura përfundon me sekuestrimin e pasurive në rast se provohet se zotëruesi i tyre i ka vendosur ato me anë të fitimeve në trafikun e drogës, çka konsiderohet burim financiar i paligjshëm. Organi i akuzës tha se ende nuk ka marrë përgjigje për pasuritë e Lazes, ndërsa pritet që një tablo e qartë për këtë të krijohet në ditët e para të vitit të ardhshëm, pasi institucionet që kanë marrë kërkesën, të bëjnë verifikimet e tyre. Arben Laze njihet publikisht si biznesmen dhe sponsor i ekipit të futbollit të qytetit të Elbasanit. Prokuroria po verifikon burimin financiar pas të dhënave paraprake, sipas të cilave i dyshuari zotëron disa prona të konsiderueshme.
Hetimi për trafikun
Gjatë kohës që Arben Laze dhe tre persona të tjerë të arrestuar bashkë me të, po qëndrojnë në ambientet e paraburgimit në Tiranë, Prokuroria po vijon procedurat e hetimit për akuzën trafik narkotikësh në formën e grupit të strukturuar kriminal. Gjatë këtyre ditëve mësohet se po zbardhen transkriptet e bisedave të përgjuara mes Arben Laze, vëllait të tij Fationit si dhe dy të arrestuarve të tjerë, Arben Prifti nga Fieri dhe Shkëlqim Hyzmo nga Lushnja. Burimet nga hetimi, konfirmuan se Laboratori Qendror Kriminalistik është duke realizuar së fundi ekzaminimin shkencor mbi masën e pluhurit prej 1043 gramë të dyshuar si heroinë, e cila u sekuestrua në makinën e Shkëlqim Hyzmos në Lushnje, pasi ky i fundit e kishte blerë atë nga vëllezërit Laze. Nga ana tjetër, katër të pandehurit dhanë deklarimet e tyre në gjykatë, ku tre prej tyre Arben Laze, Arben Prifti dhe Shkëlqim Hyzmo mohuan akuzën ndërsa Fation Laze, vëllai i Presidentit të Elbasanit, pranoi krimin duke përjashtuar nga përgjegjësia biznesmenin e njohur si sponsor i ekipit të Elbasanit në sportin e futbollit. Prokuroria i ka hedhur poshtë deklarimet e të pandehurve, duke pretenduar se biznesmeni Arben Laze dhe Arben Prifti, në bazë të hetimeve rezultojnë të implikuarit kryesorë në dosjen e koduar me emrin "Mesfushori". Sipas akuzës, Arben Prifti e ka porositur drogën tek Arben Laze, ndërsa ky i fundit ka përdorur vëllain e tij për të dorëzuar lëndën narkotike, e cila është marrë në dorëzim nga Shkëlqim Hyzmo, i cili ishte porositur nga Arben Prifti për të trafikuar heroinën. Një tentativë e tillë dështoi pasi katër të akuzuarit ishin në përgjim dhe Prokuroria ishte informuar për veprimet e tyre, duke bllokuar drogën menjëherë pas dorëzimit të saj.

Arben Laze, në qeli me fanellën e Elbasanit

Vetëm dy stema të verdha në gjoks dhe tre vija paralele në krah, me të njëjtën ngjyrë, prishin blunë e uniformës sportive të Arben Lazes, kreut të futbollit të Elbasanit, i burgosur për trafik narkotikësh. Në anën e majtë, mes të verdhës dhe blusë lexohej "1913", viti i themelimit të ekipit të Elbasanit, ndërsa stema e anës tjetër është ajo e bashkisë së qytetit. Sipër uniformës sportive, presidenti i burgosur për trafik droge, mbante veshur një xhup meshini, ndërsa në këmbë atlete sportive, ngjyrë kafe, për të cilat gardianët ishin treguar të kujdesshëm t'i hiqnin lidhëset. Biznesmenin 40-vjeçar Arben Laze, e takuam në qelitë ku të paraburgosurit takojnë avokatët. Ndodhej aty bashkë me tre të bashkakuzuarit me të, Shkëlqim Hyzmo, Arben Prifti dhe vëllain e vet Fation Laze. Fationi, njëlloj si vëllai më i madh, mbante gjithashtu veshur uniformën e skuadrës së Elbasanit. Vetëm pak minuta më parë kishte takuar avokatin e vet, me të cilin kishte diskutuar mbrojtjen dhe ankimin që do paraqiste në Gjykatën e Apelit kundër mbajtjes së tij në burg.
Presidenti Laze
Gjatë gjithë kohës, i dyshuari Arben Laze tymoste njëra pas tjetrës cigare, ndërsa fliste me dëshirë për futbollin e qytetit të tij. Për rreth 30 minuta, aq sa zgjati takimi me të, Laze tregoi për strategjitë e tij për të nxjerrë në krye të kampionatit skuadrën që sponsorizon prej disa vitesh. Ndërsa për akuzën e ngritur ndaj tij, biznesmeni Laze nuk preferoi të fliste, duke pretenduar se ishte i pafajshëm dhe se nuk kishte asnjë lidhje me çfarë akuzohej. Ai tregoi se kishte mbërritur të premten në qelitë e paraburgimit 313. Aty ishte transferuar nga qelitë e izolimit të Drejtorisë së Policisë së kryeqytetit, pasi ishte arrestuar më 23 dhjetor teksa kthehej nga Maqedonia për në qytetin e tij. Ndërsa duke folur për momentin arrestimit, Laze tha se nuk ishte e nevojshme që forcat policore ta prangosnin në mënyrë të dhunshme, pasi sipas tij, ai nuk kishte bërë rezistencë. Po kështu ai pohoi se kishte marrë nga familjarët pak ushqime dhe veshje, për shkak të ftohtit të stinës.
Festat në burg
Ndërkohë atmosfera festive e Vitit të Ri, kishte nisur të ndihej kudo në paraburgimet e kryeqytetit. Gjelat e detit të pjekur dhe ëmbëlsirat tradicionale kishin mbushur mëngjesin e djeshëm dy paraburgimet e kryeqytetit, atë 313 dhe 302. Familjarët e të arrestuarve mbanin radhë të gjata paraditen e djeshme, në hyrje të burgjeve për t'iu dërguar njerëzve të tyre të burgosur ushqimet e festave në qeli. Ambientet e përbashkëta të burgjeve ishin zbukuruar me pemë të Vitit të Ri, ndërsa nëpër mure ishin ekspozuar punime të të burgosurve. Administrata dhe sektori i edukimit të paraburgimit 302 pohuan se më 31 dhjetor do të organizojnë një ceremoni festive në mjediset e bibliotekës së burgut. Aty janë ftuar sportistë dhe humoristë kryeqytetas, ndërsa më pas atmosfera festive pritet të përhapet në të gjitha qelitë, ku do të shkojnë organizatorët për të uruar të burgosurit.

Gurra, zbukuron pemën e Vitit të Ri në burgun 302

TIRANE - Në mjediset e bibliotekës së burgut 302 kishin filluar përgatitjet për festën e Vitit të Ri, e cila do organizohet mesditën e nesërme, më 31 dhjetor. Një grup të dënuarish kishte nisur zbukurimin e ambienteve dhe pemës tradicionale, ndërkohë që punët mbi-këqyreshin nga punonjës të sektorit të edukimit. 27-vjeçari Elis Gurra, emri i të personi që u bë publik dy muaj më parë, pasi tentuan ta varrosnin të gjallë tre persona, ishte një nga të paraburgosurit që po merrej me zbukurimin e ambienteve të festës. Gurra dhe disa bashkëvuajtës, kishin zbukuruar pemën që ndodhej në bibliotekë, ndërsa ishin kujdesur edhe për mjedisin përreth. Ndërkohë autoritetet e burgut pohojnë se do t'ju ofrojnë për festë të gjithë të arrestuarve ëmbëlsirë, fruta dhe nga një shishe birrë pa alkool. Po kështu ata pohuan se nuk do të ndalonin apo censuronin sasitë e ushqimeve tradicionale që do të sillnin familjarët për njerëzit e tyre pas hekurave të burgut. Familjarët e të dënuarve, të cilët ishin njoftuar për një takim të shkurtër shtesë me të afërmit e tyre që ndodhen në qeli, mbanin radhë të gjata jashtë dyerve të burgjeve 313-të dhe 302, në pritje të momentit për të dërguar ushqimet që kishin përgatitur në familje.

Në gjyq, 15 hakerat e bankave

Njësia Task-Force kundër krimit eko-nomik dhe korrupsionit, përfundon hetimet dhe dërgon në gjykatë dosjen penale ndaj 15 personave të konsideruar si grupi më i madh i hakerave shqiptarë në fushën e vjedhjeve dhe mashtrimeve bankare. Lajmi konfirmohet nga burime zyrtare të Prokurorisë së Tiranës, sipas të cilave dosja penale e koduar me emrin "Matrix" dorëzohet ditën e sotme në gjykatë me 15 persona të pandehur për disa akuza penale. Sipas burimeve të hetimit, 11 prej të pandehurve akuzohen se kanë kryer veprat penale të mashtrimit dhe falsifikimit të letrave me vlerë, ndërsa katër të pandehur të tjerë fajësohen për moskallëzim krimi, pasi kanë qenë në dijeni të aktivitetit kriminal të miqve të tyre, por nuk kanë denoncuar në polici. Prokuroria tha se 13 prej të pandehurve i kanë pranuar akuzat që janë ngritur ndaj tyre, pasi janë përballur me përgjimet telefonike disamujore që u janë bërë bisedave të tyre. Një tjetër provë e akuzës kanë qenë imazhet filmike të fiksuara nga bankomatet, nga të cilat janë vjedhur mbi 400 llogari bankare të personave të dëmtuar. Përmes kartave të klonuara të kreditit, anëtarët e bandës së hakerave kanë hyrë në llogaritë e shtetasve të ndryshëm, duke tërhequr shuma të konsiderueshme financiare. Veprimet kriminale të të pandehurve, sipas Prokurorisë, kanë filluar në gjysmën e dytë të vitit 2007 dhe kanë vazhduar për rreth nëntë muaj deri në 6-mujorin e parë të vitit 2008.
Mashtrimet bankare
Endrit Gjergjani (Laro) akuzohet se është drejtuesi i grupit të 15 të rinjve të pandehur në dosjen "Matrix". Gjergjani, i cili ka pranuar akuzën, kishte blerë një pajisje elektronike me të cilën shkruante dhe formatonte kartat e kreditit, të cilat ua shpërndante të arrestuarve të tjerë. Këta të fundit, përfshi edhe vetë babanë e Endrit Gjergjanit, i vinin në punë kartat e klonuara të kreditit, për të tërhequr shuma nga llogaritë e personave të ndryshëm në Evropë dhe Kanada. Duke komunikuar përmes internetit me hakera rusë dhe anglezë, Enrdit Gergjani merrte prej tyre kodet e kartave të kreditit, duke u paguar bashkëpunëtorëve të tij jashtë vendit shuma prej 500 euro me anë të agjencive të transfertave. Pasi merrte të dhënat përmes një pajisje klonimi, Gjergjani hidhte të dhënat në karta krediti të boshatisura, duke prodhuar në këtë mënyrë një dokument "Mastercard" ose "Visa", identik me zotëruesit e llogarive bankare. Kartat e klonuara u shpërndaheshin më pas anëtarëve të tjerë të grupit, të cilët me kodet e vjedhura kanë kryer mbi 400 tërheqje nga bankomatet në Tiranë, Durrës, Fier e Vlorë. Tërheqjet e parave nga të pandehurit janë dokumentuar për shkak se bankomatet ku janë vënë në përdorim kartëkreditet e klonuara kanë fiksuar kohën e veprimeve të hakerave si dhe kanë regjistruar me anë të kamerave veprimet e kryera nga të akuzuarit.

Banda e Durrësit, avokatët akuza gjykatës

TIRANE - Seanca e djeshme e gjyqit të "Bandës së Durrësit" te Krimet e Rënda dështoi përsëri për shkak të mungesës së katër avokatëve. Edhe në gjyqin e djeshëm nuk kanë munguar replikat e ashpra mes avokatëve dhe gjykatës. Shtyrja e seancës ka sjellë edhe dështimin e radhës të kërkesës së Prokurorisë për pyetjen në sallën e gjyqit të bashkëpunëtorit dhe të penduarit të drejtësisë, Adriatik Coli. Në seancën e djeshme, e cila ishte e fundit për këtë vit, gjykata nuk pranoi për të disatën herë ndarjen e çështjes për të gjykuar veç e veç të pandehurit. Mbrojtësi ligjor i Selman Hetit, Sokol Azisi, përsëriti kërkesën për ndarje të dosjes. Në fjalën e tij drejtuar trupit gjykues, avokati i Hetit akuzoi Prokurorinë si shkaktare të zvarritjes së procesit gjyqësor në ngarkim të "Bandës së Durrësit". "Për shkak të vetë organit të akuzës, procesi nuk po vazhdon siç duhet. Zgjidhja është veçimi i çështjes", u shpreh ai. Avokati nuk saktësoi se për kë e kërkonte ndarjen, duke pohuar se "këtë gjë e lë në çmim të gjykatës". Ndërsa avokati mbrojtës i të pandehurit Indrit Taullai, Riza Icka, akuzoi trupin gjykues si shkaktar të vonesave në gjykimin e çështjes. Ai gjithashtu kërkoi ndarje të dosjes, për të mundësuar gjykimin normal të saj. "Atje ku ju intereson e ndatë çështjen", u shpreh ai drejt gjykatës. Në përfundim gjykata vendosi zëvendësimin e katër avokatëve që mungonin me avokatë të caktuar kryesisht prej saj.

Zyrtarët, 21.5 vjet burg e 68 milionë gjobë

TIRANE - Gjykata e Tiranës vendosi dje të dënonte me 21.5 vjet burg dhe 6.8 milionë lekë të reja gjashtë të pandehurit e dosjes "Hipoteka". Vendimi u shpall nga një trup gjykues i kryesuar nga gjykatësi Petrit Çomo, i cili gjeti fajtorë dhe dënoi me 8 vjet burg dhe 3 milionë lekë 55-vjeçarin Veiz Senko, i cilësuar nga gjykata si sekser i grupit. Po kështu gjykata dënoi me 2 dy vjet dhe 510 mijë lekë të reja gjobë sekserin tjetër të këtij grupi Halil Hima, 47 vjeç. Për ish-oficerin e SHKB-së së policisë, Dali Hakorja, 52 vjeç, gjykata akordoi 4.5 vjet burg dhe 1.2 milionë lekë gjobë. Ndërsa për tre specialistët e Hipotekës, Artan Mehmeti, 41 vjeç; Agron Tafa, 42 vjeç dhe Enton Babameto, 33 vjeç, gjykata vendosi respektivisht 2 vjet burg e 1.2 milionë lekë gjobë; 3 vjet burg e 300 mijë lekë gjobë dhe 2 vjet burg e 600 mijë lekë gjobë. Seancën e parë të procesit, gjykata u pranoi të akuzuarve kërkesën për aplikimin e gjykimit të shkurtuar, duke bërë që dënimeve të mësipërme t'iu zbritet një e treta. Në vendimin e djeshëm gjykata i gjeti fajtorë të akuzuarit të jenë përfshirë në falsifikimin e dokumentacionit të regjistrimit të një sipërfaqeje trualli rreth 14 mijë metër katrorë në kryeqytet.

Krimet e Rënda,6 vjet e 4 muaj burg Zharkut

TIRANE - Gjykata për Krimet e Rënda dha dje verdiktin përfundimtar për të pandehurin Mehmet Zharku të arrestuar nga operacionin "Morina" në maj të këtij viti. Në seancën e djeshme, pesëshja gjykuese e kryesuar nga gjyqtari Fran Prendi, shpalli Zharkun fajtor dhe dënoi atë me 6 vjet e 4 muaj heqje lirie dhe me 4 milionë lekë gjobë për akuzën e "trafikut të armëve dhe municioneve, kryer në formën e importimit dhe tregtimit". Mehmet Zharku u arrestua nga policia në 1 maj 2008 pranë "Farmacisë nr. 10" në kryeqytet, teksa kishte një arsenal të tërë armësh në automjetin e tij. Sipas kërkesës për gjykim të Prokurorisë, Zharku kryente tregti armësh me shtetas kosovarë kundrejt shumave të ndryshme. Sipas Prokurorisë, Zharku kryente tregti me shtetas kosovarë, duke i blerë atyre pistoleta të tipave të ndryshme në këmbim të granatahedhësve, predha kundërtank, granata dore e fishekë të ndryshëm. Në momentin e arrestimit policia i gjeti dhe sekuestroi atij 50 pistoleta mini-zastava, 24 copë pistoleta "Bereta", 1 granatahedhës, 6 predha kundërtank, 120 granata dore, 120 ndezës granatash dhe 150 copë fishekë të llojeve të ndryshme.

Shkodër, pranga hajdutit të motoçikletave

SHKODËR - Policia e Shkodrës ka ndaluar 26-vjeçarin Ridvan Kopliku, lindur e banues në lagjen “Perash” në qytetin e Shkodrës, i cili dyshohet se është autor i vjedhjes së disa motoçikletave të tipeve të ndryshme, në kohë e vende të ndryshme. Ndalimi i tij është bërë pas urdhrit të lëshuar nga prokuroria e Shkodrës dhe me cilësinë e provës materiale janë gjetur e bllokuar 7 motoçikleta të tipeve dhe markave të ndryshme.

Sipas policisë, është dokumentuar vjedhja e një motoçiklete tek kryqëzimi i ish-Degës së Punëve të Brendshme, në pronësi të shtetasit E.Z, ngjarje kjo e ndodhur më 07.11.2008, vjedhja e një motoçiklete në pronësi të shtetasit Gj.Gj., ngjarje e ndodhur më 05.12.2008, si dhe vjedhja e një motoçiklete tek Sahati, mjet ky në pronësi të shetasit Sh.M. Burime nga policia theksojnë se po punohet për zbulimin e gjetjen e motoçikletave të tjera të vjedhura nga ky shtetas.

Elbasan, përplas një 54-vjeçar e largohet nga vendngjarja

ELBASAN- Ka qenë fatale përplasja për një shtetas, i cili është përfshirë nga një mjet me targa të huaja dhe ka gjetur vdekjen e menjëhershme. Për shkak se aksidenti është regjistruar rreth orës 19:00 në aksin rrugor Elbasan-Metalurgji, i ndihmuar nga errësira drejtuesi i mjetit është larguar nga vendi i ngjarjes.

Gjithsesi, drejtuesit e tjerë kanë mundur të identifikojnë automjetin, i cili rezulton të jetë e tipit “FIAT” me targa të huaja CZ 695SH. Ndërkohë, nga ana e familjarëve u bë e mundur rreth dy orë pas aksidentit edhe identifikimi i viktimës, i cili rezultoi të ishte Xhemal Kashari, 54 vjeç, banor i lagjes “Haxhias” nga qyteti i Elbasanit.

Ndërsa shërbimet e policisë rrugore janë përqendruar në kërkimin e mjetit që shkaktoi aksidentin. Trupi i pajetë i viktimës është trasportuar për në morgun e spitalit.

Ulet numri i emigrantëve të kthyer

KAPSHTICË- Bie fluksi i emigrantëve që vijnë për festat e fundvitit në atdhe. Në pikën kufitare të Kapshticës, në 24 orët e fundit regjistrohet një numër shumë i vogël emigrantësh që kanë hyrë nga Greqia në atdheun e tyre. Sipas komandantit të pikës kufitare të Kapshticës, në 24 orët e fundit kanë hyrë rreth 3500 emigrantë shqiptarë me rreth 800 automjete.

Ky është dhe numri më i vogël i këtyre ditëve, ndërsa sipas autoriteteve shqiptare të këtij vendkalimi kufitar kjo lidhet edhe me kushtet e vështira të motit, ku temperatura në këtë pikë kalimi ka kaluar -7 gradë celcius. Por nga ana tjetër, vihet re një ulje e numrit të emigrantëve që vijnë për festat, kjo dhe për shkak të krizës globale, ndonëse pritet që të ketë dhe një tjetër fluks para natës së ndërrimit të viteve.

Pala shqiptare vazhdon të punojë me gjashtë sportele vetëm për hyrjet nga Greqia, teksa policia greke nga ana e saj ka tre sportele në dispozicion për daljet nga shteti i saj. Pavarësisht punës së pandërprerë, në të dyja pikat e kalimit nuk janë shmangur radhët e gjata. Madje, gjatë së hënës fenonemi është zhvendosur në daljet nga Shqipëria ku rreth 120 automjete kanë qëndruar për më shumë se 4 orë në radhë derisa kanë përfunduar procedurat në të dyja pikat e kalimit.

Librazhd, ndihma për 138 familje të varfra

LIBRAZHD - Me rastin e Vitit të Ri, Bashkia e Librazhdit ndau dje ndihma në ushqime dhe në lekë për 138 familje të varfra të këtij qyteti. Ishte një nismë e kryebashkiakut Kastriot Begaj që bëri të mundur që të gjitha familjet e varfra dhe që trajtohen me ndihmë ekonomike dhe pa punë të ndihmohen sadopak dhe të ndihen të kënaqur dhe të festojnë Vitin e Ri 2008 si të gjitha familjet e tjera. Kjo është hera e parë për 18 vjet që këta njerëz të varfër trajtohen nga bashkia.

Sipas Agim Toles, ish-polic (gështenjapjekës) por që ka vite qëështë pa punë dhe shumë i varfër thotë që “ndihem i kënaqur që bashkia vuri dorën në zemër për ne fukarenjtë”. Ndërsa Farie Kurti, një grua me ngjyrë, thotë që “neve nuk e kemi nginjur barkun asnjëherë, por sivjet të paktën do të kënaq fëmijët e mi, kjo falë dhuratës së bashkisë Librazhd, e cila e vuri dorën në zemër edhe për neve njerëzit e zinj”.

Librazhdi është një ndër rrethet më të varfra të zonës verilindore dhe të të gjithë qarkut të Elbasanit, rrethi ku ka shumë lista për ushqime nëpër dyqane dhe ku papunësia është shumë e madhe dhe mungojnë projektet e punësimit dhe ndihmat e qeverisë. Por këtë Vit të Ri, rreth 450 veta do të mbeten të kënaqur nga kjo ndihmë modeste e Bashkisë së Librazhdit.
Sipas të dhënave të nxjerra nga zyra ekonomike, një familje e varfër u trajtua me:
-20 mijë lekë të vjetra në dorë
-2 kg miell
-2 kg vaj
-dy pula
-2 kg sheqer
-2 kg oriz etj.

Gjelat e Detit, Festa e Hajdutëve

BERAT - Dje në fshatin Koridëz, rreth orës 3 pas mesnate persona të paidentifikuar kanë hyrë në banesën e Altin Isufit ku kanë vjedhur 17 gjela deti. Reshjet e shiut që nuk kanë ndalur gjatë gjithë natës i kanë ndihmuar hajdutët, për të eliminuar zhurmat dhe gjurmët.

Në banesë ndodhej vetëm gruaja me dy fëmijët.Në mëngjes, kur e zonja e shtëpisë është ngritur për të ushqyer shpendët ka kuptuar edhe mungesën e tyre. Pas mbërritjes së policisë në vendngjarje, banorë të këtij fshati bënë të ditur se rasti i Isufit nuk ishte i pari ku janë vjedhur gjelat e detit.

Edhe më parë tre banorëve të tjerë u janë grabitur gjatë natës shpendët. Ndërkohë, nga policia janë shoqëruar disa djem që njihen problematikë në fshat, megjithëse ndaj tyre nuk është ngritur asnjë akuzë.

Shkodër, investimet në komuna nuk realizohen

SHKODËR - Në gjashtë komunat e zonave të thella malore të rretheve Shkodër e Malësi e Madhe, investimet e planifikuara për vitin 2008 nuk pritet të realizohen më shumë se 60%. Konkretisht kjo ndodh për komunat Pult, Shosh, Shalë, Shllak e Temal në rrethin e Shkodrës dhe për komunën Kelmend në rrethin e Malësisë së Madhe.

Fondi i planifikuar për investime në këto komuna ishte 57 milionë e 106 mijë lekë, por për periudhën janar - fundi i nëntorit, sipas të dhënave zyrtare të prefekturës së qarkut Shkodër, janë investuar 33 milionë e 592 mijë lekë, ose rreth 50%, ndonëse këto zona njihen për vështirësitë që kanë për të jetuar dhe nevojat e mëdha për investime.

Ndër këto 6 komuna, e vetmja që premton për realizimin e investimeve të këtij viti është komuna Shalë, ku nga 18 milionë e 948 mijë lekë, janë realizuar deri tani 16 milionë e 661 mijë lekë. Më mirë në drejtim të realizimit të investimeve paraqiten komunat Bërdicë e Bushat, ku në Bërdicë sipas kryetarit të kësaj komune Qamil Xhurreta është realizuar 100% plani i investimeve, ndërsa në Bushat është realizuar 80%.

Trafiku, probleme në akset kryesore, rrugorët në vështirësi

ELBASAN- Segmenti më i ngarkuar i qytetit të Elbasanit është përcaktuar ai i Kryqëzimit të Cërrikut ku ngarkesa e Unazës i bashkohet asaj të rrugës dalëse në pjesën jugore të qytetit ku është përqendruar tregu i shpendëve dhe ai i mallrave industrialë. Vështirësitë në trafik janë shtuar sidomos me ardhjen e emigrantëve. Sipas të dhënave të para, janë rreth 2 mijë automjete me targa të huaja që qarkullojnë më tepër në segmentet rrugore të Elbasanit.

Problem kryesor në trafik mbetet ai tek Shtëpia e Kulturës dhe kryqëzimi “1 Maj” për shkak të punimeve që pozhvillohen për realizimin e investimit nga Buxheti i Shtetit. Drejtuesit e mjeteve thonë se policia rrugore dhe institucionet lokale duhet të studiojnë qarkullimin për t’i dhënë më shumë frymëmarrje pasi aktualisht ka segmente mjaft problematike që vështirësojnë së tepërmi qarkullimin e mjeteve.

Aktualisht qendra e qytetit përballë teatrit “Skampa”, si dhe aksi tjetër kryesor tek kryqëzimi “Dinamo” janë bërë më të vështirat për t’u menaxhuar nga ana e policisë rrugore. Sipas drejtuesve të Qarkullimit në Komisariatin e Elbasanit situata është vështirësuar jo vetëm me ardhjen e emigrantëve, por edhe me problemet me rrugët.

Kështu, një investim që po kryhet tani në kryqëzimin “1 Maj” ka sjellë mjaft probleme në kufizimin e trafikut dhe situata paraqitet mjaft problematike.

Kështu vetëm ditët e fundit në rrugët kryesore me trafik janë dëmtuar një kalimtar dhe një drejtues biçiklete. Zbatimi i rregullave të qarkullimit rrugor është edhe objektivi i rrugorëve të cilët gjatë këtyre ditëve kanë nisur edhe një aksion për verifikimin e dokumenteve të drejtuesve të automjeteve.

Kontrabanda dhe trafiku, rriten masat në kufi




SHKODËR - Përvoja e viteve të kaluara ka treguar se periudhat e fluksit shfrytëzohen shpesh prej trafikantëve. Një fakt i tillë ka bërë që të merren masa për parandalimin e goditjen e trafiqeve të ndryshme që mund të zhvillohen si në kufirin e gjelbër, në pikat e kalimit kufitar që ka në qarkun e Shkodrës, si dhe parandalimi i kalimeve të paligjshme të kufirit të gjelbër me shtetin malazias.

Sipas drejtorit rajonal të kufirit dhe migracionit në qarkun e Shkodrës, drejtues Besnik Zela, gjatë vitin 2008 janë evidentuar 7 raste të kontrabandës së mallrave dhe 24 raste të kontrabandës së mallrave që paguhet akcizë. Nga 7 rastet, ku në pjesë të ndryshme të vijës kufitare tokësore e ujore që lidh Shqipërinë me Malin e Zi janë kapur mallra kontrabandë, 4 kanë pasur 5 autorë, ndërsa në 3 raste autorët nuk kanë mundur të identifikohen, pasi kanë braktisur mallin dhe duke përfituar nga errësira dhe terreni janë larguar.

Ndërsa për rastet e kontrabandës së mallrave të akcizës, në 12 prej tyre janë marrë masa administrative sipas Kodit Doganor. Drejtori rajonal i kufirit dhe migracionit në qarkun e Shkodrës, Besnik Zela, për gazetën “Shekulli” shton se gjatë vitit që po mbyllet nuk kanë munguar rastet e tentativave për trafiqe të ndryshme përmes vijës kufitare të këtij qarku.

Kështu, nga shërbimet e policisë kufitare të qarkut Shkodër janë identifikuar një rast trafiku femrash për shfrytëzim prostitucioni, ku është ndaluar autori, tre raste trafiqesh mjetesh motorike, ku janë ndaluar 3 persona, ka pasur një rast mbajtje pa leje të armëve të ftohta dhe një rast dhënie ndihmë për kalim të paligjshëm të kufirit.

Nga policia kufitare e Shkodrës janë ndaluar 13 persona të shpallur në kërkim, nga të cilët 11 shtetas shqiptarë dhe 2 shtetas të huaj, të cilët kanë tentuar të hyjnë në Shqipëri përmes kufirit me Malin e Zi. Lidhur me praninë e aktiviteteve të paligjshme në vijën kufitare, gjatë 2008-s është identifikuar një rast trafik lëndësh narkotike, 2 raste të peshkimit të paligjshëm, si dhe janë marrë masa administrative duke gjobitur 67 shtetas, nga të cilët 69 janë shqiptarë dhe 8 të huaj.

Gjashtë shtetas të huaj janë gjobitur për qëndrim të paligjshëm në Republikën e Shqipërisë, ndërsa është bërë urdhër largimi dhe për tre shtetas të huaj. Nga 167 shtetas të huaj që janë pajisur me leje qëndrimi, 64 kanë hyrë për here të parë në territorin e shtetit shqiptar dhe 45 prej tyre kanë marrë leje qëndrimi 5-vjeçar.

Deri më 1 dhjetor 2008, përmes pikë kalimeve kufitare të qarkut të Shkodrës kanë hyrë 301 843 shtetas shqiptarë dhe 238 974 shtetas të huaj dhe 179 921 automjete, ndërsa kanë dalë 325 344 shtetas shqiptarë, 221 058 shtetas të huaj dhe 179 374 automjete.

Aksidenti tragjik iu merr jetën 4 të rinjve




Viktimat e aksidentit ishin nga qyteti i Durrësit. Shkaku i ngjarjes, shpejtësia e madhe

TIRANË- Një aksident i rëndë rrugor i ka marrë jetën katër të rinjve mëngjesin e djeshme në segmentin rrugor Fushë Krujë-Vorë në afërsi të vendit të quajtur Ura e Gjolës. Automjeti tip-Renault me targa të huaja “VZ 66 YK”, në të cilën po udhëtonin katër djem të rinj ka dalë nga rruga.

Përplasja me bordurat ka qenë fatale për katër të rinjtë duke iu shkaktuar atyre vdekjen. Policia mbërriti menjëherë në vendin e ngjarjes për të sqaruar rrethanat e aksidentit, ndërsa njëri prej të rinjve u nis me urgjencë në Spitalin Ushtarak por ndërroi jetë gjatë rrugës. Sipas policisë, viktimat e aksidentit të rëndë janë Lorenc Pirra, 28- vjeç, Orjent Muça, 25-vjeç, Ilir Haxhi, 26-vjeç, dhe Redi Pina, 19-vjeç, të katër banues në Durrës.

Aksidenti
Rreth orës 7:00 të ditës djeshme, katër të rinjtë nga qyteti i Durrësit, Lorenc Pirra, Orjent Muça, Ilir Haxhi dhe Redi Pina po udhëtonin me një automjet në aksin rrugor Fushë-Krujë-Vorë. Mësohet se automjeti tip-Renault me targa të huaja drejtohej nga 28-vjeçari Lorenc Pirra.

Në momentin që automjeti po lëvizte në vendin e quajtur Ura e Gjolës drejtuesi ka humbur kontrollin dhe makina nga dalë nga rruga. Makina është përplasur te një mbajtëse reklame. Tabela e reklamës ka rënë mbi makinë duke zënë edhe katër të rinjtë brenda.

Kalimtarët e rastit lajmëruanmenjëherë policinë. Forca të shumta të policisë rrugore mbërritën në vendin e ngjarjes për të zbardhur rrethanat e aksidentit. “I vetmi që kishte shenja jete ishte 25-vjeçari Orjent Muça, ndërsa tre të tjerët kishin gjetur vdekjen e menjëhershme. I plagosuri u nis me urgjencë në spital por nuk mundi të mbërrinte gjallë në duart e mjekëve”, -thanë burimet policore që ishin të pranishme në vendin e aksidentit.

Shkaku
Ekspertët e policisë rrugore nisën menjëherë hetimet për të zbardhur rrethanat e këtij aksidenti të rëndë që shkaktoi vdekjen e katër personave. Nga hetimet e para policia tha se makina po udhëtonte me shpejtësi të madhe në momentin që drejtuesi i saj ka humbur kontrollin.

Makina ka dalë nga rruga dhe është përplasur te një mbajtëse reklame. Më pas tabela e reklamës ka rënë mbi automjet duke sheshuar makinën, gjë që ka qenë fatale për jetën e katër personave. Policia e ka pasur të vështirë nxjerrjen e personave nga makina e cila ishte shkatërruar tërësisht.

Trupat e pajetë të të rinjve u transportuan në morgun e spitalit për ekzaminime të mëtejshme. Efektivat e policisë bllokuan për disa orë aksin rrugor ku ndodhi aksidenti me qëllim këqyrjen e vendit të ngjarjes.

VIKTIMAT
Lorenc Pirra, 28- vjeç
Orjent Muça, 25-vjeç
Ilir Haxhi, 26-vjeç
Redi Pina, 19-vjeç

“Jam 75-vjeç e dënuar për drogë, më lironi”




TIRANË- Një grua 75-vjeçare është e detyruar të kalojë pesë vite pas hekurave të burgut e dënuar për një krim që ndoshta nuk e ka kryer kurrë. Ajo akuzohet për kultivim të bimëve narkotike dhe ndoshta po vuan pesë vitet e fundit të jetës në mungesë totale të lirisë.

Kësaj i shtohen edhe dy nipërit e vegjël të mbetur jetimë. Për ta, kjo e moshuar është njeriu i vetëm që mund t’i rrisë. Prej më se dy muajsh gruaja dërgon letra pa fund drejt institucioneve shtetërore dhe sot shpresa e saj e vetme është Presidenti i Republikës. Falja e dekretuar çdo vit prej tij mund ta nxjerrë gruan nga burgu dhe t’i japë mundësinë që të qëndrojë pranë nipërve të saj. Me pak fjalë kjo është historia tragjike e Feride Bakos nga një fshat i Fierit.
Gjithçka ka nisur pothuajse një vit më parë kur policia e Fierit zhvilloi një kontroll të befasishëm në fshatin Mbyet. Uniformat blu zbuluan disa parcela me hashash të mbjella në një prej tokave të fshatit. Bima narkotike u korr dhe “hetimi” i mëtejshëm zbuloi se ajo ishte mbjellë në tokën që ishte në pronësi të 75-vjeçares Feride Bako.

Kjo e fundit nuk u arrestua menjëherë por çështja shkoi në prokurori. Edhe ky institucion kreu hetimet e tij dhe vendosi të konsiderojë Feride Bakon si fajtore për kultivim narkotikësh. Çështja e gruas që me vështirësi qëndronte në këmbë e jo më të kultivonte hashash kaloi në gjykatë dhe kjo e fundit e shpalli fajtore për veprën e rëndë të kultivimit të drogës. E moshuara u dënua me pesë vjet dhe menjëherë policia kreu arrestimin.
Ferideja u dërgua në qelitë e burgut ndërsa në shtëpi mbeti vetëm i shoqi dhe dy nipërit e mitur. Ata janë fëmijët e djalit të saj, i cili fatkeqësisht nuk jeton më. Djali i Feride Bakos ka vdekur disa kohë më parë në Greqi si pasojë e një aksidenti automobilistik dhe të vetmit që kujdeseshin për fëmijët ishin gjyshërit e tyre.

Por vetëm dy muaj pas burgosjes së Feridesë, edhe bashkëshorti i saj ndërron jetë. Vdekja e tij lë për herë të dytë “jetimë” dy fëmijët. Ata kanë braktisur shkollën dhe bëjnë ç’të mundin për të fituar bukën e gojës. Tashmë gruaja e moshuar jeton vetëm me nipërit në mendje.

Madje ajo kursen ndopak nga ushqimet e burgut me qëllimin e vetëm që të ketë diçka për t’iu dhënë nipërve kur t’i takojë. Në rast se nuk i takon përpara Vitit të Ri, ajo do t’iu dërgojë nipërve katër kokrrat e vetme të portokallit që ka mundur të ruajë gjatë këtyre ditëve. Prej dy muajsh Ferideja është në pritje të një faljeje.

Apel Presidentit te Republikes, te fale 75-vjeçaren Feride Bako ne prag te Vitit te Ri
E gjithë Shqipëria, madje e gjithë bota shqipfolëse, ka ndjekur përmes ekranit historinë tragjike të Feride Bakos, gruas 75-vjeçare, që mbahet në burg për kultivim bimësh narkotike, pasi ka humbur djalin emigrant, ka humbur të shoqin dhe ka mbetur e vetmja mbështetje për nipërit e saj.

Feride Bako është simboli i një drame shoqërore, ku ajo nuk është i vetmi personazh, sepse të tjera gra, gjyshe apo nëna familjesh që jetojnë nën minimumin jetik, gjenden pas hekurave të burgut për një kundravajtje ligjore të kryer në humnerën e varfërisë e kulmin e një lufte rrëqethëse për mbijetesën e familjes e të fëmijëve të tyre.
Drama e pashoqe e gruas 75-vjeçare dhe e grave që vuajnë burgun për të njëjtën arsye nuk është thjesht drama e saj, apo e një grushti grash fatkeqe, por është drama jonë e përbashkët, në një atdhe ku skamja shtyn në skaje ekstreme të mbijetesës njerëz të thjeshtë, familjarë të dëshpëruar, gjyshe e prindër, që humbasin fuqitë për të kërkuar dritën në tunelin e pafund të varfërisë.
Nënë Ferideja duhet të kthehet në shtëpi, tek fëmijët e djalit të saj të vdekur. Çdo grua që mbahet në burg, për të njëjtin shkak ndërkohë që me dhjetëra e dhjetëra fëmijë janë rrugëve në mëshirë të fatit, pa gjyshen apo nënën e tyre, duhet të ketë shansin e një trajtimi rast pas rasti të mundësisë së faljes në bazë të një ligji të veçantë.
Shteti, shoqëria, të gjithë ne, duhet t'i kërkojmë dhe gjejmë gjetkë rrënjët e krimit të kultivimit e trafikimit e kultivimit të bimëve narkotike, aty ku ato janë realisht. Këto rrënjë ushqehen nga varfëria, zhvillohen në territore ku s'ka politika sociale e ku s'ka as kontrolldhe pastaj as barazi para ligjit, dhe ç'është më e keqja, mbeten të paprera, pikërisht sepse të tjerë janë ata që fitojnë nga kjo tregti, e të tjerë janë ata që kriminalizohen e dënohen deri në absurd, si në rastin e Feride Bakos.
Kriminalizimi i një plake 75-vjeçare dhe dënimi i saj, e një grushti grash fatkeqe, të cilat në bilancet e luftës ndaj trafikut të drogës figurojnë si shifra suksesi, është në fakt një padrejtësi e madhe që vetë shteti dhe shoqëria duhet ta vënë në vend.
I kam kërkuar ekspertëve tanë, që t'i vënë në dispozicion Grupit Parlamentar të Partisë Socialiste,një propozim konkret për të trajtuar këtë grup fajtorësh pa faj përmes një nisme që duhet t'i japë secilës prej tyre, një shans për t'u trajtuar brenda kornizës së një amnistie, sigurisht rast pas rasti.
I bëj njëkohësisht apel Presidentit të Republikës, që me përgjegjësinë që i jep ligji, që të falë 75-vjeçaren Feride Bako dhe t'i japë mundësinë të përqafojë nipat e saj në vigjilje të Vitit të Ri.