Ngjarje te aktualitetit

nga ARBRI Thu Sep 18, 2008 8:43 am

Ketu mund te postoni te gjitha lajmet e aktualitetit shqiptar

nga Tetovarja Fri Nov 21, 2008 3:12 pm

Bashkia ndalon hapjen e shesheve te reja per ndertim

Një numër çekiçësh që thërrmojnë malin e Sarandës për të hapur sheshe të reja ndërtimi janë detyruar të heshtin. Ato janë bllokuar teksa punonin pa dokumentacionin e kërkuar në zonën Turizëm-Kanali i Çukës. Shkak është bërë kërkesa më e re e urbanistikës së Bashkisë së Sarandës pas tragjedisë së Gjirokastrës, për t‘i shtuar dokumentacionit të firmave ndërtuese edhe relacionin gjeologjik të truallit që përgatitet për ndërtim. Janë disa çekiçë që nuk janë lejuar të vazhdojnë punën pa këtë leje. Bllokimi është bërë gjatë një operacioni të policisë bashkiake, të nisur prej disa ditësh. Remzi Bani, shef i Policisë Bashkiake të Sarandës, tha se nuk janë lejuar të punojnë ato mjete të rënda që janë gjetur në gërmim të sipërfaqeve për troje ndërtimi, pasi nuk kanë paraqitur dokumentin e kërkuar mbi relacionin gjeologjik. Disa drejtues të këtyre mjeteve janë gjetur pa këtë dokument në hyrje të rrugës nr. 4, si dhe në rrugën nr. 5 dhe në zonën e Marinës, në afërsi të shkollës së ciklit të ulët.

nga Tetovarja Fri Nov 21, 2008 3:14 pm

Prokuroria e Krimeve te Renda “rrethon” Lazaratin

Lazarati, fshati më problematik në Shqipëri për sa i përket kultivimit të hashashit, vihet në shtetrrethim. Prokuroria e Krimeve të Rënda urdhëron policinë lokale që të mbajë nën vëzhgim të gjithë personat që dyshohet se kultivojnë dhe trafikojnë lëndë narkotike drejt Greqisë. Pas arrestimit të Klodian Bashës, me 108 kilogram hashash, disa ditë më parë, në qytetin e Gjirokastrës, policia lokale ka bllokuar të gjitha shtigjet e fshatit, madje ka vendosur patrulla policie në çdo rrugë dalëse. Qëllimi është ndalimi i trafikut të drogës, pasi ka të dhëna se disa familje në fshat kanë korrur të mbjellat dhe lënda e parë është gati për në treg. Pas arrestimit të elementëve të parë kriminalë, policia e Gjirokastrës ngriti akuzën e trafikut ndërkombëtar të lëndëve narkotike, vepër penale që është në kompetencën e Prokurorisë së Krimeve të Rënda në Tiranë. Ajo ka nisur një hetim të gjithanshëm për elementët me precedentë kriminale që dyshohet se kalojnë drogën nga qyteti i gurtë në drejtim të Greqisë. Burime nga Prokuroria e Krimeve të Rënda thanë dje se kanë urdhëruar përgjime dhe vëzhgime të elementëve kriminalë, pasi dyshohet se një grup i strukturuar kriminal vepron në fshatin rebel. Një pjesë e elementëve kriminalë janë evidentuar dhe në ditët në vijim do të përgatiten fletë-arrestet. Hetuesit e çështjes deklarojnë për gazetën se kanë të dhëna se grupi kriminal që trafikon për çdo vit tonelata me hashash nga Lazarati drejt Greqisë drejtohet nga një person që është i arrestuar. Burimet pohojnë se ai e drejton grupin nëpërmjet “letrave” dhe urdhrave nga burgu dhe “ushtarët” e tij i zbatojnë me përpikëri detyrat. Dje, Gjykata e Krimeve të Rënda ka dhënë masën “burg pa afat” për shtetasin Klodian Basha, i cili është arrestuar pak ditë më parë teksa transportonte 108 kilogramë hashash, të marra në Lazarat. Prokurori i çështjes i ka paraqitur gjykatës arrestimin në flagrancë të Bashës, duke transportuar lëndën narkotike drejt pikës së kalimit kufitar me Greqinë. Para fakteve të paraqitura nga organi i akuzës, gjykata vendosi lënien në burg, ndërsa i hapi rrugën grupit hetimor për të përcaktuar edhe destinacionin se ku do të përfundonte lënda narkotike. Disa ditë më parë, zbulimi i lëndës narkotike u bë nga njësiti i policisë kufitare, të ndihmuar edhe nga kamerat termike. Sipas Policisë së Gjirokastrës, Policia kufitare e Kakavijës, konstatoi tre persona me nga një çantë të madhe shpine, që lëviznin në drejtim të kufirit me Greqinë. Njësiti i policisë u ka bërë thirrje tre personave të ndalojnë. Por ata kanë hedhur çantat përtokë dhe janë larguar me shpejtësi, duke përfituar nga errësira dhe nga mjegulla e dendur. Policia ka arritur të kapë vetëm njërin prej tyre, 24-vjeçarin Klodian Basha, nga fshati Qesarat i Tepelenës.

nga Tetovarja Fri Nov 21, 2008 3:15 pm

Zhduket babai, djali adoleshent denoncon ne polici

Një djalë vihet në kërkim të babait. I ati mungon prej më shumë se një jave në shtëpi dhe askush nuk di të thotë se ku ka përfunduar. Kjo situatë e rënduar familjare e ka detyruar djalin 16-vjeçar të denoncojë largimin e babait dhe të kërkojë ndihmë për gjetjen e tij. S.Cami është paraqitur mbrëmjen e vonë të ditës së mërkurë pranë Komisariatit të Policisë në Shijak, duke deklaruar se që më 12 nëntor, i ati Kujtim Cami, 40 vjeç, është larguar nga banesa dhe nuk është kthyer më. Familja Cami jeton në fshatin Hamallaj të Durrësit dhe me të marrë kallëzimin, Drejtoria e Policisë së Qarkut deklaron se u bë shpallja në kërkim për largim nga banesa e shtetasit Kujtim Cami dhe kanë nisur kërkimet dhe hetimet për zhdukjen e tij. Po hetohet nëse largimi i 40-vjeçarit nga shtëpia është i vetëdijshëm, apo pas këtij largimi fshihet ndonjë ngjarje kriminale. Ndërkaq një tjetër familje është vënë në kërkim të njeriut të saj. Elis Fusha, 14-vjeçari nga Durrësi, vazhdon të jetë i humbur dhe në kërkim nga familjarët dhe policia.

nga Tetovarja Fri Nov 21, 2008 3:16 pm

Policia britanike fshehu skandalin e David Brown

Policia britanike ndihmoi mbulimin e një skandali të tmerrshëm abuzimi seksual në një jetimore misionare në Tiranë. Zyrtarë të lartë ranë dakord që të mbanin sekret detaje për homologët e tyre në Shqipëri, pasi drejtori britanik i jetimores, David Brown, i bindi ata se, megjithëse me fëmijët ishte abuzuar seksualisht në jetimoren e tij, ai nuk kishte pasur të bënte me këtë. Brown, 57 vjeç, një punonjës humanitar evangjelist, i cili ka themeluar jetimoren “Fëmijët e tij” shtatë vjet më parë, u konsiderua fajtor për “marrëdhënie seksuale” me të mitur. Duke e dënuar atë me 20 vjet në një burg të sigurisë së lartë në Shqipëri, gjykatësi Gerti Hoxha tha se shtëpia ishte përdorur si “një kamuflim” për abuzime seksuale. Ai shpreson se dënimi do të shërbejë si një paralajmërim për pedofilët e tjerë. Duke u mbajtur me vështirësi në këmbët e tij, Brown ishte shoqëruar jashtë sallës së gjyqit. Dy britanikë të tjerë që punonin në jetimore mbeten në gjykim mbi rolin e tyre në këtë abuzim. Dino Christodoulou, 45 vjeç, një kujdestar për terapinë sociale nga Blackburn-i në Lancashire, dhe Robin Arnold, 56 vjeç, një tregtar nga Cromer në Norfolk, u ekstraduan në Shqipëri prej Britanisë në muajin maj. Streha ku Brown kujdesej për 40 fëmijë të braktisur dhe të mitur, është mbyllur nga policia shqiptare në muajin maj 2006. Dhjetë fëmijë, të moshës midis 4 dhe 13 vjeç, i deklaruan policisë shqiptare se mbi ata ishte abuzuar seksualisht nga Brown dhe dy britanikët e tjerë. Në disa raste, fëmijët pohuan se ishin mbajtur të mbyllur në një galeri, të izoluar dhe të përdhunuar. Hetimi në Britani Por një hetim ka treguar se Shërbimi Kombëtar Britanik për Zbulimin e Aktivitetit Kriminal (National Criminal Intelligence Service, NCIS) mori detaje mbi këto abuzime që 18 muaj para arrestimeve, në dhjetor 2004 dhe nuk ia kaloi ato homologëve shqiptarë. Brown u dha anëtarëve të NCIS, të vendosur në rajon për të luftuar krimin e organizuar, shpjegime pikëlluese të abuzimeve që kishin pësuar djemtë në shtëpinë e tij, por nuk pranoi se ai ishte i përfshirë. Në bazë të fjalës së tij, zyrtarët vendosën të mos informonin policinë shqiptare mbi këto abuzime. Përpara se të fliste me hetuesit, Brown kërkoi këshilla nga miku i tij, Alan Moir, një ish-inspektor policie në pension nga Inverness. Moir, 64 vjeç, i cili kishte mbështetur funksionimin e shtëpisë, organizoi një takim në një hotel në kryeqytet me zyrtarë nga NCIS. Në këtë takim, Brown pretendoi se Christodoulou, të cilin ai e kishte lejuar të kthehej në Blackburn, kishte abuzuar seksualisht me fëmijët prapa krahëve të tij. Ai nuk tha asgjë mbi përfshirjen e pretenduar të Arnold dhe tha se nuk kishte pasur asnjë njohje paraprake se fëmijët kishin qenë dëmtuar. “Morëm një vendim se ne nuk do të raportonim (abuzimin) tek autoritetet”, thotë Moir. “Ne e dimë se çfarë do të kishte ndodhur, nëse dikush do të ishte arrestuar dhe fëmijët do të ishin rikthyer në rrugë”. I pyetur nëse kjo përbënte një fshehje nga ana e tyre, Moir përgjigjet: “Ky është një përshkrim i drejtë dhe i kujdesshëm. Ne e mbajtëm atë sekret nga shqiptarët. Por nuk ishte se ne donim të fshihnim ndonjë gjë. Ne ishim duke u përpjekur të mbronim fëmijët, të hapnim një strehë të re dhe të bënim diçka të mirë për ta. Kjo ishte pikëpamja ime në atë kohë. Unë mund ta kem pasur gabim. Duke parë mbrapa, unë ndihem i mashtruar nga David. Në atë kohë kisha përshtypjen se kjo ishte një shtëpi e vërtetë”. NCIS kontaktoi policinë e Lancashire, duke kërkuar informata mbi Christodoulou dhe garantoi se ai nuk ishte duke u marrë me fëmijë. Asnjë hetim nuk ishte bërë mbi Arnold, i cili kishte pasur dy dënime për sjellje të pahijshme ndaj fëmijëve, të cilat datonin në vitet 1980, duke e lënë atë të lirë të udhëtonte për në Malawi në atë që ai e përshkruante si një mision ndihme, ku kishte takuar fëmijë ndërsa u mësonte “Biblën”. Nuk ka pasur asnjë përpjekje për të shpëtuar fëmijët ciganë në strehën jetimore, ku Brown flinte me djemtë në krevatin e tij. “Shumë prej nesh ishin në siklet mbi atë që kishte ndodhur atje”, thotë një prift, i cili kishte rënë dakord të mos informonte policinë shqiptare mbi strehën. “Por ne besonim se David ishte një njeri i mirë. Dhe ne nuk donim që e gjithë ajo punë e mirë që kishat tona kishin bërë, të lidhej me jetimoren e David”. Në maj 2006, Brown kishte përshtypjen se përpjekja për t‘u fshehur kishte pasur sukses dhe parashikonte të hapte një tjetër shtëpi nën një emër të ri. Moir dërgoi rreth 20000 euro nga paratë e tij për në Shqipëri, të cilat ai tha se ishin për një depozitë mbi tokën ku ata mund të ndërtonin një strehë të re. Por për Brown, loja kishte marrë fund. Duke marrë informata mbi një rrjet të mundshëm pedofilie që vepronte brenda vendit, autoritetet shqiptare mbyllën jetimoren e rrënuar, arrestuan Brown dhe, disa muaj më vonë, ekstraduan Christodoulou dhe Arnold për të dalë përpara gjyqit në Tiranë. Fshehja e krimit Vetëm atëherë, 18 muaj pasi zyrtarëve britanikë u ishte thënë për abuzimet në jetimore, filloi një hetim i plotë kriminal. Një zyrtar i lartë i policisë britanike, i përfshirë në këtë hetim, thotë se ai ishte “befasuar” kur zbuloi se abuzimi ishte mbuluar nga kolegë të tij. “Baza e vërtetë për mbrojtjen e fëmijës është: shpëtimi i fëmijëve”, tha ai, duke shtuar se “vendimi që ishte marrë nga dhjetori 2004 ishte qartazi një gabim. Ai ka rrezikuar jetën e fëmijëve të pambrojtur”. Në një deklaratë, Agjencia për Krimin e Rëndë të Organizuar (SOCA), e cila ka marrë funksionet nga NCIS, mohoi se zyrtarët e saj ishin përfshirë në mbulimin e krimit, duke saktësuar se akuzat “i paraprijnë krijimit të SOCA” dhe komunikimi midis agjencive britanike të zbatimit të ligjit dhe atyre shqiptare prej asaj kohe, është përmirësuar. “Nuk ka pasur asnjë mbulim. Marrëdhëniet me shqiptarët në 2004-ën nuk kanë asnjë krahasim me marrëdhëniet që SOCA ka zhvilluar prej 2006- ës. Në të njëjtën kohë, zyrtarët vepruan mbi bazën e këshillës më të mirë të mundshme në ato rrethana. Marrëdhënia e shkëlqyer që ne kemi tani ka çuar në daljen përpara gjyqit në Shqipëri të tre shtetasve britanikë”. I intervistuar në burg përpara verdiktit të gjykatës, të tre britanikët e akuzuar i deklaruan gazetës “The Guardian” se me fëmijët ishte abuzuar në strehëz. Por të gjithë mohojnë implikimin e tyre personal në abuzim, duke akuzuar njëri-tjetrin. Christodoulou thotë se fëmijët kanë qenë inkurajuar që të thonin gënjeshtra mbi të. “Është mizore për dikë që të përdorë fëmijët kundër meje”, u shpreh ai. Arnold tha se, megjithëse ai në të kaluarën kishte kryer marrëdhënie të turpshme me fëmijë, ishte i pafajshëm ndaj akuzave. “Unë jam këtu sepse Zoti është duke më përdorur mua për t‘i vënë poshtë këta bastardë të tjerë”, u shpreh ai. Avokatët mbrojtës të të dyve kanë vënë në dyshim vlefshmërinë e dëshmive të dhëna nga fëmijët, duke pretenduar se ato ishin “manipuluar” nga prokuroria. Brown i përshkroi Christodoulou dhe Arnold, të cilët ai i akuzon për abuzimet, si “ujqër me lëkurë qengji”. Ai e përshkroi gjyqin e tij si “ditën time në kryq”. “Jam babai i këtyre fëmijëve dhe e kam për detyrë nga Zoti t‘i mbroj ata”, u shpreh ai.

nga Tetovarja Fri Nov 21, 2008 3:17 pm

Rrezikon shembjen shtepia 280-vjecare e Thanas Vajes

Një shtëpi e ndërtuar rreth 280 vjet më parë, në pjesën muzeore të qytetit të Gjirokastrës, në të cilën banojnë prej 60 vjetësh pesë familje gjirokastrite dhe që sipas të gjitha gjasave është ndërtuar dhe ka qenë në pronësi të Thanas Vajës, një nga komandantët më besnikë të Ali Pashë Tepelenës, aktualisht është në rrezik shembjeje. Sipas banorëve, prej katër vjetësh në tavanet, muret ndarëse dhe muret e jashtme të kësaj shtëpie, me moshë gati treshekullore, janë shfaqur plasaritje të thella, të cilat nga viti në vit kanë ardhur duke u zgjeruar. “Kemi shumë vjet që jetojmë në ankth, por kemi të paktën dy vjet që kemi parashtruar një ankesë për këtë rrezik shembjeje në bashki, prefekturë, qark dhe në Drejtorinë Rajonale të Monumenteve të Kulturës, por deri tani nuk kemi asnjë zgjidhje”, thotë Izmini Dogani, banore në një prej apartamenteve të këtij pallati në lagjen “Varrosh” të Gjirokastrës. Kjo ndërtesë me mure dhe çati guri, ku banojnë pesë familje, është ndërtuar në vitin 1815 dhe është konfiskuar nga autoritetet e perandorisë osmane në vitin 1873, pasi në atë kohë nga administrata turke u zbulua se ishte ndërtuar dhe ishte në pronësi të një prej figurave më të njohura dhe më besnike të divanit të Ali Pashë Tepelenës. Të dy ishin shpallur e ndëshkuar si armiq të betuar të Portës së Lartë. Thanas Vaja, kryekomandanti i ushtrisë dhe kryeinformatori i Ali Pashës, me orgjinë nga fshati Lekël i Tepelenës, e kishte ndërtuar këtë shtëpi me rreth 20 divale e odara në lagjen “Varrosh” të Gjirokastrës, në vitet e lulëzimit të Pashallëkut të Janinës, por sipas gojëdhënave, nuk banoi asnjëherë aty. Pas ndëshkimit shembullor që ushtritë e Sulltanit i bënë Aliut dhe Thanasit, qiraxhinjtë që banonin në këtë shtëpi e mbajtën sekret për një kohë të gjatë pronësinë e saj, derisa rreth vitit 1873 autoritetet turke zbuluan pronësinë e godinës dhe e sekuestruan atë. Për vite të tëra ajo mbeti në pronësi shtetërore, status që e trashëgoi edhe pas Luftës së Dytë Botërore. Funksioni si banesë që nisi qysh në vitin 1945, kur aty u vendosën familjet e para, ka vazhduar deri më sot, kur aktualisht në të banojnë pesë familje. Banorët thonë gjithashtu se investimet e para për restaurimin e çatisë dhe përshtatjet e mjediseve të brendshme për banim janë kryer dy herë, fillimisht në vitin 1945 dhe ndërhyrja e dytë me sens më restaurues nga pikëpamja arkitekturore është bërë nga Atelieja e Restaurimeve në vitin 1970. Banorët e kësaj ndërtese thonë se kanë paguar rregullisht qiranë deri në vitin 1994 dhe më tej pagesat janë ndërprerë, sepse ndërmarrja komunale-banesa u shkri pas privatizimit të banesave shtetërore. Pra, pesë familjet nuk kanë mundur të përfitojnë nga privatizimi, pasi shtëpia mund të ishte me pronar dhe sot nuk rezultojnë as pronarë dhe as qiraxhinj e për rrjedhojë nuk mund të investojnë në shtëpinë ku jetojnë. “Në përgjigje të kërkesës së adresuar bashkisë së qytetit, ne jemi përcjellë në Drejtorinë Rajonale të Monumenteve të Kulturës. Ndonëse tregohet vëmendje për të bërë riparime dhe restaurime të pjesshme, përfaqësuesit e kësaj drejtorie na thonë se në kompetencë për restaurim nga ana e saj janë vetëm banesat e shpallura ‘monument kulture‘ dhe kjo banesë nuk është në këtë listë”, thotë Petraq Kondili. Vetë drejtori i DRMK-së, Spartak Drasa, thotë për “Shqip” se ndonëse kjo shtëpi ndodhet brenda zonës së mbrojtur muzeore, ajo nuk është e përfshirë në listë: as në monumentet e kategorisë së parë, as në ato të kategorisë së dytë. Për shkak të situatës mjaft të rrezikshme, dy nga familjet që jetojnë aty janë detyruar të largohen për të banuar përkohësisht në shtëpitë e të afërmve, ndërsa tre të tjera vazhdojnë të bashkëjetojnë me rrezikun e shembjes së banesës së vjetër. Sidoqoftë, derisa të zgjidhen problemet burokratike të pronësisë mbi këtë banesë të vjetër, banorët e saj, sidomos pas tragjedisë së rrëzimit të pallatit në lagjen “11 janari”, jetojnë mes stresit dhe tmerrit.
Dritare në histori
Nga fundi i shekullit XVII dhe në fillim të shekullit XIX, Ali Pashë Tepelena kishte për komandant të ushtrisë së vet një shqiptar me emrin Thanas Vaja, të cilin autorët bashkëkohës francezë e anglezë e kanë quajtur “Gjeneral Vajas”.
Ky shqiptar trim i përkiste kishës ortodokse. Pasi i kishte qëlluar rasti t‘i fashiste turbullirat greke me një dorë të fortë, domethënë t‘i shtypte rreptë trazirat e tyre, grekët kanë shkruar shumë gjëra për të.
Thanas Vaja, i cili për grekët është Athanaisos Vaias, nuk shikohej si armik, por si “tradhtar”. Për grekët mendjelehtë, “feja ortodokse” dhe “kombësia greke” kanë qenë dhe vazhdojnë të jenë ende dy terma që nuk dallohen nga njëra-tjetra, domethënë janë të njëjta. Përkundrazi, shqiptarët dallojnë shumë në këtë pikë. Këta të fundit, lidhjet e kombësisë i ndjejnë më tepër se sa lidhjet e fesë.

nga Tetovarja Sat Nov 22, 2008 12:57 pm

Terror me arme, grabitet “Raiffeisen Bank”
Nën terrorin e armëve, një adoleshent ka mundur të grabisë me maska një filial banke të rëndësishme në Tiranë. Me maskë në kokë dhe pistoletë në dorë, ai ka hyrë në ambientet e bankës, ka qëlluar dy herë në ajër, e duke bërtitur ka marrë 800 mijë lekë nga arkëtarja, të cilës i ishte drejtuar arma në fytyrë. E terrorizuar, ajo ka mbushur çantën me para dhe ia ka dhënë grabitësit, për të cilin mendohet se është vetëm 17 ose 18 vjeç. Burimet e policisë kryeqytetase thanë se dje, rreth orës 13:40, shërbimet policore të Komisariatit nr. 4, morën njoftim se në kryqëzimin e rrugës “Bardhyl” me rrugën “4 Dëshmorët”, është vjedhur një nga filialet e “Raiffeisen Bank”. Menjëherë në vendin e ngjarjes shkuan specialistët e seksionit Kundër Vjedhjeve me Dhunë/Armë, për të bërë të mundur identifikimin dhe lokalizimin e autorëve, si dhe zbardhjen e rrethanave të kësaj ngjarjeje. Nga të dhënat e para hetimore rezulton se autori në momentin që ka hyrë në ambientet e bankës, ka kërcënuar nëpërmjet pistoletës punonjësen e arkës, për të marrë shumën e parave që ndodheshin aktualisht në arkë, shumë e cila dyshohet të jetë rreth 800 mijë lekë. Duke ndjekur instruksionet e marra nga autoritetet e bankës, punonjësja, e cila ndodhej edhe nën të shtënat e pistoletës së grabitësit, ka mbledhur gjithë paratë dhe ia ka dhënë atij. Nga ana tjetër, kolegët e arkëtares, kanë shtypur butonin e sigurisë për njoftimin e policisë. Burimet zyrtare nga zyra e shtypit të “Raiffeisen Bank” bënë të ditur se forcat e policisë kanë arritur në degën e rrugës “Bardhyl” rreth 5 minuta, pasi stafi ka shtypur butonin e alarmit, por fatkeqësisht vjedhësi ishte zhdukur. “Fatmirësisht asnjë nga klientët apo stafi i degës së bankës nuk është plagosur apo dëmtuar. Menjëherë pas kësaj ngjarjeje, dega e bankës është e mbyllur dhe forcat e policisë kanë marrë gjendjen nën kontroll. Prioriteti ynë i parë është pa dyshim siguria e stafit dhe ne jemi të kënaqur që ata kanë vepruar sipas politikës sonë të sigurimit”, tha Rober Wright, drejtor në “Raiffeisen Bank”. Pas grabitjes së bujshme, ku të pranishmit janë tronditur, policia ka rrethuar gjithë zonën dhe ka nisur hetimet për zbardhjen e saj. Sipas të dhënave hetimore, autori i grabitjes me armë zjarri, është një adoleshent me trup të vogël dhe besohet të jetë i ardhur në Tiranë. Zyrtarisht, policia tha se kamerat që gjenden në filialin e bankës, nuk kanë arritur të identifikojnë autorin, pasi ai ishte i maskuar. Kështu, grupi hetimor ka sekuestruar kasetat e sigurisë, për t‘i përdorur për verifikim të personave të dyshuar. Sipas dëshmitarëve në vendngjarje dhe punonjësve të filialit bankar, autori e kishte mbuluar fytyrën e tij me një bluzë golf, duke u përpjekur që të mos identifikohej nga askush. Skena e grabitjes ka qenë ajo klasike që ndodh edhe në bankat e vendeve të ndryshme evropiane, sidomos në fqinjin tonë, Greqi. Sipas të dhënave hetimore, autori dyshohet se është larguar në këmbë mes pallateve dhe më pas është pritur nga persona të tjerë, të cilët e kanë ndihmuar të arratiset me makinë. Duke u nisur nga këto dyshime, policia ka ngritur një sërë postblloqesh, duke kontrolluar mjetet e dyshimta. Deri në orët e vona të mbrëmjes, pavarësisht se policia ka vazhduar me punën për identifikimin e autorit, nuk ka mundur të prangosë ndonjë të dyshuar. Kohë më parë, një tjetër grabitës vodhi një filial të “Raiffeisen Bank” te Zogu i Zi, i cili u arrestua pak kohë më vonë, pas hetimeve të policisë.

nga Tetovarja Sat Nov 22, 2008 12:58 pm

Ne gjyq, bleu nje femije vetem 10 mije leke

Prokuroria e Krimeve të Rënda ka dërguar në gjykatë dosjen ndaj Kujtim Demirit, i akuzuar për trafik fëmijësh. Procedimi penal ka filluar në muajin janar të këtij viti, megjithëse dosja ishte pezulluar më parë nga Prokuroria e Tiranës. Nga tërësia e akteve rezulton se i pandehuri, pas muajit shkurt të vitit 2002, është larguar nga Shqipëria, duke mbërritur në Greqi së bashku me të dëmtuarin H.Sefa. Sipas akuzës, Demiri i ka krijuar kushtet dhe mundësitë, duke e detyruar, të dilte dhe të lypte në rrugë. Sipas akuzës, i pandehuri e ka njohur të dëmtuarin në Tiranë, pasi ka pasur marrëdhënie fqinjësie dhe krushqie me të. Demiri ka shfrytëzuar gjendjen e vështirë ekonomike të të atit dhe ia ka blerë fëmijën e mitur të quajtur H.Sefa. “Çmimi i blerjes ishte njëqindmijë lekë të vjetra, ndërkohë që të dyja palët, i pandehuri dhe shtetasi S.Sefa kanë rënë dakord që, përveç çmimit të shitjes, S.Sefa do të merrte çdo muaj një shumë në masën prej njëqindmijë lekësh të vjetra, te familja e shtetasit Kujtim Demiri. I dëmtuari do të nxirrej jashtë shtetit për të lypur, me qëllim përfitimin material”, thuhet në dosje. Sipas saj, metoda që ka përdorur i Demiri për të shtënë në dorë të dëmtuarin është propozimi dhe arritja e marrëveshjes me të atin e të dëmtuarit. Pas mbërritjes në Greqi, Demiri, nën ushtrimin e dhunës në disa raste, ka arritur të realizojë nxjerrjen e të miturit në rrugë për të lypur. Sipas prokurorisë, të gjitha fitimet e nxjerra nga veprimtaria e ushtruar si lypës nga ana e të dëmtuarit, kanë shkuar në favor të të pandehurit Kujtim Demiri. “Mënyra e përdorur nga i pandehuri për të krijuar lidhjen me të dëmtuarin, duke i premtuar një jetë më të mirë, që do të sigurohej nga lypja, e shoqëruar me elemente të tjerë, përbën rekrutimin e të dëmtuarit për efekt shfrytëzimi. Pas kësaj faze, i pandehuri merr të gjitha masat për t‘u larguar me të dëmtuarin jashtë shtetit, duke lëvizur në mënyrë ilegale”, thuhet në kërkesën e organit të akuzës.Sipas saj, në kohën kur ka ndodhur ngjarja, i dëmtuari ishte i mitur. “Si përfundim konkludojmë se nga aktet e administruara në dosje të përftuara nga hetimet rezulton se me veprimet e tij që konsistojnë në: rekrutimin dhe transportimin e të dëmtuarit të mitur H.Sefa me qëllim shfrytëzimin e tij, për punë skllavëruese siç është ajo e lypjes, i pandehuri Kujtim Demiri ka konsumuar elementet e veprës penale të trafikut të qenieve njerëzore”, përfundon prokuroria.

nga Tetovarja Sat Nov 22, 2008 12:59 pm

Kater minorene vjedhin ne Repartin e Nderhyrjes se Shpejte

Ëndrra për të pasur një motor nuk ka ndalur katër adoleshentë për të kapërcyer telat me gjemba të repartit të Ndërhyrjes së Shpejtë të Elbasanit. Duke qenë fqinjë me vendgrumbullimin e mjeteve të bllokuara, katër të mitur nga fshati Bradashesh i Elbasanit, kanë kurorëzuar me sukses aksionin për vjedhjen e dy motoçikletave. Ngjarja ka ndodhur mbrëmjen e së enjtes, por nuk kanë kaluar as dy orë nga akti i vjedhjes dhe të katërt kanë rënë në prangat e policisë. Sipas burimeve zyrtare të policisë, janë ndaluar tre 14-vjeçarë dhe një 17-vjeçar, nga fshati Bradashesh, pasi kishin vjedhur dy motoçikleta në Repartin e Ndërhyrjes së Shpejtë. Sipas deponimeve të tyre në polici, fëmijët e kishin kryer këtë akt së bashku, pasi prindërit i ishin përgjigjur negativisht kërkesës së tyre për të blerë motoçikleta. Pas një kontrolli në banesat e tyre, policia ka sekuestruar edhe dy motoçikletat si provë material, duke i kthyer sërish në pikën e bllokimit.

nga Tetovarja Sat Nov 22, 2008 3:24 pm

Kufizimet, pa drita nga 6 deri ne 16 ore

Dimri ka nisur të firmosë me ditët e tij të ftohta këtë fund sezoni vjeshtor, por edhe me atë që jemi mësuar të përjetojmë çdo vit, mungesën e energjisë elektrike.
OSSH, kompania “e re” që ka marrë përsipër “të nxjerrë faqebardhë” Ministrinë e Energjetikës në privatizimin e Korporatës Elektroenergjetike, ka vendosur masa të reja kufizuese. Por ndërprerja e planifikuar e energjisë mohohet prej zyrtarëve të Operatorit të Sistemit të Shpërndarjes. Megjithatë, çdo ditë kryeqytetit ka filluar t‘i mungojë energjia elektrike për katër orë e më shumë. Ndërsa në disa zona periferike të tij, të jetuarit pa drita ka filluar të bëhet pjesë e përditshmërisë. Ka pasur raste kur janë regjistruar edhe ditë me mungesa prej 11 orësh të energjisë elektrike.
Ky kufizim nuk do të kryhet mbi bazë të ndonjë njoftimi zyrtar të këtij operatori, që edhe qytetarët të mund të marrin masat. Ndërprerja e furnizimit me energji mësohet se do të jetë e herëpashershme, por jo më pak se katër orë në ditë.
Megjithatë duket se kryeqyteti do të duhet ta konsiderojë veten “me fat” për sa i përket këtyre kufizimeve. Burime në OSSH bëjnë të ditur se mungesën e energjisë elektrike do ta përjetojë i gjithë vendi dhe Tirana do të jetë më e privilegjuara edhe për shkak të numrit të lartë të popullsisë dhe bizneseve. Në rajonet e tjera të vendit, kufizimet do të lidhen edhe me nivelin e arkëtimeve të energjisë, për të cilën korporata detyrohet të arrijë në detyrimet e përcaktuara nga ministria, me qëllim arritjen e kuotave për një privatizim të suksesshëm.
Në Operatorin e Sistemit të Shpërndarjes bëhet e ditur se do të jenë sërish zonat rurale ato më të goditurat nga ndërprerjet e energjisë elektrike. Por edhe qytetet e tjera do të përjetojnë një kufizim energjie deri në gjashtë orë në ditë. Mungesa e dritave për konsumatorët familjarë është konstatuar edhe në orët e natës, kur dihet se konsumi i energjisë bie.
Gjeneratorët janë rikthyer po aq zhurmshëm sikundër u dëgjuan edhe një vit më parë nga ana e tregtarëve të bizneseve të vogla e të mesme në kryeqytet. Sektori i shërbimeve, ndër më të cenuarit nga mungesa e energjisë elektrike, ka nisur që të marrë masat e menjëhershme për të përballuar një stinë jo vetëm të ftohtë, por edhe “herë me drita e herë jo”.
Nga ana tjetër, ata i druhen më shumë kostos së shërbimit që shumëfishohet nga kjo mungesë energjie elektrike. E ndonëse të imunizuar me mungesat e herëpashershme të energjisë, madje edhe me situata krize në shpërndarjen e saj, të gjithë i tremben orareve të paparalajmëruara të kufizimeve.
Shkodër
Mungesa e energjisë shkon
deri në 16 orë në ditë
Fshati Paçram në Rrethin e Shkodrës, që ndodhet pranë hidrocentralit të Vaut të Dejës, vuan prej një muaji mungesën e energjisë elektrike për 16 orë në ditë. Situata e vështirë për këta banorë, ka bërë që drejtuesit e Partisë Demokratike dhe ata të Partisë Socialiste në fshat të reagojnë, duke i kërkuar Kryeministrit që fshati i cili njihet si bastion i të djathtëve dhe paguan në masën 90 për qind faturat e energjisë të mos diskriminohet, por të trajtohet njëlloj si të tjerët. I gjithë Qarku i Shkodrës po përballet prej disa ditësh me kufizime të ndjeshme të energjisë elektrike, që variojnë për qytetet deri në katër orë, ndërsa për fshatrat kufizimet arrijnë deri në 16 orë gjatë 24 orëve. Pavarësisht reshjeve të dendura të shiut gjatë ditëve të fundit dhe faktit që në territorin e Qarkut të Shkodrës ndodhen dy nga hidrocentralet kryesore të vendit, ai i Komanit dhe i Vaut të Dejës, furnizimi me energji elektrike është i pakët dhe në pjesën më të madhe të ditës ka sjellë edhe mungesën e ujit të pijshëm. Fshati Paçram, që ndodhet midis Shkodrës dhe Lezhës, është një ndër më problematikët për sa i përket mungesës së energjisë. Banorët e fshatit janë të revoltuar, pasi e paguajnë rregullisht energjinë që konsumojnë. Të mbërthyer nga halli, fshatarët e zonës janë bashkuar si rrallëherë, të majtë e të djathtë, dhe kanë kërkuar me këmbëngulje heqjen e kufizimeve. Kryetari i Partisë Demokratike në fshat, Lush Deda, thotë se fshatarët ndihen të diskriminuar. Në të njëjtën linjë shprehet edhe kryetari i Partisë Socialiste për fshatin, Pjetër Dini, i cili thotë se gjendja nuk ndryshoi kur në pushtet erdhën demokratët, të cilët premtuan më shumë vëmendje për zonën e Shkodrës.

nga Tetovarja Sat Nov 22, 2008 3:25 pm

Familjet e pallatit te shembur presin fondin nga qeveria
Dosja me dëmet e shkaktuara nga shembja e pallatit pesëkatësh në lagjen “11 janari” të Gjirokastrës është miratuar në bashki, në qark dhe prefekturë dhe pritet një vendim i Këshillit të Ministrave për dëmshpërblimin e familjeve të dëmtuara. Burime të Këshillit të Qarkut të Gjirokastrës kanë zytarizuar dje listën emërore të familjeve të dëmtuara nga shembja e pallatit në mesditën e 9 nëntorit, ku humbën jetën tre njerëz, si dhe ka përfunduar dosjen e vlerësimit të dëmit.
Jorgo Nikolla, specialist për emergjencat civile në Këshillin e Qarkut të Gjirokastrës, tha dje se vlera reale e dëmit shkon në shifrën 80.476.960 lekë, duke llogaritur këtu edhe orenditë shtëpiake. “Pesë specialistë, tre nga Këshilli i Qarkut Gjirokastër dhe dy nga Agjencisë Rajonale të Legalizimeve, Urbanizimit dhe Integrimit të Zonave të Ndërtimeve Informale (ALUIZNI), kanë dokumentuar 70 faqe raport për 18 familje të prekura nga tragjedia e Gjirokastrës dhe shumë shpejt ky dokument do të mbërrijë në Ministrinë e Brendshme”, tha Nikolla. Sipas tij, llogaritja e dëmit të pallatit të shembur kap shifrën 59.276.960 lekë, ndërsa dëmi në orendi shtëpiake kap shifrën 21.200.000 lekë. Duke iu referuar specialistit të Emergjencave Civile në Këshillin e Qarkut Gjirokastrës, familjet Ibrahim Braho, Krenar Nikicaj, Thanas Zoko, Vasil Pulla dhe Shpëtim Llocko, Imzot Haska kanë pësuar një dëm material me vlerë 6.457.470 lekë për secilin. Ndërkohë, familjet e Vasil Vangjelidhi, Trashëgim Roshi, Axhem Mene dhe Vullnet Sinani kanë pësuar një dëm materiale me vlerë 4.938.400 lekë për secilin. Ndërsa familjet Hadër Haska, Jetnor Dalani, Bilbil Tena dhe Sokrat Papadhopulli kanë pësuar një dëm me vlerë 5.087.490 lekë për secilin. Gjithashtu, në tragjedinë e 9 nëntorit janë dëmtuar edhe katër qiramarrës të këtij pallatit. Këto familje parashikohen të dëmshpërblen me vlerën 500.000 lekë.
Shtabi i Emergjencës është ngritur në prefekturën e qytetit të Gjirokastrës me qëllim përballimin e fatkeqësisë që ndodhi në mesditën e 9 nëntor në këtë qytet pas shembjes së një pallati, si pasojë e të cilit, 3 veta kanë humbur jetën dhe 18 familje mbetën pa shtëpi. Familjarët e prekur nga tragjedia e 9 nëntorit në fillim të javës përfituan ndihma financiare nga Prefektura dhe nga Bashkia e Gjirokastrës. Nga hetimet e deritanishme është arritur në përfundimin se pallati pesëkatësh i ngritur në një kodër, u shemb për shkak të punimeve për ndërtimin e një godine të re, pranë tij. Deri tani për këtë ngjarje janë arrestuar tetë punonjës të Bashkisë së Gjirokastrës dhe të firmës që po ndërtonte pallatin e ri.
Universiteti
Ndihma për tre
studentë që banonin
në pallatin e shembur
Rektorati i Universitetit “Eqrem Çabej” të Gjirokastrës ka vendosur dje të akordojnë një ndihmë financiare për tre studentët e tij, të cilët u prekën nga tragjedia e 9 nëntorit, ku humbën jetën tre persona dhe u plagosën disa të tjerë. Rektori i Universitetit të Gjirokastrës, prof. as. Gëzim Sala, tha se, studentët Dorina Sinani, Luriana Haska dhe Erald Bundo do të përfitojnë secili nga 70 mijë lekë. “Kjo ndihmë vlen për kompensimin e humbjeve që ata kanë pësuar nga ky aksident tragjik, si dhe për të shprehur solidaritetin e stafit akademik dhe studentëve për t‘u qëndruar pranë në këto ditë të vështira për ta”, tha Sala. Sipas tij, ky fond është simbolik dhe synon më së shumti pajisjen e këtyre studentëve me libra dhe mjete shkollore, që i humbën bashkë me shtëpitë ku banonin.

nga Tetovarja Wed Nov 26, 2008 4:47 pm

Gjimnazistja i ngul thiken kambistit, per ti marre leket
Një ngjarje e rrallë ka ndodhur në qytetin e Korçës, kur protagonist e një plagosjeje me thikë ka qenë një nxënëse gjimnazi. Një 17-vjeçare është bërë autore e një plagosjeje me motiv grabitjen. Nxënësja e vitit të tretë, të shkollës së mesme “Themistokli Gërmenji”, në Korçë, ka plagosur me thikë një kambist. Identiteti i saj nuk është bërë i ditur nga ana e policisë për shkak të moshës, por, sipas të dhënave zyrtare, vajza me inicialet D.K., ka kryer një tentativë grabitjeje dhe plagosje me dashje. Ngjarja ka ndodhur rreth orës 11:30, kur vajza 17-vjeçare, pasi ka dalë nga shkolla, është drejtuar te pika e këmbimit valutor disa metra larg nga shkolla e saj. Sipas dëshmitarëve okularë, ajo i është drejtuar njërit prej kambistëve, 57-vjeçarit Tahir Mëhalla, të cilit i ka kërkuar të ndërrojë valutë në shuma të mëdha. Ajo e ka bindur kambistin që të shkojnë në shtëpinë e saj, pasi atje ajo kishte një shumë të madhe eurosh. Por, ndërsa e ka larguar nga vendi ku kryhet këmbimi valutor, në fakt, nxënësja ka shkuar në një nga lagjet e qytetit me pretendimin se banon aty dhe pasi e ka futur 57-vjeçarin në një rrugicë të parrahur mes pallateve, e ka qëlluar me thikë. Policia, që ka nisur menjëherë hetimet për këtë ngjarje të rëndë, ka bërë të ditur se D.K., ka qëlluar me thikë kambistin Tahir Mëhalla. Kjo ka ndodhur në lagjen 12, tek ish-”Vetëshërbimi”, aty ku vajza e kishte gënjyer 57-vjeçarin se kishte banesën e saj. Sapo kanë hyrë në rrugicë, gjimnazistja ka nxjerrë një thikë buke, me të cilën ka qëlluar pas shpine 57-vjeçarin dhe më pas ka tentuar t‘i marrë çantën me lekë, që ai kishte me vete. Por edhe pse i plagosur, kambisti ka rezistuar duke u mbrojtur. Kur ka hasur në rezistencën e 57-vjeçarit, vajza është mbërthyer nga paniku dhe ka tentuar të fshihet. I plagosuri ka dalë për ndihmë në rrugën kryesore dhe më pas i është drejtuar spitalit, ku dhe ka marrë mjekimin me terapi ditore pranë kirurgjisë septike. Mjekët e spitalit kanë bërë të ditur se 57-vjeçari kishte një plagë të lehtë në pjesën e kurrizit, rreth 4 centimetra dhe fatmirësisht gjendja e tij shëndetësore është përmirësuar ndjeshëm pas mjekimit. Disa minuta pas ngjarjes, policia ka kapur 17-vjeçaren e dyshuar si autore të kësaj ngjarjeje të rëndë, e cila ishte përpjekur të fshihej vetëm disa metra larg vendit të ngjarjes. Ajo ka pranuar në polici se motivi i plagosjes me thikë ishte pikërisht grabitja e parave dhe se e kishte kohë që kishte menduar planin e grabitjes. Policia ka deklaruar se ka bërë arrestimin e 17-vjeçares D.K., e cila akuzohet për tentativë grabitjeje dhe për plagosje të rëndë me dashje.

nga Tetovarja Mon Dec 01, 2008 8:00 am

Loja me sepate, vellai plagos rende motren

Dy fëmijë të vegjël, vëlla e motër, janë bërë protagonistë të një ngjarjeje në Tiranë, që fatmirësisht nuk është kthyer në tragjedi. 5-vjeçari Muharrem G. ka goditur motrën me sëpatë pas koke gjatë një loje në oborrin e shtëpisë. Në një moment që ata i kanë humbur kontrollit të prindërve, kanë filluar të luajnë me sëpatë dhe Jurida G. është goditur pas koke. Burimet policore bënë të ditur se ngjarja e rëndë ka ndodhur pasditen e dy ditëve më parë në Mëzez. Sipas policisë, në orën 17:30 të së premtes, në Spitalin Ushtarak ka shkuar e dëmtuar në kokë Jurida G, 4 vjeçe. Në lidhje me këtë ngjarje, policia ka marrë në pyetje të ëmën e të miturve, e cila deklaroi se vajza është dëmtuar me sëpatë, duke luajtur në oborrin e banesës me të vëllain. Pas mjekimit, Jurida G. u largua në banesë, jashtë rrezikut për jetën. Policia tha se njoftimi Shemsi Shaljani, i cili tentoi të vetëvritej është dhënë nga mjekët e spitalit.

nga Tetovarja Fri Dec 12, 2008 11:57 am

Pi helm se nuk e lane te dilte

Një vajzë 15-vjeçare nga fshati Pojan i Rrethit të Korçës ka rrezikuar seriozisht jetën, pasi ka gëlltitur një sasi pesticidesh me qëllim vetëvrasjen. Burime të Policisë së Korçës bënë të ditur se ngjarja ndodhi të martën në fshatin Pojan, pas një sherri në familjen e adoleshentes. Vajza nuk është lejuar nga prindërit që të dalë me shoqet dhe shokët dhe kjo e ka rënduar gjendjen e saj psikologjike. Menjëherë pas debatit, vajza ka gëlltitur një sasi pesticidesh që ndodhej në shtëpi, por është gjetur nga familjarët, të cilët e kanë çuar në spital, në gjendje të rëndë. Mjekët thanë dje se ajo ka dalë jashtë rrezikut.

nga Tetovarja Fri Dec 12, 2008 11:58 am

Gjykata e Larte: Ne do ta shqyrtojme dosjen per Bashen

Gjykata e Lartë ka pranu ar, pas shumë interpre timesh ligjore, që të marrë nën shqyrtim dosjen Durrës- Kukës, ku Prokuroria e Përgjithshme akuzon ish-ministrin e Transporteve, Lulzim Basha, dhe ish-drejtorin juridik në këtë ministri, Andi Toma, për shpërdorim detyre dhe abuzime me fondet publike para dhe gjatë ndërtimit të rrugës “patriotike”. Dje, Gjykata Supreme në Shqipëri, verifikoi materialin e ardhur nga akuza qendrore dhe sot në orët e paradites do të kryhet një short për të përcaktuar trupin gjykues që do të marrë në shqyrtim provat e paraqitura nga prokuroria kundër dy ishzyrtarëve, të cilat do të gjykohen për rreth 232 milionë euro dëm të shkaktuar ndaj shtetit shqiptar. Veprimi i djeshëm i Gjykatës së Lartë do të “detyrojë” Gjykatën e Apelit dhe Gjykatën e Shkallës së Parë t‘i dorëzojë “eprorit” të gjitha çështjet që kanë emrin e deputetit Lulzim Basha, pasi, bazuar në Kushtetutë dhe në Kodin e Procedurës Penale, është kjo gjykatë që verifikon një person me imunitet në të gjitha rastet kur është dorëzuar dosja. Sot, shorti Sot, në ambientet e Gjykatës së Lartë, do të hidhet shorti për të përcaktuar trupin gjykues që do të marrë nën hetim dosjen e abuzimeve të rrugës Durrës- Kukës, e cila ka “në gjirin” e saj dy të pandehur. Ata janë Lulzim Basha dhe Andi Toma, që kanë kundërshtuar organin e prokurorisë për veprimet që ka ndërmarrë pas datës 6 nëntor, duke u bazuar te një vendim i Gjykatës së Tiranës, i cili pezullonte afatet e hetimit. Por, në kundërshti totale, organi i akuzës ka këmbëngulur se afati hetimor realizohej për plotësimin e dosjes dhe për asgjë tjetër. Dhe në fakt ashtu ndodhi. Një javë para mbarimit të afatit të hetimit, akuza qendrore mori të pandehur ministrin aktual të Jashtëm, Lulzim Basha, lidhur me detyrën e tij të mëparshme në Ministrinë e Transporteve. Dhe, më datën 5 dhjetor, disa orë para se të mbaronte afati i hetimit, prokuroria depozitoi në sekretarinë e Gjykatës së Lartë dosjen penale në ngarkim të tij. Duke qenë se ditët pasardhëse ishin pushim, për shkak të festave në Shqipëri, Gjykata e Lartë verifikoi dosjen dje dhe vendosi që ta regjistrojë. Në pamundësi të verifikimit të të gjitha akteve, gjykata vendosi që sot paradite të hidhet shorti për të zgjedhur pesëshen e trupi gjykues. Pas shortit, togat e zeza do të caktojnë një datë për gjyqin që me shumë gjasa, do të zhvillohet rreth datës 20 dhjetor. Por, në pamundësi të fillimit të proceseve gjyqësore në këtë periudhë, për shkak të festave të fundvitit, gjykata mund ta shtyjë procesin në ditët e para të vitit që vjen. Kërkesa e prokurorisë Po dje, prokurori i dosjes Durrës-Kukës, Arben Kraja, ka përgatitur disa arsye pse ka kërkuar përjashtimin e gjyqtares Fatmira Hajdari nga shqyrtimi i kërkesës së Lulzim Bashës, i cili kërkonte që veprimi i prokurorisë për thirrjen dhe marrjen e tij të pandehur janë të paligjshëm. Sipas burimeve nga akuza qendrore, mësohet se një ndër arsyet ka qenë vendimi i ndërmjetëm i gjyqtares Fatmira Hajdari, e cila rrëzoi pretendimin se kjo kërkesë duhet të shqyrtohet në Gjykatën e Lartë. Prokuroria thotë se vendimi është i gabuar, pasi deputeti pa imunitet, Lulzim Basha, është marrë i pandehur për abuzimet e pretenduara të rrugës Durrës-Kukës. Gjithashtu, prokuroria i shkruan Gjykatës së Tiranës se duhet të shpallë moskompetencën e shqyrtimit të kësaj kërkese, pasi, tashmë, dosja është dërguar në Gjykatën e Lartë. “Bazuar në Kushtetutë dhe në Kodin e Procedurës Penale, i kërkojmë Gjykatës së Tiranës që të vendosë moskompetencën e kërkesës të të pandehurit Lulzim Basha”, thanë burimet. Sipas tyre, procesi në vijim në Gjykatën e Tiranës do të jetë vetëm formal, pasi dosja është depozituar në Gjykatën e Lartë, e cila ka vendimmarrje në të gjitha shkallët e gjyqësorit në rast se i pandehur është një ministër.