Venera, zëri më i mirë shqiptar

Venera është fituesja e edicionit të dytë të spektaklit të talentëve të këndimit, The Voice of Albania, pas një finale të jashtëzakonshme të zhvilluar të premtën mbrëma, e që zgjati deri vonë pas mesnate.

Kjo nuk ishte një finale e rëndomtë, por një finale që do të mbahet gjatë në mend. Kjo për shkak se edicioni i dytë i The Voice of Albania u kompletua me një mbrëmje të fundit e cila u mrekullua nga realizimi i jashtëzakonshëm me zëra të fantastik.

Matej, Mjellma, Venera dhe Jozefina ishin protagonistët e finales së madhe. Që të gjithë kënduan nga dy këngë. Secili më i miri se tjetri, performuan në skenën e gjigante nën instrumentet ‘live’ dhe ashtu si trajnerët Alma, Sidriti, Eltoni dhe Miriami, edhe shikuesit anë e mbanë trojeve shqiptare ishin dëshmitarë të interpretimeve epike.

Ishte përshtypja që Matej do të mund ta fitonte spektaklin, por kjo nuk ndodhi. Performanca e tij e dytë i kaloi të gjithë kufinjt e reales, por Venera i bëri ballë dhe shqiptarët vendosën që vajzën nga Struga e Maqedonisë ta kurorëzojnë fituese.




“Jam tejet e emocionuar, ju faleminderit të gjithëve. Nuk e kam pritur, e pabesueshme... e pabesueshme”, ishin fjalët e para të Venerës pasi e mësoi lajmin në skenën e madhe, teksa lotët në fytyrën e saj nuk merrnin fund.

Përkundër disfatës edhe tri kandidatët e tjerë u ndjenë të kënaqur nga epilogu i spektaklit dhe pritet që së shpejti edhe të lansojnë karrierat e tyre muzikore.

Vlen të përmendet realizimi nga një planet tjetër i Top Media për The Voice of Albania, që edhe një herë u tregua shembull që duhet të ndiqet nga mediat tjera për evoluimin medial dhe kënaqësinë që i është ofruar shqiptarëve.

A e meritoi Venera fitoren në The Voice of Albania? Shprehuni në hapësirën për komente... /Telegrafi/