Dinozaurët dhe fëmijët e një oborri.

nga **Morena** Mon Dec 20, 2010 12:45 pm

U bënë shumë kohë që dinozaurët e politikës shqiptare po grinden midis tyre dhe problemet e popullit i kanë harruar.

Shkodra ishte një tragjedi, që nuk mbahej dot e fshehur, por problemet e
tjera, si përmbytjet në rrethet e tjera, rrëmuja urbane nëpër qytete,
shkollat pa drita në fshatra, pallatet që lihen përgjysmë nga firmat e
ndërtimit, fëmijët që në kohën e lirë dëfrehen me krismat e shashkave
etj., që veç e veç duken probleme të vogla, të marra së bashku janë një
tragjedi më vete e lënë pa zgjidhje.

Bashkë me politikanët, në këtë betejë absurde dinozaurësh janë
përfshirë edhe qytetarët, të cilët kanë harruar problemet që lidhen me
mirëqenien e tyre dhe të familjeve të tyre.

Nuk po flas për mungesën e veprave të artit në mjediset në Tiranës, se
nuk dua të bëhem si ndonjë provinciale, që synon të vishet me Valentino,
apo Armani.

Flas për gjithë ato leje ndërtimi që jepen, në të cilat nuk parashikohen
vende për kohën e lirë të banorëve apo të fëmijëve, ose parashikohen në
projekt po nuk realizohen. Jo vetëm aq: pronarët e firmave marrin
pagesën nga banorët që blejnë apartamentet dhe zhduken, duke lënë
ambiente të shëmtuara, oborre të pashtruara, garazhe të pambaruara, që
bëhen kosha plehrash, apo vende të rrezikshme për kalimtarët e natës.

Indiferentizmi, paaftësia për të reaguar përballë padrejtësive apo
sjelljeve të atyre që cenojnë qetësinë, rregullin e pastërtinë publike,
është në nivele shumë të larta. Ne kalojmë pranë këtyre shfaqjeve, si
banorë të një planeti tjetër, sepse me sa duket edhe pas 20-viteve ende
është e fortë frika nga pushteti, nga protestat, e ngulitur gjatë
sistemit monist. Ndërkohë fëmijët zbaviten nën hundën e ligjit dhe
rendit me mjete të dëmshme e të rrezikshme, si shashkat.

Po çfarë mund t'u thuash fëmijëve, që dëfrehen me plasjet e
shashkave dhe frikën e të tjerëve, ku janë prindërit ata që u japin të
holla për t'i blerë?

Ndërgjegjja qytetare nis të formohet që në fillimet e jetës në familje e
pastaj në shkollë. Njeriu gjithë jetën mëson e korrigjon veten në
marrëdhëniet me të tjerët. Të gjithë kemi qejf të quhemi 'tiranas', duke
hidhëruar pak 'tironsit' që janë grupuar deri edhe nëpër faqet e
internetit për të ruajtur gjuhën dhe zakonet e këtij qyteti-kryeqytet.

Po edhe 'tiranasit' edhe 'tironsit' janë njësoj, kur flitet për
ndërgjegjen qytetare. Sepse përderisa nën hundën tonë hedhin plehrat nga
dritarja, i lënë qeset me mbeturina në qoshet e pallatit, nuk reagojnë
ndaj atyre që prishin qetësinë apo rregullin publik, ne nuk mund të
quhemi 'qytetarë', pra as 'tiranas', as 'tironsa'.

Të jesh qytetar, sipas kuptimit që ka kjo fjalë, do të thotë jo thjesht
të jesh banori i një qytetit apo shteti, por edhe të shqetësohesh për
pasojat e sjelljes tënde ndaj qetësisë, ndaj rregullit e jetës së të
tjerëve.

Realiteti tregon se ende jemi larg të qenit 'qytetarë', pra larg
detyrimit të pashkruar për të punuar për mbarëvajtjen e bashkësisë, së
cilës i përkasim, nëpërmjet pjesëmarrjes ekonomikisht, punës vullnetare
apo mënyrave të tjera, që përmirësojnë jetesën e bashkëqytetarëve dhe
tonën.

Të gjithë kemi të drejt të kërkojmë mbështetje, mbrojtje nga bashkësia,
po ashtu si kemi edhe detyrime ndaj saj. Po ende të gjithë jemi të
mbërthyer para skenës, ku politika tregon muskujt.

Ndërkohë Edvini, Joeli, Leonardi, Aldo, Orjoni, Tisiani, Marçelo,
Marvini, Rei, Ergini, një grup fëmijësh, që banojnë në rrugën "Myrteza
Topi" këtu në Tiranë dhe si vend zbavitjeje, si pothuajse të gjithë
fëmijët e pallateve të banimit në Tiranë, kanë një shesh të shëmtuar, të
zhveshur, të lënë përgjysmë nga firma 'Goga'.

Një ditë me iniciativën e Edvinit e Joelit, ata lanë shashkat e u
kërkuan banorëve përreth ndonjë fidan peme apo rrënjë lulesh nga
kopshtet e ballkonet e tyre, morën lopatë e vegla të tjera dhe mbollën
disa pemë në një cep të oborrit, që firma e ndërtimit e ka lënë
pambaruar, duke përfshirë edhe pjesën e garazheve poshtë pallatit, e
cila tani është kthyer në kazan plehrash e burim mizash.

Me lekët, që deri dje blinin shashka, ata do të blinin pleh për pemët e
tyre. Madje mendojnë të gjejnë edhe dërrasa, që të bëjnë ndonjë stol
atje.

U thashë se duhej të kërkonin edhe ndihmën e prindërve e të fqinjëve, që
të jepnin ndihmesën e tyre në këtë nismë që ata kishin marrë, po Orjoni
më tha se askush nuk i ndihmon.

Atëherë unë mora aparatin, u bëra një foto dhe mendova se duhet t'i
ndihmoj, duke biseduar me banorët përreth, kështu që ata të vijojnë në
këtë rrugë, po të nxis edhe shkollat ku ata mësojnë: "Lidhja e
Prizrenit", "Servete Maçi" e "Siri Kodra", dhe me anë të shtypit, që të
ndihmohen dhe të edukohen fëmijët për të krijuar një atmosferë të qetë e
të këndshme rreth banesave, sepse ndihmohet edhe secili prej nesh.

Fëmijët, po edhe prindërit e tyre duhet më në fund ta kuptojnë se
përmirësimi i cilësisë së jetës, mbajtja e një ambienti të pastër e të
bukur nuk është vetëm detyrë e qeverisë dhe e bashkisë, po është edhe
detyrë e qytetarëve.

Le t'i lëmë dinozaurët në betejat e tyre zulmëmëdha. Le të nisim të
bëjmë detyrën tonë si qytetarë, të mendojmë më shumë për vete dhe
fëmijët tanë.

nga Adi1 Mon Jan 17, 2011 9:49 am

E bukur!
Nese e lexon per here te dyte kam idene qe pervecese e bukur behet edhe shume interesante. Eshte shume bukur kur shkruan dhe une nuk e di nese jetoni ne shqiperi apo jashte saj. Pasi nese jeton ne shqiperi kupton qe ketu realiteti eshte shume i hidhur dhe qytetaret eshte shume e veshtire te largohen nga Demonet e politikes shqiptare.
Jeta e nje pjese te tyre eshte e lidhur me ta dhe e kane te pamundur qe te shkeputen madje jane gati ti shqyejne kundershtaret ashtu si bejne kafshet mishngrenese kur nje kundershtar ju eshte futur gabimerisht ne teritorin e tyre te gjuetise.
Duhet shume kohe qe qytetaret e ketij vendi te jene te pavarur nga politika destabilizuese qe ka 65 vjet qe po ju mer cdo gje te bukur te kesa bote.
Mgjt shpresoj qe pas nje 5 vjecari njerezit ndoshta do te kene mundesi ti therresin mendjes dhe ti vene gishtin kokes. Duke u mare me familjen dhe hallet e saj kane per ta pare qe cdo gje ka per te ndryshuar.
Shpresoj qe kjo te ndodhe por nje mendje me thote qe demonet kane fuqi te mbinatyrshme dhe te bejne per vete.