Big brother ALBANIA 3 - PROFILET E BANOREVE

nga Engjelli Shqiptare Tue Feb 02, 2010 8:05 pm

PROFILI I HAKIUT
Mosha: 34 vjeç
Vendbanimi: Prishtinë
Vendlindja: Prishtinë
Arsimi: I lartë (Aktrim, magjistraturë për Gazetari)
Profesioni: Moderator në radion “Blue Sky”, Prishtinë
Statusi civil: I martuar

Thotë për veten: “Unë jam Kika... jam ky që shikoni, nuk fsheh asgjë!”.

Eksperiencat: Punon prej 10 vjetësh në Radion “Blue Sky”, radio publike që u dedikohet të rinjve dhe aty ka show-n e tij që quhet “Wolt” e që mbahët çdo mbrëmje. Dashuria e tij mbetet aktrimi, për të cilin dhe ka studiuar. Ëndrra e tij është të ketë një emision të tijin në Top Channel dhe të lexojë dokumentaret e Explorer-it.

Familja: Përbëhet nga gruaja Linda dhe tre fëmijët: Remesiana, Redoni dhe Rea. Është prind i devotshëm dhe bashkëshort i përkryer. Me Lindën është njohur që fëmijë. Kur u martuan, ajo ishte 18 vjeç, ndërsa Hakiu 20. Me gjithë peshën e viteve, dashuria e tyre është nëjsoj si ditën e parë.

Interesa & hobi: Pëlqen sportet dhe muzikën. Herë pas here shkruan dhe kur ka kohë të lirë shkon për peshkim.

Marrëdhëniet me femrat: Në Prishtinë e njohin për aventurier, por është thjesht një përshtypje. Pohon se gruan nuk e ka tradhëtuar asnjëherë.

Hyn në Big Brother... për të fituar!

nga Engjelli Shqiptare Tue Feb 02, 2010 8:07 pm

PROFILI I VALENTINES
Mosha: 49 vjeç
Vendbanimi: Tiranë
Vendlindja: Memaliaj
Arsimi: I mesëm
Profesioni: Biznesmene
Statusi civil: Vejushë

Thotë për veten: “Unë jam mama Vale, mamaja e Domit dhe mamaja e të gjithëve. Jam energjike, e dashur me të gjithë dhe gjithnjë në kërkim të adrenalinës”.

Eksperiencat: Në Memaliaj kryen shkollën 8-vjeçare dhe të mesme. Ëndrra e saj ka qenë të studionte Regjisurë, por babai nuk ia lejoi një gjë të tillë, për shkak të mentalitetit të atëhershëm. Detyrohet të fillojë punë si tornitore. Pasi lind Domenikën, i shoqi futet në burg. Ndahen dhe filon një jetë të re e vetme, me një fëmijë të vogël, me halle e probleme pafund. Në vitin ’97 largohet për në Itali. Aty martohet me një italian rreth të 80-ave, i cili, pas disa vitesh ndahet nga jeta dhe i lë Valentinës gjithë të ardhurat e pensionit të tij. Kthehet në Shqipëri dhe hap një fabrikë plastmasi, që ka vendosur ta shesë, duke qenë punë shumë impenjative.

Familja: Domenika është familja e saj. Ajo është njeriu më i rëndësishëm i jetës.

Interesa & hobi: Po shkon rreth të 50-ave, por ndjehet si një 20 vjeçare. Adhuron udhëtimet me makinë, të cilën e nget si e çmendur. Pasion i madh është gatimi, të cilin e ka të trashëguar nga e ëma.

Marrëdhëniet me meshkujt: Ka shumë miq të mirë meshkuj, por asnjë lidhje për momentin.

Hyn në Big Brother... Për të fituar një bast që ka vënë me të bijën.

nga Engjelli Shqiptare Tue Feb 02, 2010 8:08 pm

PROFILI I DOMENIKES
Mosha: 24 vjeç
Vendbanimi: Firenze, Itali
Vendlindja: Vlorë
Arsimi: I lartë, “Akademia e Arteve të Bukura”, Firenze, Itali.
Statusi civil: Beqare

Thotë për veten: “Unë jam kështu siç më shikoni, e qeshur, e lirshme dhe gjithnjë me buzëqeshje në fytyrë. E marr jetën si të më vijë. Më pëlqen të njoh njerëz të rinj”.

Eksperiencat: Është në prag të diplomimit në degën e skenografisë. Pëlqen shumë artin në përgjithësi. Ka bërë disa shërbime fotografike. Ka mijëra foto në arkivin e saj.

Familja: Nëna e saj Valentina është gjithçka që ka në jetë. Prindërit janë divorcuar që kur ajo ishte vetëm pak muajshe. Babai tani ka një familje tjetër. Mamanë e quan motër, shoqe, shok. Me të konsumon çdo bisedë. Para se të hynin në Big Brother vunë një bast: kush nga të dyja do hynte në shtëpi, do t’i paguante tjetrës një udhëtim për një Dubai. Domenika nuk e dinte që nëna e saj do bëhej një nga banorete shtëpisë së Big Brother.

Interesa & hobi: Pëlqen çdo gjë që ka lidhje me shkollën që ndjek. Fotografia është pasioni më i madh, por edhe teatri e kinematografia.

Marrëdhëniet me meshkujt: Me meshkujt nuk i ka punët dhe aq mirë. Pjesën më të madhe të kohës nuk e di se çfarë kërkon.

Hyn në Big Brother... për të bërë qejf!

nga Engjelli Shqiptare Tue Feb 02, 2010 8:10 pm

PROFILI I ERJONIT
Mosha: 25 vjeç
Vendbanimi: Tiranë
Vendlindja: Përmet
Arsimi: I lartë, diplomuar për Psikologji
Profesioni: Volejbollist
Statusi civil: Beqar

Thotë për veten: “Tek vetja vlerësoj inteligjencën. Di të përshtatem mjaft mirë në grup. Kur dua diçka, përpiqem gjithmonë ta arrij.

Eksperiencat: Ka punuar për rreth 2 vjet si folës dhe gazetar në një nga televizionet lokale. Paralelisht është volejbollist me ekipin e Tiranës. Po t’i ofrohej, nuk do t’i thoshte “jo” një pune që lidhet me profilin që ka studiuar. Dikur ka qenë pjesëmarrës në një konkurs bukurie të rangut kombëtar.

Familja: Përbëhet nga prindërit dhe vëllai.

Interesa & hobi: Pëlqen muzikën dhe është frekuentues i rregullt i jetës së natës. Më shpesh frekuenton karaoket.

Marrëdhëniet me femrat: Kanë qenë gjithnjë pozitive. Ka pasur edhe lidhje impenjative, por më së shumti lidhje të shkurtra. Thotë se nuk ka ngelur asnjëherë pa një femër në krah. Me të gjitha femrat që është ndarë ruan marrëdhënie të mira dhe respekt reciprok.

Hyn në Big Brother... Ndoshta për t’iu rikthyer televizionit, pse jo dhe për të njohur famën në një dimension tjetër.

nga Engjelli Shqiptare Tue Feb 02, 2010 8:12 pm

PROFILI I PAMELES
Mosha: 23 vjeç
Vendbanimi: Tiranë
Vendlindja: Korçë
Arsimi: I lartë, diplomuar për Punë Sociale
Profesioni: Agjente udhëtimesh
Statusi civil: Beqare

Thotë për veten: “Jam tip i hapur, pa komplekse. Përshtatem kollaj. Jam e qetë dhe spontane”.

Eksperiencat: Puna si agjente shitjesh i pëlqen. Pjesa më e bukur është kur vjen stina e verës dhe agjencia organizon udhëtimet turistike për stafin. Është marrë me modë, konkurse bukurie dhe ka bërë disa shërbime fotografike, por me kalimin e viteve, kjo ka mbetur më shumë si një hobi e së kaluarës. Do pëlqente të studionte Juridikun.

Familja: Jeton me prindërit dhe vëllain më të vogël. Me nënën konsumon gjithçka, kurse me babain më pak. Kur vjen darka dhe ajo duhet të dalë, është mami ajo që e merr babain me të mira.

Interesa & hobi: Pamela është një vajzë tipike kryeqyteti. Ditën e sheh sportive dhe të angazhuar me punë, kurse mbrëmjeve është gjithnjë elegante, më look më të kuruar, e trukuar dhe gati për të bërë qejf. Mbrëmjeve i pëlqen të shijojë një gotë verë me miqtë, kurse fundjavat i kalon nëpër pub-e.

Marrëdhëniet me meshkujt: S’kanë qenë asnjëherë një problem. Nuk i mungon kurrë vëmendja. Momentalisht po shijon beqarinë. Nuk pëlqen ta kthejë kokën pas. I duket kohë e humbur.

Hyn në Big Brother... për të provuar famën dhe për të vënë në provë personalitetin e saj.

nga Engjelli Shqiptare Tue Feb 02, 2010 8:13 pm

PROFILI I SELDIT
Mosha: 23 vjeç
Vendbanimi: Tiranë
Vendlindja: Tiranë
Arsimi: I lartë, Akademia e Arteve të Bukura, Kanto
Statusi civil: Beqar

Thotë për veten: “Jam i hapur, i komunikueshëm, shumë i suksesshëm me femrat. Më pëlqen të jem në qendër të vëmendjes dhe ia arrij gjithmonë”.

Eksperiencat: Vazhdon studimet në degën e kantos. Ka marrë pjesë në Top Fest dhe Këngën Magjike. Nuk i është dashur të punojë, pasi të gjitha të ardhurat e nevojshme ia siguron e ëma, e cila ka një biznes privat.

Familja: Nëna është familja e tij e vetme. Prindërit janë ndarë që kur ai ishte vetëm 1 vjeç. Babain e takon rrallë dhe kur i duhet të flasë për të ndjehet jo shumë komod. Jeton vetëm dhe e ëma mundohet t’ia bëjë jetën sa më të lumtur. Lidhja që ka me nënën është vërtet e rrallë. Ajo është i vetmi njeri për të cilin ai do hiqte dorë nga gjithçka, po të nevojitej.

Interesa & hobi: Pëlqen jetën aktive, veshjet trendy dhe fundjavat i kalon gjithnjë në shoqëri.

Marrëdhëniet me femrat: Gjithnjë të mira. Është gjithë kohës i rrethuar nga femra.

Hyn në Big Brother... për të fituar famë në rrugën e muzikës dhe pse jo, për të marrë çmimin e madh!

nga Engjelli Shqiptare Tue Feb 02, 2010 8:15 pm

PROFILI I JETMIRIT
Mosha: 25 vjeç
Vendbanimi: Vlorë
Vendlindja: Vlorë
Arsimi: I lartë, “Shkenca Politike”, Romë
Statusi civil: Beqar

Thotë për veten: “Jam egocentrik, shakaxhi dhe zemërmirë. Relacionohem shpejt me njerëzit dhe jam gjithnjë aktiv”.

Eksperiencat: Është në prag të diplomimit për Shkenca Politike. Deri tani ka provuar punë nga më të ndryshmet, që nga kamarier, ndihmës-kuzhinier, animator, asistent, etj. Është larguar për në Itali që në moshën 13 vjeçare.

Familja: Përbëhet nga prindërit dhe motra, e cila studion për Mjekësi. Ka 12 vjet që jeton larg tyre. Çdo gjë e ka arritur me forcat e tij. Rruga drejt maturimit ka qenë e vështirë, por ai ia ka dalë mbanë.

Interesa & hobi: Lexon shumë filozofi, histori, shkenca, etj. Është natyrë shumë kurioze. Do të zbulojë sa më shumë lidhur me natyrën njerëzore, zanafillën, masonerinë, okultet e lashta, etj. Në këndvështrimin e tij, njeriu është një specie në evolim të vazhdueshëm. Kontributi më i madh që mund të japë gjithsecili nga ne është lufta për përmirësimin e kulturës dhe realizimin e asaj që quhet begati e lumturi.

Marrëdhëniet me femrat: Të shkëlqyera.

Hyn në Big Brother... për të sjellë një model të ri në shoqërinë shqiptare, modelin e të riut që di t’i bëjë të gjitha.

nga Engjelli Shqiptare Tue Feb 02, 2010 8:16 pm

PROFILI I EDUARDIT
Mosha: 37 vjeç
Vendbanimi: Tiranë
Vendlindja: Fier
Arsimi: I mesëm
Profesioni: Parrukier
Statusi civil: Beqar

Thotë për veten: “Unë nuk jam vetëm parrukier. Jam dhe showman, piktor, etj. Sarkazma dhe intriga janë qershia mbi tortë. Jam artist në shpirt”.

Eksperiencat: Profesionin e parrukierit e ushtron çdo ditë, por Eduardi nuk është vetëm ky. Gjatë verës punon si animator dhe showman nëpër plazhe, gjithashtu gjen kohën dhe të merret me pikturë, një nga pasionet më të mëdha. Për një kohë të gjatë ka jetuar në Greqi. Atje është njohur me njerëz të të gjitha shtresave shoqërore.

Familja: Eduardi jeton vetëm. Familja e tij përbëhet nga nëna dhe motra. Ai mendon se për një artist është e domosdoshme të jetojë vetëm.

Interesa & hobi: Piktura, muzika, gjuhët e huaja. Këtë të parën e ka pasion, vetëm se ka një problem: nuk pikturon dot meshkuj, por vetëm femra. Ka aftësi të mësojë shumë shpejt gjuhët e huaja. Flet mirë greqisht, anglisht dhe pak frëngjisht.

Marrëdhëniet me femrat: Të shkëlqyera!

Hyn në Big Brother... Për t’i dhënë penelatën e tij një “excellent show” si Big Brother.

nga Engjelli Shqiptare Tue Feb 02, 2010 8:19 pm

PROFILI I XHIMIT
Mosha: 29 vjeç
Vendbanimi: Stavanger, Norvegji
Vendlindja: Milot
Arsimi: Është duke ndjekur fakultetin ekonomik part-time.
Profesioni: Asistent menaxher në një firmë norvegjeze
Statusi civil: Beqar (bashkëjeton)

Thotë për veten: “Jam tip i hapur, pa komplekse. Përshtatem në çdo lloj ambienti. Jam dinak dhe egocentrik”.

Eksperiencat: Jeton në Stavanger të Norvegjisë prej 10 vjetësh. Puna e tij e parë ka qenë si përkthyes italishteje për KFOR-in në Prishtinë.

Familja: Përbëhet nga prindërit dhe 4 motrat. Prindërit nuk e njohin më, duke qenë se ka shumë vite larg Shqipërisë. Me nënën ka raport më të afërt. Ajo është shumë e lidhur me të.

Interesa & hobi: Synon të investojë në jug të Shqipërisë për të ndërtuar një resort bashkë me disa miq të tij. Është kuzhinier i shkëlqyer. Është frekuentues i rregullt i jetës së natës. Kërcen shumë mirë dhe pohon se shpesh femrat i josh me anë të kërcimit.

Marrëdhëniet me femrat: Për momentin, femra e jetës së tij është një, Elisabeta, një vajzë norvegjeze, me të cilën bashkëjeton prej disa vitesh. Thotë se ajo nuk do ta kishte problem nëse Gjimi do krijonte një raport brenda shtëpisë, duke qenë se ata janë një çift mjaft i hapur.

Hyn në Big Brother... Sepse ka kohë që e ëndërron dhe është gati të sakrifikojë gjithçka për të.

nga Engjelli Shqiptare Tue Feb 02, 2010 8:21 pm

PROFILI I BERTINES
Mosha: 25 vjeç
Vendbanimi: Tiranë
Vendlindja: Delvinë
Arsimi: I lartë, diplomuar për Inxhinieri Mjedisi
Statusi civil: Beqare

Thotë për veten: “Kam karakter të fortë dhe jam e vendosur. E kam provuar bashkëjetesën me njerëz të panjohur. Më pëlqen të rrezikoj dhe zakonisht u shkoj gjërave deri në fund”.

Eksperiencat: Ka 5 vjet që jeton në Tiranë, që kur filloi studimet. Pas përfundimit të shkollës ka punuar si PR në një kompani dhe më pas është marrë me casting në një kompani viedo-prodhuese.

Familja: Nëna dhe vëllai jetojnë në Delvinë. Ka dy motra më të rritura në Greqi. Bertina e ka humbur babain që kur ishte 9 vjeç. Familja e saj është në gjendje të vështirë ekonomike. Nëna, e cila është në pension, për të siguruar shkollën dhe jetesën normale për fëmijët ka bërë për një kohë të gjatë punë dore, të cilat i shet për të fituar të ardhura.

Interesa & hobi: Pëlqen botën e spektaklit, muzikën, kërcimin. Ndjek sportet, basketbollin, luan bilardo dhe pëlqen notin, të cilin e praktikon.

Marrëdhëniet me meshkujt: E pranon që është femër joshëse dhe shpesh vihet në qendër të vëmendjes së meshkujve. Momentalisht është single.

Hyn në Big Brother... Për të bërë një gjë ndryshe për veten, për një të ardhme më të mirë, për të dhe familjen e saj, mbi të gjitha për të treguar që është një femër që vlen.

nga Engjelli Shqiptare Tue Feb 02, 2010 8:23 pm

PROFILI I GRACIELES
Mosha: 27 vjeç
Vendbanimi: Shkodër
Vendlindja: Fier
Arsimi: I lartë, diplomuar për Gjuhë-Letërsi
Profesioni: N/komisare policie në Drejtorinë Rajonale të Kufirit, Shkodër.
Statusi civil: Beqare

Thotë për veten: “Jam e qeshur, kokëfortë, ndonjëherë edhe më shumë sesa duhet. Njerëzit më thonë që rrezatoj energji pozitive”.

Eksperiencat: Eksperiencat e para profesionale i ka pasur në televizionin e Shkodrës, ku pagesa linte për të dëshiruar, por ishte një punë që e bënte me shumë pasion. Këtu është njohur dhe me Ergysin, djalin me të cilin është e lidhur prej më shumë se dy vjetësh. Puna si oficere policie nuk hynte tek aspiratat e saj, por i siguron të ardhurat e nevojshme për të mbajtur veten dhe babain, i cili është i verbër.

Familja: Graciela jeton me babain, i cili nuk e ka parë të bijën asnjëherë. Ka një motër të martuar me të cilën është shumë e lidhur. Që pas humbjes së nënës nga një sëmundje e rëndë, jeta e saj mori një rrjedhë tjetër. Tani i duhet të kujdeset për babain, të cilin e çon çdo ditë në një qendër për të moshuarit. Ka një shifër të konsiderueshme parash për t’i paguar shtetit, por nuk dorëzohet asnjëherë. Dita e saj fillon dhe mbaron me buzën në gaz.

Interesa & hobi: Është e dashuruar me çdo gjë të bukur, çdo gjë që lidhet me artin. Pëlqen teatrin dhe televizionin në mënyrë të veçantë.

Marrëdhëniet me meshkujt: Është pjesë e një lidhjeje që është shumë e rëndësishme për të.

Hyn në Big Brother... Për të provuar veten dhe për t’i siguruar të atit një vizitë mjekësore jashtë Shqipërisë.

nga Engjelli Shqiptare Tue Feb 02, 2010 8:24 pm

PROFILI I OLTES
Mosha: 22 vjeç
Vendbanimi: Tiranë
Vendlindja: Tiranë
Arsimi: I lartë, Biznes, “Universiteti Bujqësor Kamëz”
Profesioni: shitëse
Statusi civil: Beqare

Thotë për veten: “Jam këmbëngulëse dhe gjërat që nis dua t’i çoj deri në fund. Kam shumë vetëbesim dhe ambicie. Jam dëgjuese e mirë, por dua edhe të më dëgjojnë. Veç bukurisë fizike, vlerësoj edhe atë shpirtërore”.

Eksperiencat: S’ka shumë eksperienca pune. Është gjithnjë në kërkim të një pune ku të mund ta gjejë veten. Momentalisht është sh*tëse në një kompani telefonie celulare, por është thjesht diçka e përkohshme.

Familja: Përbëhet nga prindërit dhe vëllai Arjani, i cili është futbollist me ekipin e Partizanit. Me nënën është më e lidhur, kurse me babain e ndan një mur, që tanimë që është bërë edhe më i lartë, me hyrjen e saj në Big Brother. Ka një nip të vogël që e do shumë.

Interesa & hobi: Pëlqen muzikën, kërcimin. Hobi ka sportet dhe shëtitjet në natyrë me qenin e saj.

Marrëdhëniet me meshkujt: Deri tani nuk ka pasur asnjë histori të rëndësishme. Duke qenë natyrë shumë selektive, edhe meshkujt i kërkon të përmbushin atë çka ajo synon.

Hyn në Big Brother... Sepse ka qenë gjithmonë një dëshirë shumë e madhe, që kur filloi edicioni i parë. Deri tani ka bërë gjithnjë atë që ka dashur për veten dhe ky është maksimumi.