Hiqet barrikada në Mitrovicë, Bahtiri meritat ia lë vetes

Barrikadën nuk e hoqën qytetarët e veriut! Ja kush e hoqi!
Publikuar: 17:13 / 19.06.2014



Disa deklarata të autoriteteve në veri, por edhe shtypi nga Beogradi, patën transmetuar lajmin se qytetarët e veriut të Mitrovicës kanë larguar me vetiniciativë barrikadën nga ura kryesore e këtij qyteti. Madje, këtë e ka thënë edhe vet kryeministri në largim, Hashim Thaçi.

Që nga mëngjesi i së mërkurës, nëpër rrugë të veriut, institucione, kafiteri, rrjete sociale etj., janë vërejtur komente cinike dhe zhgënjyese të qytetarëve, përmes të cilave ata demantojnë se kanë pasur lidhje me largimin e kësaj barrikade.

Barrikada e cila ka filluar të largohet të mërkurën rreth orës 01:00 pas mesnate, pothuajse të gjithë qytetarët i kishte zënë në gjumë, ndërsa në aksionin e largimit të saj me makinerinë e rëndë të kompanisë serbe “Inkop Srbija”, megjithatë kanë marrë pjesë rreth 15 qytetarë, pjesëtarë të të ashtuquajturës “Rojat e urës”, nga veriu i Mitrovicës.

Për herë të parë, gjatë 15 viteve, nuk është dëgjuar as alarmi i cili është përdorur në situata të tilla ose të ngjashme, kur serbët kanë ndërmarrë ndonjë aksion afër urës.

Serbët e veriut të Mitrovicës, gjatë paradites së të mërkurës kanë qenë vetëm spektatorë të pastrimit të urës nga balta e mbetur prej zhavorri (pastrimi bëhej nga kompania “Uniteti” nga jugu i qytetit), derisa shqiptarët e emocionuar kanë filluar menjëherë të kalojnë nëpër urë, me këmbë dhe me automjete RKS.

Qytetarët serbë në afërsi të urës, nuk kanë qenë shumë të disponuar për të dhënë ndonjë deklaratë, ndërsa ata të cilët janë përgjigjur në pyetjet e KosovaPressit, kanë qenë dukshëm të shqetësuar për shkak të heqjes së barrikadës, por edhe për shkak të - siç thanë - “kampanjës” nga Beogradi me të cilën përgjegjësia e një aksioni të tillë hedhet tek qytetarët e veriut të Mitrovicës.

Të gjithë ata me të cilët ka biseduar KosovaPressi, janë pajtuar se qytetarët e veriut të Mitrovicës nuk e kanë larguar barrikadën.

“Kjo është marrëveshje e Vucicit dhe Dacicit”, “na kanë shitur”, “tani ndjehemi të pasigurte”, “është gënjeshtër se qytetarët e kanë hequr barrikadën”, “kjo ka qenë mburoja e fundit për t’i parandaluar hordhitë nga Shqipëria”... janë vetëm disa nga reagimet e shkurta të qytetarëve serbë, të cilët nuk kanë pranuar t’i bëjnë emrat publikë.

Në anën tjetër, burime të KosovaPressit bëjnë të ditur se heqja e barrikadës është planifikuar nga dy vëllezër serbë me ndikim në atë pjesë, të njohur si kapo të krimit në veri, si dhe një shqiptar - po ashtu me ndikim prej “nëntokës” (emrat e tyre janë të njohur për redaksinë) - të cilët një ditë para heqjes së barrikadës e kanë bërë publike idenë e tyre edhe në një ambasadë të një shteti të fuqishëm në Prishtinë. /KosovaPressi/