Çfarë kapiteni i madh, prishet me klubin për Kosovën

Publikuar: 10:12 / 17.05.2014



Dëshira e madhe për të luajtur për Përfaqësuesen e Kosovës, ka bërë që Anel Rashkaj të mbetet pa klub. Në fakt, ai tani është në listën e transferimeve dhe pritet të largohet shpejtë nga Sandnes Ulfi. Sipas zyrtarëve të klubit norvegjez, gjithçka ka ardhur pas presionit të madh që i ka bërë Anel Rashkaj kryesisë së klubit të tij, për ta liruar atë për dy ndeshjet e radhës të Kosovës ndaj Turqisë dhe Senegalit.

Krerët e Sandnes Ulfit i dhanë fund situatës delikate me Rashkajn, duke vendosur për ta hedhur në shitje. Lajmin e konfirmoi për mediat norvegjeze zyrtari i këtij klubi, Tom Rune Espedal.

“Rashkaj është në listën e transferimeve. Ne kemi pasur presion të papërshtatshëm gjatë javëve të fundit për ta lëshuar atë për të luajtur për Kosovën. Por, një gjë e tillë gjatë ditëve të fundit e arriti kulmin. Kjo nuk ishte aspak profesionale nga ana e Anelit. Për këtë arsye, ne iu bëjmë të qartë se ai tani është në shitje”, ka deklaruar ai në pasditen e së premtes. Përpos Rashkajt, te Sandnesi luajnë edhe dy reprezentuesit tjerë kosovarë, Avni Pepa dhe Zymer Bytyqi. /Tribuna/Telegrafi/