Artistja që i shndërron personazhet në skulptura prej libri

Brenda saj jetojnë dy dashuri. Njëra për artin, e tjetra është pasioni për lexim. Imagjinata e ka shëtitur nëpër secilën qoshe të botës, teksa personazhet e librave që ka lexuar deri vonë i ka përfytyruar vetëm brenda kokës së saj.

Tre vjet më parë ajo do ta gjente formulën. Një gërshetim mes artit dhe dëshirës për të lexuar do të merrte formën e një shprehjeje unike në art.

Jodi Harvey-Brown (26), është artistja amerikane që ka marrë vëmendje botërore me skulpturat e saj prej libri. Ajo ka sfiduar imagjinatën duke u dhënë formë reale karaktereve të librave, tek ka sjellë në jetë skulpturat unike që i bën në faqe librash.

Harry Potter, Bambi, Tom Sawyer, janë disa prej personazheve më të famshëm të letërsisë, të cilëve Brown u ka dhënë formë nëpërmjet letrës. Por imagjinata e saj kapërcen kufijtë e librave. Ajo mbërrin deri tek hapja e Kutisë së Pandorës…