Raporti i OKB: Shqipëria e 89-ta në botë për lumturinë

Shqipëria nuk është vend i lumtur për të jetuar. Sipas klasifikimit të bërë nga Organizata e Kombeve të Bashkuara, vendi ynë klasifikohet i 89-ti në botë për gjendjen e lumturisë. Në renditjen e lumturisë për mbarë globin “World Happiness Report”, vendi ynë gjendet përkrah Tunizisë, Nikaraguas e Afrikës se Jugut, dhe pas Iranit, Libisë dhe Pakistanit. Ndryshe nga Shqipëria, në raportin për gjendjen e lumturisë në botë që është realizuar nga ekspertët e Universitetit të Kolumbias në ShBA, Kosova ndodhet disa vende me sipër në klasifikim, në pozicionin e 69-të. Vendi i parë në rajon sa i përket lumturisë është Kroacia, ndërsa ndër shtetet e rajonit ne kemi lënë pas Maqedoninë dhe Serbinë, të cilat janë disa shkallë më poshtë. Ajo që bie në sy në këtë klasifikim është një renditje shumë e dobët e Bullgarisë, që është ndër vendet e fundit në botë për lumturinë, ndërkohë që edhe hungarezët janë ndër vendet me renditje më të keqe në Europë. Në këtë raport është vënë re se shtetet e pasura, kryesisht vendet nordike, janë ato me popullsinë më të lumtur në botë. Në fakt, në krye të këtij klasifikimi ndodhet Danimarka, Finlanda, Norvegjia, Holanda e më pas edhe Kanadaja, Zvicra, Suedia, Australia etj. Kurse SHBA renditet e 11-ta, ndërsa Britania e Madhe e 18-ta. Sa u takon vendeve më pak të lumtura, ato janë ato më të varfrat, si: Togo Benin, Republika Qendrore e Afrikës dhe Siera Leone. Elementet që janë marrë parasysh nga profesorët e Universitetit të Kolumbias për përcaktimin e lumturisë janë: papunësia, mosha e vdekshmërisë dhe shëndetit mendor, zgjatshmëria e martesave dhe qëndrueshmëria e familjes, si dhe numri i viktimave apo aksidenteve në vit. “Ne shohim së pari faktorët e jashtëm më shumë (të ardhurat e punës, komuniteti, qeverisja, vlerat dhe feja), dhe pastaj ata më personalët (shëndeti mendor, shëndetit fizik, familja, edukimi, gjinia dhe mosha). Në shumë raste ka një bashkëveprim ndërmjet faktorit dhe lumturisë. Për shembull, arsimi ndikon në lumturinë e një personi, por lumturia gjithashtu ndikon në aftësinë për të mësuar. Po ashtu shëndeti ndikon në lumturinë dhe lumturia ndikon në shëndetin”, – thuhet në raport. Studime të tilla për indeksin e lumturisë në botë janë bërë kryesisht për kategori të caktuara popullatash, për grupe të margjinalizuara, apo të pasura, por kohët e fundit këto kanë qenë në qendër edhe të anketimeve të mediave apo agjencive të sondazheve. Ky indeks i lumturisë njerëzore është një gur themeli në matjen e kësaj ndjesie te njerëzit, të cilët po jetojnë kohëra gjithnjë e më të vështira, me plot stres dhe ku është shumë e vështirë të kërkosh lumturinë kur të mungojnë paratë për të jetuar.