Homoseksuali i dënuar për përdhunim përçan Kushtetuesen: Më diskriminuan

Tiranë Kërkesa e një homoseksuali të dënuar për marrëdhënie seksuale me dhunë me një të mitur ka përçarë Gjykatën Kushtetuese, e cila ka vendosur në favor të tij me 5 vota pro dhe 4 kundër. Ilir Velo, i dënuar me 18 vjet burg nga Gjykata e Fierit për marrëdhënie homoseksuale me të miturin V.Gj. ndër të tjerë pretendon se i janë shkelur disa të drejta, përfshi edhe të drejtën e barazisë para ligjit. Në kërkesën drejtuar shkallës më të lartë të gjyqësorit, nëpërmjet avokatit të tij ai thotë se është dënuar jo mbi vlerësimin e provave, por mbi bazën e diskriminimit për shkak të pritjeve të tij homoseksuale. Për të mbështetur këtë pretendim, Ilir Velo i referohet një shkrese që policia e Fierit i dërgon Prokurorisë, ku ndër të tjera thuhet se në orën e ngjarjes, në vendin ku është përdhunuar i mituri është parë një person homoseksual nga Lushnja. “Nga burime konfidenciale ka marrë të dhënën se në atë zonë, atë ditë në atë lagje dhe në ato orë është parë të lëvizte një shtetas homoseksual nga qyteti i Lushnjës. Në bazë të verifikimeve është identifikuar kërkuesi, i cili u shoqërua në Komisariat si i dyshuar, dhe pas paraqitjes për njohje ai u njoh nga i dëmtuari si autor i kësaj vepre penale”- thuhet në shkresën e policisë për ngjarjen e 26 marsit të vitit 2006, kur është denoncuar ngjarja e rëndë nga i mituri dhe familjarët e tij. Kaq ka mjaftuar që përmbajtja e kësaj shkrese të ngrihet në radhën e pretendimeve që i dënuari me 18 vjet burg dhe avokati i tij kanë bërë në Gjykatën Kushtetuese. Ndër të tjera thuhet se të dënuarit i është cenuar e drejta themelore e barazisë para ligjit të sanksionuar në nenin 18 të Kushtetutës dhe në nenin 14 të KEDNJ-së. “Kërkuesi është ndaluar, arrestuar, proceduar, gjykuar e më pas dënuar për veprën penale të kryerjes së marrëdhënieve homoseksuale me dhunë me të mitur, jo mbi bazën e vlerësimit të plotë e të gjithanshëm të provave, por nisur nga vlerësime diskriminuese, të bazuara mbi njohuritë për orientimin e tij seksual”- thuhet në kërkesën e Ilir Velos. Por përfaqësuesi i Prokurorisë së Përgjithshme e ka kundërshtuar një pretendim të tillë, pasi, sipas tij, kjo shkresë përcjell një informacion që policia ka siguruar për ngjarjen, i cili duhet të pasqyrohet në formë të drejtë. “Fakti i prirjeve homoseksuale të kërkuesit detyrimisht do të evidentohej shpesh gjatë procesit penal për shkak të veprës penale për të cilin ai është akuzuar gjykuar dhe dënuar, por në asnjë rast ky fakt nuk është vënë në dukje apo përdorur me qëllim diskriminimi”- ka deklaruar në seancë gjyqësore prokurori Hysen Keta. Sipas tij, shkresa që Komisariati i Policisë Fier i ka dërguar Prokurorisë së Rrethit, të cilën kërkuesi e paraqet si provë, nuk ka asnjë nuancë diskriminimi. “Kjo shkresë pasqyron përmbajtjen e një informacioni nga burime konfidenciale që detyrimisht duhet pasqyruar ashtu siç është dhënë nga burimi “se në atë zonë, atë ditë në atë lagje dhe në ato orë është parë të lëvizte një shtetas homoseksual nga qyteti i Lushnjës”, informacion që ka rezultuar i saktë, sepse prirjet homoseksuale të kërkuesit kanë qenë të njohura edhe nga persona të tjerë”- thotë ndër të tjera prokurori. Për këtë pretendim ka mbajtur qëndrim edhe Gjykata Kushtetuese, e cila i ka kushtuar një paragraf të veçantë në vendimin përfundimtar që ka shpallur. “Respektimi i parimit të barazisë kërkon, ndër të tjera, mosdiskriminimin e shtetasve dhe grupeve, në kushte të njëjta, pa arsye të përligjura. Ky parim kërkon që të gjitha subjektet të trajtohen në mënyrë të njëjtë, por nuk formulon ndalime që të mund të bëhet trajtim i diferencuar kur individët e grupet nuk ndodhen në kushte të njëjta apo të ngjashme apo kur ka justifikim të arsyeshëm e objektiv, duke vendosur një raport të arsyeshëm dhe përpjesëtimor midis mjeteve të përdorura dhe qëllimit që synohet të arrihet”- thuhet në vendim. Lidhur me pretendimin se Ilir Velo është dënuar jo mbi prova, por mbi bazën e prirjeve të tij seksuale, gjykata shprehet se kërkuesi nuk e ka argumentuar këtë pretendim në nivel kushtetues. Kërkesa e vetme që është pranuar nga Gjykata Kushtetuese është mospranimi i rekursit të të dënuarit nga Gjykata e Lartë. Duke e quajtur këtë vendim si keqinterpretim të ligjit, pesë nga 9 anëtarët e Gjykatës Kushtetuese kanë vendosur dërgimin e çështjes në Gjykatën e Lartë, me qëllim shqyrtimin e saj nga kolegji pena