Restelicë, vazhdon kërkimi i tre të ngujuarve

E plotësuar- Përkundër kushteve të këqija atmosferike dhe rifillimit të reshjeve të borës, njësitë e kërkim-shpëtimit vazhdojnë të kërkojnë tre njerëzit tjerë, të cilët thuhet të kenë qenë në shtëpi në momentin kur orteku i borës ka goditur shtëpitë në fshatin Restelicë të Dragashit.

Më herët është thënë se në momentin e goditjes së ortekut, këta tre persona kanë qenë në katin e dytë të një shtëpie, ashtu që dyshohet që t’i ketë bartur orteku pas shkatërrimit të shtëpisë ku kanë qëndruar.

Nga FSK kanë bërë të ditur se janë të vendosur që kërkimi të vazhdojë deri në momentin kur ata të gjenden, ndërkohë që pritet të bëhet ndërrimi i njësiteve të kësaj force.

Ndërkaq, është konfirmuar nxjerrja e tetë personave- shtatë prej tyre të vdekur, ndërsa vetëm një fëmijë i ka shpëtuar kësaj tragjedie. /Telegrafi/

---

E plotësuar- Sipas informacioneve më të fundit, shtatë persona e kanë humbur jetën si pasojë e ortekut që shkaktoi tragjedi në fshatin Restelicë të Dragashit.

Konfirmimin se shtatë persona janë nxjerrë pa shenja jete e ka bërë edhe ministri i Infrastrukturës, Fehmi Mujota.

Nga ana tjetër, mjekët kanë konfirmuar se fëmija që është nxjerrë i gjallë është me gjendje stabile shëndetësore dhe jashtë rrezikut për jetën.

Ndërkohë, njësitë e kërkim-shpëtimit janë në kërkim edhe të tre personave të tjerë, të cilët thuhet t’i ketë bartur orteku pas shkatërrimit të shtëpisë ku kanë qëndruar. /Telegrafi/

---

E plotësuar- Njësia e zjarrfikësve në fshatin Restelicë ka konfirmuar për RTK-në se janë gjetur edhe dy kufoma.

Bëhet fjalë për dy persona të gjinisë femërore, njëra fëmijë dhe një tjetër e moshës madhore. Dukagjini njofton se fëmija i vdekur është i moshës katërvjeçare.

Me këtë numri i viktimave nga tragjedia në këtë fshat shkon në pesë. /Telegrafi/

---

E plotësuar- Forca e Sigurisë së Kosovës dhe njësitë e emergjencës në fshatin Restelicë të Dragashit, kanë njoftuar se kanë arritur ta gjejnë të gjallë një fëmijë, i cili bashkë me shtatë anëtarët tjerë të familjes, ndodhej në shtëpinë që u godit nga orteku mëngjesin e të shtunës.

Fëmija thuhet të jetë një vajzë shtatëvjeçare, e cila është transportuar me shpejtësi në spitalin më të afërt. Po ashtu, bëhet e ditur se ushtarët e FSK-së në vendin e ngjarjes kanë dëgjuar zërin e një gruaje nga rrënojat e shtëpisë.

Njësitë emergjente po kërkojnë shtatë anëtarët e një familje tjetër, dhe gjetja e fëmijës ka rritur shpresat se edhe të tjerët mund të jenë të gjallë. /Telegrafi/

---

E plotësuar- Ministri i Infrastrukturës, Fehmi Mujota, ka deklaruar se nuk mund të thuhet se sa do të zgjasë misioni i kërkim shpëtimit në Restelicë.

“Kërkimet po i vështirësojnë edhe kushtet atmosferike. Rruga është e hapur. Konfiguracioni i fshatit e bën të pamundur që mjetet motorike të arrijnë në vendin e ngjarjes. Nuk mund të afatizohet koha e kërkim shpëtimit. Deri sa ka shpresa për të gjetur persona të gjallë, kërkimi do të vazhdojë, madje do të vazhdoj, nëse ndodh më e keqja, edhe për trupa të vdekur”, i ka thënë ministri Mujota portalit Dukagjini.

Ai ka shtuar se ka angazhim maksimal që ta arrihet sa më shpejt te personat që janë ngujuar nën ortek dhe është lutur që ata të jenë gjallë.

Ndërkohë, më herët, koordinatori i ekipit për menaxhimin e krizës, Osmon Qereti, ka thënë se ai nuk ka asnjë informacion nëse tetë personat që dyshohet se janë nën ortek kanë shenja jete. /Telegrafi/

---

E plotësuar- Njësitë e kërkim-shpëtimit të Forcës së Sigurisë së Kosovës janë duke vazhduar kërkimet për të gjetur tetë banorët ngujuar nën ortekun e borës në Restelicë.

Sipas Kosovapress, ushtarët e FSK-së janë duke rrezikuar edhe jetën e tyre, pasi me lopata dhe mjete tjera të dorës, kanë hapur tunele nën borë, për të arritur te personat që besohet se gjendeshin në shtëpitë, në momentin kur u përfshinë nga orteku.

Pjesëtarët e FSK-së në Restelicë kanë depërtuar në këmbë, pasi është e pamundur që aty të shkohet me makineri të rëndë. Komandanti i FSK-së, Kadri Kastrati, ka urdhëruar që në ndihmë të njësive të FSK-së që gjenden në Restelicë, t’u shkojnë edhe 100 ushtarë tjerë, të specializuar për kërkime në situata të vështira natyrore.

FSK ka ngritur shtabin emergjent pranë Restelicës, ku ka dërguar njësitë mjekësore dhe ato të ndërlidhjes. /Telegrafi/

---

E plotësuar- Policia e Kosovës ka konfirmuar edhe viktimën e tretë nga orteku që ka goditur disa shtëpi në fshatin Restelicë të komunës së Dragashit.

“Gjatë përpjekjeve të vazhdueshme për nxjerrjen e personave të ngujuar nga orteku është nxjerrë edhe personi i tertë pa shenja jete”, ka thënë për Radion Evropa e Lirë, zëdhënësi i Policisë së Kosovës, Baki Kelani.

Policia ka thënë se dyshohet se edhe tetë persona të tjerë gjenden të mbuluar me borë. /Telegrafi/

---

E plotësuar- Policia e Kosovës ka konfirmuar se në tragjedinë e Restelicës kanë humbur jetën dy persona, ndërsa dyshohet se edhe nëntë banorë të tjerë të dy familjeve gjendën të mbuluar nga orteku i borës.

“Policia e Kosovës sot rreth orës 09:25 ka pranuar një informacion se në fshatin Restelicë të Komunës së Dragashit, ka rrëshqitur një ortek i bores me ç’rast ka mbuluar në tërësi dhjetë deri në pesëmbëdhjetë shtëpi të këtij fshati, gjashtë prej të cilave janë mbuluar tërësisht. Sipas informacioneve të pranuara nga tereni dy nga këto shtëpi kanë qenë të banueshme, ndërsa të tjerat kanë qene të pabanuara. Në dy shtëpitë e banuara dyshohet të kenë qenë njëmbëdhjetë persona, të cilët kanë mbetur brenda të izoluar nën ortekun e borës”.

“Gjatë përpjekjeve të vazhdueshme deri me tani janë nxjerrë nga bora dy persona, një i gjinisë mashkullore dhe një i gjinisë femërore, të cilët janë pa shenja jete, si dhe supozohet se edhe nëntë persona të tjerë gjenden brenda nen shtëpitë e mbuluara nga orteku i borës”, thuhet në komunikatën e Policisë së Kosovës. /Telegrafi/

---

E plotësuar- Pas përpjekjeve të vazhduara pjesëtarët e Forcës së Sigurisë së Kosovës dhe ekipeve tjera emergjente, kanë arritur të depërtojnë në fshatin Restelicë.

Pranë shtëpive të rrënuara më parë kanë mundur të shkojnë vetëm banorët e fshatit Restelicë, fshatrave përreth dhe disa njësi policore, të cilët thuhet se nga orteku i borës kanë nxjerrë dy banorë pa shenja jete.

Sipas Kosovapress, nga orteku i borës që ka përfshirë 18 shtëpi të fshatit Restelicë të Dragashit, dy banorë kanë humbur jetën, ndërsa dyshohet se brenda dy shtëpive gjenden edhe nëntë banorë të tjerë. Ndërsa mësohet se nga 18 shtëpi, sa janë përfshirë nga orteku, gjashtë janë shkatërruar tërësisht, kurse të banuara ishin vetëm dy. /Telegrafi/

---

E plotësuar- Zëvendësministri i FSK-së, Shemsi Veseli, ka konfirmuar se dy viktima janë identifikuar deri më tash si pasojë e rrëshqitjes së borës në fshatin Restelicë, të Dragashit, ndërsa Dukagjini.com raporton se dyshohet edhe për gjashtë të tjerë të vdekur.

Një nga viktimat është M. R., mashkull, i lindur më 1958, ndërsa viktima e dytë thuhet se është një grua.

Mësohet se dymbëdhjetë shtëpi gjenden të mbuluara nga bora si pasojë e rrëshqitjeve të mëdha të borës. /Telegrafi/

---

E plotësuar – Dy persona kanë vdekur dhe njëmbëdhjetë të tjerë dyshohet se janë ende nën gërmadhë, si pasojë e rrëshqitjes së borës në fshatin Restelicë të Dragashit.

Zëvendësministri i FSK-së, Shemsi Veseli, ka konfirmuar vdekjen e dy personave në Restelicë.

Katër njësi të FSK-së janë nisur për ta ndihmuar fshatin e goditur nga orteku. Por, ende nuk dihet nëse kanë arritur në vendin e ngjarjes. /Telegrafi/

---

E plotësuar - Bora që vazhdon të bie, ka bllokuar pothuaj tërësisht rajonin e Dragashit, në veçanti fshatin Restelicë, i cili është goditur nga orteku.

Siç njoftojnë zyrtarë policorë për “Kosovapress”, tri shtëpi në këtë fshatë janë mbuluar nga orteku i borës, ndërsa dyshohet se dy persona janë nxjerr pa shenja jeta. Brenda shtëpive dyshohet se gjenden edhe 9 anëtarë të familjeve.

Banorët që kanë mundur të arrijnë, janë duke u munduar që të nxjerrin banorët që janë mbuluar nga bora, brenda shtëpive.

Nga tri shtëpitë e goditura nga orteku, dy kanë qenë të banuara, ndërsa një jo.

Burme të Telegrafit bëjnë të ditur se policia ende nuk ia ka dalë të arrijnë në vendngjarje.

“Express” ka mësuar se dymbëdhjetë shtëpi gjenden të mbuluara nga bora si pasoj e rrëshqitjeve të mëdha të borës.

Ekipet e kërkim-shpëtimit tashmë janë nisur drejt Restelicës. Burime të gazetës kanë thënë se as helikopterët e KFOR-it nuk kanë mundur t`i nxjerrin banorët brenda shtëpive, për shkak të pamundësisë së aterrimit.

KFOR-i bashkë me FSK i kanë mësyrë rrugës tokësore, me makineri të rëndë, për t`i nxjerr personat që gjenden nën gërmadhat e shtëpive bë Restelicës.

Lajmin e ka konfirmuar zyrtari i lartë i FSK-së, Shemsi Syla.Ai ka konfirmuar

“Tashmë për një person dihet se ka vdekur, dyshohet se ka edhe të tjerë të vdekur nën gërmadha”, ka thënë një burim i gazetës.

Ekipet shpëtimtare të komunës janë nisur për në vendin e ngjarjes për të ofruar ndihmë, por bora dhe mjegulla e madhe kanë bërë të pamundur afrimin tek orteku që supozohet të jetë burim i tragjedisë, njofton KTV.

Me të ngujuarit janë humbur kontaktet.

Në fshatrat e komunën së Dragashit, lartësia e borës thuhet të ketë arritur në 2.5 metra. /Telegrafi/