Kronika e zezë

Një 47-vjeçare shqiptare është vrarë me 4 plumba nga bashkëjetuesi italian në Vercelli. Trupi i gruas është gjetur mbrëmjen e së enjtes në një rrugë pranë qendrës së qytetit.

Shqiptarja e vrarë është Donika Xhafa, e cila në fillim është qëlluar me një plumb në makinën me të cilën po udhëtonte bashkë me bashkëjetuesin e saj, Raffaele Vorrano, 59 vjeç, më pas është qëlluar edhe tre herë të tjera pasi ishte zbritur nga makina. Vrasësi në fillim është larguar nga vendngjarja për t’u vetëdorëzuar më pas në polici. Vrasja dyshohet të ketë ndodhur për motive xhelozie, ndërsa policia nisi hetimet për të zbardhur ngjarjen.

Qëllohet për vdekje me armë zjarri shoku i ngushtë i Elton Deliut, i vrarë në vitin 2008-të teksa njihej nga policia si kontingjent i trafikut të drogës.

Admirim Sako është qëlluar 3 herë me pistoletë teksa hipte në mjetin e tij tip “BMV” me targë AA 975 BR. Atentati ka ndodhur pranë lokalit të 40-vjecarit në afërsi të Gjykatës së Tiranës, kur një person është afruar dhe e ka qëlluar. Më pas autori është larguar në drejtim të rrugës “Myslym Shyri”, teksa i plagosuri u dërgua në Spitalin Ushtarak ku dhe ka gjetur vdekjen.

Menjëherë në vendngjarje kanë mbërritur forcat e policisë të cilat po hetojnë në lidhje me tentativën për vrasje, teksa pritet që filmimet e sigurta nga kamerat e sigurisë të lokalit të ndihmojnë hetimet dhe identifikimin e autorit. Sipas policisë Sako, i cili ka disa objekte në pronësi rezulton të jetë shoku i ngushtë i Elton Deliut dhe administronte pronat e pasuritë e tij, të sekuestruara në dhjetor të vitit të kaluar.

Ndërkohë që Deliu i njohur për trafik të lëndëve narkotike u vra në dhjetor të 2008-tës së bashku me nënën e tij.

Një ngjarje e rëndë ka ndodhur mëngjesin e sotëm në Shkodër, ku një person është ekzekutuar me armë zjarri.

Burime nga policia lokale bëjnë të ditur se vrasja ka ndodhur në lagjen ‘Zdrale’, ku 40-vjeçari Kujtim Vajushi është qëlluar disa herë me armë zjarri nga persona ende të paidentifikuar.

Policia ka mbërritur në vendin e ngjarjes dhe po punon për të zbardhur shkaqet dhe autorët e vrasjes.

Autori i vrasjes së ish-gruas së tij dhe të dashurit të saj Burhan Kapllani ka thyer më në fund heshtjen dhe ka folur për krimin që kreu. “Nuk e pranoja shkatërrimin e familjes time”, ka thënë Kapllani në seancën e sotme të dëgjimit, i cili pas krimit ishte nën shok dhe nuk pranonte të fliste.

Burhan Kapllani, biznesmeni shqiptar 48-vjeçar të enjten shokoi Italinë duke vrarë me armë zjarri pistoletë në parkimin e një supermarket në Aquila ish-gruan Orjeta Boshti 36 vjeçe dhe të dashurin e ri te saj Shpëtim Hana 39-vjeç.

48-vjeçari po qëndron në burg dhe i shoqëruar nga avokati i tij Tomasso Colella është pyetur në qelinë e tij, për të zbardhur më shumë detaje rreth krimit makabër. Kapllani ka zbuluar një tjetër fakt që për policinë italiane nuk është shumë i besueshëm, pasi ka deklaruar se e kishte parë rastësisht ish-gruan dhe personin tjetër pasi ishte duke shkruar në një dyqan aty afër për të blerë cigare.

Sipas policisë italiane për këtë ngjarje ka shumë pika të errëta dhe paqartësi, si për shembull se ku e kishte gjetur pistoletën tip Beretë me kalibër 7.65 me të cilën ai vrau dy personat.

Burhan Kapllani mesa duket ka përzgjedhur edhe viktimat pasi në makinën Opel Zafira ku ai vrau ish-bashkëshorten ishte edhe nëna e Orjetës, por 48-vjeçari ka sqaruar se kurrë nuk do t’i kishte bërë keq vjehrrës së tij. Të tronditur nga kjo vrasje janë edhe fqinjët e Orjeta Boshtit të cilët shprehen se është një histori e shëmtuar. Ndërsa një i ri komenton: “Mendoj për fëmijët të cilët kanë mbetur pa nënë. Fëmijët e Orjetës po qëndrojnë në shtëpinë ku deri pak ditë më parë luanin me nënën e tyre, ndërsa tani për ta po kujdesen prindërit e viktimës”.

Udhëtimi i fundit i Orjeta Boshtit dhe Shpëtim Hanës drejt Shqipërisë kushton shumë, rreth 5 mijë euro dhe për këtë fakt persona të afërt me familjen po përpiqen për të mbledhur këtë shifër për të rikthyer në shtëpi dy viktimat, pas autopsisë që është parashikuar për t’u zhvilluar të hënën.

Një grua 45-vjecare është mbytur sot në lumin që kalon në fshatin Isufmuç të komunës Baldushk, aty ku edhe jetonte.

Mësohet se viktima është shtetësja Caje Fejzo, e cila sipas të dhënave të para po përpiqej të kalonte lumin dhe është tërhequr nga rrjedha e tij.
Policia e mbërritur në vendngjarje deklaron se po heton edhe pistën e vetëmbytjes së gruas.

Klos, gjendet i mbytur në liqen një 37-vjeçar, nisin hetimet
Ndërsa në Një 37-vjeçar është gjetur i mbytur në liqen mesditën e sotme. Mësohet se bëhet fjalë për shtetasin Nazmi Dika, i cili është gjetur i mbytur nga banorët e zonës.

Policia sqaron se 37-vjeçari vuante nga sëmundja e epilepsisë, ndërkohë që po hetohen shkaqet e mbytjes së tij. Viktima, baba i një fëmije ishte nga fshati Bejn i Matit.

Policia po heton në dy pista, atë të vetëmbytjes së viktimës, por nuk përjashtohet as ajo e vrasjes së tij.

Një person i paidentifikuar i hodhi acid në fytyrë dhe kraharor një gjyqtareje në qytetin e Vlorës.

Dyshohet se veprimi ndaj gjykatëses lidhet me detyrën që ajo kryen në gjykatën e shkallës së parë në qytetin bregdetar.

Gjyqtarja Mirela Mishgjoni aktualisht po merr ndihmën mjekësore në spital si pasojë e plagëve të marra nga sulmi i rëndë.

Dy shqiptarë të shpallur në kërkim, ekstradohen nga Spanja dhe Gjermania

Dy shtetas shqiptarë të shpallur në kërkim ndërkombëtar janë ekstraduar sot nga Spanja dhe Gjermania. Zyra Qëndrore Kombëtare Interpol Tirana ekstradoi nga Madridi i Spanjës, shtetasin Sokol Sejda, 32 vjeç, i cili dyshohet se më datë 16 shkurt 2013 rreth orës 20:30 në një lokal në Elbasan, ka kanosur me armë zjarri pistoletë dhe më pas ka plagosur rëndë me thikë shtetasin Albert A.

Sejda është arrestuar më datë 30.04.2014 në qytetin e Barcelonës, në Spanjë, me qëllim ekstradimi drejt vendit tonë.

Ndërkohë nga Frankfurti, Gjermani, u krye ekstradimi drejt vendit tonë i shtetasit Dëfrim Prekaj, 26 vjeç, nga Peja, Kosovë, i cili ishte dënuar në vitin 2013 nga Gjykata e Rrethit Gjyqësor Tiranë me 2 vjet burg për kryerjen e veprës penale të “Falsifikimit të letërnjoftimeve, pasaportave ose vizave“.

I ekstraduari Dëfrim Prekaj, më datën 25.04.2011, është paraqitur pranë Zyrave të Gjendjes Civile për të bërë pasaportë biometrike dhe ka deklaruar emrin Bruno K.. Pas verifikimit të këtij deklarimi të rremë, dhe si rezultat i bashkëpunimit të Interpol Tirana me Interpol Wiesbaden, u bë i mundur arrestimi i tij në Gjermani me qëllim ekstradimi.

Abuzoi me të miturën, arrest me burg 41 vjeçarit

Gjykata e Rrethit Gjyqësor Lezhë ka dhënë masën e arrestit burg (në mungesë) për 41 vjeçarin Luan Lleshaj, i cili disa ditë më parë abuzoi seksualisht me një të mitur në fshatin Poresk të Mirditës. Lleshaj akuzohet nga Prokuroria për “Marrëdhënie seksuale me dhunë me të mitur të moshës 14-18 vjeç”. Vetëm pak ditë më parë familjarët e të miturës denoncuan rastin në polici. Lleshaj është në kërkim nga blutë e Lezhës, të cilët kanë vënë edhe një shumë prej 250 mijë lekësh të reja për të gjithë ata që mund të japin informacion në lidhje me vendndodhjen e abuzuesit.