Pasaporta false, pranga pedagogut

Policia e Korçës prangosi dje katër persona, të cilët ndryshonin gjeneralitetet e personave që kishin probleme me ligjin në shtete të ndryshme të Europës.Nga hetimi i kryer ka rezultuar se dy punonjësit e kompanisë “ALEAT”, Relis Mullai 27 vjeç dhe Armand Cenolli 20 vjeç, prej disa kohësh shfrytëzonin pozicionin e tyre të punës për të ndërhyrë në të dhënat e shtetasve të ndryshëm, të cilët aplikonin për të nxjerrë pasaportat biometrike. Së bashku me ta janë arrestuar edhe dy persona të tjerë, njëri prej të cilëve është pedagog i Fakultetit të Ekonomisë, pranë universitetit “Fan Noli”. Sytki Mullai, 56 vjeç, ishte ndërmjetës për shkëmbimin e sasive të lekëve që u merreshin këtyre personave. Ndërkaq, Artur Feto, 35 vjeç, ka qenë personi i cili luante rolin e sekserit për gjetjen e personave që interesoheshin për të marrë pasaporta biometrike me gjeneralitete të ndryshuara. Shuma e kërkuar në këmbim të falsifikimit të kryer varionte nga 5000 deri në 7000 euro. Nga hetimi i kryer rezultoi se dy punonjësit e kompanisë “ALEAT” merrnin në këmbim të punës së kryer 2000 apo 3000 euro, ndërsa pjesa tjetër ndahej mes sekserit dhe ndërmjetësit. Burime të Policisë bënë të ditur se pedagogu i Ekonomisë, i cili ishte babai i të arrestuarit Relis Mullai, ishte personi i cili ndërhynte te djali i tij për të bërë këto falsifikime, duke shkelur kështu ligjin. “Falsifikimet bëheshin tek emri ose mbiemri i personave, në mënyrë që këta të fundit të mund të kalonin me lehtësi kufirin”, bënë të ditur burime nga grupi i hetimit. Ka qenë një operacion i koduar “Specialistët”, ai që ka bërë të mundur arrestimin e këtyre personave, pas sinjalizimeve të siguruara edhe në rrugë operative. Sipas Policisë, shtetasi Artur Feto, pasi gjente shtetas të ndryshëm, të cilët kishin probleme me ligjin në vendet e Europës dhe ishin të interesuar për ndryshimin e gjeneraliteteve, u garantonte nxjerrjen e pasaportave biometrike me të dhëna të shtetasve të tjerë. “Nxjerrja e këtyre pasaportave garantohej kundrejt pagesave nga 5000-7000 euro për pasaportë dhe realizohej duke bashkëpunuar me punonjës të firmës së prodhimit të pasaportave. Konkretisht, pasi iu siguronte personave të interesuar dokumente të falsifikuara, bashkëpunonte me specialistin e IT-së, Relis Mulla dhe operatorin e aplikimit për pajisje me pasaportë, Armand Cenolli, për të bërë aplikimin dhe prodhimin e pasaportave biometrike me të dhëna të rreme. Ata i paguante nga 2000-3000 euro për çdo pasaportë, me ndërmjetësim të shtetasit Setki Mulla, i cili është edhe babai i shtetasit Relis Mulla. Me pas, shtetasi Artur Feto, në rolin e organizatorit të këtij aktiviteti kriminal, i ndihmonte këta shtetas për të dalë jashtë Shqipërisë sipas destinacionit të kërkuar prej tyre”. Ndaj të arrestuarve, Gjykata e këtij rrethi kishte vendosur masën e sigurisë “arrest me burg” për veprat penale të “falsifikimit të letërnjoftimeve, pasaportave ose vizave,” “ndihma për kalim të paligjshëm të kufirit” dhe “ushtrim i ndikimit të paligjshëm ndaj personave që ushtrojnë funksione publike”.
Në hetim, raste të tjera të dyshuara
Pas arrestimit të katër personave, Policia e Korçës iu sekuestroi; pesë praktika aplikimi për pajisje me pasaporta biometrike, tre automjete të markës “Mercedes Benz”, një pasaportë, gjashtë fotografi të shtetasve të ndryshëm etj. Në lidhje me këtë procedim penal po hetohen dhe raste të tjera të aplikimit të dokumenteve të falsifikuara, si dhe persona të tjerë, të cilët janë të përfshirë në këtë aktivitet kriminal.