Femrat shqiptare sot

Një rrëfim fotografik

Ekspozita është produkt i një projekti të iniciuar nga Ambasada Spanjolle nën titullin “Ellas”(Ato). Është zgjedhur jo pa qëllim 8 Marsi për t’i prezantuar. Fotografitë e ekspozuara janë përzgjedhur nga një konkurs i lajmëruar më parë me temën “Gjendja e gruas në Shqipëri: e përditshmja, fantazi, art, denoncim, barazi, krijimtari”

Një vajzë e re, pastaj një plakë që shet rroba në trotuar, një tjetër që më shumë u ngjan burrneshave, një tjetër që ngre bar në krah...Janë të gjitha femra shqiptare të kapura në përditshmërinë e tyre. Nëse kalon në krahun tjetër të ekspozitës fotografike ajo duket më e përditësuar në fenomene: një nudo, një çift lezbikesh, një grua që qëndron para fotos së një anoreksikeje, një e moshuar që i kthen shpatullat përqindjeve nëpër dyqane, një vajzë rome e takuar rrugës, një tjetër në zymtësinë e shtëpisë, por edhe duart plot me rrudha të një gjysheje. Është një rrëfim fotografik për gruan shqiptare, parë jo me sytë e profesionistëve. Ekspozita është produkt i një projekti të iniciuar nga Ambasada Spanjolle nën titullin “Ellas” (Ato). Është zgjedhur jo pa qëllim 8 Marsi për t’i prezantuar. Fotografitë e ekspozuara janë përzgjedhur nga një konkurs i lajmëruar më parë me temën “Gjendja e gruas në Shqipëri: e përditshmja, fantazi, art, denoncim, barazi, krijimtari”. Këto janë fotografi të realizuara nga persona të ndryshëm pa kufij moshe e as gjinie, pa kushtin e domosdoshëm për të qenë profesionistë. “Ky konkurs ka për synim të nxisë, të njohë, të përhapë e të vlerësojë krijimtarinë, si dhe të festojë duke i dhënë një kuptim Ditës Ndërkombëtare të Gruas”, thotë organizatorja e këtij projekti për Ambasadën Spanjolle, Carmela Sánchez-Blanco Palomera. Nga fotografitë e paraqitura për konkurrim një juri e përbërë nga anëtarë të Ambasadës Spanjolle në Tiranë, Shtëpia e Spanjës, si dhe nga fotografi Armando Babani, përzgjodhën disa nga veprat për t’u ekspozuar, ku më e mira në mënyrë simbolike i jepet edhe një shumë monetare prej 200 eurosh, ndërsa çmimit të dytë, 100 euro. Ajo që vihet re në ekspozitë është përballja e femrës në dy dimensionet: jetës në periferi dhe asaj urbane. E thënë ndryshe, mund të ndërtosh dy histori përmes këtyre fotografive. Në periferi, në zona të thella ku jeta e femrës është afër asaj tradicionales, përpjekjes për mbijetesën e familjes dhe një tip i femrës shqiptare që në një jetë paralele me tjetrën, është më afër e pjesë e fenomeneve më bashkëkohore. Ekspozita do të qëndrojë e hapur në galerinë “Zeta” deri më 13 mars.