Van Basten: Leonardo tek Inter? Tradhti e hapur ndaj Milan

Legjenda e futbollit holandez, Marko van Basten ka mbetur i habitur pasi ka mësuar lajmin se braziliani, Leonardo ka pranuar detyrën e trajnerit te skuadra e Interit.
Leonardo, ashtu sikurse Van Basteni ishte legjendë e Milanit, prandaj kalimi i tij në rivalin e përbetuar për mendimin e holandezit është një tradhti.
“Nuk kam asgjë kundër Interit, por nuk më duket i arsyeshëm vendimi i Leonardos për t’u larguar nga familja kuqezi dhe për të kaluar në radhët e zikaltërve. Kjo më duket sikur një tradhti”, ka theksuar Van Basten në një bisedë për “Sky”. Më pas ai ka folur edhe për gjendjen aktuale te Milani, që kryeson renditjen në Serinë A pas 17 javëve të zhvilluara. “Skuadra është e re. Ka shumë futbollistë cilësorë në radhët e saj, por ende duhet ta përmirësojë lojën e saj në rast se dëshiron të fitojë trofe në Itali dhe Evropë. Isha i sigurt se Zlatan Ibrahimovici do të jetë i mirë, ngaqë i tillë ishte edhe në Inter dhe Juventus, madje edhe në Spanjë, përkundër faktit se Barcelona luan me një stil tjetër dhe ai kishte probleme me trajnerin, Pep Guardiola”, ka nënvizuar 46-vjeçari Van Basten.