Mbulohet me xham kalldrëmi 300 vjeçar

Në qytetin muze të Gjirokastrës, pjesë e trashëgimisë kulturore të UNESCO-s, një rrugë e vjetër e shtruar me kalldrëm guri rreth 300-vjeçar është trajtuar si vlerë trashëgimie.
Kjo rrugë është mbuluar me xham për t’u dhënë mundësi vizitorëve të qytetit që të shijojnë vlerat e vjetra të traditës gjirokastrite, shkruan gazeta ''Shqip''.

Gjurmët e një kalldrëmi të vjetër, të zbuluar vetëm pak kohë më parë në zonën e Pazarit të Vjetër, pranë qendrës historike të pazarit karakteristik, janë tashmë të vizitueshme për të gjithë turistët që vijnë në qytetin e gurtë.

Pozicioni i kalldrëmit të vjetër që gjendet në kuotën rreth 1.5 metra nën atë të kalldrëmit ekzistues, në një trotuar ende funksional është mjaft favorizues për vizitorët e qytetit muze.
Për të ruajtur dukshmërinë e tij, kjo pjesë e trotuarit në të cilën ndodhet kalldrëmi 300-vjeçar është bërë me mbulesë prej xhami dhe ndriçim të brendshëm.

Kalldrëmi i gurtë i përket periudhës rreth 300-vjeçare kur pazari u rindërtua pas një zjarri të furishëm që e shkatërroi plotësisht atë. Ky është një nga rastet kur zbulimet e rastësishme vihen në funksion të turistëve edhe në zona të banuara / Zhurnal /