Trasha: Medalje në Evropian

Peshëngritësi shqiptar premton rezultate në pjesëmarrjen e tij të fundit

Gerti Trasha premton medalje në pjesëmarrjen e tij të fundit të Kampionatin Evropian të të Rinjve. Peshëngritësi shqiptar, i cili është edhe fitues i një titulli kampion i kontinentit në këtë kompeticion, ka bërë kështu të njohur objektivin e tij për aktivitetin që ka startuar dje në Durrës. Kampionati Evropian i Peshëngritjes për të Rinj ka shënuar fillimin e tij në mëngjesin e djeshëm, me disiplinën 56 kg, bateria B për meshkuj, ku nuk ka marrë pjesë asnjë peshëngritës shqiptar. Gjithsesi tifozët e pranishëm në shkallët e Pallatit të Sportit të Durrësit "Ramazan Njala" kanë mbështetur përfaqësuesin nga Kosova, peshëngritësin 16-vjeçar Ardian Murati, i cili nuk arriti të kualifikohej, pasi dështoi në peshën 35 kilogramë. Në garën e parë merrnin pjesë 6 shtete të tjera veç Kosovës, si Hungaria, Lituania, Italia, Gjermania, Spanja dhe Bullgaria. Peshëngritësi bullgar, Franc Çukov, e ka dominuar baterinë B, kur ka triumfuar në peshën 116 kg, por ka dështuar në provën e fundit me 119 kg. I dyti në këtë bateri është renditur spanjolli Hernandez Hakora, me 111 kg, ndërsa i treti Aleksandro Bosko, me 110 kg. Në këtë kampionat marrin pjesë 37 shtete, të cilat do të përfaqësohen nga 220 sportistë në total. Mes tyre do të jenë 17 sportistë, të cilët garojnë për ngjyrat e Shqipërisë, ku spikat edhe peshëngritësi ynë i talentuar, Gerti Trasha. Ky Kampionat Evropian për të Rinj është i fundit për Trashën, i cili pas këtij kompeticioni nuk do të mund të marrë më pjesë, për shkak të moshës së tij. Sportisti nga Elbasani dështoi në Lojërat Olimpike të Pekin 2008, ku nuk mundi të merrte asnjë rezultat në tre provat e tij. Trasha është deri tani i vetmi shqiptar kampion i Evropës për të rinj. Por duket se për lamtumirën ka rezervuar shumë energji, pasi ai ka premtuar se synimi i tij është medalja e artë. Peshëngritësi shqiptar pritet të garojë në disiplinën 69 kg, ku edhe ka besim se do të mundë të gjithë kundërshtarët e tij, që për hir të së vërtetës priten të jenë të shumtë në këtë disiplinë. "Jam në formë të mirë, pohon Trasha, duke komentuar pjesëmarrjen e tij të fundit në Kampionatin Evropian të të Rinjve. Jam stërvitur mirë, ky është Evropiani i fundit për mua. Synoj që t‘i jap lamtumirën Kampionatit Evropian të të Rinjve me një medalje". Garën e tij të parë, Gerti Trasha do ta ketë të mërkurën, kur dhe do të duhet të provojë t‘i dhurojë një tjetër titull të fundit Shqipërisë në këtë aktivitet". Ndërkohë që, po dje, janë zhvilluar edhe gara të tjera në të tjera disiplina deri në orën 19. E sotmja do të jetë edhe dita e dytë e Kampionatit Evropian, e cila do të zhurmojë pallatin e sportit "Ramazan Njala" që në orën 00:09 të mëngjesit.