Dashuria largon dhembjen

Nëse shpesh konstatoni se gruaja juaj ju shkakton dhembje të kokës, duhet të pyeteni se a vazhdoni të duheni, meqë shkencëtarët pohojnë se dashuria largon, e jo shkakton dhembjen.

Përkundër asaj se shumë poetë dhe këngëtarë thonë se ‘dashuria dhembë’, një grup shkencëtarësh amerikanë pohojnë se dashuria intensive, romantike, në fakt e zvogëlon dhembjen sikur që bëjnë ilaçet anestetike. Në studimin e botuar në revistën "PLoS One", shkencëtarët amerikanë thonë se dashuria ndikon sikur morfinë. Rezultatet e studimit të tyre kanë treguar se epshi, që është karakteristik për fillimin e lidhjes së dashurisë, bllokon dhembjen fizike, sikur që bëjnë edhe barnat kundër dhembjes.

Me anë të rezonancës magnetike funksionale, kërkuesit shkencorë kanë skanuar trurin e 15 studentëve ‘të dashuruar marrëzisht’ të të dy gjinive, të cilëve u kishin shkaktuar një dhembje të lehtë derisa ata shikonin fotografinë e personit të dashur. Testet kishin treguar se vala e dashurisë, e shkaktuar nga shikimi i fotografisë së partnerit, ka ndikim njësoj të fortë sikur anestetiku. "Studimi tregon qartë se efekti i dashurisë mund të krahasohet me efektin e morfinës dhe kokainës", ka deklaruar dr Sean McKee nga Universiteti “Stanford”.

Ai ka shpjeguar se, në fazën fillestare, intensive të dashurisë, disponimi i njerëzve pëson ndryshime të cilat ndikojnë në vet ndjenjën e dhembjes. Është konstatuar se, për dallim nga të dashuruarit, personat e vetmuar apo që vuajnë nga depresioni, shpesh kanë një prag të ultë të dhembjes.