Primera Division

Kampionati Spanjoll i futbollit

Barça e Guardiolës, një tjetër hap flas!


Katalanasit barazojnë në fushën e tyre ndaj Santanderit. Atletiko e Madridit “dështon” në Valadolid

Barcelona barazoi në shtëpi, 1-1 ndaj Santanderit, në ndeshjen e luajtur mbrëmë, e cila hapi javën e dytë të kampionatit spanjoll. Trajneri i ri i katalanasve, Pep Guardiola, ende nuk e ka shijuar fitoren e parë në Primera Divizion. Duke menduar për Ligën e Kampioneve, pasardhësi i Rajkardit, la në stol disa prej titullarëve: Henri, Mesi, Injesta dhe Kërkiç, duke besuar te talentet Serxhi Baskuets dhe Pedrito. Ndërkohë, Aleksandër Hleb debutoi si titullar. Ndeshja u dominua nga Barcelona, e cila koleksoi plot 22 goditje drejt portës së Santanderit. Gjithsesi, katalanasit e gjetën golin e vetëm me 11-metërsh, në minutën e 70-të. Gjyqtari akordoi penallti për një prekje të topit me dorë, në zonën e miqëve dhe Lionel Mesi, i aktivizuar në pjesën e dytë, shënoi nga pika e bardhë. Por avantazhi i vendasve zgjati vetëm pesë minuta. Xhonatan Pereira, me një goditje dënimi të devijuar, mposhti portierin Viktor Valdes dhe sigloi barazim, duke heshur “Kamp Nou”-n. Barcelonës i mbetën 15 minuta në dispozicion, për të fituar ndeshjen, por Santanderi u mbrojt me rregull dhe mori barazimin e dytë në këtë kampionat, pas atij ndaj Seviljes, në javën e parë. Nga ana tjetër, Barça e Guardiolës ka vetëm një pikë, pas dy ndeshjesh.

Në ndeshjen tjetër të luajtur dje për kampionatin spanjoll, Atletiko e Madridit u mund 2-1 në fushën e Valadolidit. Kryeqytetasit, të cilët vinin nga dy goleada ndaj Shalkes dhe Malagës, kishin lënë pushim disa nga titullarët dhe për më shumë luajtën me dhjetë futbollistë, në pjesën më të madhe të ndeshjes. Angel Vivar Dorado dhe Havier Baraja (me 11-metërsh) shënuan për vendasit, ndërsa në minutën e 21-të Pedro Lopez u ndëshkua me kartonin e kuq. Valadolidi e ruajti fitoren, pavarësisht se Serxhio Aguero ngushtoi diferencën, pak minuta pas aktivizimit, në pjesën e dytë. Atletiko mbetet në kuotën e tri pikëve.
Ndërkohë, sot zhvillohen takimet e tjera. Reali, kampion në fuqi, do të luaj në Madrid ndaj Numasias. Skuadra e ardhur nga kategoria e dytë shkaktoi suprizën më të madhe në javën e parë, duke mundur Barcelonën. Almeria-Valencia do të jetë një tjetër sfidë ineteresante ku skuadra fituese ka të ngjarë të jetë në krye të klasifikimit. Vilareali pret Deportivon.

Kupe: Më ka habitur Atletiko!



Gregori Kupe ka mbetur i habitur nga atmosfera në Visente Kalderon gjatë dy ndeshjeve të para të Atletikos së Madridit. Portieri francez u bashkua me formacionin spanjoll gjatë kësaj vere dhe e pranon se nuk e priste atë pasion që pa në ndeshjet mes Shalkes dhe Malagës. “Në Francë tifozët bëjnë tifozllëk për skuadrën dhe shkojnë në stadium, por këtu gjërat janë ndryshe, rrezatohet një atmosferë e mrekullueshme dhe e pakrahasueshme. Kam mbetur i habitur kur kam parë një familje komplet në stadium. Kjo është fantastike!” Kupe nuk luajti në ndeshjen e kthimit kundër Shalkes, por debutoi në kampionat javën e parë kundër Malagës, si dhe ka mbetur i habitur që Leo Franko qëndroi në pankinë. “Nuk e mendoja se do të luaja kundër Malagës, sepse Leo u tregua i zoti ndaj Shalkes,” - shtoi veterani i portës së Francës.

Atletiko: Aguero kushton 60 mln euro



Drejtori teknik i Atletikos së Madridit, Hesus Garsia Pitark, ka deklaruar ditën e djeshme se klauzola për blerjen e Serxho Agueros është rritur në 60 milionë euro. Garsia Pitark është shfaqur para medieve ditën e djeshme, për aktivitetin e klubit në merkaton e verës, edhe pse pjesa më e madhe e konferencës për shtyp është shpenzuar duke folur për argjentinasin Aguerro. Kështu që drejtori teknik i Atletikos ka deklaruar se ndonjë nga klubet që kërkon të përfitojë shërbimet e Agueros duhet të ketë bërë gati 60 milionë euro. “Vitin e kaluar biseduam për ta ngritur çnmimin e tij në 55 milionë euro, por këtë vit e rritëm edhe me pesë milionë të tjera.”

Serxho Ramos, “përjetësisht” me Realin



Mbrojtësi i Realit të Madridit, Serxho Ramos, ka treguar dëshirën e tij për ta kaluar gjithë pjesën e mbetur të karrierës së tij me kampionët e Spanjës. Ramos, 22-vjeçar, do të marrë një ofertë nga drejtuesit e Realit të Madridit për një rinovim 10-vjeçar të kontratës, pas largimit të Robinjos drejt Mançester Sitit. Ka qenë një lajm i mrekullueshëm. Ndihem shumë i lumtur këtu dhe dëshira ime është ta mbyll karrierën time këtu, - tha Ramos. - Ndihem i lumtur me klubin, tifozët, qytetin dhe gjithçka tjetër. Objektivi im është të jap maksimumin dhe të arrij sa më shumë suksese me Spanjën dhe Realin. Do të jap maksimumin me këto dy skuadra; kjo është 100% e sigurt.

Vila: Nuk mund të sillem si Robinjo!



Sulmuesi i Valencias: Edhe mua më kërkonte Reali, por nuk mund t’i bëj asnjëherë presion klubit tim!

Sulmuesi i Valencias, David Vila, ka deklaruar se ndihet i kënaqur që ka mbetur në “Mestaja” këtë verë, si dhe ka insituar se “ai nuk do t’ia bëjë asnjëherë Valencias atë që Robinjo i bëri Realit të Madridit”. Vila ishte një nga lojtarët më të kërkuar në këtë merkato të verës, pas formës së mrekullueshme që tregoi në Euro 2008 me Spanjën, ku Reali i Madridit ka qenë kandidat i fortë për ta marrë 26-vjeçarin në skuadër. Megjithatë, ai ka firmosur me Valencian, duke u dhënë fund spekulimeve rreth të ardhmes së tij. Reali u përpoq sërish për të firmosur me të, pas largimit shokues të Robinjos te Mançester Sitit, por ka insistuar se nuk do të imitojë atë që bëri braziliani Robinjo. Ai tha për gazetën spanjolle “AS”: “Nuk do të bëja asnjëherë atë gjë që Robinjo i bëri Realit të Madridit, pasi i jam mirënjohës klubit për gjithçka që ka bërë për mua. Nuk dua ta kritikoj Robinjon, pasi nuk e njoh situatën në të cilën ai ndodhej, por unë nuk do ta kisha bërë”. Vila gjithashtu deklaroi se nuk ka pasur asnjëherë ndonjë dëshirë për t’u larguar nga “Mestaja”, edhe pse pas tij kanë qenë të interesuar një numër i madh klubesh me emër në botën e futbollit. Ai ka shtuar se ia la në dorë klubit gjithë çështjen e transferimit të tij, si dhe ka deklaruar se, fakti që drejtuesit e Valencias nuk preferuan ta shesin, edhe pse klubi po kalon momente tepër të vështira, në aspektin financiar, do të thotë se ata e vlerësojnë shumë. “Asnjëherë nuk do ta detyroja klubin të më linte që të largohesha, - shpjegoi ai. - Këtu ndihem më së miri; i detyrohem shumë Valencias dhe është gjithmonë vendimi i klubit, nëse unë largohem apo jo. Unë kam qëndruar jashtë këtyre çështjeve. U ndjeva shumë i lumtur dhe i lehtësuar kur Valencia i refuzoi ofertat për mua. Jo se nuk do të shkoja në Madrid për të luajtur, pasi kjo ishte shenjë e besimit që ata kishin tek unë, si dhe aty kuptova se sa vlej. Ata zgjodhën të më mbanin, në vend që të merrnin paratë dhe të përfundonin punë me mua. Valencia me vlerësoi më shumë. Ditën e mërkurë, në orën 13:00, e pranova ofertën në telefon. Në orën 18:00 mbasdite shkova të firmos. Kaq ishte e gjitha. Nuk kërkova asnjëherë rritje page, as edhe rinovim të kontratës. Ishte klubi që ia ofroi këto gjëra Silvës dhe mua, pas përfundimit të Euro 2008. Kjo të bën krenar, të ndihesh i rëndësishëm për atë punë që bën. Është një aspekt i domosdoshëm.”

Alvesh: Barça do ta fitojë kampionatin!




Braziliani, i ardhur nga Sevilja, nuk shqetësohet nga humbja e parë dhe beson te suksesi

Daniel Alvesh mendon se Barcelona do ta fitojë titullin kampion për herë të parë në tri sezone, edhe pse janë mundur në ndeshjen e parë kundër Numansias. Mbrojtësi brazilian është duke shijuar kalimin e tij nga Sevilja te Barça. Reali i Madridit e ka fituar kampionatin në dy sezonet e fundit, por Alvesh mendon se këtë herë katalanasit do të marrin veten. “Jam i sigurt se ne do ta fitojmë kampionatin, edhe pse ka skuadra të tjera që janë përforcuar mirë. Të gjithë këtu në klub janë shumë të fokusuar dhe gati të punojmë deri në limite, për të ndryshuar dinamikën e dy sezoneve të fundit,” - tha ai për gazetarët. Edhe pse ka te Barça prej dy muajsh, Alvesh ka pranuar se ai po adoptohet me stilin e lojës së skuadrës. “Lojtarët e rinj duhet të mësohen me stilin e ri të lojës dhe me shokët tanë të rinj, - vazhdoi ai. - Jemi një skuadër, që ecim para dhe luajmë me më shumë pasime se Sevilja, e cila është më direkt. Për shkak të kësaj, për mua është e pamundur të luaj në të njëjtën mënyrë, por ende kam të njëjtën dëshirë.” Humbja në Numansia ka ngritur shumë pyetje rreth skuadrës, por Alvesh mendon se lojtarët janë të vetmit që duhen fajësuar për mosrealizimin e detyrave të dhëna nga Guardiola. “Në atë ndeshje e kërkuam me çdo kusht fitoren, dhe kjo gjë na mërziti shumë. Skuadra nuk e lexoi mirë ndeshjen dhe nuk diti si të luante, pasi trajneri ka kërkuar ta hapim pak lojën, - shpjegoi braziliani. - Përveç kësaj, është më mirë t’i bësh këto gabime tani, sesa pas dy muajsh. Jam i sigurt se këto gjëra nuk do të ndodhin më.”

Valencia, Hoakini refuzon klubet e mëdha



Mesfushori i Valencias, Hoakin, do të qëndrojë në “Mestaja”, të paktën edhe për një sezon, pasi i ka refuzuar të gjitha ofertat e skuadrave të mëdha, në orët e fundit të merkatos. “Marca” bëri të ditur se 27-vjeçari i tha “jo” Interit, Totenhemit dhe, së fundi, Realit. “Ata më respektuan me ofertat e tyre dhe do t’ua rikthej respektin, duke mos i përmendur klubet që më kërkuan, - tha Hoakin. - Jua garantoj se bëhet fjalë për skuadra të mëdha, por unë e ndjej që edhe Valencia është e tillë. Me trajnerin e ri po punojmë me ide të reja. Nuk doja të ndyshoja ambient, pikërisht tani që u ambientova, sepse po futem në fazën vendimtare të karrierës sime.” Hoakin “shpërtheu” si talent me fanellën e Betisit dhe u grumbullua nga kombëtarja spanjolle, por dy sezonet e dobëta me Valencian bënë që ai ta humbasë vendin në kombëtare dhe të mbesë jashtë skuadrës që fitoi europianin, pavarësisht se i kishte nisur eliminatoret si titullar i saj.

Ramon Kalderon: Robinjo zgjodhi paratë!



Presidenti i Realit, për brazilianin: Siti do ta paguajë më shumë se ne, por nuk do të fitojë trofe si në MadridPresidenti i Realit të Madridit, Ramon Kalderon, ka dalë dje në një konferencë për shtyp, ku ka folur për detajet e transferimit të brazilianit Robinjo te Mançester Siti. Në të njëjtën kohë, numri 1 i Realit ka komentuar edhe çështje të tjera, si dhe ka shpjeguar strategjinë e klubit “merenges”…

Mijatoviç: Një largim i pashmangshëm


Pedrag Mijatoviç, drejtori teknik i Realit të Madridit, ka dhënë mendimin e tij, në lidhje me transferimin e Robinjos te Mançester Siti. “E shitëm Robinjon te Mançester Siti dhe mendoj se bëmë zgjidhjen më të mirë për interesat e skuadrës. Ishte një largim i pashmangshëm. U përpoqëm ta bindim Robinjon të qëndronte, por ai nuk ndyshoi mendim. Eshtë logjike se duhej të shisnim blerësit më të mirë. Në fund, i uroj Robinjon fat të mbarë me punëdhënësit e rinj.”

Kalderoni i kërkon nder Platinisë

Presidenti i Realit të Madridit, Ramon Kalderon, duket se e ka parë të nevojshme të kërkojë edhe tolerime nga rregullorja. Skuadra e tij ka pasur jo pak probleme me rezultatet deri këtë sezon dhe një nga arsyet ka qenë pikërisht dëmtimet e shumta. Në një situatë të tillë, klubi e ka parë të domosdoshme të bëjë blerje gjatë merkatos së janarit dhe deri tani ka bërë dy të tilla, pikërisht sulmuesin Klas-Jan Huntelar dhe mesfushorin Lasana Diarra. Presidenti Ramon Kalderon ka pranuar publikisht se shpreson te një tolerim nga ana e presidentit të UEFA-s, Mishel Platini, që federimin e të dy lojtarëve të ardhur gjatë merkatos së janarit.