Bundes Liga

Kampionati Gjerman i futbollit

Podolski: Gabova që zgjodha Bajernin!


Sulmuesi gjerman, në kulmin e dëshpërimit: Dy vite më parë nuk duhej të kisha zgjedhur Bajernin

Sulmuesi i Bajernit të Mynihut, Lukas Podolski, e ka pranuar se ai gaboi para dy vitesh, kur zgjodhi të transferohej te Bajerni i Mynihut. Sulmuesi i Gjermanisë u bashkua me bavarezët nga Këlni në vitin 2006. Para se të firmoste me Bajernin ai kishte shënuar 10 gola në 19 ndeshjet e para të Bundesligës, si dhe 24 të tjerë në divizionin e dytë të Gjermanisë, nga ku fitoi edhe një vend në kombëtare, vend, të cilin që nga ajo kohë nuk e ka dorëzuar më. Megjithatë, sulmuesi i ri nuk ka arritur ta mbajë një vend të rregullt në formacionin e parë të Bajernit në dy vitet e fundit. Edhe pse zhvilloi një fazë përgatitore të shkëlqyeshme, përsëri duket se ai do të ketë të njëjtin fat. “Sigurisht, te Bajerni nuk është se po kënaqem aq shumë, që nga momenti kur kam ardhur këtu, -tha ai. - Nëse gjërat vazhdojnë kështu, duhen marrë parasysh mundësitë e tjera që do të më ofrohen. Do të quhesha futbollist i keq, nëse do të kënaqesha me një vend në pankinë. Nuk po qahem, jam vetëm shumë i nervozuar se pse nuk luaj në formacionin e parë.” 23-vjeçari ka qenë subjekt i spekulimeve intensive për një largim të tij te Këlni këtë verë. Në fund, asnjë ofertë nuk mbërriti për Bajernin, edhe pse trajneri Jurgen Klinsman kishte deklaruar se tre sulmuesit, Lukas Podolski, Toni dhe Klose janë të barabartë dhe duhet të luftojnë për një vend në sulm. Por, pasi e nisi ndeshjen kundër Hamburgut që nga minuta e parë, pasi Toni ishte i dëmtuar, Podolski është detyruar që dy ndeshjet e fundit vetëm t’i shohë nga pankina. “Ndihem sikur jam mbi një rrotë të madhe, njëherë shkoj lart dhe pastaj zbres përsëri poshtë, - shpjegoi ai. - Ndihem i zhgënjyer nga kjo situatë e krijuar. Nëse do ta dija që gjërat do të shkonin kështu, atëherë jo, nuk do kisha firmosur për Bajernin.” Nostalgjia e Podolskit për Këlnin mbetet ende shumë e madhe, por, megjithatë, klubi duhet të akumulojë shumë fonde, në mënyrë që ta blejë atë në muajin janar, pasi sulmuesi i Gjermanisë nuk do të mendohej dy herë. “Këlni do të ishte gjithmonë një zgjedhje për mua; të gjithë e dinë shumë mirë këtë, - shtoi ai. - Nëse do të merrja oferta, do të quhesha neglizhent, nëse nuk do t’i merrja parasysh. Nuk kam frikë të largohem jashtë Gjermanisë, çdo gjë është e mundur.” Ndeshja e radhës për Bajernin e Mynihut është kundër Këlnit dhe, nëse ai do të shënojë, ka premtuar se nuk do të festojë, ashtu siç bëri edhe me golin kundër Polonisë, origjinës së familjes së tij, në Euro 2008.

Balak do të mungojë në eliminatore


“Mikael Balak do të mungojë në dy sfidat e para eliminatore të Botërorit të 2010-s kundër Lihtenshteinit dhe Finlandës, për shkak të dëmtimeve,” - ka thënë trajneri Hoakim Lëv ditën e martë. “Ai nuk do të ketë mundësi të luajë në asnjë ndeshje, - tha Lëv në një intervistë, duke mohuar çdo mundësi që kapiteni të rikuperohet nga dëmtimi në këmbën e majtë. Lëv ka një problem në qendër të mesfushës, ku edhe Torsten Frings do të mungojë në eliminatore, në Vaduz, më 6 shtator, dhe Helsinki më 10 shtator, pasi theu hundën në një ndeshje basketbolli. Balak e ka ndjekur nga tribuna ndeshjen miqësore për nder të Oliver Kahn. Portieri veteran i dha fund karrierës së tij në muajin maj. Ai u përcoll me duartrokitje shumë të gjata nga 69 000 tifozë të pranishëm në stadium.

Oliver Kahn, lamtumira e “titanit”!



Portieri legjendar largohet nga futbolli, pas një miqësoreje “luksi”: Ishte dita më prekëse në jetën time!

Portieri Oliver Kahn i ka dhënë fund karrierës së tij futbollistike ditën e martë në mbrëmje, duke qenë pjesë e Bajernit të Mynihut në barazimin 1-1 kundër 11-shit të Gjermanisë në Mynih. Ka shijuar mundësinë të dalë edhe njëherë tjetër para tifozëve, për herë të fundit. Portieri veteran, i cili zhvilloi 85 ndeshje me kombëtaren, nga 1995-a deri më 2006-n, ka qenë “ylli” i mbrëmjes. Ai pësoi një gol në minutën e 33-të nga Piotr Troçovski i Hamburgut, por u duartrokit nga tiofozët sa herë që prekte topin, dhe doli nga fusha në minutën e 75-të me brohorimat e tifozëve, duke u zëvendësuar nga Majkëll Rensing. Dritat e stadiumit u ulën dhe tenori Pol Pots këngoi “Time to say goodbye” (Koha për të thënë lamtumirë). “Është fundi i një pjese të jashtëzakonshme në jetën time, por gjithashtu fillimi i një pjese të re, - tha portieri, i cili zhvilloi 128 ndeshje në kampionat për Karlsruhen, përpara se të bashkohej me Bajernin më 1994-n. Ai ka fituar tetë tituj të Bundesligës dhe më 2001-shin Ligën e Kampioneve me bavarezët, por gjithsesi ka pranuar se do të kishte shumë dëshirë që në 430 ndeshje në Bundesligë të kishte shënuar, të paktën një gol, një herë të vetme. “Sot ka qenë një ditë shumë prekëse për mua, ndoshta momenti më emocional i gjithë karrierës sime, - tha Kahn pas ndeshjes, në të cilën Miroslav klose shënoi nga një pasim i Masimo Odos, për të barazuar për bavarezët. - Kam qenë nën presion gjatë gjithë karrierës sime, ndërsa në këtë ndeshje kisha vetëm mundësinë ta shijoja tifozërinë për herë të fundit.” 69 000 spektatorët kanë treguar vlerësimin e tyre për Oliver Kahn. Duke i lënë mënjanë gjithë këto emocione të largimit të tij, Kahn ka deklaruar se atë nuk do ta marrë malli për futbollin. “Kam provuar gjithçka që ofron futbolli profesionist. Tani mund ta mbyll librin, - tha ai, duke shtuar se në fillim tërheqja nga futbolli i ishte dukur e çuditshme. - Pas dy dekadash, zgjohesh në mëngjes pa kontratë, duke e ditur se kjo fazë e jetës tënde ka arritur fundin. Më pas, u mundova të qetësohem dhe fillova të shijoj ditën që e kisha bosh.” Kahn do të jetë këshilltar në një televizion gjerman dhe i është kërkuar të komunikojë me të rinjtë në Bavari. “Mesazhi im do të jetë i thjeshtë, - tha ai. - Talenti nuk mjafton: punë, vetëm punë, si dhe disiplinë, nëse kërkoni suksesin! Nuk është konkurrent më i talentuar ai që fiton luftën, por ai që është më i vendosur.” Ai shtoi: “Përpara meje kam shumë sfida të tjera. E kalova gjysmën e parë të jetës time si futbollist profesionist. Tani nis gjysma tjetër”.

Herta, në delir për Voroninin



Herta e Berlinit ka arritur ta zgjidhë krizën në repartin sulmues, duke firmosur në minutën e fundit me ukrainasin Andri Vorornin në formën e huazimit nga Liverpuli. Sulmuesi Amin Shermiti u dëmtua javën e kaluar në ligamentin e gjurit dhe do të mungojë për dy muaj, kështu që kryeqytetasit kanë qenë të detyruar ta përmbyllin marrëveshjen përpara mbylljes së merkatos në Gjermani. “Punuam me shumë seriozitet për t’i zgjidhur problemet në sulm, - tha drejtori teknik Diter Hënes. - Zgjodhëm Andri Voronin, pasi ai e njeh Bundesligën, flet gjermanisht dhe mund të përshtatet në shumë sisteme taktike. Ai ka treguar me Leverkusenin dhe Liverpulin se është lojtar i nivelit të lartë. Gjithashtu, na nevojitej një sulmues me eksperiencë, për një skuadër të re në moshë.”

Hënes: Podolski, mjaft u ankove, luaj futboll!


Lukas Podolski duhet ta mbyllë gojën dhe të përqendrohet te futbolli që luan, ka paralajmëruar drejtori teknik i Bajernit të Mynihut, Uli Hënes. Sulmuesi i Gjermanisë nuk ndihet i lumtur që konsiderohet si një zgjedhje e dytë pas dyshes Toni-Klose; kohët e fundit është lidhur edhe më një largim nga “Allianz Arena”. “Ndihem i lumtur se tani është mbyllur dritarja e transferimeve, sepse tani Lukas do të ketë mundësi të përqendrohet me ne, - tha Hënes. - Ai nuk duhet të qahet më për fatin e tij të keq dhe fatin e vështirë. Ka shumë gjëra të tjera në botë më të më të vështira, sesa të jesh futbollist i Bajernit,” - tha Hënes, në mënyrë tepër të drejtpërdrejtë. Në muajin korrik Podolski ka zhvilluar bisedime me trajnerin Jurgen Klinsman, duke ua besuar përsëri të ardhmen bavarezëve, pas një sezoni 2007 ‘08 tepër të vështirë për të. Por në Euro 2008 Podolski tregoi një formë të shkëlqyer duke e rritur edhe çmimin i tij në treg e duke shënuar tri gola, duke qenë në formacion në gjashtë ndeshje. Ai u bashkua me Bajernin për 10 milionë euro nga Këlni, pas Botërorit 2006; që nga ajo kohë është lidhur me skuadra të tilla, si Totenhem, Mançester Siti dhe Juventus.

Masimo Odo: Bajerni, klub i madh!



Italiani ka filluar stërvitjen me bavarezët, i huazuar nga Milani: Bajerni më kërkoi një vit me radhë

Dy ditë pasi ka firmosur me Bajernin e Mynihut, Masimo Odo ka filluar menjëherë nga puna me pjesën tjetër të skuadrës, në qendrën stërvitore të klubit të tij të ri. Pasi ka kryer disa testime fizike, ai ka qëndruar për 20 minuta në fushë për një ndeshje me shokët e tij të rinj. Masimo e ka mbyllur ditën e parë të stërvitjes në “Sabener Shtrase” në drekë, përpara se 32-vjeçari të nisej me avion përsëri në Milano. “Gjithçka ka ndodhur shumë shpejt. Më duhet të organizoj disa çështje personale,” - tha ai. Odo pritet të rikthehet në Mynih ditën e enjte. Mbrojtësi i kombëtares së Italisë ka deklaruar se ka mbetur i impresionuar nga dita e parë te Bajerni. “E dija shumë mirë që po transferohesha në një klub të madh e me një skuadër të mirë, por tani jam këtu dhe e kam parë vetë atë që perceptoja; mund të them që gjithçka është pozitive,” - deklaroi ai. Transferimi i Odos nga Milani te Bajerni nuk ka qenë aspak surprizë. “Kishim kontaktuar vitin e kaluar, por nuk u arrit asgjë, - deklaroi Odo. - Dëshiroja që këtë verë të largohesha nga Milani, pasi një numër i konsiderueshëm klubesh ishin të interesuar, por në këto momente Bajerni e bëri të ditur interesin e tij përsëri.” Jurgen Klinsman ka shpjeguar se dëmtimet e Hamit Altintop dhe të Uilli Sanjol e kishin detyruar skuadrën të rifutej në tregun e lojtarëve, ka shpjeguar Jurgen Klinsman. Bajerni e kishte të qartë se blerja e Zambrotës nga kuqezinjtë e Milanit i kishte hapur rrugë të lirë largimit të Masimo Odos. “E dinim situatën në Milano, - konfirmoi Klinsman. - Masimo ka cilësi të provuara; ai do të futet menjëherë në sistemin tonë dhe na sjell në skuadër atë që ne kërkojmë,” - deklaroi Klinsman. Ardhja e Odos do ta rrisë konkurrencën për një vend në krah të djathtë. Ai mund të luajë si mbrojtës i djathtë dhe si mesfushor i djathtë. Vetë Odo ka qenë shumë i gëzuar që ka vendosur të veshë fanelën e Bajernit. “Ardhja këtu është vendimi më i mirë që mund të kisha marrë,” - tha italiani. Ai tani mendohet se do t’i shtojë koleksionit të titujve edhe ndonjë nga koha që do të luajë te Bajerni. “Dëshiroj të tregoj se sa vlej, - insistoi ai, - Edhe pse këtë do të mund ta bëj me mbështetjen e gjithë skuadrës. Përshtypja ime e parë është se Bajerni është një skuadër tepër e fortë,” - nënvizoi mbrojtësi. Natyrisht që Masimo do të ndihmohet shumë nga Luka Toni, si në fushë ashtu edhe jashtë fushës. “Të largohesh nga vendlindja drejt një kulture tjetër është risk,” - bëri të ditur Odo, duke shpjeguar se prezenca e Tonit në Bavari ishte një nga faktorët kyç që ia mbushën mendjen të transferohej në Mynih. “Fakti që Luka është te Bajerni është sigurisht një faktor që e favorizonte transferimin tim. Ai më ka thënë një thes me gjëra të mira për Bajernin. Dyshja italiane do të jetë shoqe skuadre shumë shpejt, pasi Bajerni do të luajë një ndeshje miqësore në nder të Oliver Kahn. “Ajo është ndeshja e parë ku unë do të kem mundësinë ta shoh në fushë,” - konfirmoi Klisnman.

Verder Bremeni ka harruar të fitojë!


Skuadra e Shafit humbet në Myshengaldbah. Kryesojnë Shalke, Dortmund dhe Hamburg. Sot e ka radhën Bajerni

Bajer Leverkusen i ka dhënë fund fillimin të mbarë të Hofenhaimit me një fitore 5 2 në “BayArena”. Dy gola në fillim të takimit, me autor Arim Hagui dhe Manuel Fridrish, i ka kalaur në avantazh vendasit përpara se Vedad Ibiseviç të ngushtonte diferencën katër minuta më pas. Stefan Kisling ka rikthyer avantazhin e dy golave të vendasve në minutën e 36-të, por Hefanhaimi refuzoi të dorëzohej dhe Fehae Salihoviç shënoi nga pika e bardhë në minutën e 58-të. Leverkuseni ka arritur të sigurojë rezultatin me golat e minutave të fundit me autor Trankuilo Barnetën dhe Stefan Kisling. Shalke ka kapur kreun e renditjes me një fitore 1-0 kundër Bokhumit. Heiko Vesterman shënoi golin e fitores në minutën e 36-të. Borusia e Mynshengladbahut ka arritur fitoren e parë të sezonit duke mundur Verderin 3-2. Karim Matmur ka kaluar në avantazh skaudrën në minutën e 12-të dhe Rob Frend shënoi golin e dytë, përpara se në minutën e 71-të Aleksandër Baumjohan të vendoste fatin e ndeshjes, të cilin dy golat me autor Pizarron dhe Diegon nuk kanë arritur ta kthejnë. Verderi nuk ka fituar asnjë nga tri ndeshjet e para në këtë kampionat. Në ndeshjet e tjera, Hamburgu ka rikuperuar nga dy gola disavantazh duke kaluar Arminian e Bielefeldit me rezultatin 4 2. Arminia kaloi në avantazh dy golash falë Kristofer Katongo dhe Artur Vishnjarek, por dy golat e Bastian Rajnhardt në minutat 39′, 49′ kanë rikthyer qetësinë në kampin e Hamburgut. Sulmuesi kroat, Ivica Oliç kaloi Hamburgun në avantazh në minutën e 64-ët dhe Daniel Jarolim mbylli çdo gjë 13 minuta nga fundi i takimit. Borusia Dortmundit e ka vazhduar nisjen mirë të sezonit me një fitore minimale kundër Energie Kotbusit. Neven Subitiç shënoi golin e vetëm në fund të pjesës së parë. Volfsburgu dhe Ajntrahti kanë barazuar 2-2 në “Volksvagen Arena”. Joanis Amanitidhis i dha Ajntrahtit avantazhin në minutën e 22-të, por pesë minuta më vonë rezultati u barazua nga pika e bardhë. Më pas ka qenë Volfsburgu ai që ka kaluar në avantazh, por Faton Toski shënoi golin e barazimit shtatë minuta nga përfundimi i takimit. Me ndeshjet e sotme, Bajern-Herta dhe Shtutgart-Hanover mbyllet java e tretë e Bundesligës

Heking: Shtutgarti ka dy fytyra



Trajneri: Ata herë janë të fortë dhe herë “të dhurojnë” ndeshjen

Trajneri i Hanoverit, Diter Heking, nuk di se çfarë të presë prej Shtutgartit ditën e sotme, duke qenë se ata e kanë nisur sezonin me një formë të çuditshme. Kampionët e Bunesligës në 2007-ën e hapën fushatën e re me një fitore jashtë fushe kundër Borusias së Mynshengladbahut dhe shtatë ditë më pas humbën në shtëpinë e tyre kundër Bajer Leverkusenit. “Duket sikur ata kanë dy fytyra, - tha Heking për Shtutgartin. - I ndoqa në lojën kundër Gladbahut dhe luajtën shumë mirë, ndërsa kundër Leverksuenit nuk ishin aspak bindës. Është në dorën tonë të tregojmë fytyrën e tyre të rradhës”. Hanoveri mban vendin e 16-të në Bundesligë me një pikë, dhe ende nuk ka arritur të gjejë rrugën e rrjetës. “Akoma nuk i kemi reazliaur pritshmëritë tona dhe ka ardhur koha që të ndryshojmë diçka”, -shtoi Heking. Mikael Tarnat, Hano Balish dhe Salvbe do të mungojnë për shkak të dëmtimeve, ndërsa Mario Egiman pritet të zëvendësojë mbrojtësin Valerien Ismael. Shtutgarti nuk do të ketë në dispozicion sulmuesin Kakau, Ludovik Manjin dhe Sami Kediran. Do të jetë padyshim një ndeshje e veçantë për mesfushorin Jan Simak, i cili tani do të aktivizohet me Shtutgartin, pas një aktivizimi të pasuksesshëm me Hanoverin para disa sezonesh.

Oliver Kahnit nuk i mungon futbolli


Ish-portieri i Gjermanisë dhe i Bajernit të Mynihut, Oliver Kahn, ka deklaruar ditën e hënë se atë nuk e ka marrë malli për futbollin, pasi hoqi dorë pas 20 vitesh karriere nga futbolli profesionist. “Nuk janë të shumta gjërat, për të cilat më ka marrë malli. Thonë se kalon momente të vështira kur e lë futbollin, pas një karrierë kaq të gjatë, por unë nuk kam ndjerë asgjë të tillë, tha Kahn. - Për ndeshjet, stërvitje, kompeticione dhe gjithçka nuk më ka marrë malli. Më mungon vetëm skuadra, kur ishim të grumbulluar,” - tha Kahn, i cili, prej temperamentit të tij mori pseudonimin “Vul-Kahn”. Veterani 39-vjeçar luajti gjithsej 557 ndeshje në Bundesligë me Dortmundin dhe Bajernin e Mynihut; të martën do të zhvillohet një ndeshje në nder të tij, ku Bajerni do të ketë përballë një 11-rësh të Gjermanisë. “E kam kaluar gjysmën e parë të jetës time duke luajtur futboll, dhe në pjesën e dytë dua të bëj shumë gjëra të tjera,” - tha Kahn, i cili do të fillojë punë si këshilltar në një televizion, më 10 shtator, kur Gjermania të ndeshet me Finlandën në eliminatoren e botërorit.

[b]Gomez: Kur jam në formë, gjithmonë shënoj![/b


Sulmuesi i Shtutgartit, Mario Gomez, ka qenë në gjendje të mirë emocionale, pas fitores së skuadrës me rezultatin 2-0 kundër Hanoverit. Sulmuesi i Gjermanisë ka shënuar tri gola në katër ditë, duke shënuar dy herë në fitoren 4-1 kundër Girot në Kupën UEFA. “Këtë gjë e them prej kohësh; sa herë që do të jem në gjendje të mirë fizike, do të shënoj golat e mi, - tha sulmuesi shtatlartë, i cili ka qenë në qendër të kritikave për shkak të prezantimit të dobët në kampionatin europian. - Sigurisht, shpërdorova shumë raste, por këto janë gjëra që ndodhin në futboll, - shtoi ai. - E rëndësishme është që të dal nga fusha me ndërgjegje të pastër, pasi unë mundem.” Ndërkohë që Pavel Pardo, autori i golit tjetër, ka zgjedhur të fokusohet te loja e skuadrës. “Pjesa e parë ishte e mirë për ne dhe ne arritëm t’i shfrytëzonim rastet tona. Prandaj arritëm të kalonim në avantazh 2-0, - tha ai. - Edhe pjesa e dytë ishte shumë e mirë. Në mbrojtje ishim shumë mirë.”