Gjendet gruaja 157-vjeçare.

nga **Morena** Wed Jun 16, 2010 12:45 pm

Regjistrimi i
përgjithshëm i popullsisë që po zhvillohet në Indonezi, duket se do të
sjellë një surprizë shokuese për mbarë botën dhe për moshën që ne
konceptojmë. Zyrtarët e regjistrimit të përgjithshëm të popullsisë
deklaruan se një grua ka pretenduar se ka lindur në vitin 1853, pra
atëherë kur “La Traviata” e Xhuzepe Verdit debutoi në Venecia apo kur
nisi Lufta e Krimesë dhe San Francisko u bë qyteti i parë me tabela
rruge. Për më tepër, ata kanë deklaruar se e besojnë këtë grua. “Nuk
ekziston asnjë e dhënë që të provojë moshën e saj, por duke u bazuar në
deklaratat e saj dhe në moshën e vajzës së saj të birësuar, që tashmë
është 108 vjeçe, është vështirë që ta vendosësh në pikëpyetje”, – tha
Xhoni Sarxhono nga zyra e statistikës. I vetmi person që është vërtetuar se ka jetuar më shumë se 120
vjet ishte gruaja franceze Zhan Kalment, që vdiq në vitin 1997, në
moshën 122-vjeçare. Fshatarja
Turinah nga Sumatra e Jugut do të jetë tërësisht 35 vjet më e madhe se
mosha e Kalmentit kur vdiq, thonë zyrtarët. Akoma më e pabesueshme është
fakti se ajo punon në shtëpi gjatë gjithë ditës dhe ka pirë cigare
gjatë gjithë jetës së saj, thotë z. Sarxhono. “Pavarësisht moshës së saj, ajo ka një
memorie mbresëlënëse, shikim të pastër dhe nuk ka probleme dëgjimi. Ajo
flet holandishten rrjedhshëm”, – thotë ai. Indonezia ishte një koloni holandeze për 300
vjet deri në vitin 1945. Ai
tha se znj. Turinah dogji të gjitha dokumentet e saj të identitetit në
mënyrë që të mos e lidhnin me një grusht komunist shteti në vitin 1965. Indonezia është vendi i katërt më i madh në
botë me një popullsi prej 240 milionësh banorësh. Presidenti Susilo
Bambang Judhojono tha se rezultatet e regjistrimit të përgjithshëm të
popullsisë do të jenë të një rëndësie të veçantë për politikat e
ardhshme qeveritare të tij.