Udhëtimi për në Mars për 39 ditë

nga capkenja Sun Feb 28, 2010 12:48 pm

Rrugëtimi i fluturakeve kozmike nga Toka deri në Mars në t ardhmen do të mund të zgjasnin vetëm 39 ditë, gjashtë herë më shkurt sesa sot, kanë kumtuar shkencëtarët amerikanë.
Franklin Chang Diaz, ish astronaut dhe fizikan në Institutin e Teknologjisë në Masachusets, tha se udhëtimi deri në planetin e kuq do të mund të përshpejtohej dukshëm me përdorimin e raketës VASIMR, fluturimi provues i të cilës do të mund të bëhej pas tre vjetësh.
Kjo raketë si karburant përdor teknologjinë e të ashtuquajturës magnetoplazmës impulsive dhe gjendet në qendër të strategjisë së ardhshme të agjencisë kozmike amerikane NASA.
Raketa e tillë do të shfrytëzonte energjinë elektrike për transformim të karburantit -hidrogjenit, heliumit apo deuteriumit – në plazmë gazi që nxehet deri në temperaturë prej 11 milionë gradë Celsius. Me teknologji të tillë raketa do të mund të arrinte shpejtësinë prej 55 kilometra në sekondë.
Largësia e Marsit nga Toka është ndërmjet 55 dhe 400 milionë kilometra, varësisht nga pozita e orbitave të tyre rreth Diellit.