Femra muskuloze, fakt apo trillim?

Vitet e fundit si çdo kund në botë, ashtu edhe te ne, femrat çdo
herë e më tepër janë të interesuara për arritjen e formës sa më të
bukur të trupit përmes ushtrimeve të fitnesit pasi dihet se është
mënyra më e shpejtë dhe më e shëndetshme për të arritur qëllimet. Këtë
dëshirë shpesh herë e vejnë në dyshim disa thashetheme të cilat
rezultojnë në frusturimin e femrave që dëshirojnë të merren me fitness.
Të gjitha këto thashetheme, mendime dhe presupozime ndikojnë që disa
femra vendosin ta lënë anash dëshirën e tyre për të pasur një trup
ideal, të bukur dhe të shëndetshëm. Disa nga dilemat më të shpeshta do
t’i sqarojmë në tekstin e mëposhtëm.
1. Çka ndodh kur t’i ndërpremë ushtrimet e fitnesit, a
ndikojnë negativisht në organizëm dhe a fillon menjëherë shtimi i
peshës trupore?
Kjo është një pyje te cilën e bëjnë femrat ende pa u regjistruar në
sallë të fitnesit. Vet fakti që ajo mendon për t’i ndërpre ushtrimet
ende pa filluar, tregon për seriozitetin dhe vullnetin e mangët qe ka
për ushtrime. Sa i përket asaj që fitnesi mund të ndikon negativisht
pas ndërprerjes, është një gjë e pamundur, sepse fitnesi është vetëm
ushtrim fizik, nuk është medikament që mund të ketë edhe efekte
anësore. Shtimi i peshës pas ndërprerjes se ushtrimeve të fitnesit
ndodh sepse shumica e femrave e çrregullojnë mënyrën e të ushqyerit dhe
konsumojnë ushqim edhe më tepër se që kanë konsumuar gjatë ditës dhe
kohës kur kanë stërvitur. Pra, nëse ndërpritet aktiviteti
fizik-fitnesi, patjetër duhet të zvogëlohet edhe ushqimi, përafërsisht
300-500 kalori më pak gjatë ditës. Nëse nuk harxhohet energji-kalori me
ushtrime, ato nuk duhet të konsumohen, sepse ajo energji e
pashfrytëzuar deponohet dhe kthehet në peshë dhjamore. Pra edhe pas
ndërprerjes së fitnesit mund të keni peshën e njëjtë trupore nëse nuk
konsumoni ushqim të tepërt, kurse sa i përket metabolizmit ai fillon të
kthehet në gjendjen e mëparshme dhe gjithashtu forma e trupit nuk mund
të qëndrojë e njëjtë, sepse muskujt pa aktivitet fizik nuk mund të
qëndrojnë të forcuar, por me kohë fillojnë të sforcohen.
2. A bën apo jo, të ngrisim pesha të rënda dhe të bëjmë intensitet të lartë të ushtrimeve?
Kjo hamendje është edhe arsyeja pse disa femra nuk mund t’i arrijnë
qëllimet e tyre. Nëse ngrisim pesha shumë të lehta ato nuk kanë
kurrfarë efekti në metabolizmin dhe organizmin e njeriut, çka do të
thotë se as nuk mund të dobësohemi e as të forcojmë muskujt. Poashtu,
intensiteti i ulët i ushtrimeve nuk shpejton metabolizmin dhe
preferohet të përdoret vetëm në rast të një lëndimi muskulor apo
gjendjes jo të mirë shëndetësore. Pra, pesha duhet të caktohet në bazë
të qëllimit të cilin dëshirojmë ta arrijmë kurse intensiteti duhet të
përcaktohet në bazë të përvojës, gjendjes shëndetësore, moshës dhe
qëllimit. Nëse kemi për qëllim humbjen e peshës dhe forcimin e muskujve
patjetër që duhet të përdorim pesha mesatare dhe herë pas here edhe të
renda si dhe intensiteti të jetë çdo herë i lartë gjatë stërvitjes,
sepse vetëm atëherë mund të shpejtojmë metabolizmin, të forcojmë
muskujt, të humbim kilogramët e tepërt dhe të arrijmë formën e
dëshiruar të trupit.
3. A duhet bërë vetëm ushtrime te barkut dhe kardio për të rënë në peshë?
Duhet të cekim se me ushtrime të barkut shpenzojmë rreth 120 kalori,
kjo është e barabartë me një banane, ndërsa me ushtrime për muskujt e
këmbëve, shpinës dhe gjoksit mund të shpenzojmë rreth 500 kalori. Pra,
duke ditur se për të humbur një kilogram të peshës trupore duhet të
shpenzojmë-djegim rreth 7700, kalori vijmë në përfundim se vetëm
ushtrimet e barkut nuk mjaftojnë për arritjen e qëllimit, përkundrazi
duhet të fokusohemi më tepër në ushtrimet për muskujt tjerë, më të
mëdhenj të trupit të cilët i përmendëm më lartë. Kjo tregon më së miri
pse muskujt e barkut nuk duhet të stërviten çdo herë e muskujt tjerë të
lihen anash. Sa i përket ushtrimeve kardio siç janë trakat vrapuese,
krostraineri, biçikleta, steperi, reveri, etj., janë mjaft të mira për
rritjen e qëndrueshmërisë dhe humbjen e peshës vetëm atëherë nëse
aplikohen me një intensitet më të lartë dhe një kohëzgjatje të shkurtë
prej maksimum 30 minutave. Sepse, nëse bëni intensitet të ulët dhe
kohëzgjatje më tepër se 30 minuta, atëherë kjo mund të rezultojë në
dobësimin e muskujve, në stërngarkimin e nyejve dhe në numrin më të
vogël të kalorive të djegura. Por vlen të përmendet se edhe nëse
arrijmë të humbim peshë duke bërë vetëm ushtrime kardio, prapë do të
mungojë forma e trupit të dëshiruar.

4. A duhet t’i ekzekutojnë ushtrimet e meshkujve edhe femrat?
Asnjë ushtrim dhe asnjë makinë e fitnesit nuk është e dizajnuar apo
e ndërtuar vetëm për njërën apo tjetrën gjini, sepse ushtrimet fizike
nuk njohin gjini. Ato njohin vetëm sistemin nervor, muskulor dhe
sistemin eshtëror të trupit të njeriut. Që të dyja gjinitë kanë këto
sisteme dhe kanë grupet e njëjta muskulore në trup. Pra, nuk ka dallime
dhe ndarje të ushtrimeve. Nëse disa ushtrime janë më të përshtatshme
dhe më të nevojshme për femrat, nuk mund të quhen se janë ushtrime të
femrave, sepse për ato ushtrime mund të kenë nevojë edhe meshkujt si
dhe anasjelltas. Dallimi i ushtrimeve mund të behët vetëm në bazë të
qëllimit të femrave dhe përvojës se a janë fillestare apo të avancuara.
Pra, pasi dy gjinitë kanë grupet e njëjta muskulore, atëherë pse mos
t’i forcojnë muskujt e shpinës apo duarve edhe femrat, pse mos të
formësojnë muskujt e këmbëve dhe barkut kur dihet se këta muskuj
rregullojnë dhe i japin bukuri pamjes trupore.
5. A mjaftojnë 10 minuta brenda ditës ushtrime të barkut për të zvogëluar linjat e belit dhe për të shkrirë yndyrën në bark?
Kishte qenë gjëja më e mirë nëse kjo do te ishte e
mundur. Me 10 minuta ushtrime të barkut shpenzojmë maksimum 100 kalori,
çfarëdo lloj ushtrimesh apo makinash qofshin ato, kurse për të humbur
një kilogram të peshës trupore nevojitet të shpenzojmë rreth 7 700
kalori. Pra, ushtrimet e barkut nuk janë edhe aq të domosdoshme për
shkrirjen e yndyrës sa janë për mirëmbajtjen e boshtit kurrizor dhe
bukurinë e trupit. Nëse për 77 ditë me radhë bëjmë nga 10 minuta
ushtrime të barkut, mund të humbim një kilogram që vjen nga i gjithë
trupi e jo vetëm nga pjesët e barkut, sepse shkrirja e yndyrës në një
vend të caktuar të trupit mund të realizohet vetëm me ndërhyrje
kirurgjike, përndryshe çfarëdo lloj ushtrimi që ekzekutoni, organizmi
përmes metabolizmit fillon shpenzimin e kalorive dhe shkrirjen e
yndyrës duke filluar nga rezervat më të mëdha që gjenden në trup, qoftë
ajo pjesë e barkut apo e kofshëve deri te rezervat më të vogla të
yndyrës në trup. Nga kjo kuptojmë se nëse ushtrojmë muskujt e barkut,
nuk mund të shkrijmë vetëm yndyrën e barkut, por do të shkrijmë edhe
yndyrën që gjendet në pjesët tjera të trupit. Pra, nëse qëllimi juaj
është zvogëlimi i linjave të belit dhe shkrirja e yndyrës në bark së
bashku me ushtrimet për të gjitha pjesët e trupit, kombinoni edhe
ushqimin e pasur me më shumë proteina dhe me më pak yndyra e
karbohidrate.
6. A është e vërtet se edhe pse nuk mban dietë, nëse ushtron fitnes, mund të dobësohesh?
Duke mos e ditur rëndësinë dhe efektin e ushqimit në humbjen e
peshës, disa femra koncentrohen vetëm te ushtrimet dhe shpesh herë
dëshpërohen me rezultatet e tyre. Ato mendojnë se pavarësisht ushqimit
që e konsumojnë, stërvitja do të ketë efekt në zvogëlimin e peshës
trupore. Me ushtrime të fituesit, brenda një ore mund të shpenzojmë
rreth 500 kalori dhe është e vërtetë se nëse gjatë ditës nuk konsumojmë
ushqim më tepër, por vetëm aq sa na duhet, brenda një muaji mund të
humbim 2-3 kilogram. Por, nëse konsumojmë ushqim më tepër gjatë ditës
dhe me shumë kalori si çokollatë, hamburger, picë, dyner, byrek,
pomfrit, akullore, ëmbëlsira etj., të cilat kanë çdo njëra nga 550
kalori, do të thotë se kaloritë e shpenzuara në stërvitje i kemi
zëvendësuar ose dyfishuar me ushqimin që e kemi konsumuar. Kjo është
arsyeja pse nuk mund të humbim peshë, por vetëm të mbetemi në atë peshë
ose nganjëherë mund edhe ta rrisim atë. Pra, nëse qëllimi juaj kryesor
është humbja e peshës, atëherë mundohuni që gjatë ditës të konsumoni
ushqim natyral në sasi të vogël, pra më pak kalori, siç janë: tuna
sallatë, mish të bardhë të zier, sallatë frutash, jogurt i pemëve, pemë
të freskëta, qumësht me pak yndyrë, oriz, vezë, patate, etj. Të gjitha
këto kanë nga 150-300 kalori, prandaj edhe merren si ushqime të vogla
të cilat treten shumë shpejtë dhe ndihmojnë në shpejtimin e
metabolizmit gjegjësisht humbjen e peshës trupore.
7. Ushtrimet e fitnesit mundësojnë humbjen apo rritjen e peshës trupore?
Ushtrimet e fitnesit shpejtojnë dhe rregullojnë
metabolizmin-sistemin e tretjes, pra mundësojnë edhe humbjen edhe
rritjen e peshës, varësisht prej ushqimit që ju e konsumoni. Cilësia
dhe sasia e ushqimit janë ato që përcaktojnë qëllimin tuaj, kurse
ushtrimet ndihmojnë për të arritur më shpejt atë qëllim të paracaktuar.
Pra, nëse keni për qëllim humbjen e peshës, metabolizmi i shpejtuar i
cili arrihet me ushtrime të fitnesit do t’ju ndihmon të shpenzoni
kalori më shumë dhe më shpejt gjatë ditës, që do të thotë se do të
arrini më shpejt qëllimin tuaj, pra humbjen e peshës. Nëse femra është
nën peshë dhe ka për qëllim rritjen e peshës, metabolizimi i shpejtuar
dhe i rregulluar do t’i ndihmon në rregullimin e dy gjërave që më së
shumti ajo ka nevojë, rritjen e oreksit dhe rritjen e ndjenjave të
qendrave në tru për ndjenjën e urisë, që do të thotë se do të mund të
konsumoi ushqim më shpesh dhe më tepër gjatë ditës me një orar më të
rregullt. Pra, fitnesi është zgjidhja kryesore dhe më e shëndoshë edhe
për ato që dëshirojnë të humbin peshë edhe për ato që dëshirojnë të
shtojnë peshë, por gjithmonë duke kombinuar me cilësinë dhe sasinë e
ushqimit varësisht prej qëllimit që dëshirohet të arrihet.
8. A guxoj të përdori suplemente (proteina) për rritjen e peshës trupore?
Suplementet nuk duhet quajtur proteina, sepse ato mund të mos
përmbajnë fare proteina, por vetëm karbohidrate dhe vitamina të cilat
shërbejnë për rritjen e energjisë, për këtë arsye më së miri është t’i
quajmë ushqim shtesë. Ushqimi shtesë nuk është vetëm për meshkuj, sepse
për të kanë nevojë edhe femrat pasi dihet se kanë përmbajtje të
zgjedhur ushqyese për të mirëmbajtur linjat e trupit në formë të mirë,
por edhe për t’i rritur apo zvogëluar ato. Nevoja për ushqim shtesë
është çështje individuale duke marrë parasysh gjendjen shëndetësore,
fizike, punën që kryen gjatë ditës, qëllimin dhe sportin me të cilin
merret ajo. Pra, në bazë të nevojës mund të përcaktohet se çfarë
përmbajtje duhet të ketë suplementi, se a duhet të jetë ai për rritje
të peshës, forcës, qëndrueshmërisë, apo për humbje të peshës. Është me
rëndësi të përcaktohet suplementi i duhur për qëllimin e duhur si dhe
sasia e konsumimit të përcaktohet në bazë të peshës së individit,
moshës dhe imunitetit. Suplementet nuk kanë efekte anësore, vetëm se
disa tregojnë me tepër rezultat e disa më pak. Nëse bëjmë krahasimin e
një pice me një suplement në përmbajtjet e tyre ushqyese gjejmë se pica
ka 40-60 gram yndyrë shtazore e cila është mjaft e dëmshme për
organizmin e njeriut, 10-15 gram proteinë që ka vlerë të dobët
biologjike dhe 50-90 gram karbohidrate të thjeshta, ku gjithsej këto
bëjnë 600-1000 kalori, ndërsa suplementi ka 2 gram yndyrë, 20 gram
proteinë me vlerë të lartë biologjike dhe 6 gram karbohidrate, që
gjithsej bëjnë 150 kalori.
Unë mendoj se suplementet të japin një ndihmesë të vogël dhe efekti i
tyre mund te rritet vetëm nëse kombinohet me stërvitje dhe ushqim te
rregullt. Duhet të përmendim se ka suplemente edhe për humbjen e
peshës, madje disa janë shumë efektive edhe për zvogëlimin e
triglicerideve-yndyrës në gjak dhe mund të përdoren lirisht nga të dy
gjinitë. Çdo herë përpiquni të rregulloni ushqimin ditor që ai të jetë
sa më natyral dhe të stërviteni rregullisht me intensitet të
mjaftueshëm për qëllimin e caktuar dhe vetëm atëherë kur këto nuk japin
rezultat, mund të shfrytëzoni zgjedhjen e tretë, pra konsumimin e
ushqimit shtesë-suplementeve.

9. A mund të arrij formën e duhur te trupit me ushtrime në shtëpi?
Me ushtrime në shtëpi mund të mirëmbahet një forcim i përgjithshëm i
trupit, mirëpo jo edhe të fitohet ai, sepse ka pak ushtrime që mund të
ekzekutohen vetëm me peshën e trupit dhe ato mund të jenë shumë të
vështira, veçanërisht për një femër fillestare. Për të pasur mundësi më
të mëdha për ekzekutimin e më shumë ushtrimeve në shtëpi, nevojiten
disa vegla për ushtrime siç janë: shufra, dorake, banka lëvizëse, pesha
të lira, topi, biçikleta, etj. Për këtë arsye zgjidhja për të ushtruar
fitnes duhet të jetë në sallë të fitnesit ku gjenden edhe trajnerët
profesionist të cilët të ndihmojnë në ekzekutimin e rregullt dhe të
drejtë të ushtrimeve, me fjalë të tjera të mësojnë tekniken e rregullt
të ushtrimeve dhe të shmangin nga teknika e gabuar e ushtrimeve e cila
mund të shkakton lëndime dhe dëmtime muskulore. Pasi të fitoni përvojë
dhe pasi të arrini formën e dëshiruar të trupit, atëherë mund të
vendosni që me disa vegla në shtëpi dhe me një program të ushtrimeve
për shtëpi ta mbani formën e trupit që e keni arritur.
Përfundimisht me ushtrime në shtëpi nuk duhet të pritni se mund të
arrini formën e trupit të dëshiruar, sepse forma e trupit të bukur dhe
simetrik kërkon punë dhe angazhim më të madh se sa ekzekutimi i disa
ushtrimeve të thjeshta, mirëpo mjafton se ushtrimet në shtëpi mund të
jenë shumë të dobishme, kryesisht në kohën kur jeni në pushime, kur
jeni shtatzënë dhe në kohën kur jeni në atë moshë ku për ju ka rëndësi
më tepër të ndiheni mirë dhe e relaksuar se sa të arrini përmasat
ideale të trupit.
10. Unë nuk kam komplekse, andaj nuk më pengon mbipesha dhe forma ime e trupit!
Ky është justifikimi që e përdorin disa femra me mbipeshë, ngase
kanë frikë se nuk mund ta arrijnë kurrë formën ideale të trupit. Sot,
mbipesha është shkaktari kryesor i shumë sëmundjeve dhe problemeve
shëndetësore. Çdo herë duhet bërë dallimin në mes të kujdesit të shtuar
dhe kompleksit. Kujdes të shtuar njeriu mund të ketë ndaj familjes,
fëmijëve të vet, punës, ushqimit, shëndetit, profesionit, higjienës së
trupit, peshës trupore etj. kurse komplekse quhen pakënaqësitë që i
kemi me ato që natyra na i ka dhuruar. Disa femra ndihen të
kompleksuara se ju mungon gjatësia mesatare trupore, disa për shkak të
pamjes së fytyrës jo të bukur, disa për shkak të flokëve jo të mira,
disa nuk janë të kënaqura me përmasat e gjokseve, disa me ngjyrën e
syve, etj. Disa femra mendojnë se këto komplekse mund të rregullohen me
ndërhyrje kirurgjike-operacione plastike, të cilat mund të jenë të
rrezikshme dhe shumë të dëmshme për shëndetin.
Pra, mos harroni, ushtrimet e rregullta dhe ushqimi natyral,
gjegjësisht forma dhe pesha e trupit tuaj, është pasqyra e shëndetit
tuaj.
11. Nuk dua të bëhem femër muskuloze!
Shumë femra mendojnë dhe besojnë se nëse ushtrojnë fitnes dhe
përdorin pesha të rënda do të krijojnë muskuj. Për këtë arsye te ne më
tepër preferojnë të mbesin me mbipeshë se sa të ushtrojnë fitnes. Nëpër
revista dhe publikime të ndryshme paraqiten femra që kanë trup me aq
shumë muskuj të ndërtuar dhe të theksuar sa që shpesh herë na bëjnë të
dyshojmë se mos i përkasin ndonjë gjinie tjetër. Por, duhet të cekim se
arritja e formës së tyre është thuajse e pamundur ngase ato kanë
gjenetikë të veçante dhe përveç asaj përdorin hormone
mashkullore-testosterone me anë të injeksioneve, aplikojnë së paku 10
deri 20 vjet trening intensiv, shpenzojnë rreth 60 mijë dollar në vit
për ushqim, suplemente, trajner personal, doktor, hormone, steroide,
etj. Pra, kjo është edhe arsyeja pse në krejt botën ekziston një numër
shumë i vogël i femrave muskulore, sepse arritja e formës së trupit
tyre është një rruge shumë e gjatë, shumë e mundimshme dhe shpesh herë
e paarritshme. Qëllimi kryesor i tyre është pjesëmarrja nëpër gara
botërore dhe disa prej tyre e kanë edhe punë-profesion. Kurse femrat e
zakonshme të cilat ushtrojnë fitnes në mënyrë natyrale, nuk mund të
ndërtojnë shumë muskuj, sepse gjenetikisht nuk janë të predispozuara
dhe nuk kanë nivel të mjaftueshëm të hormoneve
mashkullore-testosteroneve të cilat janë përgjegjëse për rritjen e
volumit muskulor.
Çdo trup të bukur të ndërtuar dhe të zhvilluar proporcionalisht që e
shohim te artistët dhe këngetaret e ndryshme, duhet ta dimë se është
arritur me shumë përkushtim, me ushtrime të rregullta dhe me ushqim të
përzgjedhur. Edhe pse në raste të veçanta, si ylli i popit Madona,
shpesh herë kritikohet se ka një trup muskulor, me shumë muskuj,
imagjinoni si do të dukej ajo po të kishte dhjamë në vend të muskujve,
kur dihet çfarë moshe ka! Pra, çdo herë, trupi duhet të mbulohet më
tepër me muskuj ose me dhjam, varësisht prej pamjes që dëshirojmë ta
kemi.
Ushtrimet e fitnesit dhe ushqimi natyral femrave iu mundëson të
forcojnë muskujt, të zvogëlojnë përqindjen e yndyrës në trup, të
zvogëlojnë linjat trupore apo në pjesë të veçanta edhe të rrisin ato,
varësisht prej qëllimit, të largojnë celulitin, të tërheqin lëkurën që
ajo të duket më e re, të rrisin forcën dhe qëndrueshmërinë-kondicionin,
fleksibilitetin, të forcojnë imunitetin dhe metabolizmin, etj. Të
gjitha këto e bëjnë një femër të duket bukur, të ndjehet mirë, të ketë
vetëbesim dhe të jetë e kënaqur me veten dhe trupin e saj. Pra, femra
muskuloze është vetëm një trillim se një formë e tillë e trupit
asnjëherë nuk mund të arrihet në mënyrë natyrale. Sot, për shumicën e
femrave dëshira për të pasur një trup sa më të bukur, me përmasa
ideale, me muskuj të forcuar dhe pa dhjame të tepërt, i shtyn ato çdo
ditë e më tepër të ushtrojnë fitnes dhe të ushqehen sa më natyral kur
dihet se kjo është mënyra më e mirë, më e shpejtë dhe më e shëndoshë
për t’i arritur qëllimet