12 vjeç në universitet: "Do të bëhem astronaut"

Kur të rritet dëshiron të bëhet astronaut dhe nëse vazhdon të ecë me këto ritme me siguri që do të arrijë të bëhet, madje edhe përpara kohe. Kjo, sepse Cameron Thompson, 12 vjeç, me origjinë nga Uellsi, ka nisur studimet universitare për matematikë në "Open University". Sipas llogaritjeve të thjeshta, i bie që djaloshi të diplomohet në moshën 16-vjeçare. Një gjeni i vërtetë, për sa u përket llogaritjeve dhe teoremave, por ashtu si gjenitë e tjerë të kalibrit të Anshtanjit, Njutonit dhe matematikanit Kurt Godel, edhe ai është i prekur nga një formë e autizmit, nga sindromi Asperger.
Bota e numrave

Cameron e ka të vështirë të luajë dhe të komunikojë me shokët e tij të Maelor School në Penley, një fshat në Uellsin verior, por që nga fëmijëria i ka befasuar familjarët e tij me veprime matematikore vërtet befasuese. Prindërit e tij,

Roderick, 35 vjeç dhe Alison 32, sipas asaj që tregon britanikja "Daily Mail" - e vërejtën për herë të parë aftësinë e djalit të tyre me numrat kur ishte vetëm 4 vjeç, ndërsa llogariste bashkë me mësuesen e kopshtit numra negativë. Në shkollën fillore gjeniu i tyre shkëlqente në testet e matematikës kuantistike. Aty ku pikët më të larta ishin 140, ai arrinte të merrte 141.



Duke parë yjet

Majin e kaluar mësueset e tij vunë re se inteligjenca e djaloshit ishte shumë herë më e lartë se atje ku ai ishte dhe për këtë arsye i kërkuan "Open University", që duke bërë një përjashtim të jashtëzakonshëm, ta pranonin djalin 12-vjeçar në klasat e matematikës, pavarësisht moshës shumë të vogël. Krenar për vogëlushin e tij, i ati tregon: "Është në vitin e dytë të studimeve dhe ka arritur rezultate shumë të larta, 89%. Por ndërsa të gjithë përfundojnë kurset dhe i japin provimet në qershor, Cameron e ka përfunduar vitin e parë dy javë më parë". Me pak fjalë, do të vazhdojë rrugën e tij për një tjetër diplomë pas moshës 16-vjeçare. Ai nuk e fsheh aspak se kur të rritet dëshiron të bëhet astronaut. "Kur të jem i madh dua të bëhem astronaut", thotë ai.



Autizmi

Babai i Cameron që punon si informatikan, u trembet arritjeve të tij, "aftësitë që ka në matematikë janë të jashtëzakonshme, por ne prej kohësh dyshojmë se ka sindromin Asperger. Shpesh lodhja për të komunikuar dhe bashkëpunuar me fëmijët e tjerë, gjë që bën të qëndrojë i mbyllur në vetvete për shumë ditë me radhë". Asnjë mjek nuk ka firmosur deri më tani një diagnozë të këtij lloji, por prindërit e tij, që kanë një tjetër fëmijë me aftësi të kufizuara 10 vjeç dhe një tjetër 8 vjeç, Bethany, që duket se ka të njëjtat aftësi gjeniale si Cameron, janë të bindur. Djaloshi ka një koeficient inteligjence të barabartë me atë të shkencëtarëve më të njohur. Ai është pjesë e "Mensas" prej kohësh. Testet e inteligjencës moderne u formuan për herë të parë nga psikologu francez Alfred Binet në vitin 1905. Në Britaninë e Madhe u nënshtrohen testit të inteligjencës rreth tre mijë persona çdo vit. Testi "Mensa", që zhvillohet në Britani, është i përbërë nga dy prova. E para quhet "Culture fair" dhe shërben për të vlerësuar kapacitetin e arsyetimit jo verbal, nëpërmjet një serie problemash që paraqiten në formën e disa skemave; e dyta, "Cattell B", merr në konsideratë më së shumti arsyetimin verbal. Për të bërë pjesë në klubin e "Mensa" duhet të marrësh një sasi pikësh që hyn në 2 përqindëshin më të lartë se ajo e popullsisë britanike, të paktën në një nga këto dy prova. Për sa i përket provës së parë duhet të totalizosh të paktën 132 pikë dhe tek e dyta 148. Teste të tjera inteligjence përdorin sisteme të ndryshme pikësh. Pra, nëse dikush ju thotë se keni një nivel të caktuar inteligjence në terma matematikorë, informacioni nuk do të jetë shumë i vlefshëm, nëse nuk dini se kujt test i referohet. Shoqata "Mensa" u themelua nga avokati australian Roland Berrill dhe nga shkencëtari britanik Lançelot Ueir.