Internet qe do na lehtesoi se tepermi

Nga Tring dixhital TV,cdo familje internet te shpejt e te lire.





Synimi
i marrëdhënies së re është ofrimi me çmime të lira i shërbimeve të
internetit, telefonisë dhe të televizionit për shqiptarët në çdo cep të
vendit
Një
nga marrëveshjet më rëndësishme të Panairit Ndërkombëtar të Tiranës
“Klik Ekspo Group” është prezantuar publikisht dje në mjediset e hotel
“Rogner”. Drejtori i përgjithshëm i “Skylogic”, Renato Farina, ka dhënë
detaje për të pranishmit mbi këtë bashkëpunim të “Eutelsatit” me “Tring
Communications”, duke zyrtarizuar tashmë gjithçka. Kështu, “Tring
Communications” vjen me një risi në tregun shqiptar, duke lidhur
njerëzit me njëri-tjetrin, pavarësisht vendit ku ata ndodhen. Kjo do të
thotë se vetëm nëpërmjet një antene parabolike dhe aparatit “Tring”,
nuk ka rëndësi nëse shqiptarët ndodhen në mal, det apo në periferitë më
të skajshme të vendit. Të gjithë klientët e “Tring Communications” do
të përfitojnë me një antenë dhe pa kabull telefoni, internet,
televizion dhe telefoni, si dhe mjaft shërbime të tjera me parametra të
lartë, shpejtësi maksimale dhe çmime të ulëta në krahasim me tregun.
Mes të tjerash, përfaqësuesi i “Eutelsat/Skylogic” është shprehur:
“Duam që të kemi sa më shumë partnerë. Ne zgjodhëm kompaninë “Tring”,
pasi mendojmë se është kompania e duhur për të operuar në Shqipëri. Ajo
është e shtrirë në të gjithë vendin dhe ky është edhe qëllimi ynë, që
të lidhim këdo në çdo vend që ai të ndodhet me shumë shërbime të tjera,
me shpejtësi maksimale dhe sigurisht me kosto të leverdishme. Me
“Tringun” ne kemi një marrëdhënie të gjatë. Investimet që ata kanë bërë
deri tani në fushën e telekomunikacionit e rendisin këtë kompani në një
nga kompanitë më serioze në tregun shqiptar”. Sa u takon risive,
“Skylogic” ofron shërbimin e komunikimit broadband për shërbim e
internetit dhe televizionit për institucionet publike dhe korporatat
shumë të mëdha. Nëpërmjet produktit të tyre më të ri, që është
“Tooway”, që është një produkt që targeton familjarët, synon që të kapë
të gjithë këtë treg. Shërbimi i ofruar nga kompania e komunikimeve
satelitore “Eutelsat” mundëson shpejtësinë broadband deri në 3.6 Mbps
në vendet më thella, pa nevojën e linjave tokësore dhe me të njëjtin
çmim si shërbimi ADSL. Ky shërbim i quajtur “Tooway” përbëhet nga një
antenë parabolike dhe një modem, i cili lidhet me kompjuterin nëpërmjet
kartës së rrjetit. Me një instalim shumë të thjeshtë me “Tooway” mund
të arrijmë shpejtësinë në download të 3.6 Mpbs dhe 384 Kbps në upload.
Shërbimi “Tooway” është i bazuar në mbulimin me sinjal satelitor nga
“Eutelsat”, kurse përvoja e operimit komercial dhe në infrastrukturë,
nga filiali i “Eutelsat”, “Skylogic” dhe teknologjia “SurfBeam”, e
zhvilluar nga “ViaSat”. Teknologjia e përdorur nga “Tooway” vjen në
Europë pas përfitimit të një përvoje të konsiderueshme në tregun e
Amerikës së Veriut, ku “ViaSat” tashmë ofron pajisje dhe rrjet për më
shumë se 400 000 shtëpi nëpërmjet aksesit satelitor plotësisht të
pavarur nga rrjeti tokësor. Një tjetër e re mjaft interesante, të cilën
na e bën të ditur përfaqësuesi i “Skylogic”, z. Renato Farina, është se
nga mesi i vitit 2010, “Eutelsati” do ta zgjerojë më tej shërbimin
broadband, me shpejtësi deri në 10 Mbps. Kjo shpejtësi revolucionare do
të mundësohet nga hedhja e sateliteve “KA-SAT”, sateliti i dedikuar nga
“Eutelsat”, i dizajnuar posaçërisht për shërbimin broadband në Europë.
Ky satelit kombinon kapacitetin e 40 satelitëve tradicionalë dhe do t’i
mundësojë “Eutelsatit” që të japë shërbim deri për dy milionë shtëpi në
mbarë Europën me të njëjtin kualitet dhe shpejtësi të lidhjes sikundër
shërbimi tokësor ADSL.