Dashuria e parë të thyen zemrën edhe pas 50 vitesh

Dashuria e parë nuk harrohet kurrë, thotë një proverb i lashtë. Sot, përveç mendjes së ndritur të popullit, pamundësinë e fshirjes së atyre emocioneve të rralla dhe të forta që lindin nga ndjenjat e para, e konfirmon edhe shkenca. “Dashuria e parë nuk mund të përkufizohet vërtet si një lidhje normale”, - shpjegon Nancy Kalish, drejtuese e një ekipi psikologësh nga Universiteti i Sakramentos në Kaliforni, e cila që prej 14 vitesh studion këto lloj marrëdhëniesh. Nuk mund të fshihen nga vëmendja, kujtimet e asaj dashurie të humbur që rikthehet sërish me një takim të rastësishëm, por që mund të prishë ekuilibrin e personave të përfshirë në të, bashkë me lidhjet dhe martesat e konsideruara të shëndosha dhe të pandashme. “Dashuria e parë jo vetëm që nuk harrohet, por krijon edhe më shumë varësi se çfarëdolloj droge tjetër”, - thotë Kalish, e cila ka publikuar së fundmi një studim në lidhje me “të dashurit e humbur dhe të rigjetur”. Është një lidhje shumë e fortë, edhe pse mbetet në harresë shpeshherë.
Vetëm raportet që kanë lindur në moshën e adoleshencës, mund të rinisin sërish me kaq shumë forcë dhe intensitet edhe pas dhjetëra vitesh”. “Më të rinjtë, të themi të drejtën, nuk i nënvlerësojnë kurrë historitë e tyre të dashurisë.
Por edhe më të rriturit, - thonë studiuesit amerikanë, - do të bënin mirë të mos i nënvlerësonin dashuriçkat në moshën e rinisë.
Nuk bëhet fjalë për ngjarje të rralla. Kjo i ka ndodhur edhe (për fat të keq në rolin e viktimës) Rudolph Giuliani, ish-kryebashkiak i Nju Jorkut dhe kandidat i republikanëve për zgjedhjet presidenciali të vitit 2008 në SHBA. Divorci nga ikona e lajmeve, Donna Hanover shkaktoi skandal për faktin se Giuliani sapo kishte njoftuar se ishte i sëmurë nga kanceri në prostatë. Menjëherë pas ndarjes, Donna takoi të dashurin e saj në kohën e kolegjit, Edwin Oster. Nuk flisnin prej vitesh. E megjithatë, pas takimit fatal, tërheqja fatale u rikthye njësoj si më parë. Historia e Hannover dhe e 49 vip-ave të tjerë amerikanë është përmbledhur në një libër, “Dashuria ime është rikthyer”, që ka shumë sukses në Amerikë.
Për të evituar tronditjet e forta emocionale, pra, duhet të evitoni darkat me ish-shokët dhe ish-shoqet e shkollës, që në fakt janë vendi i ritakimeve dhe i rënies në dashuri për së dyti herë me të njëjtët njerëz që të kanë pëlqyer në kohën e gjimnazit. Për të evituar problemet, - thonë ekspertët, - shkoni me partnerin tuaj: ndoshta në këtë mënyrë nuk do të jeni aq të brishtë përballë të dashurit tuaj në adoleshencë dhe do të keni ndrojtje të këmbeni numrin e telefonit apo adresën e e-mailit. Mjafton vetëm një takim i thjeshtë për të ndezur sërish shkëndijat, - thotë studiuesja.
Dhe tërheqja duket e pamundur të refuzohet, sidomos sot që interneti dhe telefonat celularë e kanë bërë kaq të thjeshtë komunikimin. Kështu shpjegohet edhe suksesi i atyre faqeve në internet si “class mates.com”, që në Shqipëri janë konvertuar “shokë klase.com”.
Kështu, nëse ju rastis të takoni sërish dashurinë tuaj të parë të pafat, për të evituar tronditjen e ekuilibrit, alternativa e vetme do të ishte ajo e filmit të pak viteve më parë “Nëse më braktis, do të fshij nga kujtesa!”, me regji të Michel Gondry si dhe aktorët Jim Carrey dhe Kate Winslet: të dy duhen çmendurisht, por dashuria e tyre vihet në provë nga mënyra e jetesës dhe shijet shumë të largëta. Kur bindet ta braktisë të dashurin, Winslet vendos të fshijë dhe kujtesës: pa dijeninë e tij, ajo lidhet me teknikët e një kompanie që do të fshijë nga kujtesa edhe kujtimet që kanë lidhje me historinë e dashurisë. Më mirë një harresë fantastiko-shkencore sesa dhimbjet e dashurisë së humbur. Dhe të rigjetur.