Keshilla per pisikologjine

nga Vizitor Wed May 06, 2009 9:03 pm

Shpëtoni lidhjen tuaj pa folur

Zakonisht, reagimi ynë i parë kur gjërat nuk shkojnë ashtu siç do të donim ne, është të qartësojmë gjendjen nëpërmjet diskutimit. Shpesh mendojmë se, edhe nëse meshkujt do t'i përballonin gjërat me të njëjtën mënyrë, do të ishte më e lehtë të shmangeshin disa kriza në lidhje. Por ja që e kemi gabim.
Çfarë thonë specialistët
Studime të fundit treguan se, diskutimet pa fund rreth lidhjes tonë është më shumë e mundshme të bëjnë keq sesa mirë. Ndërkohë që, femrat synojnë diskutimin, meshkujt ndihen në siklet të bëjnë të njëjtën gjë. Dhe jo vetëm; sepse zakonisht këto dialogje përfundojnë në ankesa dhe grindje për "dështimin" e lidhjes. Çështja është edhe fizike. Sipas studimeve, qarkullimi i gjakut në muskujt e meshkujve rritet kur ata bëjnë këto lloj bisedimesh, sepse përjetojnë tension më të madh. Dhe për këtë ndihen në siklet të flasin, sidomos kur ndiejnë turp. Dhe më e mundshmja është të ndihen kështu sepse mënyra që t'ju afrohemi i bën të ndihen se na shkaktuan shqetësim (madje edhe nëse nuk ndodh diçka e tillë) duke i i bërë të ndihen pak për ne dhe në fund të dështuar. Por meqë ata mësojnë që të vegjël se, nuk duhet të tregohen të brishtë zhvillojnë mbrojtjet (që ngjanë më shumë me sulmin) që të shmangin dhimbjen që mund t’ju shkaktojë ky turp. Dhe mënyra më e thjeshtë që ta arrijnë, është të shmangin diskutimet.

Rrethi vicioz
Femrat nga ana tjetër e kuptojmë këtë qëndrim të partnerit si indiferencë, ndërkohë që bëhet fjalë për një mënyrë të ndryshme reagimi. Kështu, sa herë që gjejmë një shkak për diskutim, dhe me sa duket gjejmë më shpesh sesa duhet, fillojmë me një temë dhe në fund përfundojmë në diçka tjetër që na sjell që të dy në një situatë shumë të vështirë. Për shembull, blejmë një fustan të ri që t'i pëlqejmë të dashurit dhe e pyesim me padurim nëse na shkon. Ai, duke menduar se e blemë që të shkaktoj më admirimin e meshkujve tjerë, nuk tregohet aq i entuziazmuar sa prisnim. Si pasojë, të zhgënjyera fillojmë të grindemi me gjënë më të vogël. Në fillim me naze, por dalëngadalë një gjë sjell tjetrën dhe në fund gjendemi duke u zënë pa parë ndonjë fund të mirë në horizont.
Ai nga njëra anë nxehet dhe nga ana tjetër mërzitet që na bëri të ndiheshim keq, por tashmë është vonë. Por, nëse që në fillim do t'i kishim thënë se e kishim zgjedhur atë fustan që t'i pëlqejmë vetëm atij, nuk do të ndihej i kërcënuar, përkundrazi do të ndihej i rëndësishëm. Dhe nëse ai në vend që të shfaqë pasigurinë e tij, na thotë se sa shumë na shkon fustani ynë i ri dhe sa shumë i bëhet qejfi që përpiqemi t'i pëlqejmë, do të ishim të gjithë të lumtur.
Fjalët e shumta janë fukarallëk
Tregoni që interesoheni
Përpiquni t'i shfaqni njëri-tjetrit me gjëra të thjeshta sa i rëndësishëm është për ju partneri. Dërgojini një mesazh kur është në punë, që ta pyesni si po i shkon dita dhe shkruajini se e doni. Thojini sa i bukur është, bëjini surpriza të mëdha ose të vogla njëri-tjetrit etj ...

Preke
Meshkujt kanë rreth 2-3 herë më shumë nevojë për prekje sesa femrat që të fillojnë "të lidhen". Pra, nëse doni të flisni me partnerin tuaj për diçka që ju shqetëson, fillojeni bisedën me një prekje të butë që ta sillni më afër vetes.

Dilni jashtë
Shumica e femrave thonë se, i bëjnë bisedat më të mira me partnerin e tyre kur ecin ose janë në makinë. Pra, transferojeni lidhjen tuaj jashtë shtëpisë, në vende më asnjëanëse, që do të ndihmojnë në një ç’tensionim të mundshëm.

Ndani rutinën
Për meshkujt është shumë e rëndësishme të ndiejnë që jemi afër tyre dhe se mund të bëjmë çdo ditë gjëra bashkë. Për këtë arsye ndani rutinën tuaj. Pas kësaj, fjalët do të ishin të tepërta.

nga Vizitor Wed May 06, 2009 9:05 pm

Ku fshihen burrat

Kërkimi i atij mashkullit ideal po ju zgjat më shumë nga sa e kishit parashikuar? Ne jemi përpjekur të kuptojmë se ku fshihen burrat. Ja ç’kemi zbuluar dhe ua këshillojmë atyre që janë ende vetëm.
Nëse mendoni të gjeni një burrë që është i lirë pasi të keni kaluar të tridhjetat, është si të shkoni në treg në orët e pasdites e të gjeni ende fruta të freskëta; kjo nuk është udhë që bën për ju. E vërtetë është që meshkujt janë me pakicë: nuk janë kurrë gati të bëjnë jetë në çift apo kanë bërë më parë... dhe ata që mbeten, nuk shihen më vërdallë.

Ne jemi përpjekur të bëjmë një lloj harte të vendeve ku mund t’i gjejmë apo të zbulojmë se ç’duhet bërë apo shmangur për të njohur njerëz interesantë. Problemi nuk është të gjejmë një njeri për të bërë seks. Problemi është të gjejmë një njeri me të cilin është bukur të darkosh. Një njeri me të cilin, kur njihesh, dëshiron të dalësh për darkë dhe pasi të dalësh, do që ta takosh përsëri. Ja sugjerimet.

Hapi i parë: stop pretendimeve
I bukur, i pasur, sportiv, me shëndet të mirë. Nuk ka të tillë vërdallë. Duhet të dorëzohemi. Në fakt, po të mendoni historitë e shkuara, kur na i paskan plotësuar këto kritere?!... Mund të kujtosh që dikush që e ke dashur shumë, e kishte lënë shkollën përgjysmë apo ai që doje të fejoheshe dhe të theu zemrën, nuk ishte i bukuri i dheut.

Harta Girls Generated
Nëse qëllimi është të gjeni një burrë, duhet që mbi të gjitha të jeni të vendosura të qëndroni larg femrave për ca kohë. Palestra dhe kurset e kërcimit, teatri, një panair i librit... Mjafton të vrisni pak mendjen dhe të bëni një hartë me dhjetë vendet më të mira në qytet (duke përjashtuar këtu lokalet dhe klube të ndryshëm) ku mund të njihni njerëz interesantë.

Internet me doza të vogla
Mos humbisni kohë me agjencitë martesore online: mund të gjeni vetëm njerëz me vese apo me flokët e lyera me reflekse të kuqe. Pastaj nëse në fushën përballë do të fusnit kërkesën për t’u njohur vetëm me të diplomuar, që nuk pinë duhan dhe që banojnë dhjetë hapa larg jush, sistemi do t’ju informonte se nuk ekzistojnë njerëz që i kanë këto kritere. Gjithsesi, interneti funksionon vetëm nëse jeni më pak se tridhjetë vjeç, nëse doni vetëm të argëtoheni dhe keni mjaft kohë për të harxhuar. Por një nga avantazhet është se nuk jeni të detyruara të takoni askënd, derisa të jeni gati.

Aktivitetet për beqarë
Deri tani për këto gjëra kishim dëgjuar vetëm të flitej... Por tashmë edhe tek ne kanë nisur të promovohen të tilla aktivitete, si vrapi i organizuar për njohje të reja. Përvoja tregon se përgjithësisht në këto aktivitete ka femra të mrekullueshme dhe meshkuj zhgënjyes. Mosha mesatare mund të jetë e lartë ose moshë e deklaruar – siç ndodh online – paksa e ndryshme nga ajo reale. Problemi tjetër i këtyre aktiviteteve është se mund të bëjnë të ndihesh si “në kurthin e dëshpërimit”. Por gjithsesi mund të kalosh njëherë andej... “in incognito”, me justifikimin se po shoqëroni një mikeshë.

Kurset ideale
Tani besoj se e keni kuptuar që meshkujt nuk bëjnë joga. Do të ishte ideale ta bënin: mund të fillonit një bisedë të këndshme teksa qëndroni ulur mbi tapet, se sa i rëndësishëm është meditimi dhe sesa tip me këmbë në tokë jeni (pra më se e përshtatshme për martesë)... Nejse, kjo është fjali kushtore... Ajo që dimë me siguri, është se nëse nuk preferojnë jogën, ka mjaft djem që ndjekin të tjera kurse. Gjuhët e huaja apo kompjuteri dhe fotografitë janë argumente të mira për të krijuar miqësi të reja. Dhe frekuentimi i shpeshtë i tyre është rast ideal për të gjetur këto mundësi. Në fund të fundit, dhe nëse nuk do arrinit qëllimin që i keni vënë vetes, do dilnit me një tjetër diplomë në xhep, që do t’ju shërbejë jo pak në të ardhmen.

Zhytuni në... sport!
Nëse dëshironi një lidhje të lumtur me një burrë, duhet të dini se sportet ndahen në dy grupe: ato që edhe ju mund t’i bëni dhe ato që nuk mund t’i bëni. Futbolli është sigurisht shembulli më i keq i grupit të dytë. Një sport që s’të ngjall aspak shpirtin konkurrues dhe që është më se i përshtatshëm për këtë “hallin” tonë, është zhytja në ujë në ndonjë pishinë: një ambient mjaft mashkullor, por që u pëlqen edhe femrave. Pastaj, kur vjen puna te sportet, mund të përftoni edhe nga vendet ku ato bëhen pa u përfshirë edhe vetë.

nga Vizitor Wed May 06, 2009 9:08 pm

Alkoolizëm apo depresion bipolar

Aurela Hazizi
Psikologe klinike
Rasti
Ndihej më tepër se e lumtur, kishte një vetëvlerësim të lartë për veten! Ishte një grua mjaft e zgjuar, krijuese e talentuar dhe me tërheqëse se gjithkush që kisha takuar. Krijova idenë që ajo zotëronte çdo lloj situate dhe që mundet të arrinte çdo qëllim! Ajo që e solli për trajtim ishte pagjumësia! Nuk kishte nevojë për shume çlodhje! Flinte më pak se katër pesë orë çdo natë, ose nuk e zinte gjumi fare. Zakonisht në ambiente sociale pinte edhe një gotë më tepër alkool se miqtë e saj dhe pothuajse çdo natë pak konjak. Mbas pak kohësh diagnostikohet me Depresion Bipolar II. E pabesueshme!
Ky rast më bëri të studioj më shumë për lidhjet e alkoolit dhe bashkëudhëtimin me sëmundjet e tjera të shëndetit mendor si depresionet bipolare, depresionet unipolare, ankthin dhe çrregullimet e personalitetit antisocial. Sigurisht që alkoolizmi nuk është subjekt shumë i këndshëm për t'u diskutuar për shkak të të qenit sëmundje kronike që e bën trupin të jetë i varur nga përdorimi i tij dhe të pamundur të kontrollojë përdorimin.
Dihet që alkooli shkakton probleme serioze të shëndetit, dëmton marrëdhëniet me njerëzit që të rrethojnë, punën dhe situatën financiare të çdo përdoruesi. Ajo që unë dua të theksoj është që në shumicën e rasteve përdorimi i alkoolit mbulon simptomat e plota të një sëmundje të shëndetit mendor siç është depresioni bipolar, i cili në shumicën e rasteve kur pacientët janë përdorues alkooli mbetet i padiagnostikuar dhe i pa trajtuar.

Depresioni bipolar karakterizohet nga një gjendje euforie e larte në një gjendje tjetër të ulët, nga mania ne depresion, nga një aktivitet i drejtuar për të arritur një qëllim tek idetë për vetëvrasje apo përpjekjet, nga lëkundje të jashtëzakonshme të humorit i cili bëhet serioz dhe krijon paaftësi. Këto dy ekstreme mania dhe depresioni mundet të vazhdojë për javë ose muaj duke shkaktuar çrregullime të mëdha të jetës së pacientëve të cilët janë të prekur nga kjo sëmundje, familjes së tyre apo miqve.
Njerëzit të cilët vuajnë nga depresioni bipolar pa u diagnostikuar mundohen të "vetëmjekohen" me alkool dhe gradualisht rrisin përdorimin e tij për te pasur më tepër gjendje hipomaniake dhe maniakale se sa depresion. Përdorimi i alkoolit ka bërë që shpesh depresioni bipolar jo vetëm të mos diagnostikohet në kohën e duhur dhe të mos trajtohet por në të njëjtën kohë ka rritur rastet e vetëvrasjeve tek njerëzit të cilët vuajnë nga depresioni bipolar.

Pse alkooli mbulon diagnostikimin e depresionit bipolar?
Pothuajse e njëjta simptomatologji paraqitet edhe tek pacientët që herë pas here tentojnë të "braktisin" alkoolin, euforia, mungesa e nevojës për të fjetur, lëkundja e vazhdueshme e humorit, hipomania, depresioni, vetmia, dëshpërimi, nervoziteti karakterizojnë alkoolistin. Në këto raste është shumë e rëndësishme që pacienti i cili do të ndalojë përdorimin e alkoolit të ndiqet nga specialisti më. tepër se tre, katër javë për të parë nëse do të ketë përmirësim të simptomave të mësipërme në mënyrë që të arrihet diagnoza diferenciale ndërmjet alkoolizmit dhe depresionit bipolar.
Ka disa studime të cilat tregojnë që në raste të tjera depresioni bipolar mundet të jetë i shoqëruar nga alkooli jo me si "medikament" për trajtimin e shenjave, por si sëmundje bashkëshoqëruese. Në shumë raste është gjetur që pacientët të cilët janë përdorues të alkoolit në pemën e tyre familjare kanë sëmundje si ajo e depresionit bipolar I ose II, depresion ose ankth.

Sëmundje shoqëruese apo "medikament" i vetëpërdorur nga njerëzit alkooli rëndon më tepër depresionin bipolar I, hedh një vel të hollë simptomave dhe e le atë të patrajtuar duke rënduar gjendjen e çdo njeriu i cili është i padiagnostikuar për "çrregullime të humorit". Do të ishte e rëndësishme për diagnostikimin e depresionit bipolar apo dhe depresionit madhor, të hidhej pak dritë mbi ndonjë gotë alkooli në ambientet sociale apo ndonjë gotë sa për t'i thënë "Lamtumirë trishtimit".

nga Vizitor Wed May 06, 2009 9:11 pm

Si të tejkaloni stresin post-traumatik

Presioni, neveritja dhe zemërimi janë aspekte të zakonshme të reagimeve post-traumatike. Mund të ketë edhe simptome fizike duke përfshirë frymëmarrje të dobët, rrahje e zemrës me shpejtësi, frymëmarrje të tepërt, marramendje dhe tension në muskuj. Provoni mënyrat në vijim për t’i zvogëluar simptomat fizike.
Në mënyrë që t’i zvogëloni simptomet fizike është e dobishme nëse ia filloni menjëherë si të vini re shenjave të para të tensionit. Kur i vëni re shenjat të para të tensionit ju mund t’i ndaloni të bëhen shumë të shpeshta duke përdor mënyra të relaksimit. Disa njerëz relaksohen nga ushtrimet fizike, duke dëgjuar muzikë, shikuar televizor apo duke lexuar libër. Për të tjerët është më e dobishme për t’i vijuar disa ushtrime. Klasat për joga (lloj të ushtrimeve spirituale që vjen nga hinduizmi që përfshin frymëmarrje të kontrolluar dhe meditim) apo relaksim mund të jenë të dobishme, apo mund të dëgjoni kaseta relaksuese.

Relaksimi është një aftësi si çdo gjë tjetër kështu që duhet të mësohet dhe kjo shkon gjatë. Ushtrimet në vijim ju mësojnë t’i relaksoni muskujt dhe shumë njerëz i gjejnë të dobishme për të zvogëluar nivelin e tensionit dhe ankthit. Relaksimi i muskujve në thellësi – është më e dobishme nëse i lexoni udhëzimet para se të ia filloni në mënyrë për t’i mësuar.
Më së pari e gjeni një vend të qetë, të ngrohtë dhe të rehatshëm ku nuk do të keni pengime. E bëni këtë në kohën kur ndjeheni më të qetë. Shtrihuni, rehatohuni dhe i mbyllni sytë. Koncentrohuni në frymëmarrjen tuaj për disa minuta. Merrni frymë ngadalë dhe në qetësi duke marrë frymën brenda dhe numëroni deri në tre dhe pastaj e qitni frymën jashtë prapë duke numëruar deri në tre. I përsëritni vetvetes fjalën ‘qetësi’ apo ‘relaksohu’ duke e qitur frymëmarrjen jashtë. Ushtrimet e relaksimit kalojnë nëpër grupe të ndryshme të muskujve duke qenë në tension dhe pastaj relaksoheni. Ju duhet të merrni frymën brenda kur jeni në tension dhe relaksoheni kur e qitni frymën jashtë. Filloni me duart tuaja e shtrëngoni njërën shumë dhe mendoni për tensionin që e bëhet në dorë. Mendoni për tensionin në dorën tuaj për disa sekonda dhe pastaj e relaksoni dorën. Vëni mendjen te ndryshimi i tensionit dhe relaksimit. Ju mund të ndjeni në dorë si shpim të lehtë kjo do të thotë që relaksimi ia ka filluar të zhvillohet. E përsëritni të njëjtin ushtrim në dorën tjetër.
Çdoherë kur relaksoheni muskujt e një grupi mendojnë se si ndjehen kur relaksohen. Mos u mundoni të relaksoheni vetëm ta largoni tensionin. I lejoni muskujt të relaksohen sa më shumë që mundeni. Mendoni për ndryshim që e ndjeni kur muskujt janë të relaksuar dhe kur janë në tension. Tani e përsëritni këtë me muskujt e tjerë në trup. Çdoherë i shtrëngoni për disa sekonda pastaj i relaksoni. Mendoni se si i ndjeni muskujt dhe pastaj i relaksoni. Është e dobishme nëse punoni me grupin e muskujve në vijim:

• Gishtat – i shtrëngoni dhe pastaj i relaksoni.
• Duart – lakoni bërrylat dhe shtrëngoni duart. E ndjeni tensionin në duar posaçërisht mbi bërryla. Mos harroni, e bëni këtë vetëm për disa sekonda dhe pastaj relaksohuni.
• Qafa – e mbani qafën drejt dhe shkoni prej një ane në anën tjetër ngadalë. E ndjeni si tensioni bartet. Pastaj e sillni kokën përpara në pozitë të rehatshme.
• Fytyra – Janë disa muskuj në fytyrë por ju mendoni për ballin dhe nofullën. Fillimisht i ulni vetullat teposhtë. E relaksoni ballin. Ju poashtu mund t’i ngritni vetullat dhe relaksohuni. Tani e shtrëngoni nofullën pastaj relaksohuni.
• Gjoksi – Merrni frymë thellë, mbajeni për disa sekonda dhe relaksohuni. Pastaj merrni frymë normal.
• Barku – shtrëngoni muskujt e barkut sa më shumë që keni mundësi dhe relaksohuni.
• Prapanica – e shtrëngoni prapanicën dhe relaksohuni.
• Këmbët – i shtrini këmbët dhe i lakoni këmbët nga fytyra juaj. I përfundoni ushtrimet duke i lëvizur gishtat e këmbëve.
Për t’i bërë këto ushtrime ndoshta do të ju ndihmojë nëse dikush mund të ju lexoj udhëzimet përderisa ju ushtroni. Mos u mundoni shumë, bëni aq sa mundeni. Për të pasur efekt të dukshëm për tu relaksuar ju duheni të:

• Ushtroni çdo ditë
• Ia filloni të përdorni relaksimin në situata të përditshme.
• Mësohuni të relaksoheni duke mos pasur nevojë t’i shtrëngoni muskujt.
• I përdorni relaksimin në situata të vështira p.sh. me frymëmarrje të ngadalshme.
• Zhvilloni stil të jetës më relaksues.
Mos harroni relaksimi është një aftësi ashtu si aftësitë e tjera shkon kohë derisa të mësohet. Para se t’i bëni ushtrimet relaksuese shkruani sa jeni në ankth para dhe pas ushtrimeve, e vlerësoni ankthin me numrat prej një deri në dhjetë.

Frymëmarrja e kontrolluar

Frymëmarrja e shpejtuar është shumë e zakonshme kur dikush është në ankth, i zemëruar dhe . Kjo do të thotë që ndryshimet ndodhin në frymëmarrjen e tyre. Ata fillojnë të gëlltisin ajër, dhe mendojnë që do të ju ndalet fryma apo mund të fillojnë të marrin frymë shumë shpejt. Kjo i bënë ata të ju merret mendja dhe i bie më shumë në ankth. Mundohuni ta njihni nëse e bëni këtë dhe mundohuni të merrni frymë ngadalë. Mësohuni të merrni frymë ritmikisht merrni frymë brenda deri në tre dhe qitni jashtë deri në tre kjo do ta rregullon frymëmarrjen në normale. Disa njerëz e kanë gjetur të dobishme me përdor orën për ta numëruar frymëmarrjen. Të tjerët e kanë gjetur të dobishme për të marrë frymë në një qese të letrës apo në duar të grumbulluara. Me këtë duhet të i mbuloni hundën dhe gojën. Ju duhet tre minuta frymëmarrje të ngadalësuar apo për të marrë frymë në qese të letrës për frymëmarrjen tuaj të kthehet në normale.

Heqja nga mendja
Nëse e hiqni mendjen nga simptomat ju gjeni që simptomat shpesh zhduken. Mundohuni të shikoni përreth juve, i shikoni gjërat në hollësirat më të vogla si regjistrimet e veturave, këpucët që njerëzit e tjerë i mbathin, bisedat. Prapë ju duhet të hiqni mendjen për tre minuta që simptomat të ia fillojnë të zvogëlohen. Përderisa relaksimi, ushtrimet për frymëmarrje dhe mënyrat për ta hequr mendjen që ndihmojnë për ta reduktuar ankthin është shumë me rëndësi të kuptoni që ankthi nuk është i dëmshëm dhe i rrezikshëm. Edhe nëse nuk i përdorni këto mënyra asgjë e tmerrshme nuk do të ndodhë. Ankthi nuk është e dëmshme por është e parehatshme. Këto mënyra mund të ju ndihmojnë ta reduktoni këtë parehati.

Zemërimi
Është e vlefshme të bisedoni ndjenjat e zemërimit me njerëzit përreth tyre. Ju nuk ju drejtoheni atyre me zemërimin tuaj mirëpo,ju mund ta drejtoni zemërimin në ata. Ju tregoni atyre që zemërimi nuk është për shkak tyre por nga ajo që e keni përjetuar. Kërkoni durim nga ata përderisa zemërimi dhe neveritja ju kalon dhe tregoni atyre që mos ta marrin zemërimin tuaj personalisht.

nga Vizitor Wed May 06, 2009 9:12 pm

Këshilla për një marrëdhënie të mirë

Në një marrëdhënie seksuale duhet të përpiqen të dy partnerët. Kjo është këshilla më e mirë sipas studiueses Ellen Gim. Ajo thotë se është e kotë që partnerët t’ia hedhin fajin njëri-tjetrit sepse kjo shton edhe më shumë problemet. Ajo që duhet bërë është të gjendet një zgjidhje. “Nuk duhet besuar asnjëherë se është gjetur princi apo princesha e kaltër, asnjë individ nuk është perfekt, ndaj partnerët duhet të mësohen të jetojnë me defektet e njëri-tjetrit”, shprehet Gim. Në librin e saj "Couples" ajo jep disa këshilla të cilat mund të përmirësonin një marrëdhënie.

1. Bisedoni
Është thënë dhe rithënë shumë herë, baza e seksit është komunikimi. Në ndihmë të kësaj ideje vjen një histori e shkurtër nga studiuesi Donald Strassberg. Ai tregonte historinë e një çifti të vjetër. Bashkëshorti kishte dëshiruar gjithmonë seksin oral, por edhe pas shumë vjet martese e kishte të vështirë të bisedonte rreth kësaj me bashkëshorten, por në fakt ajo mendonte se ishte një ide shumë e mirë.
Bisedat seksuale nuk mund të rezultojnë gjithmonë ashtu siç dëshirohet. Partnerët mund të kenë dëshirën për të kryer marrëdhënie pranë dritares, duke veshur veshjet intime të njëri-tjetrit para aktit apo edhe të përdorin revistat dhe videot-porno si një “këshillues”.
Ndoshta çiftet mes tyre kanë dëshirën për t’i thënë njëri-tjetri gjërat që do të donin të bënin, si, kur apo ku, por frika e një përgjigjeje negative bën që t’i mbajë të mbyllura këto kërkesa.
Duket e çuditshme që mund të jetë kaq e vështirë, por në fakt për shumë njerëz është vërtet kështu. Për disa arsye një mashkull/femër pret që të “rritet” menjëherë seksualisht, duke besuar se di gjithçka dhe se është i aftë të bëjë gjithçka.
Por askush nuk mund t’ua mësojë teknikat e seksit më mirë se personi që keni në krah. Kërkon kohë dhe mbështetje, por në thelb të gjithçkaje qëndron komunikimi.

2. Qëndroni në formë
Kjo është gjëja më e mirë që duhet të bëjë një mashkull/femër për t’u pëlqyer gjithmonë nga partneri. Përpara se mijëra njerëz qejflinj të shkruanin për “pranimin e shëndoshjes”, studimet më të fundit kanë treguar se njerëzit mbi peshë kanë dëshirë të ulët për seks dhe libido të dobët.
Partnerët treguan se nëse njeriu prej tyre ishte shumë i dhënë pas të ngrënit dhe tjetri jo, marrëdhënia e tyre fillonte të vuante. Kjo ka një shpjegim. Kur meshkuj janë mbi peshë niveli i hormonit të testosteronit tek ata bie.
Duke pasur kilogramë të tepërta edhe mundësia për të vuajtur nga sëmundje të tilla si diabeti, pagjumësia, sëmundjet kardiovaskulare është më madhe, të gjitha këto ndikojnë në kënaqësinë që merrni gjatë kontaktit seksual.
Lajmi i mirë është se orari i gjatë i punës mund të shtojë numrin e hormoneve seksuale tek meshkujt dhe femrat duke lënë mënjanë gjërat negative.
Pra nëse një mashkull ka nevojë për një “ndihmës” për të qenë një partner seksuale i zoti nuk ka nevojë të përdorë viagrën, mjafton të humbasë disa kilogramë dhe të punojë.

3. Hidhni poshtë bindjet seksuale
Njerëz të ndryshëm e mendojnë seksin në mënyrë të ndryshme dhe kur ai nuk rezulton i tillë, mërziten. Seksi supozohet të jetë i kënaqshëm, dehës, intim, por në të njëjtën kohë mund të jetë i egër, qetësues dhe zbulues. Ndaj nuk duhet të shqetësoheni asnjëherë nga mënyra se si kryet njëherë marrëdhënie dhe cilat ishin emocionet që morët, sepse gjatë aktivitetit seksual do ta përjetoni seksin në të gjitha format.

nga Vizitor Wed May 06, 2009 9:15 pm

Buzë!

Zbulo mënyrën më të mirë për të ruajtur buzëqeshjen edhe në momentet më të vështira të jetës tënde.
Ndihesh e dominuar

Po kalon një moment në të cilin ti ndihesh vërtet e poshtëruar.
- Po e lëshon veten pak nga pak.
Këshillë: Rindiz zjarrin që ndodhet brenda teje.
- Humbet besimin në veten tënde.
Këshillë: Mëso të nxjerrësh në pah aftësitë e tua të fshehura.
- Je gjithmonë e nxehur edhe pse pa shkak.
Këshillë: Përdor disa arsyetime që ndryshojnë argumentin.

Je e nxehur
Po jeton një situatë e cila të bën të nxehesh dhe të jesh shumë e palumtur.
-Të shpërfillin dhe të lënë në një vend të harruar.
Këshillë: Mos hezito të shprehesh, është më mirë që të evitosh mosvëmendjen.
- Nismëtare në çdo diskutim të nxehtë.
Këshillë: Mos u sorollat përqark problemit, hyr direkt në temën që të intereson.
-Mimika jote shpreh qartë që ti nuk je e qetë.
Këshillë: Prano faktin që je e mërzitur dhe gjej një mënyrë për të zgjidhur problemin më një buzëqeshje në fytyrë.

Ndihesh e nënvlerësuar
Ke përshtypjen që nuk të shohin me sy të mirë, të evitojnë.
-Veçohesh dhe rri e vetmuar.
Këshillë: Bëhu me e shoqërueshme dhe më kurioze ndaj të tjerëve dhe rindërto një dialog me ta.
- Shpesh je e trishtuar dhe pak e stresuar.
Këshillë: Dil më shpesh me miket e tua, kujdesu më shumë për aspektin tënd fizik dhe veshjen tënde. Bëje në mënyrë që të ndihesh sa më mirë.
- Je xheloze për të tjerët.
Këshillë: Rigjej mënyrat e kënaqësisë, vëri në jetë dhe buzë më shumë.

Ndihesh e dekurajuar
Situata që po kalon të bën të humbësh kurajon. Reagimet e tua:
-Reagon në mënyrë automatike, pa krijimtari.
Këshillë: Rigjej një dozë, sado të vogël fantazie edhe në gjërat më të vogla, mbi të gjitha për veten tënde.
-Je gjithmonë me vonesë dhe pa energji në gjërat që bën.
Këshillë: Mendo seriozisht për të ndryshuar sjelljen tënde ose të paktën një pjesë të saj.
-Humori yt është i vakët dhe pa entuziazëm.
Këshillë: Kërko interesa të reja dhe zbulo kënaqësitë e jetës.

Ndihesh e pakuptuar
Ke ndjesinë që je e lënë pas dore dhe pak e vlerësuar.
-Je nervoze dhe fuqitë e tua kanë shteruar.
Këshillë: Gjej ato mënyra që të japin më shumë fuqi, disa herë vetëm fjalët nuk mjaftojnë.
-Mbyllesh në vetvete.
Këshillë: Kërko një aleat që të të mbështetë dhe transmeto mesazhet nëpërmjet tij.
-Të vjen keq për ç'ka ndodhi, por...
Këshillë: Shprehe haptazi keqardhjen tënde dhe kërko ndihmën e të tjerëve për zgjidhjen e situatës.

Ndihesh joluftëtare

Nuk arrin të mbash gjërat që ti dëshiron dhe kjo të irriton.
-Bën kokëfortën, është më e fortë se ty.
Këshillë: Mendo që do të vijë dhe dita jote, ajo që ti dëshiron, shumë shpejt do të jetë e jotja.
-Hakmarrja të shtyn të kryesh idiotësira dhe të bësh gabime.
Këshillë: Mëso të falësh dhe të zhvillosh kualitetet e tua, gjithçka do të zhvillohet në favorin tënd.
-Mendon gjithmonë të përplasësh dyert ose të bësh gjëra të këtij lloji.
Këshillë: Analizoje mirë situatën para se të marrësh një vendim të gabuar.

Ndihesh e shfrytëzuar
Po kalon një situatë që të bën të ndihesh e shfrytëzuar dhe nuk po merr asnjë përfitim.
-Heq dorë nga gjithçka pa marrë parasysh se ç'mund të humbasësh.
Këshillë: Mëso të thuash " jo". Mos ke frikë të shfaqësh këndvështrimin tënd.
-Bëhesh agresive dhe për këtë të vjen keq...
Këshillë: Fol hapur për problemin që të shqetëson, në të kundërt bashkëbiseduesi yt nuk do të jetë në gjendje të të kuptojë.
-Rebelohesh, por përsëri nuk tërheq vëmendjen.
Këshillë: Analizoje mirë situatën dhe përballoje problemin me një mënyrë këndvështrimi më logjike.

Tani mund të dhurosh një buzëqeshje për çdo rast të mundshëm.

nga Vizitor Wed May 06, 2009 9:34 pm

Pse vajzat dashurojnë djem çapkënë

Shumë vajza kanë dëshirë të ecin në anën e egër, edhe pse rrezikojnë të thyejnë zemrën e tyre duke u takuar me një djalë të keq. Është e rrezikshme, emocionuese dhe interesante. Ndërsa disa vajza vendosin të lidhen me këta rebelë thjeshtë për ndryshim, shumë prej tyre tërhiqen nga aparenca e ashpër, për to është si një sfidë. Pra, çfarë mund të bëjë një djalë i mirë për të patur dhe krijuar pak kënaqësi në një lidhje?

Këtu janë pesë mënyra për të përfshirë një djalë ’të keq’ në një lidhje:

1. Vajzave u pëlqen të ndjekin

Nëse, që në fillim telefononi gjithë kohës dhe na mbushni duart me lule, ne do të mendojmë që është tepër dhe shumim shpejt. Djemtë pak si rrugaç e dinë që një distancë e mjaftueshme dhe jo e rrezikshme e bën çmimin më të vlefshëm.
Ne nuk mund të heqim dorë nga një djalë i keq që na bën ta duam më shumë. Çelësi për djemtë nuk është të jenë të pasjellshëm ose të duken sikur nuk e çajnë kokën. Ju doni një grua të lumtur, jo një çështje të rëndësishme me kompleksin e braktisjes, apo jo?

2. Vajzat duan një djalë të zot me besim tek vetja

Kur vjen puna për të zgjedhur, shumë vajza do të preferonin Russell Crowe në vend të Tom Hanks. Nuk janë muskujt apo pamja e egër ato që tërheqin, por besimi suprem tek vetja.
Një djalë i keq nuk dyshon kurrë tek aftësitë e tij seksuale dhe kjo e bën atë më tepër seksi. Ky lloj besimi i fortë, bëhet edhe më i fortë kur ne fillojmë ta njohim dhe të zbulojmë anën e tij të butë, por jo në takimin e parë!

3. Vajzat duan një burrë që luan sipas rregullave të tij

Ne pëlqejmë meshkuj që e shohin botën dhe përpiqen ta ndryshojnë atë, ndonjëherë duke e drejtuar një kompani dhe jo duke punuar për të; duke u përballur me problemin, në vend që të ankohen prej tij; duke krijuar diçka dhe jo duke kritikuar.
Burrat që kanë bindje të forta nuk përshtaten me rregullat dhe gjendjet stereotipie. Një djalë i keq i suksesshëm, është kurajoz, merr përsipër rreziqe dhe nuk ka frikë nga dështimi.

4. Vajzat pëlqejnë surprizat

Nuk mund ta dish kurrë se çfarë fsheh nën mëngë një djalë çapkën. Një shëtitje me motor në mesnatë? Një marrëdhënie seksuale në një vend pak të veçantë?
Të krijohet ideja se djemtë çapkënë jetojnë për momentin. Ata nuk mund të kenë sigurime shoqërore apo fonde për pension, por kanë një sens aventure. Pra përmbajuni rregullave tuaja dhe kurseni për pleqërinë, por shtoni pak spontanitet dhe entuziazëm në takimet dashurore.

5. Vajzat duan të joshen
Errësira, një lokal nate, një pije e vërtetë (martini apo xhin) dhe një kërcim i ngadaltë seksi, një aventurë kur nuk ta pret mendja. Këto janë brumi i djemve çapkënë.
Ai mbështetet, na prek dhe bën kon takte të gjata të ngadalta me sy. Një djalë i tillë e bën të dashurën e tij të ndihet si perëndeshë, si e vetmja vajzë e pranishme.
Ai mund ta japë këtë lloj vëmendjeje vetëm një ose dy herë përpara se të hedhë hapin tjetër të joshjes. Por nuk ka gjë më të mirë sesa një djalë "rrugaç" që përpiqet të bëjë përshtypje të mirë ..... madje dhe kur pretendon, se mund të jetë vetëm i keq

nga Vizitor Wed May 06, 2009 9:36 pm

Ju u ndatë? Po fëmijët…

Pyesim çiftet që përjetojnë momente “krize”: A e menduat çdo gjë më së miri para se të vendosnit për t’u ndarë? A e menduat se si do të ndikohen fëmijët tuaj nga një situatë e tillë?
Kushtet në të cilat po jetojmë, kanë shkaktuar kriza nga më të ndryshmet në rrethet familjare, gjë kjo që ndikon në mënyrë të drejtpërdrejtë jo vetëm në marrëdhëniet midis çiftit, por edhe tek fëmijët.
Pyesim çiftet që përjetojnë momente “krize”: A e menduat çdo gjë më së miri para se të vendosnit për t’u divorcuar? A e menduat se si do të ndikohen fëmijët tuaj nga një situatë e tillë?
Divorci mund të përkufizohet si dhënie fund një kontrate midis dy personave që më parë kishin vendosur të bashkonin jetën e tyre. Fatkeqësisht ky fenomen në ditët tona vihet re të ketë një rritje mjaft të shpejtë.

Divorci mund të shkaktohet nga shumë faktorë. Zakonisht, mosmarrëveshjet në çift dhe zhgënjimi nga njëri tjetri janë ato që çojnë në dhunën në familje, në lindjen e problemeve ekonomike, në tradhti bashkëshortore etj.
Sidoqoftë, divorci po aq sa ndikon çiftin, ndikon edhe të afërmit e tyre si fëmijët, prindërit etj. Prindërit, mund të ndahen nga njëri tjetri, por kurrë nga fëmijët e tyre. Nuk mund të mos mendohet që ata, si pjesë mjaft e rëndësishme e institucionit të familjes të mos ndikohen nga një shpërndarje e saj.
Ky ndikim, zakonisht nuk shfaqet në problemet që këta fëmijë paraqesin pas shumë vitesh, si një tubim ndjenjash të frenuara. Tek këta fëmijë, shfaqen probleme të theksuara psikologjike, të dukura këto më shumë në momentin që bëhen vetë prindër.

Njerëzit para se të martohen mendojnë gjerë e gjatë. Pyesin miq e shokë dhe pasi duket se janë siguruar edhe me ndjenjat e tyre, vendosin të martohen. Por, të hedhësh themelet e një familjeje të re, nuk është edhe shumë e lehtë.
Po ashtu, edhe divorci para se të vendoset për tu kryer, kërkon që të mendohesh gjerë e gjatë. E njëjta përgjegjësi që mendohet para martesës, e njëjta duhet të kihet parasysh edhe para divorcit.
Çifti midis tyre duhet të ketë parasysh që të shmang nga fjalori fjalën “divorc” për gjëra të vogla. Ajo që nuk duhet harruar kurrë, është që “divorci” të mendohet si zgjidhja e fundit përkundrejt situatave që has.
Duhet të mendohet mirë nëse divorci do tu japë fund problemeve, apo të çelë rrugë për probleme të tjera. A jeni të sigurt se do të mund të përballoni problemet që do të lindin pasi të jeni ndarë?

Një tjetër pikë mjaft e rëndësishme është edhe mënyra se si i thuhet fëmijëve vendimi për divorc, nëse tashmë është arritur në atë pikë. Kjo duket të jetë edhe pika më e vështirë për prindërit, pasi këta janë edhe ata mbi të cilat rëndojnë më shumë pasojat e këtij fenomeni.
Para se t’u thuhet një vendim i tillë, fëmijët duhet të jenë të përgatitur, pse jo të merret edhe ndihma e ndonjë psikologu. Sipas moshës së fëmijës duhet të përdoren edhe fjalët dhe shprehjet me të cilat do t’i transmetosh situatën, shkaqet e divorcit, atë që nuk ka mbetur më rrugë tjetër për të vazhduar së bashku nëna dhe babai, në një situatë të tillë duhet të kenë kujdes që në asnjë mënyrë të mos ulin dhe fyejnë njëri tjetrin në syrin e fëmijës.

Në një rast të tillë, nga një fëmijë që nuk është mësuar dhe nuk di gjë mbi divorcin, mund të vijnë reagime nga më të ndryshmet. Këto sjellje, janë më të dukshme tek ata fëmijë mosha e të cilëve është ende e vogël dhe janë të lidhur shumë pas nënës apo babait. Fëmija mund të ushqejë ndenja nga më të ndryshmet duke fajësuar njërin nga prindërit.
Si pasojë e situatës në të cilën gjenden, tek ai/ajo mund të vihen re edhe nënvleftësim i shkollës, rënie nga mësimet, nervozizëm etj. Për ata që janë të një moshe akoma më të vogël, shfaqen probleme edhe në kryerjen e nevojave urinare të cilët në të shumtën e rasteve i bëjnë ato në gjendje të veshur.

Ja disa mënyra që lehtësojnë sadopak ndikimin negativ tek fëmijët kur prindërit kanë vendosur të ndahen:

* Prindërit e ndarë nuk duhet të harrojnë se mund të jenë ndarë nga njëri tjetri, por jo nga fëmijët.
* Fëmija gjithmonë ka nevojë për mbështetjen dhe dashurinë e prindit. Çifti i ndarë, edhe pse të tillë, nuk duhet të harrojë që t’i qëndrojë pranë fëmijës sa herë ka nevojë. Nuk duhet të shtyjë në asnjë mënyrë kohën e vendosur për të kaluar së bashku me fëmijën.
* Prindërit e ndarë nuk duhet t’u flasin keq fëmijëve për njëri tjetrin.
* Fëmija duhet të lajmërohet për çdo ndryshim që mund të ndodh pas divorcit. Duhet të mënjanohen ndikime negative të menjëhershme mbi fëmijën si p.sh., ndryshim qyteti, shkolle, shoqërie etj.
* Duhet të përballohen të gjitha nevojat e fëmijës për edukim, mirëqenie etj.
* Duhet të lejohet takimi i fëmijës me prindin tjetër me të cilin jetojnë të ndarë.
* Nuk duhet në asnjë mënyrë që veprime të nxituara të fëmijës t’i përngjasohen prindit tjetër (je si yt atë, apo jot ëmë)
* Gjatë procesit të divorcit, prindërit duhet të jenë të sinqertë me fëmijën. Nuk duhet të gënjehen asnjëherë.

nga Vizitor Wed May 06, 2009 9:38 pm

Sa mirë e njihni njëri-tjetrin

Sa mirë e njihni veten? Sa i mirë është komunikimi me seksin tjetër? Mbi marrëdhëniet burrë-grua janë bërë shumë studime. Ndonjëherë shkencëtarët dalin në përfundime befasuese. Zbuloni se çfarë urrejnë më shumë bashkëshortët tek njëri-tjetri!

Vlen njësoj si për burrat dhe gratë: Partneri vjen nga një planet tjetër
Çfarë shkakton më shpesh zemërim në çift? Nuk e kuptojnë më njëri-tjetrin, apo janë problemet financiare? Edhe kur një lidhje martesore ka mbijetuar, jo rrallë takojmë famëkeqen “prishje e lidhjes për arsye të monotonisë”.
E vërteta është se pas këtyre qëndrojnë kryesisht arsye pa rëndësi, të cilat ia marrin frymën dalëngadalë dashurisë.

Çfarë nervozon gratë:
Nuk më thotë asnjëherë se sa e rëndësishme jam për të
Më duhet gjithmonë të sistemoj shtëpinë pasi ai di vetëm të bëjë lëmsh
Nuk më kujtohet hera e fundit që më ka sjellë lule

Çfarë nervozon burrat:
Gjithmonë do të dijë çdo gjë për mua
Kur bën shopping më duhet ta pres me orë të tëra
Shpik gjithmonë ndonjë punë që duhet ta bëj unë

Është një konflikt, për të cilin Psikologjia njeh tre shkaktarë kryesor: “Burrat dhe gratë flasin dhe jetojnë shpesh pranë dhe njëkohësisht kalimthi me njëri-tjetrin”.

1. Komunikimi
Ndërsa bisedat e grave në shumicën e rasteve nevojiten për të shprehur ndjenjat e tyre, për burrat bisedat janë për të shkëmbyer informacion. Klasike është situata: Ajo shkon në sallon bukurie dhe kthehet me një “look” të ri në shtëpi.
Ai konstaton pa asnjë lloj shprehje: “Oh, ishe në floktore sot”. Këtë ajo e di edhe vetë dhe do të donte më mirë të dëgjonte: “Zemër, dukesh fantastike”.

2. Pritshmëria nga partneri
Nga dashuria pa kushte e fillimit, ku vlente që ta zbuloje dhe ta bëje për vete tjetrin pa rezerva apo kufizime, zhvillohen me kalimin e kohës qëndrime pritshmërie, të cilat duhet t’i përmbushë partneri.
Nëse ai s’e bën këtë, i duhet të ndryshojë. Kjo çon thuajse në mënyrë të pashmangshme – pavarësisht nga seksi – në reagim mbrojtës.

3. Stresi
Faktori i tretë vjen nga jashtë dhe quhet stresi i përditshëm. Një studim i Universitetit zviceran Fribourg – sipas periodikut Psikologjia sot – tregon se rreth 25 % e çifteve jetojnë në një lidhje jo të lumtur.
Nëse një lidhje qëndron për një kohë të gjatë, kjo përqindje mund të shkojë deri në 50%. Më të ndjeshëm ndaj një lidhje jo të lumtur janë partnerët që flasin pak me njëri-tjetrin, por që të dy akuzojnë për një mbingarkesë të madhe stresi.
Dhe në vend që ta përballojnë së bashku këtë stres, “gatuan secili gjellën e vet “. Lidhja mbetet, në këtë mënyrë, në mes të rrugës. Dhe si përfundim kthehen në të panjohur për njëri-tjetrin.

Çfarë duhet bërë?
Zgjidhja tingëllon e thjeshtë dhe quhet pranim. Kjo zgjidhje është terapia e përdorur nga profesorët amerikan të psikologjisë Neil S. Jacobson dhe Andrew Christwnsen.

Hapi i parë: Të pranosh nëpërmjet të kuptuarit
Partnerët të cilët i hedhin njëri-tjetrit akuza, natyrisht që besojnë se tjetri bën diçka të gabuar. Sipas Christwnsen dhe Jacobson çifti duhet të përpiqet ta shohë problemin nga një këndvështrim tjetër.
Nuk duhen diskutuar si të vërteta veset negative të hamendësuara të partnerit. Përpiquni ta kuptoni dhe të zbuloni motivet e vërteta të problemit për t’u çliruar nga paragjykimet.

Hapi i dytë: Pranim nëpërmjet ndjenjës
Kush i thotë bashkëshortit apo bashkëshortes pas një zënke të fortë, se tani ndihet i vetmuar dhe që do të donte që partneri ta mbështillte në krah? Kjo mund të konsiderohet si dobësi, por prej saj mund të nxirren avantazhe.
Apo më mirë t’i kthehesh me ashpërsi dhe më në fund je më i plagosur se asnjëherë tjetër. Këto ankthe, sipas mendimit të ekspertëve, duhen kaluar. Kush hapet, i jep mundësinë tjetrit të reagojë me mirëkuptim dhe ndjenjë.
"Nuk bëhet fjalë të fitosh kundrejt tjetrit. Në çift duhet të qëndrojë në qendër zgjidhja e përbashkët e problemit. Në fund të fundit, përse na nevojitet partneri?", pyet Profesor A. Christwnsen.

Ai flet pak – ajo shumë
Si kusht vlen – dhe për këtë janë të gjithë ekspertët në një mendje – gatishmëria për komunikim. Dhe këtu duket që seksi "i fortë" ka ende deficite.
Sipas statistikave një në katër gra shprehen: "Më nervozon tek partneri im që flet shumë pak me mua“. Po burrat? 23,8 % thonë: "Mua më nervozon fakti që duhet të telefonoj gjithmonë nëse ndonjëherë më duhet të vonohem". Nuk ka asnjë shenjë, që ky fakt me kalimin e kohës do të ndryshojë shumë midis burrit dhe gruas.

Trego interes për botën e partnerit tuaj dhe gjithmonë kërkoni në mënyrë të vetëdijshme afërsinë emocionale: kështu përballohen si çift vështirësitë e vazhdueshme.