Shkon në burg - nuk e duronte dot gruan në shtëpi

Publikuar: 8:50 / 8.05.2014



“Më mirë në burg, se në shtëpi me gruan”. Kështu është shprehur një i dënuar me arrest shtëpie në Francë, i cili ka thyer “byzylykun elektronik” që shërbente për të treguar se në çfarë vendi ndodhet i dënuari. Ai u vetëdorëzua në polici.

Rreth 54 vjeçari Philippe Brongniart ka deklaruar se nuk e duronte dot situatën e krijuar në shtëpi, ndaj më mirë parapëlqente që të rrinte në burg, sesa të qëndronte në shtëpi me gruan dhe të duronte këtë të fundit.

Brongniart, kohë më parë ishte drejtuesi i përgjithshëm i një grupi të madh restauruesish.

Pas ndarjes nga gruaja e parë ai u bë alkoolist dhe në vitin 2013 kreu disa vepra penale, për të cilat u dënua me burg, por më pas gjykata vendosi që ta linte në “arrest shtëpie”.

Ai u martua sërish, por si duket as me gruan e dytë nuk gjeti qetësi, pasi kishte konflikte të përditshme.

Kjo situatë e çoi Brongniart që të merrte vendimin që të shkonte dhe ta kalonte jetën në burg – se të qëndronte në shtëpi, me gruan.

Kërkesa e tij për t’u kthyer në burg nuk është pranuar dhe tashmë pritet që gjykata të japë verdiktin përfundimtar. /Telegrafi/