Vazhdojnë të përleshen studentët dhe policia

Publikuar: 12:30 / 6.02.2014



Qindra studentë dhe anëtarë të shoqërisë civile janë mbledhur para rektoratit për të kërkuar dorëheqjen e rektorit të Universitetit të Prishtinës, Ibrahim Gashi.


2:40 pm

Gazetari i Telegrafit raporton se disa protestues kanë nxjerrë jashtë oborrit të Rektoratit disa policë.

2:37 pm

Policia sërish ka filluar përdorimin e sprejit për t’i shpërndarë studentët, ndërkohë që nga përdorimi i mëhershëm i sprejit janë raportuar edhe të lënduar.

1:26 pm

Studentët janë kthyer në oborrin e Rektoratit, ndërkohë që Policisë po i drejtohen me fjalinë “Do ta merrni përgjegjësinë historike për këtë ditë”.

1:23 pm

Njësia Speciale e Policisë së Kosovës po largon studentët nga oborri i Rektoratit, ndërkohë që studentët kanë filluar të gjuajnë me gjësende në drejtim të Njësisë Speciale të Policisë së Kosovës.

1:20 pm

Ka filluar edhe ndërhyrja e Njësisë Speciale, ndërkohë që deri tani është arrestuar një studentë.

1:13 pm

Mësohet se Policia ka filluar përdorimin e ‘sprejit’ dhe gaz lotsjellësit , ndërkohë që studentë kanë filluar të brohorisin “marre, marre”. Ndihma e shpejtë ka arritur dhe po merret me pjesëtarin e sigurimit të UP-së.

1:03 pm

Studentët dhe Policia kanë filluar të përleshen, derisa studentët po tentojnë të futen në ambientet e Rektoratit. Studentët po kërkojnë nga Policia që të largohen nga dyert e Rektoratit. Telegrafi mëson se një pjesëtar i sigurimit të Rektoratit është lënduar.

12:48 pm

Popovci tha se nëse formohet komisione për verifikimin e thirrjeve akademike atëherë do të dalin shumë profesorë të cilët kanë marrë thirrje akademike të dyshimta.

12:46 pm

Hatixhe Latifi-Popovci, profesoreshë në UP ka thënë se UP që nga paslufta ka qenë e udhëhequr nga njerëz që kanë prodhuar skandale.

Ajo tha se ndodhet në protestë për ta ndaluar diskreditimin e UP-së.



Gazetari i Telegrafit njofton se në mesin e protestuesve është edhe Veton Surroi, Flaka Surroi, Halil Matoshi, Igballe Rugova, Imer Mushkolaj, Ilir Deda, Lumir Abdixhiku, Blerta Syla.

Ndër brohoritje e studentëve janë “Autonomi, jo Këshill Drejtues”.

Kërkesë e studentëve është dorëheqja e menjëhershme e rektorit Ibrahim Gashi, fillimi i hetimeve rreth keqpërdorimeve në Universitet, përmirësimi i infrastrukturës në Qendrën e Studentëve dhe largimi i ndikimit të pushtetit në Universitet nëpërmjet heqjes së Këshillit Drejtues.

Ndryshe, edhe Kuvendi i Kosovës po diskuton lidhur me gjendjen e UP-së.

Fotografia: Telegrafi/Arkiv