Seri A kampionati italian

Në ndeshjen ndaj Fiorentinës, në ato pak minuta që luajti, Vinçenco Iakuinta tregoi formë të shkëlqyer dhe të gjithë menduan se, po të kishte hyrë më parë, mbase bardhezinjtë do të fitonin. Por ai vetë thotë: “Të ishte për mua, do të kisha hyrë më shpejt në fushë, por këtë e vendos trajneri. Mua më takon vetëm të vazhdoj të punoj e të sillem si profesionist. Te Juvja ka shumë konkurrencë. Kemi vepruar mirë në merkato dhe kanë ardhur lojtarë të shkëlqyer. Megjithatë, unë shpresoj të luaj një kampionat të madh. Nuk e kam menduar asnjëherë të largohem nga Torino. Përpara verës, kur isha i dëmtuar, Ranieri më tha se kishte besim tek unë, ndaj qëndrova”.

Lojtari dëshiron të luajë deri në 38 vjeç dhe e marrë veten pas dëmtimit

Zeni korean thonë se dhimbjet mund të kalojnë përmes 14 orësh meditim në ditë, të ndara në 3 blloqe kohore: murgjit aziatikë ndërthurin 50 minuta meditim ulur, shoqëruara nga 10 minuta në këmbë. “Nuk duhet negociuar me dhimbjen, ajo duhet parakaluar,” - thotë budizmi. Por thotë edhe se: “Duke vuajtur, nuk do të vuani më”. Për të vuajtur, Françesko Toti ka vuajtur goxha, sidomos në dy vitet e fundit dhe ka pasur mjaft raste për të medituar: ulur, në këmbë, në palestër dhe pishinë, ku ka kaluar shumë ditë, edhe kohët e fundit, pas dëmtimit në kaviljen e majtë, si pasojë e një përplasjeje me interistin Maikon. Ai mori një goditje të fortë, por e keqja është se kjo i krijoi një hematomë që i shkakton shumë dhimbje. Si një vit më parë, kur përplasja me brazilianin Liedson të Sporting Lisbonës i shkaktoi dy të tilla në këmbën e djathtë, e që Totit i mbetën për shumë kohë pasojat.
MENDIMI I BUKUR - Gjurin dhe kaviljen e majtë më 2006-n, trinën e këmbës së djathtë në prill, kaviljen e majtë përpara një jave. Toti i ka provuar të gjitha; por çdo herë e ka parakaluar dhimbjen më shpejt nga ç’parashikohej, duke medituar edhe për të ardhmen. Mendimi i tij i fundit është që të vazhdojë të luajë deri pranë moshës 40-vjeçare. Vetëm më pas ai mund t’u kushtohet familjes dhe fëmijëve, që në atë kohë do të kenë filluar shkollën, sepse deri atëherë do të avzhdojë të mbajë fanellën verdhekuq, të cilën s’e ka hequr më që prej 1989-s, kur e veshi për herë të parë në Trigoria. Totit do t’i pëlqente ta zgjaste kontratën, e cila i përfundon më 2010-n deri më 2014-n, me të njëjtat shifra: diçka më shumë se 5,5 milionë euro në sezon. Mbase rinovimi do të nënshkruhet që këtë vit. Për në këtë rast, më shumë se çështje parashë, do të bëhet fjalë për një histori të madhe dashurie, e cila ka gjasa të vazhdojë përjetësisht. Toti dëshiron të luajë deri në moshën 38-vjeçare. Më 2014-n, kur ta lërë futbollin, do të festojë 25-vjetorin e martesës së tij me Romën. Një arritje marramendëse!

Kapiteni i “axurrëve” foli për episodet e napoletanëve, por tha se ky është një fenomen që prek gjithë Italinë

Ai u betua se nuk e kishte përgatitur: “Isha ulur aty dhe po mendoja me vete se “tani që m’u dha kjo mundësi nuk do ta lë të më ikë nga duart”. “Dhe kështu ndodhi. Besoj se ishte diçka e drejtë pas shumë polemikash, të bëra në njëfarë mënyrë edhe për ta zhdramatizuar çdo gjë.” Fabio Kanavaro mendoi atë që bëri të martën padite, kur mori nga duart e presidentit të FIFA-s, Blater, (me disa vite vonesë) Kupën e Botës. Kapiteni shfaqi buzëqeshjen e tij, por e fshehu menjëherë.

DHUNA - Menjëherë u kalua te një temë shumë më serioze. “Episodet e dhunës, në të cilat u përfshinë tifozët e Napolit? Mendoj se është gjithnjë diçka e papëlqyeshme të shohësh disa gjëra të caktuara. Por mendoj edhe se nuk është problem ekskluzivisht i Napolit dhe i napoletanëve. Është më keq, sepse ka të bëjë me të gjitha qytetet dhe tifozëritë e të gjitha skuadrave. Zgjidhja? Nuk besoj se idealja është bllokimi i transfertave, as mbyllja e stadiumeve, sepse kjo penalizon tifozët e ndershëm. Duhet të hyjmë brenda shkallëve të stadiumeve, të eliminojmë të dhunshmit e t’ua u kthejmë stadiumet familjeve dhe fëmijëve. Për shembull, unë në këtë moment nuk do t’i çoja kurrë fëmijët e mi të shihnin një ndeshje; njerëzit nuk dinë ku të ulen, nuk ka organizim, nuk ka persona që të të tregojnë se ku e ke vendin. Në krahasim me stadiumet tona (italiane), Brenabeu duket si sallon. Shteti duhet të jetë më i pranishëm. Le t’i ristrukturojmë stadiumet tona dhe t’i bëjmë më efikase masat që kemi.”

TURPI - Vetëm pak çaste ndërprerje dhe diskutimi rinisi menjëherë: “Rregullat ekzistojnë, por duhen aplikuar, siç kanë bërë në Angli. Puna është se në Itali nuk po gjendet një zgjidhje, në stadium çdokush ndihet i lirë të bëjë atë që do. Gjithsesi, të gjithë e dinin se ndeshja Napoli Roma ishte e rrezikshme. Nëse më erdhi turp për Napolin? Jo, ndihem gjithnjë krenar që jam napoletan. E përsëris: nuk duhet të ketë turp një qytet, por i gjithë fenomeni, sepse problemi i dhunës ekziston nga Veriu e deri në Jug. Çfarë do të mendoja, po të zbuloja se pas kësaj fshihet Kamorra? Se nuk ka të bëjë aspak me futbollin!”.

IMAZHI NË BOTË - Më pas, pamjet e ngjarjeve të tilla i tejkalojnë kufijtë kombëtarë: “Jashtë Italisë ekzistojnë struktura fantastike, ajo është e ardhmja. Edhe ne duhet të krijojmë premisat për të favorizuar investimet apo për të tërhequr sheikët, sikurse po ndodh në Angli. Edhe pse kampionati ynë nuk ka përse të ketë zili asnjë kampionat tjetër, sepse, po të vazhdohet kështu, do ta kemi vështirë t’ua shpjegojmë lojtarëve të huaj se futbolli italian nuk është vetëm dhunë”.

RIKTHIMI - Më pas u kalua te disa argumente më të lehta: “Jam mirë, isha gati që në ndeshjen e parë të kampionatit, por trajneri zgjodhi ata që ishin më të përgatitur se unë. Lipi? Ka të njëjtin pasion dhe vendosmëri që kishte edhe përpara dy vitesh. E dimë se duhet të kualifikohemi në Botërorin e ardhshëm, si kampionët në fuqi, ndaj do të kemi më tepër përgjegjësi. Nuk dua të mendoj se në Europian ndikoi dëmtimi im, sepse skuadrën nuk e ndryshon vetëm një person. Megjithatë, me përjashtim të ndeshjes ndaj Holandës, u paraqitëm mirë dhe na eliminuan kampionët e Europës”.

JUVE REAL -Edhe Europa do ta vendosë atë përballë ish-skuadrës së tij, Juventusit: “E dija se në Ligën e Kampioneve do kishte dalë Real Madrid Juve. E them menjëherë se më vjen mirë që do të takohem sërish me ish-shokët e skuadrës time në këtë veprimtari. Më pas, sigurisht, do të ndjej habi dhe emocione. Si mendoj se do të më presin? Di se nuk u ka pëlqyer mënyra se si u largova, por, nga ana tjetër, të gjithë ata që kanë luajtur më pas ndaj Juves janë trajtuar në një mënyrë të caktuar. Megjithatë, vitet që kam kaluar aty nuk mund të fshihen”.

DËMTOHET AMELIA - MarKo Amelia u kthye në Palermo: rezonanca magnetike, së cilës iu nënshtrua dje në mëngjes, nxori në pah dëmtimin që dyshohej; portieri do të kurohet në Sicili.

Diego Milito është kthyer me gëzim te Xhenoa dhe ka qenë vetë sulmuesi argjentinas ai që i ka shpjeguar arsyet e një zgjedhjeje të tillë. “Këtu jam si në shtëpinë time, këta janë njerëzit e mi,” - tha ai. “Princi”, sikurse e thërrasin tifozët, mbërriti në Gjenovë të mërkurën në mesnatë. Diego Milito ishte larguar nga Xhenoa pas vendimit që e zbriti skuadrën kuqeblu në Serinë C1, pak ditë pasi ai e kishte merituar në fushë me skuadrën kalimin për në Serinë A. Milito shpjegoi se donte të kthehehj vetëm te Xhenoa, dhe se nuk do të kishte pranuar të shkonte në asnjë skuadër tjetër, madje ai refuzoi edhe transferimin te Totenhemi: “Këmbëngula shumë që ta vishja sërish këtë fanellë”.

Lojtarët pa skuadër

Merkatoja u mbyll me goditje të mëdha: Kuarezma, Milito, Robinjo dhe me pronarët e rinj sauditë të Mançester Sitit, të cilët “kërcënojnë” se do të blejnë gjysmën e Premier Ligës (për fat të mirë, do t’u duhet të presin, të paktën deri në janar). Por sezoni i uljes së çmimit nis pikërisht tani: në listat e lojtarëve pa kontratë nuk është e pamundur të gjesh ndonjë blerje të leverdishme, si për shembull ndonjë “plakush”, i cili dëshiron të marrë revansh, ose ndonjë lojtar që konsiderohej si talent dhe që mund të rigjenerohet. Për ta ekziston mundësia që të merren deri më 31 mars të 2009-s.

TË PAPUNËT - Ata nuk do të organizojnë protesta, sepse gjithsesi mbeten të papunë luksi, por, po të donin, mund edhe të ndërtonin një skuadër të vërtetë. Mbase jo edhe aq dinamike, por në gjendje, pse jo, po të ishte e motivuar, të luftonte për qëndrimin në kategori. Le të përpiqemi të formojmë një 11-she imagjinare me ta: në portë ish-mbrojtësi ekstrem i Parmës Buçi, në një mbrojtje të përbërë nga katër lojtarë vendosim Valerio Bertoton (35 vjeç), Gaetano De Rozën (35), Fabio Galanten dhe Aparesido Sezarin (një kampion italie i papunë, së bashku me ish-trajnerin e tij Roberto Mançini); në mesfushë muskulozin Stefen Apiah (për të cilin, ama, gjatë këtyre orëve po interesohet Uest Ham), grintën e Alesio Takinardit dhe të ish-lojtarit të Barcelonës e të Atletiko Madridit Tiago Mota (pas kthimit të Manikes te Atletiko, atij iu dhanë duart), Stefano Fiore (e ka mbyllur aventurën te Mantova) pas dy sulmuesve dhe një sulm nostalgjik për interistët: Alvaro ReKoba dhe Ronaldo.

ZGJEDHJET E TJERA - Në stol zgjedhjet janë të shumta: me një portier, si Kristiano Lupateli (30 vjeç), një ish-futbollist premtues, si Fabio Gati (26), një shkatërrues, si Xhiuliano Xhianikeda apo Antonio Filipini. Dhe më pas Manitta e Xhiampà, të cilët mbetën pa skuadër, pas falimentimi të Mesinës. Po trajneri? Emrat janë të shumtë, por emri më prestigjoz me siguri është ai i Roberto Mançinit.

FENOMENI - Mosha, dëmtimet dhe pagat e larta janë problemet kryesore. Megjithatë, emrat e tyre janë mjaft të respektueshëm, mjafton të mendosh rastin më flagrant, Ronaldon. Ai e ka fituar dy herë “Topin e Artë”, por është detyruar të ndalet shumë herë për shkak të dëmtimeve në gju. Fotot verore që tregojnë se ka vënë mjaft tule, që nuk është shenjë e mirë, por “Fenomeni” ka ndër mend të kthehet sërish dhe ka filluar të stërvitet me Flamengon.

Mbetet ende pezull vendimi për ndeshjen Napoli-Fiorentina. Shefi i Policisë tha se ka ndikim mafioz

Komiteti i Analizës për Sigurinë e Veprimtarive Sportive, përveçse ka konfirmuar bllokimin e tifozëve të Napolit për të shkuar nëpër transferta gjatë gjithë kampionatit, ka vendosur ta ndalojë edhe transfertën për tifozët kuqezinj në ndeshjen Xhenoa Milan të 14 shtatorit. Në ndeshjen Itali Gjeorgji të mërkurën, në Udine, e vlefshme për eliminatoret e Botërorit 2010, gatishmëria do të jetë e shkallës së lartë. Ndërkohë, nuk u mor ndonjë vendim për ndeshjet e tjera të rrezikuara, si Ankona Askoli e 7 shtatorit. Ndërsa për ndeshjen Napoli Fiorentina të 14 shtatorit masat mbeten pezull, në pritje të vendimeve të gjyqtarit sportiv, por, hëpërhë, shitja e biletave është bllokuar.

MANGANELI - Analiza e shefit të Policisë Antonio Manganeli konfirmoi dyshimet, për faktet lidhur me ndeshjen Roma Napoli të së dielës. “Kemi të drejtën të konsiderojmë se ka një ndikim të kriminalitetit të organizuar në kryerjen e episodit në Napoli dhe në udhëheqjen e këtyre incidenteve, - tha Manganeli në Palermo, në kuadër të përkujtimit të tragjedisë, në të cilën humbi jetën gjenarali Karlo Alberto Dala Kieza. Kemi lidhur një bashkëpunim më të ngushtë mes policisë, karabinierëve dhe Prokurorisë së Napolit, e cila jo ratsësisht ia ka besuar Sektorit të Antimafies çështjen. Në vijim do të ketë disa mbledhje të strukturave hetimore për të planifikuar masat për të frenuar atë që ndodhi në këtë çështje, por edhe në kuadër të rasteve të tjera të ngjashme kundër veprimtarive mafioze.”

JO TRENAVE TË VEÇANTË - “E shtuna dhe e diela, vijoi Manganeli, kanë qenë dy ditë, gjatë të cilave nëpër stadiume nuk ndodhi asnjë incident. Ky është padyshim një rekord, që prej vrasjes së Raçitit. Por, për fat të keq, u shënua ky episod i rëndë, i një grupi të madh tifozësh të papërgjegjshëm napoletanë.” Shefi i Policisë më pas u shpreh kategorikisht kundër trenave të veçantë: “Kundër kësaj ka qenë si qeveria e mëparshme, ashtu edhe ajo aktuale, pasi një gjë e tillë mund ta nxitë tifozëritë e dhunshme nëpër transferta. Vandalë të tillë na kanë prishur jo vetëm një fundjavë, por po kthehen në fenomen shqetësues. Ndaj, ata duhet të identifikohen e të dënohen. Dhe ne këtë po bëjmë, - përfundoi Manganeli. Sot (dje) dërgova në Napoli zëvendësin tim, prefektin Kavaliere.”

“Për Kasano sigurisht nuk bëhet fjalë për një përjashtim!” Ky është mendimi i Xhixhi Bufonit. Në fakt, portieri i Italisë i ka dhënë zemër talentit nga Bari, pas mosgrumbullimit në kombëtare. “Mendoj se është diçka mëse e justifikueshme, zgjedhje që një trajner ka të drejtën ta bëjë, aq më tepër në një periudhë si kjo, - tha Bufoni. - Kasano është lojtar i shkëlqyer dhe në kombëtare, në europianin e fundit, tregoi se ka bërë progrese të mëdha nga ana e sjelljes. Ai është pjekur shumë.”

Në Botërorin 2006

Në Gjermani janë ngritur disa dyshime për rezultatin e ndeshjes Itali Ukrainë, çerekfinalja e Botërorit 2006, që u fitua nga “axurrët” 3-0, falë golit të Xhianluka Zambrotës dhe dygolëshit të Luka Tonit. Sipas informacioneve që ka marrë e përditshmja gjermane “Bild”, nga gazetari kandez Deklan Hill, ndeshja e fituar 3 0 nga “axurrët” dyshohet, ashtu sikurse dy sfida të tjera të 1/8-va të finaleve, Angli Ekuador (1 0) dhe Brazil Ganë (3 0).
Të shtunën, në një deklaratë për “Der Spiegel”, Hill ishte ndalur kryesisht te ndeshja e fituar 3 0 nga Brazili. Sipas gazetarit, disa lojtarë të Ganës ishin bindur ta përballonin ndeshjen pa shumë përkushtim.
Rezultati final dyshohet të ketë favorizuar një organizatë aziatike bastesh klandestine. Sipas akuzave të bëra nga Hill, keqbërësit vepruan për të siguruar një rezultat të thellë, në mënyrë që fitorja e Brazilit të arrihej me më shumë se dy gola. Sipas kanadezit, kontaktin mes manipuluesve dhe disa lojtarëve të kombëtares afrikane e ka realizuar një ish-futbollist i Ganës.

Interi prezantoi blerjen e tij të re. Portugezi tha se do të përpiqet të japë më të mirën për zikaltrit

“Ndihem i lumtur që kam ardhur tek Interi, realizova një ëndërr!” Kështu është shprehur blerja e re e Interit, Rikardo Kuarezma, i cili u prezantua dje përpara shtypit. “Jam nën urdhrat e trajnerit, detyra ime është të punoj sa më mirë. E falënderoj Porton për gjithçka që më ka dhënë.”

- Kuarezma, çfarë përshtypjesh keni pasur gjatë ditës tuaj të parë tek Interi?
- Ndihem i lumtur që kam ardhur këtu tek Interi; kam ndjerë përshtypjen se ndodhem në një klub të madh, me lojtarë të mëdhenj. Tani detyra ime është të punoj.
- Sa përgjegjësi ndjeni? Mourinjo dhe klubi kanë punuar shumë për t’ju marrë…
- Mendoj se përgjegjshmërinë e kam, ndaj tani rëndësi ka të punoj mirë dhe të arrij të ambientohem.

- Çfarë mendoni se mund t’i jepni lojës së Interit?
- Vetëm me kalimin e kohës mund t’i jap një përgjigje kësaj pyetjeje. Kam shumë gjëra për të mësuar.

- Keni disa kohë që nuk luani. Cila është gjendja juaj?
- Ndihem shumë mirë fizikisht dhe psikologjikisht, ndihem gati. Jam në dispozicion të trajnerit.

- Për mendimin tuaj, ky është shansi më i madh në jetë?
- Po, është një ëndërr, ndodhem në një klub të madh, e arrita objektivin tim, por sigurisht i jam shumë mirënjohës Portos për gjithçka që më ka dhënë.

- A keni menduar gjithnjë se çështja do të realizohej, apo keni pasur frikë se do të qëndroni te Porto?
- Kam shpresuar gjithnjë se çdo gjë do të shkonte mirë. Agjenti im Horge Mendez më ka informuar vazhdimisht dhe në fund gjithçka shkoi mirë.

- Çfarë ka ndryshuar në krahasim me përvojën tuaj të përpara disa viteve te Barcelona?
- Te Barça disa gjëra nuk shkonin mirë, këtu kjo nuk do të ndodhë.

- A e ndjeni se mund të jeni lojtari më spektakolar i Serisë A, së bashku me Ronaldinjon?
- Jam gati të luaj ndaj të gjitha skuadrave dhe ndaj gjithë lojtarëve.

- Cila të pëlqen më shumë nga nofkat që të kanë vënë, Mustang apo Harry Potter?
- Më mirë vetëm Kuarezma.

- Përpara gjashtë vitesh, në kohën e Sporting Lisbonës, a është e vërtetë se desh kaluat tek Interi?
- Kur luajta ndaj Interit në paraeliminatoren e Championsit isha shumë i ri, por që atëherë kanë ndodhur shumë gjëra.

- A është një përgjegjësi më shumë për ju fakti që ju krahasojnë me Ronaldinjon?
- Drtyra ime është të jap më të mirën, në bazë të kontratës që kam.

- Si ka lindur goditja juaj më e famshme “Trivela”?
- Jam në gjendje të godas me të dyja këmbët.

- A do ta mësojë Kuarezma italishte po aq shpejt sa edhe Mourinjo?
- E kuptoj, mendoj se do ta mësoj brenda 2 3 javësh.

Kapiteni, edhe pse ishte i inatosur e i zhgënjyer për barazimin në Firence, ka gjithsesi shumë besim te skuadra

Inati dhe krenaria kanë përshkuar gjendjen shpirtërore të Alesandro Del Pieros, pas barazimit 1 1 në Firence. Inat për golin që shënoi në minutat e fundit Xhilardino, duke i mohuar një fitore tepër të rëndësishme Juventusit, duke parë edhe rezultatet e skuadrave të tjera të mëdha. Krenari për mënyrën se si luajti skuadra në 89 minutat, përpara se të pësonte golin, “duke krijuar raste të tjera pas golit të Nedvedit dhe pa rrezikuar asgjë”. Një prej atyre rasteve, mbase më i pastri, e humbi vetë ai përballë Freit dhe, ndoshta një pjesë e inatit i vinte pikërisht nga kjo, sepse Aleksi e pranoi gabimin. “E gjuajta topin shumë vonë,” - shpjegoi ai. Megjithatë, sipas stilit të tij, kapiteni preferon të shohë anën pozitive të zhgënjimit të së dielës: “Ndaj Fiorentinës kuptova se mund të luftojmë me të vërtetë për titullin”.

- Po të kishit fituar, mund ta kishit nisur që tani shkëputjen…
- Është e vërtetë. Flakëm tutje dy pikë. Pasi kaluam në avantazh, patëm edhe disa raste për të shënuar golin e dytë dhe për ta mbyllur ndeshjen. Edhe sepse mbrojtja jonë nuk u rrezikua shumë. Pa dashur t’i fyej vjollcët, ata vetëm në atë mënyrë mund të shënonin dhe, në fakt…

- Si ishte atmosfera brenda ekipit, pas ndeshjes?
- E pamë njëri-tjetrin në fytyrë, ishim të inatosur e të zhgënjyer. Por vetëm për rezultatin, jo për lojën. Na mungoi pakëz agresivitet sportiv, në rastin e golit të barazimit të tyre. Në këtë pikëpamje duhet të përmirësohemi. Megjithatë, unë ndihem i kënaqur.

- Përse?
- Po të kemi parasysh se ishte java e parë dhe një ndeshje direkt në një fushë të vështirë dhe, nëse shtojmë atë që krijuam e se sa pak u rrezikuam, përfundimi është mjaft optimist. Pashë një Juve kompakte dhe energjike.

- Pra, jeni ju anti Interi?
- Ky është një përcaktim, i cili tani, pas vetëm një ndeshjeje, nuk do të kishte kuptim. Duhet të presim, nuk mund të jepen gjykime për barazimet e Interit dhe Romës, apo për humbjen e Milanit. Por, përsa i takon Juves, mendoj se jemi në rrugë të mbarë. Dola nga stadiumi Franki me ndjesinë e fortë se sivjet mund të luftojmë me të vërtetë për titullin.

- Gjithçka do të rinisë pas dy javësh, tani e ka radhën kombëtarja. Cilat jaën garancitë për ju?
- Unë do të punoj siç kam bërë gjithnjë. Na presin dy ndeshje, që në letër nuk paraqiten shumë të vështira, ndaj nuk do të na falej sikur të mos i fitonim. Italia është si Juvja, nuk mjaftohet me pjesëmarrjen.

Patrik Vieira është gati për t’u rikthyer në skuadër. Dëmtimi i pësuar një muaj më parë në këmbën e majtë tashmë duket vetëm një kujtim i largët për mesfushorin zikaltër, aq sa Zhoze Murinjo do ta hedhë në fushë francezin në miqësoren e ditës së sotme kundër Lokarnos. “Kam ende shumë për të dhënë dhe sigurisht që konkurrenca e madhe ndërmjet lojtarëve të rinj të mbërritur nuk më frikëson. Na pret një sezon impenjativ me kampionatin dhe Ligën e Kampioneve dhe besoj se nëse të gjithë do të impenjohemi në maksimum, mund t’ia dalim mbanë. Zhoze Murinjo e di mjaft mirë se mund të mbështetet gjithmonë tek unë, ndaj për këtë arsye do të më duhet të stërvitem më shumë se të tjerët”, tha Vieira.

Trajneri i Milanit, Karlo Ançeloti, pas humbjes që skuadra e tij pësoi ndaj Bolonjës, mendon për skemat e reja që mund të aplikojë të cilat tani e tutje duhet të ekuilibrojnë çdo repart. Galiani me anë të një “pusulle” të dorëzuar nga numri një kuqezi Silvio Berluskoni i ka bërë të qartë Ançelotit se tani e tutje Milani duhet të luajë me “tre tenorët” ose me tre fituesit e topit të artë, Kaka, Ronaldinjo dhe Shevçenko. Kjo skemë mund të aplikohet në fushë të dielën e ardhshme në sfidën ndaj Xhenoas. Sipas Berluskonit, ky është Milani që duhet të zbresë në fushë. Në portë: Abiati, mbrojtës: Jankulovski, Nesta, Kaladze, Zambrota, mesfushë: Pirlo, Flamini, Kaka, Shevçeko, Ronaldinjo. Në sulm Pato.

pupuppupup ç'paske qen per ITALIONT re Arbri ,maroke fare per breshkaxhit

:gezim: :gezim: :gezim: :gezim: :gezim: