Kampionati Shqiptar i futbollit

Rezultate, komente dhe klasifikime!

Sebino, “Plaku i Vitit të Ri” për Dinamon

Kryendeshja e “Loro Boriçit” mbyllet me fitoren e bluve. Sinani shpërdoron dy herë një 11-metërsh
Vllaznia - Dinamo 0 - 1
Shënues: Plaku 88′ (11-m)
Vllaznia: Grima (Ndoja ‘79), Smajli, Lici, Bashiq, Osja (Hoti 89′), Shtubina, Belisha, Nallbani, Dhëmbi (Doçi 81′), Boadu, Sinani. Trajner: A.Canaj
Dinamo: Kotorri, Pisha, Sina, Brahja, Ferraj (Haliloviç 75′), Diop, Poçi, Allmuça, Sefa (Jusufi 63′), Petriçeviç (Çapja 90′) , Plaku. Trajner: Z.Daliç
Gjyqtarë: L.Jemini, E.Doda, S.Avdo, (Durrës)


“Radiografia”
4′- Allmuça harkon nje top drejt portës së Vllaznisë dhe Grima me vështirësi e zotëron pranë vijës fatale.
11′- Safet Osja jep sinjalin e parë për Vllazninë, provon me të majtën nga një distancë e largët, topi kalon ngjitur me shtyllën e majtë pingule.
16′- Rrëmujë në zonën e Dinamos. Topi përfundon tek Osja, cili gjuan rreptë, por vetëm goditje këndi pas devijimit të mbrojtjes.
34′- Kros i Ferrajt për Plakun, që godet me kokë, por jashtë.
35′- Kundërsulm i shpejtë i Vllaznisë, topi shkon te Nallbani, që gjuan fort, por jashtë.
36′- Rrëmujë në zonën e Dinamos. Topi nuk zotërohet nga Kotorri, por ka qenë ndërhyrja e një mbrojtësi që largon topin mbi vijën fatale, duke shmangur një gol të sigurt.
53′- Një top që shkon në zonën e Vllaznisë, nuk zotërohet nga Grima dhe Brahja, që kishte ardhur nga mbrojtja, vetëm dy metra larg portës, gjuan jashtë.
59′- Sinani pengohet në mënyrë të parregullt nga Pisha brenda zonës dhe gjyqtari Jemini akordon 11 metërsh. Gjuan vetë Sinani, por Kotorri e grushton topin. Gjyqtari anësor Doda bën sinjalizim për përsëritje të 11 metërshit, pasi Kotorri nuk ka qenë i vendosur mbi vijën e portës.
60′- Pas protestave të dinamovitëve, kapiteni Sinani ekzekuton penalltinë dhe Kotorri arrin ta presë edhe një herë, duke bërë mrekullinë e vërtetë të kësaj ndeshjeje.
88′- Nedim Haliloviç depërton në zonën e Vllaznisë, por aty pengohet nga Lici dhe për gjyqtarin Lorenc Jemini nuk ka asnjë pikë dyshimi: 11 metërsh për Dinamon.
Sebino Plaku gjuan nga pika e bardhë dhe bën atë që Sinani nuk e bëri për dy tentativa radhazi, shënon dhe i jep fitoren ekipit të tij, duke parë se nuk ka më kohë për Vllazninë që të rikuperojë disavantazhin.
90+3′- Rasti i fundit i kryendeshjes: kros nga e majta për Bashiçin, që godet me kokë, por jashtë.

Komenti
Duhej të ishte festë, por në të vërtetë nuk ka ndodhur ashtu. Vllaznia i ka zhgënjyer tifozët e saj, teksa dje jo vetëm që nuk ka arritur ta mundë Dinamon, por ka humbur ndaj saj, që do të thotë se në vend që të mbyllte 2008 n me 7 pikë avantazh ndaj Tiranës, kjo diferencë është ngushtuar në 4 pikë.
Vllaznia nuk e ka nisur mirë ndeshjen. Madje është Dinamo ajo që ngulmon, duke u munduar t’u imponohet vendësve me lojën e saj.
Por megjithatë blutë nuk arrijnë të krijojnë raste shënimi dhe, si pasojë, pas minutës së 15 të të takimit, gjërat ndryshojnë.
Janë kuqeblutë ata që marrin frenat e lojës në dorë dhe, megjithëse nuk janë shumë të qartë në ndërtimin e aksioneve sulmuese, sërish janë më të rrezikshëm dhe për rrjedhojë krijojnë disa raste shënimi, kryesisht me anë të mesfushorëve që vijnë deri në afërsi të zonës dinamovite dhe godasin nga jashtë saj.
Sulmi i Vllaznisë u duk qartë se nuk ishte në një ditë të mirë, ndoshta edhe falë markimit të ashpër që iu bë nga Pisha & Co. Me gjithë presionin e shkodranëve, pjesa e parë do mbyllej në barazim.
Në të dytën, janë sërish kuqeblutë që duan medoemos të shënojnë golin e avantazhit dhe rasti më i mirë për këtë iu dha në minutën e 59-të.
Gjyqtari Jemini ka dhënë 11 metërsh dhe Sinani ndonëse ka gjuajtur dy herë nga pika e bardhë, nuk ka arritur në asnjërin rast të kalojë Kotorrin, që ka qenë shpëtimtari i vërtetë i Dinamos. Pas këtij momenti, loja e Vllaznisë bie ndjeshëm.
Lojtarët e saj e ndiejnë presionin e tifozëve dhe për rrjedhojë, në asnjë moment nuk arrijnë të krijojnë raste të tjera për të kaluar në avantazh.
Këtë situatë e shfrytëzon mjaft mirë trajneri Daliç, i cili me futjen në lojë fillimisht të Jusufit e pastaj të Haliloviçit, fillon të krijojë panik te mbrojtja vendëse.
Madje do jetë Haliloviç ai që me një 11 metërsh të marrë në minutën e parafundit të ndeshjes, dhe të kthyer në gol nga Plaku, i dha fitoren skuadrës së tij.
Një fitore që e fut Dinamon sërish në vallen e titullit ashtu siç kishte thënë trajneri i saj para ndeshjes, ndërkohë që për Vllazninë mund të jetë një tripikësh që mund të kushtojë shtrenjtë.


Deklaruan
Agim Canaj, trajner i Vllaznisë: “Humbëm një ndeshje, por jo gjithçka. Mbi të gjitha, na vjen keq për tifozët tanë, të cilët u larguan të pakënaqur nga stadiumi. E them me plot bindje se nuk e meritonim humbjen në këtë ndeshje.
Penalltia e pashënuar mbylli gjithçka në lojën tonë. Disa nga lojtarët tanë nuk ishin në formën e tyre më të mirë dhe kjo për pasojë, e bën më të domosdoshme hyrjen në merkato.
Rëndësi ka që jemi në vend të parë sërish, sepse edhe humbje do ketë gjatë kampionatit, por e përsëris, pengu ynë i vetëm është që nuk kënaqëm tifozët në këtë ndeshje”.

Zllatko Daliç, trajner i Dinamos: “Dua të përshëndes Vllazninë fillimisht, sepse me meritë është në vend të parë në këtë moment. Në pjesën e parë luajtëm dobët dhe ishim me fat që nuk pësuam gol.
Për të dytën e dinim që do ishim më mirë fizikisht, luftuam për ta fituar ndeshjen dhe ia arritëm. Jam i kënaqur për këtë, sepse ishte një ndeshje vendimtare për titullin.
Pas këtij rezultati sigurisht që pjesa e dytë e kampionatit do të jetë më e bukur dhe Dinamo besoj se ka për të qenë pretendente deri në fund.”


Të veçanta
- Rreth 7 mijë sportdashës e kanë ndjekur ndeshjen e djeshme mes Vllaznisë dhe Dinamos, duke krijuar një atmosferë shumë entuziaste në shkallët e “Loro Boriçit”. Megjithatë, ata janë larguar shumë të zhgënjyer në fund të ndeshjes, sepse prisnin rezultat tjetër nga skuadra e tyre.
- I pafat ka rezultuar edhe maskoti kuqeblu, që u duk për herë të parë në stadium këtë ndeshje. Shkodranët e kishin menduar si festë, por fundi i 90 minutave ka rezultuar jo i mirë për të. Atmosfera në stadium ka qenë e tillë sikur të ishte humbur titulli kampion.
- Tribuna “VIP” e stadiumit ka qenë e tejmbushur në këtë ndeshje, ndërkohë që temperaturat kanë qenë të ulëta.

Elbasani, “harakiri” i fundit vjen me Besën

Verdheblutë me këtë humbje rrezikojnë, ndërsa kavajasit pretendojnë me të drejtë
Elbasani - Besa 0 - 1
Shënues: Mërtiri 70′
Elbasani: Osmani, Mehmetaj, Stojku, Ahmataj, Kaçuli, Vrapi, Merxha, Gava, Fagu (Hyshmeri 68′), Abazaj (Bejzade 77′), F.Xhafa. Trajner: M.Josa.
Besa: Dura, Grizha, Mërtiri, E.Xhafa, Leci, Sakaj, Ishka (Abilaliaj 69′), Mihani, Kuli (Krasniqi 68′), Mancaku, Haliti (Alikaj 80′). Trajner: I.Daja.
Gjyqtarë: A.Lulaj (Vlorë), G.Koka (Lezhë), D.Salaj (Shkodër)
Karton i verdhë: Mërtiri


“Radiografia”
7′ Abazaj nuk arrin të përfitojë nga një gabim i mbrojtjes së Besës, duke mos shënuar.
19′ Eshtë Haliti për Besën që lëshon një goditje nga 18 metra, por Osmani grushton mjaft mirë.
22′ Gava ekzekuton një goditje dënimi, Sakaj për pak rrezikon autogolin.
25′ Kësaj radhe është Mihani që ekzekuton një goditje dënimi, por topi i devijuar përfundon pak mbi traversë.
50′ Abazaj lëshon një goditje të fortë nga 18 metra, por topi përfundon jashtë portës së mbrojtur nga Dura.
53′ Kësaj radhe është mbrojtësi Vrapi, i cili gjuan fort nga distanca, sërish topi jashtë.
61′ Mancaku nga një goditje dënimi, Haliti me kokë godet jashtë, duke rrezikuar seriozisht portën e Osmanit.
65′ Xhafa kalon mjaft mirë në të djathtë të sulmit, vjen pasimi i tij për Abazajn, i cili është në kundërkohë dhe nuk arrin të godasë portën e Durës.
70′ Lulaj akordon një goditje dënimi për Besën. Ekzekuton Mancaku, topi endet në zonë, ku përfiton Mërtiri, i cili në hyrje të zonës godet fort dhe shënon. 0-1 për Besën.
73′ Mancaku tenton të shënojë nga 25 metra, vjen grushtimi i Osmanit.
84′ Elbasani mundohet të rrezikojë pas një goditjeje dënimi të Stojkut, por Dura pret i qetë.
90′ Aksion i rrezikshëm i vendësve, topi mbërrin te Bejzade, i cili rrotullohet mirë brenda zonës, por nuk arrin të shënojë.
91′ Kundërsulm i shpejtë i skuadrës kavajase, që mbyllet me një goditje të lehtë të Mihanit, që pritet nga Osmani.

Komenti
Elbasani ka harruar të fitojë, madje jo vetëm kaq, por tani më shumë skuadra verdheblu e sheh vetën shumë pranë zonës së ftohtë pas humbjes ndaj Besës.
Deri pak javë më parë, një ekip pretendent për vendet e para të tabelës së klasifikimit, tani skuadra e drejtuar nga trajneri Mirel Josa është vetëm dy pikë larg zonës së “play-off”-it.
Nuk ka ku të shkojë më keq për ekipin elbasanas, i cili për më tepër po kalon një situatë shumë të vështirë në aspektin moral, duke marrë në konsideratë edhe ndalimin pak ditë më parë të presidentit Arben Laze.
Në këtë situatë, drejtuesit verdheblu duhet të ndërhyjnë patjetër në merkaton e janarit për të riorganizuar një ekip, i cili ndaj Besës nuk tregoi asgjë tjetër, veçse një mori me probleme.
Humbja e Elbasanit ndaj Besës ishte një sinjal i paralajmëruar që nga humbja një javë më parë në derbi ndaj Shkumbinit, ku verdheblutë luajtën shumë dobët.
Duke shtuar këtu mungesat e shumta, si Beqiri, Lako, Kacollja, Sheta dhe Bakalli, si dhe gjendjen e rënduar psikologjike pas çështjes “Laze”, kuptohet që në njëfarë mënyre skuadra do të haste vështirësi.
Por kjo nuk mund të përdoret si justifikim i mobilizimit të dobët të disa lojtarëve, të cilët, ashtu siç pranoi edhe Mirel Josa në fund të ndeshjes, meritojnë të mos jenë më pjesë e skuadrës së Elbasanit.
Nga ana tjetër, Besa mori një tripikësh me shumë zgjuarësi. Nuk bëri asgjë më shumë sesa Elbasani, por pati qetësinë e duhur për të pritur golin. Kavajasit e vizituan shumë rrallë portën e Osmanit, por shënuan me Mërtirin dhe pastaj monitoruan me qetësi rastet e pakta të vendësve.
Natyrisht, fitorja u shoqërua me shumë entuziazëm nga kavajasit, që në këtë mënyrë qëndrojnë në garë për vendet e para në klasifikim.
Protagonistë në këtë ndeshje u bënë edhe tifozët elbasanas, të cilët thuajse gjatë 90 minutave nuk i kursyen thirrjet në adresë të presidentit Arben Laze së bashku e banderolat përkatëse, ashtu si protagonist u bë edhe gjyqtari Lulaj, i cili u akuzua ashpër nga drejtuesit elbasanas si mjaft tendencioz.
Pjesa parë mbyllet në barazim pas një futbolli të mërzitshëm dhe me shumë faulle në fushën e lojës. Kjo pjesë mbyllet me një episod të çuditshëm, teksa një tifoz futet në fushën e lojës dhe ul në tapet një foshnjë, gjest vërtet i rrallë që kalon edhe me një përplasje mes tifozëve elbasanas dhe policisë.
Loja është më se e mërzitshme, me Elbasanin që nuk duket se është një skuadër në tërësinë e vet, ndërsa Besa pret vetëm kundërsulmet për të reaguar, duke përdorur cilësitë e disa lojtarëve në mesfushë.
Pikërisht nga një moment i tillë në një goditje dënimi vjen edhe goli mik, kur Mërtiri pranë zonës shënon. “Ruzhdi Bizhuta” shokohet, ndërsa vendësve nuk u bën mirë as futja në fushën e lojës e Bejzades e Hyshmerit për të marrë një pikë.
Vetëm një rast i Bejzades në fund është shumë pak për të justifikuar një ekip të shpërfytyruar tashmë dhe që ka nevojë patjetër për riorganizim të organikës së lojtarëve, pasi zona e ftohtë është shumë pranë. Ndërsa Besa konfirmon veten si një skuadër me pretendime serioze në kampionat.


Deklaratat:
Mirel Josa, trajner i Elbasanit: “Ishte një ndeshje që, ashtu si shkoi, mendoj se duhet të mbyllej në barazim. Ne duhej të ishim më të gatshëm, që falë edhe motit e terrenit, ta kishim goditur kundërshtarin. Besa ishte e organizuar mirë në mesfushë.
Mungesat bënë të vetën, ndërsa jam i kënaqur nga të rinjtë. Mbyllje e keqe për këtë vit, por lojtarët ndiejnë shumë presionin e renditjes mbi vete. Tani për tani s’mund të diskutojmë nëse mund të biem nga kategoria, por unë mund të them që kemi marrë garanci nga drejtuesit nga ana financiare.
S’dua t’u futem problemeve që ka pasur ekipi gjatë kësaj jave, por them që ai ka nevojë për rigjenerim. Pra, mendoj se do të ketë lëvizje lojtarësh në janar.”

Ilir Daja, trajner i Besës: “Ishte një mbyllje e suksesshme. Unë do të ndalem te rasti “Laze”, i cili ka dhënë një kontribut të madh për të gjithë komunitetin e futbollit në pesë vitet e fundit.
Drejtësia le të thotë fjalën e vet, por ne të paktën si komunitet futbolli duhet ta mbështesim të paktën moralisht në këtë situatë.”


Të veçanta
Ndeshja ka nisur me shtatë minuta vonesë.
Në tribunën “VIP”, veç presidentit Bizhdili, përkrah kryebashkiakut Sejdini ka qenë djali i presidentit Laze, Xhanin Laze.
Në stadium kanë qenë më shumë se 4 mijë tifozë, paçka se temperaturat kanë qenë shumë të ftohta.
Në stadium dalloheshin shumë banderola, si “Presidenti Laze, krenaria e tifozërisë elbasanase!”, “Arben Laze, jeta e futbollit elbasanas!”, “Arben Laze, ne me ty prapë jemi kampionë!”
Në minutën e 42-të një tifoz vendës ka kapërcyer rrethimin e brendshëm dhe ka ulur në tapet një fëmijë të vogël 1-vjeçar. Ndeshja ndërpritet dhe tifozi me fëmijën e vogël përcillet jashtë.

Tirana, festival golash me Bylisin


Bardheblutë shfryjnë dyfin me mallakastriotët, shënojnë plot gjashtë herë në portën e miqve
Tirana - Bylis 6-2
Shënues: Neves 2′ (aut), Memelli 3′, 35′, 57′, Muzaka 13′, Xhafaj 33′, Bakiu 11′, 48′ (11-m)
Tirana: Nallbani, Arapi, Pezo, Osmani (Lilaj 49′), Dabulla, Agolli, Sefa (Metani 74′), Devolli, Muzaka, Xhafaj, Memelli.
Trajner: A.Kola.
Bylis: Miresofksi, Novi (Beshaj 46′), Kapaj, Neves (Kule 46′), Muça, Hodo, Dalipi, Nenaj, Bakiu, Kabore.
Trajner: H.Dedja.
Kartonë të verdhë: Nallbani, Sefa, Kapaj
Gjyqtarë: A.Janku (Tiranë), E.Pjetrushi, F.Lame (Lezhë).

“Radiografia”
1′- Në aksionin e saj të parë, Tirana arrin të kalojë në avantazh. Memelli depërton nga e majta, kroson në zonë, por kthen mbrojtja, topin kontrollohet nga Agolli, i cili kërkon të gjejë në thellësi Xhafajn dhe topi i devijura nga Neves përfundon në rrjetë. 1-0.
3′- Aksion i shpejtë i Tiranës me Muzakën, që pason në të djathtë për Xhafajn, ky i fundit asiston Memellin, që fare pranë portës dyfishon rezultatin. 2-0.
11′- Goditje e lirë për Bylisin në hyrje të zonës bardheblu. Kapaj pason shkurt për Bakiun, që gjuan bukur nga rreth 20 metra dhe mposht portierin Nallbani. 2-1.
13′- Aksion i shpejtë i Tiranës, që nis në mesfushë me Dabullën, i cili nxjerr të lirë Memellin. Ky i fundit godet, por kthen mbrojtja, gjuan Xhafaj, pret portieri, por në herën e tretë nuk gabon Muzaka. 3-1.
18′- Sefa depërton në qendër, godet fort, por kontrollon saktë portieri mik.
26′- Gjuan më kokë Bakiu, ngjitur me shtyllën.
28′- Memelli depërton nga e djatha, gjuan prirët, pak centimetra larg shtyllës së djathë të portës mike.
29′- Bakiu gjuan fort nga distanca, duke e detyruar Nallbanin të bëjë një pritje të vështirë.
33′- Aksion i shpejtë i Xhafës nga e majta, që preferon ta hapë topin në të djathtë për Arapin, ky i fundit kroson për vlonjatin, që realizon më kokë ndoshta golin më të bukur të takimit. 4-1.
35′- Pa kaluar dy minuta Tirana realizon golin e pestë me Memellin, që depërton bukur në qendër, duke mposhtur përsëri Mirselofskin. 5-1.
43′- Bakiu përsëri vënë vështirësi Nallbanin nga distanca, vijon aksioni për miqtë, Kabore me kokë vë përsëri në vështirësi Nallbanin.
48′- Bylisi fiton një 11-metërsh, pas prekjes së topit më dorë nga Osmani, gjuan Bakiu dhe 5-2.
54′- Kundërsulm i Tiranës, dy kundër dy. Xhafaj pason për Memellin, që diagonalisht me portën nuk gabon. 6-2.
58′- Kros i Agollit, gjuan Xhafaj me kokë, çuditërisht topi përfundon jashtë.
59′- Bakiu, përballë Nallbanit, lëshon një parabël, topi që po ndiqej edhe nga Kabore, në mënyrë të pabesueshme përfundon jashtë.
66′- Kundërsulm i Tiranës me Devollin, që pason saktë për Memellin, por ky i fundit nuk gjen rrjetën, por traun.
75′- Hodo gjuan nga distanca dhe pret Nallbani.
79′- Nenaj shmang dy mbrojtës, gjuan prirët me portëm, por devijon me këmbë Nallbani.
89′- Kabore me kokë dhe pret me vështirësi “Tata”.
90′- Muzaka godet fluturimthi dhe pret përsëri portieri i Bylisit.

Komenti
Të gjithë dufin e akumuluar prej më se 9 javësh bardheblutë e kanë shfryrë ndaj Bylisit. Plot tetë gola janë shënuar në “Selman Stërmasi”, gjashtë nga Tirana dhe dy nga Bakiu i Bylisit.
Ishte parashikuar një fitore e lehtë për djemtë e Kolës, por jo kaq e thjeshtë. I vetmi fakt që mund ta shqetësojë trajnerin bardheblu është pësimi i dy golave apo rastet e shumta që kanë pasur miqtë.
Kuptohet, bardheblutë mund të kishin shënuar dyfishin e golave, por në të njëjtën kohë u kanë lejuar shumë hapësira miqve nga Ballshi. Tirana vazhdon të shpërthejë në fushën e saj, tani me më shumë gola, por është akoma e brishtë në aspektin mbrojtës.
Ndoshta loja e saj u ndikua edhe nga kalimi i shpejtë në avantazh, apo thellimi i mëtejshëm i diferencës. Pjesa e parë nisi e vrullshme nga të dyja skuadrat.
Deri në mintën e 13-të, çdo aksion shndërrohej në gol. Në minutën e tretë Tirana është gjendur në avantazhin e dy golave, si kurrë më parë. Në fillim vendësit u ndëshkuan nga autogoli i Nevesit, ndërsa dy minuta më pas ka dyfishuar Memelli.
Më pas i vjen radha Bylisit, që ngushton me një supergol të Bakiut, mirëpo vetëm dy minuta më vonë Muzaka thellon përsëri. “Dita e mirë shihet që në mëngjes” dhe takimi Tirana-Bylis shndërrohet në festival golash.
Nga fundi i pjesës së parë Tirana thellon përsëri me Xhafajn, që këtë radhë ka shënuar një gol shumë të bukur me kokë. Bylisi është dorëzuar, është shthurur taktikisht.
Të gjithë aksionet e Bylisit kthehen në bumerang, pasi bardheblutë janë shumë të shpejtë në kundërsulm. Dedja nuk ka çfarë t’u mësojë lojtarëve të tij.
Në pjesën e dytë shkodrani bën dy zëvendësime dhe duket sikur loja e Bylisit është më e qartë. Në të 48-tën minutë Bakiu ngushton nga pika e bardhë, por vetëm kaq.
Deri në fund rastet janë të shumta në të dyja portat, pasi skuadrat janë hapur. Tirana shënon një tjetër gol, me të zakonshmin Memelli, duke e mbyllur në 6-2 festivalin e golave në “Selman Stërmasi”. Tirana-Bylis më shumë u duk si miqësore, pasi detyrat taktike u zbatuan shumë pak nga të dy krahët.


Deklarojnë
Agustin Kola, trajner i Tiranës: “Të them të drejtën, nuk jam i kënaqur në çdo aspekt të lojës së skuadrës sime. E kam thënë edhe herë tjetër, se puna ime do të duket pas fazës së janarit.
Megjithatë, e rëndësishme është që e mbyllëm me fitore këtë takim. Tani do ta kalojmë më të qetë Vitin e Ri. E thashë që nuk jam i kënaqur, sepse nuk u çuan deri në fund detyrat që u pata ngarkuar futbollistëve. Për mua, rezultati i thellë nuk do të thotë asgjë, unë e kam fjalën për detyrat që duhet të zbatojnë futbollistët.”
Hysen Dedja, trajner i Bylisit: “Nuk kemi pasur rezultate të mira jashtë fushës. Sot nuk e prisja këtë humbje të thellë. U ndëshkuam shumë shpejt, madje dy herë, dhe futbollistët nga dëshira e madhe për t’u kundërpërgjigjur dolën nga detyrat.
Mund të shënonim më shumë gola, por kjo nuk vlen, sepse kundërshtari shënoi shumë më tepër se ne dhe na rrezikoi në mënyrë permanente. Pozitat na detyrojnë të kërkojmë përforcime gjatë merkatos.
Për këtë problem kam biseduar edhe me presidentin. Më 2009-n besoj se nuk do të jetë ky Bylis. I uroj të gjithë, gazetarë, futbollistë, trajnerë etj., gëzuar Vitin e Ri dhe sa më pak raste dhune nëpër stadiume.”


Të veçanta
- Në tribunën përballë nuk ndodhej asnjë tifoz, ndoshta për shkak edhe të motit të ftohtë.
- Për herë të parë në këtë sezon Tirana arrin të shënojë gjashtë gola në një takim.
- Ishte hera e parë që Memelli dhe Xhafaj shënonin të dy në një takim.
f- Megjithëse gjithçka kishte mbaruar, në një moment “Tata” nervozohet me tifozët, duke krijuar një situatë humori në “Selman Stërmasi”.

Nuk është gënjeshtër, fiton Partizani!

Të kuqtë rikthehen te fitorja pas 125 ditësh, duke mundur Flamurtarin dhe “gabimet njerëzore”
Partizani - Flamurtari 2-0
Shënues: Babamusta 2′, Bakaj 67′
Partizani: Xhika, Hallaçi, Pinari, Tafaj, Malota, Kalari (Shala 73′), Karabeci, Babamusta, Gjyla (Sulçe 81′), Ngjela, Bakaj (Përlleshi 85′). Trajner: Sh. Duro
Flamurtari: Moçka, Beqiri, Guga (Zeqiri 27′), Paniç, Veliu, Malaj (Rustemi 46′), Arifaj, Kuqi, Çaushaj, Strati (Shehaj 57′), Brajkoviç. Trajner: E. Liçaj
Gjyqtarë: R.Sadiku (Elbasan), E. Miho, F. Elezi (Durrës)
Kartonë të verdhë: Hallaçi, Karabeci, Babamusta, Malaj, Çaushaj

“Radiografia”
1′- Hallaçi provon nga distanca, por jashtë kuadratit.
2′- Bakaj nga e majta lëshon një top në zonë dhe është Babamusta që e shfrytëzon bukur me kokë dhe shënon gol. 1-0 për Partizanin.
4′- Goditje këndi për të kuqtë dhe është Bakaj që godet, topi largohet nga zona vlonjate dhe përfundon te Kalari, i cili gjuan fort, por jashtë.
35′- Pinari gjuan një goditje standarde nga mesfusha dhe është Babamusta që me kokë e ul topin te Bakaj, i cili shumë pranë portierit Moçka, gjuan, por reagon “gardiani” vlonjat.
36- Bakaj merr një top nga shokët, hyn në zonën e Flamurtarit, shmang një mbrojtës, por gjuajtja e tij ishte e lehtë, pret Moçka.
44′- Nga këndi Ngjela pason shkurt te Karabeci, që lëshon një top në zonë, Babamusta godet me kokë dhe largon portieri Moçka.
52′- Goditjen e këndit të miqve e gjuan Brajkoviç dhe është Veliu, që e godet me kokë topin, por jashtë.
59′- Në hyrje të zonës vlonjate Ngjela gjuan bukur, por grushton portieri Moçka.
67′- Gjyla pason bukur për Ngjelën. Ky hyn në zonë dhe gjuan, topi i goditur përplaset te portieri Moçka dhe përfundon te Bakaj, i cili e dërgon për herë të dytë në rrjetë. 2-0 për Partizanin.
80- Gjyla bën gjithçka bukur, por në fund humbet një rast të pastër shënimi, pasi vetëm për vetëm me portierin gjuan lehtë dhe pret Moçka.
83′- Sulçe nga e djathta, kros, me kokë Ngjela, por jashtë.
84′- Ngjela provon nga larg dhe pret Moçka.
92′- Paniç gabimisht pason te Ngjela, i cili vetëm për vetëm me Moçkën nuk arrin të realizojë.


Komenti
Pas 125 ditësh, të kuqtë e Shpëtim Duros janë kthyer te fitorja, pasi dje kanë mposhtur 2-0 Flamurtarin. Pra nuk është gënjeshtër, sepse më së fundi Partizani ka arritur të marrë fitoren e parë sezonale në shtëpi, e cila konsiderohet moment shprese.
Dje është vërtetuar “aksioma” e trajnerit Duro, i cili para ndeshjes me Flamurtarin deklaroi se kush ka fituar me Tiranën, nuk e ka bërë të njëjtën gjë me Partizanin.
Lojërat e mira që ka zhvilluar skuadra gjatë javëve të fundit kanë arritur të kurorëzohen me një tripikësh, që mungonte nga premiera e 24 gushtit me Lushnjën.
Takimi i djeshëm, që u zhvillua në stadiumin “Qemal Stafa”, ishte i gjithi nën kontrollin e Partizanit, i cili arriti të shënojë gol që në minutën e dytë.
“Demat” e djeshëm kanë arritur të sfidojnë Flamurtarin, që një javë më parë kishte fituar me Tiranën, por për herë të parë dje të kuqtë kanë arritur të mposhtin edhe “gabimet njerëzore” të gjyqtarëve.
Asistenti Eduard Miho ishte një barrierë e pakalueshme nga të kuqtë, pasi me ngritjen pa kriter të flmaurit nuk lejonte që Partiznai të avanconte drejt portës vlonjate.
Njëkohësisht edhe në pjesën e dytë pati vendime të lëkundura, por rasti më i pastër ishte ai minutës së 84-t, kur Bakaj pengohet në zonë nga mbrojtësi Beqiri, i cili për një moment keqkuptohet me gjyqtarin Sadiku, që dha faull në favor të Flamurtarit dhe ndëshkon me të verdhë sulmuesin e Partizanit.
Gjithsesi, dje të kuqtë kanë vendosur në vend karakterin e tyre dhe dhanë një leksion se po të jesh konkret, mund të sfidosh edhe vendimet tendencioze të gjyqtarëve.
Ndaj Flamurtarit, Partizani ka bërë më të paktën e mundshme për vitin 2008, pasi e mbylli me një fitore, e cila mund të jetë jetike për pjesën e mbetur të sezonit.
Dje të kuqtë treguan se, pavarësisht se janë në vend të fundit, përsëri kanë kapacitete për të qenë më lart në renditje.
Partizani i djeshëm ka qenë një ndërthurje e mirë e elementit me përvojë dhe atij me moshë të re, pasi dihet se në portë ishte 19-vjeçari Dashamir Xhika, në mbrojtje një tjetër 19 vjeçar, Renato Malota, në mesfushë 20-vjeçari Erando Karabeci, pa harruar edhe Elis Bakajn, që nuk është më shumë se 21 vjeç.
Në pjesën e dytë trajneri Duro aktivizon edhe dy të rinj të tjerë, 16-vjeçarin Salvatore Sulçe si dhe 17-vjeçarin Teodor Përlleshi, i cili i dha gjallëri sulmit të kuq në pesë minutat e fundit.
Partizani i djeshëm ka treguar shenja jete, por nuk dihet se sa do të zgjasin, pasi gjithçka është në dorë të presidentit Albert Xhani, i cili duhet të mbajë premtimet.
Të kuqtë janë larguar buzagaz nga stadiumi “Qemal Stafa”, pasi e prisnin prej kohësh fitoren, por kuleta e tyre vazhdon të mbetet e ndryshkur. Me fitoren e djeshme, Partizani kalon në kuotën e 13 pikëve dhe, falë golaverazhit më të mirë, lë në vend të fundit Lushnjën dhe trajneri Shpëtim Duro ka besim se të kuqtë do të mbeten në kategorinë superiore.

Deklaruan
Shpëtim Duro, trajner i Partizanit: “Në përgjithësi, kemi bërë lojëra të mira, pasi në “Qemal Stafa” kemi qenë superiorë, por kemi bërë një gabim në një moment jo të përshtatshëm me Apoloninë.
Me pak fat duhet të ishim në pozita të tjera. Për sa i përket gjyqtarëve, dua të them se ata janë të rinj dhe kërkojnë të bëjnë kursin te Partizani. Në kompleksitet gjykimi sot (dje) nuk ishte keq, por për fat fituam dhe nuk dua të bëj kritika.
E rëndësishme është se nuk jemi në vend të fundit, ngritja ishte se e mbyllëm 2008-n në vend të parafundit. Ishte një fitore që na ngre në aspektin moral. Pas bisedimeve që do të kem me presidentin, kam besim se Partizani do të ecë dhe nuk do të zbresë në kategorinë e parë.
Kjo fitore me Flamurtarin është një dritë jeshile për të ardhmen e skuadrës.”
Edmond Liçaj, trajner i Flamurtarit: “Për sa kohë jam në drejtim të Flamurtarit ndeshja e sotme ka qenë më e dobta si me rezultat, por edhe me lojë.
Lojtarët ishin të papërgjegjshëm në fushë, por kjo nuk e heq të drejtën për të thënë se edhe ne si staf kemi përgjegjësi për këtë humbje. Mendoj se skuadra ka probleme. Nuk është në natyrën e vlonjatëve që pas një ndeshjeje të mirë të priten paraqitje të tilla si me Partizanin.”


Të veçanta
- Në fillim të ndeshjes nuk ndodheshin më shumë se 200 tifozë, ndërsa në tribunën “VIP” ndodheshin kryetari i Bashkisë së Vlorës, Shpëtim Gjika, ish-kryeministri Bashkim Fino si dhe presidenti Dajtit, Naim Qarri. Ndërsa presidenti Albert Xhani nuk ishte i pranishëm në stadium.
- Ora e tabelës elektronike ka qenë një “elektron i lirë”, pasi sipas saj, ndeshja nisi në 11:30 dhe gjatë takimit akrepat kanë bërë disa rrotullime të plota.
- Vendimet e gabuara të anësorit Miho e kanë detyruar trajnerin Duro të lëshojë një batutë në drejtim të tij. “Çfarë bën ashtu, o kaptinëpatate!”
- Në një moment tifozët vlonjatë nisën të ofendojnë në kor, por kanë qenë gjestet e kryebashkiakut Gjika, që nga tribuna “VIP” solli qetësinë në stadium.
- Takimi i djeshëm ka qenë i fundit me fanellën e kuqe për Elis Bakajn, i cili në minutën e 85-të është zëvendësuar dhe ka dalë duke qarë nga fusha dhe ka marrë edhe duartrokitjet e tifozëve të pranishëm.
- Në takimin e djeshëm kapiten i Partizanit ishte mbrojtësi Pinari, që zëvendësonte portierin Shehi, i cili ishte i pezulluar. Në fund të ndeshjes Pinari ka hequr fanellën dhe ia ka bërë dhuratë një tifozi në shkallët e stadiumit.

Apolonia, fitorja e shkëputjes në renditje

Fierakëve u ka mjaftuar goli i Dhramit për të mposhtur Teutën, që thyhet sërish
Apolonia - Teuta 1 - 0

Shënues: Dhrami 63′ (11-m)
Apolonia: Haxho, Spaho, Shoshi, Elmazi, Kelmendi, Gega, Meto, Mirçeta, Haxhibuliç (Bratja 87′), Dhrami (Guri 81′), Bërkiç (Roshi 90′). Trajner: E.Karishik.
Teuta: Vashaku, Dushku, Likmeta, Ymeraj, Kote (Dosti 60′), Muçollari, Stafa (Malo 89′), Ahmeti (Qorri 81′), Vila, Hysa, Mile. Trajner: S.Starova.
Gjyqtarë: L.Mustafaraj, E.Biçaku, G.Qirici (Tiranë).
Kartonë të verdhë: Gega, Elmazi, Shoshi, Bërkiç / Likmeta, Ymeraj, Mile


“Radiografia”
1′-15′- Minuta kryesisht të qeta me lojë më tepër në mesfushë. Vihet re se miqtë janë më të disiplinuar dhe veprojnë më qartë, por pa pasur ndonjë rast të spikatur për të shënuar.
15′- Goditje këndi për Teutën. Ahmeti kroson në zonë, atje ku ndodhet tërësisht i zbuluar kapiteni Dushku, i cili ka gjuajtur bukur me kokë, por Haxho ka realizuar një pritje të shkëlqyer.
24′- Dy gjuajtje të njëpasnjëshme të Metos dhe Gegës, që kanë përfunduar jashtë kuadratit të portës së Vashakut.
39′- I ndodhur nën trysninë e Dhramit, Likmeta kthen fort një top te Vashaku, i cili në përpjekje për ta larguar, e dërgon në këmbët e sulmuesit fierak Bërkiç, por ky i fundit ka humbur ekuilibrin dhe topi largohet përfundimisht nga Ymeraj.
41′- Një gjuajtje e fortë e mesfushorit Meto nga krahu i majtë i sulmit vendës, por topi është pritur nga Vashaku.
44′- Bërkiç ka parë të zbuluar Dhramin dhe ka shërbyer në mënyrë të saktë për të, por vlonjati është bllokuar nga ndërhyrja e Ymerajt dhe Stafës në momentin final.
47′- Pasiguri e mbrojtjes durrsake, teksa topi endet në zonën e tyre. Përfiton Haxhibuliç, që ka gjuajtur fuqishëm me të djathtën e tij, duke detyruar portierin Vashaku që të bëjë një grushtim.
49′- Dhrami i ka shpëtuar mbulimit të mbrojtjes dhe ka dalë në pozicion ballor me portën, te harku i 16-shes. Gjuan fort, por topi kalon pak centimetra tej shtyllës së majtë pingule.
56′- Vashaku grushton një top të ardhur nga e djathta e sulmit fierak. Sfera shkon drejt Haxhibuliçit, i cili godet parabël me kokë dhe portieri durrsak, i dalë shumë përpara nga porta e tij, mezi e eviton goditjen në vijën fatale.
58′- Goditje këndi për Apoloninë. Krosi ka gjetur Dhramin, i cili gjuan tokazi dhe topi përplaset te Haxhibuliç dhe largohet me vështirësi nga Vashaku.
60′- Goditje e rrufeshme e Metos në pozicion të prirët nga rreth 20 metra largësi dhe portieri durrsak pret në dy kohë.
63′- Pas ekzekutimit të një goditjeje këndi për Apoloninë, Haxhibuliç ka gjuajtur drejt portës, por topi është prekur me dorë nga mbrojtësi Ymeraj dhe gjyqtari akordon 11-metërsh për fierakët. Nga pika e bardhë godet Dhrami saktë. 1-0 për Apoloninë.
68′- Likmeta provon me një gjuajtje nga një distancë e largët, por pa problem për portierin Haxho.
82′- Bërkiç kërcen fuqishëm me kokë, por topi i gjuajtur prejt tij kalon ngjitur me shtyllën traversale.

Komenti
Një tjetër fitore e bukur e Apolonisë, edhe pse me rezultat të ngushtë 1-0. Fierakët kanë treguar edhe ndaj durrsakëve se janë një skuadër që tashmë kanë filluar të mendojnë më seriozisht për kampionatin dhe, mbi të gjitha, loja e tyre ka qenë sërish në nivele të kënaqshme.
Pjesa e parë e takimit ka folur më tepër për miqtë nga Durrësi, të cilët kanë qenë më kërkues në drejtim të portës dhe më të qartë në veprimet e tyre.
Apolonia ka vuajtur paksa në mesfushë dhe Teuta fiton gjithnjë e më tepër epërsi territoriale, por vetëm kaq, pasi Apolonia i mbajti larg sulmuesit kundërshtarë nga porta e saj.
Gradualisht, ritmi i lojës në pjesën e parë do të vijë duke rënë dhe të dyja skuadrat duket se janë pajtuar me atë “paqe të bardhë” të gjysmës së parë të lojës.
Krejt e kundërta do të ndodhte në pjesën e dytë, ku Apolonia është shfaqur në mënyrë të menjëhershme me synimet e qarta të saj, duke u hedhur në sulm total qysh në minutat e para.
Për shumë momente loja zhvillohet e zhvendosur tërësisht në gjysmëfushën durrsake, ku Teuta mbrohet me forca të shumta. Porta e Vashakut ndihet gjithnjë e më e kërcënuar, ku në dy raste Haxhibuliç e Dhrami, por pa harruar edhe Meton, mund ta kishin ndëshkuar më parë Teutën.
Gjithsesi, do të duhej të vinte minuta e 63-të, kur pas shumë aksioneve dhe rasteve të shpërdoruara, Apolonia do të fitojë një 11-metërsh mëse evident pas prekjes së topit me dorë nga mbrojtësi Ymeraj.
Ekzekutimin do ta marrë përsipër sulmuesi Dhrami, i cili tregohet i pagabueshëm dhe kalon në avantazh ekipin e vet, duke ngritur peshë tifozërinë fierake, sërish e shumtë në numër në këtë takim.
Edhe pas shënimit të golit, Apolonia ruan ritmin e aksioneve të saj sulmuese, por tashmë është më e qetë dhe e konturon siç duhet situatën e ndeshjes, që shkon në favor të saj.
Pas golit të pësuar, Teuta nuk mundi dot të bënte reagimin e duhur dhe porta e Haxhos mbeti thuajse e pashqetësuar, përveç ndonjë tentative me gjuajtjet nga distanca, të pamjaftueshme për të gjetur golin e barazimit.
Ndryshimi i “kursit” të lojës së Apolonisë në pjesën e dytë diktoi dhe fatin e lojës, duke çuar në rrjedhën e një fitoreje tjetër, dëshmi e një ndryshimi të mentalitetit të lojës së fierakëve.
Mbi të gjitha, duhen përmendur veprimet e sakta në prapavijë, ku Spaho dhe Shoshi kanë dalë gjithmonë fitues në dyluftimet me Hysën dhe Vilën, duke u minimizuar atyre në maksimum rrezen e veprimit.
Tri pikë të tjera për Apoloninë, më se të merituara dhe kjo do të ishte dhe mbyllja më e mirë për këtë skuadër për vitin 2008. Skuadra fierakë ndihet më qetë tashmë që ka lënë pas në renditje edhe Bylisin dhe është afruar me ekipe të tjera, që synojnë mesin e tabelës e lart.
Gjendja e skuadrës dhe efekti “Karishik” janë premtues për një Apoloni ndryshe në pjesën në vijim të kampionatit, për të qenë më pranë objektivave që skuadra i ka vënë vetes. Ndërsa Teuta tashmë humbet shumë terren karshi rivalëve dhe vitin tjetër do ta ketë të vështirë.


Deklarojnë:
Esad Karishik, trajner i Apolonisë: “Ka qenë një fitore e madhe e Apolonisë dhe ua dedikoj lojtarëve, pa harruar të falënderoj në mënyrë të veçantë publikun tonë të mrekullueshëm, që ka pjesën e vet të padiskutueshme në sukseset tona.
Ndeshja ka qenë e vështirë. Nuk duhet harruar që kundërshtari ynë është ekipi që ka pësuar më pak gola se kushdo tjetër në këtë kampionat dhe e dinim që do të ishte një ndeshje me rezultat të ngushtë.
Luajtëm mirë dhe e merituam fitoren, madje kemi pasur edhe raste të tjera përveç golit.”
Sulejman Starova, trajner i Teutës: “Edhe në këtë ndeshje jemi ndier “jetimë” nga FSHF-ja. Nuk mund të caktohet një arbitër anonim për të gjykuar një ndeshje të niveli të tillë. Ishte ai që na dhuroi humbjen, për shkak të akordimit të 11-metërshit.
Pjesën e parë e dominuam totalisht, por u dëmtuam nga dhënia e 11-metërshit në atë moment. Ky gjyqtar është “viktima” e FSHF-së. E theksoj, ai nuk mund të gjykojë në nivele kaq të larta të futbollit. Kjo është një vazhdimësi, pasi ne kemi humbur më shumë se 6-7 pikë nga shkaku i gjykimeve në dëmin tonë.”

Të veçanta

- I pakursyer në dhënien e kartonëve të verdhë gjyqtari i ri Labian Mustafaraj. Plot 7 herë ka ndëshkuar futbollistët në këtë takim, 4 për fierakët dhe 3 për durrsakët.
- Sulmuesi Mlladen Bërkiç është zëvendësuar në minutën e 90-të nga i riu Odise Roshi. Në momentin e daljes nga fusha, sulmuesi serb ua ka falur fanellën e tij me numrin 9 tifozëve fierakë, por gjyqtari Mustafaraj e ka ndëshkuar me karton të verdhë, edhe pse futbollisti kishte dalë jashtë vijave kufizuese të fushës.

Nevil Dede firmos per Elbasanin, rikthehet ish-kapiteni




Merr fund telenovela e Nevil Dedes, pas kthimit ne Shqiperi. Pasi ka luajtur disa muaj ne Kinen e larget, “mbrojtesi i hekurt”, sikurse njihet ne kampionatin shqiptar, ka vendosur te luaje ne Elbasan, pikerisht atje ku fitoi titullin kampion verdheblu, ku u shendrrua ne idhullin e nje qyteti te tere, ku gezon akoma te njejtin respekt. Marreveshja mes paleve eshte zyrtarizuar sot, mes Dedes dhe kryebashkiakut te Elbasanit, Qazim Sejdini, por ne fakt, parimisht ishte arritur qe para arrestimit te presidentit Arben Laze, edhe me kete te fundit. Merret vesh se lojtarit kryeqytetas, Nevil Dedes, i jane plotesuar te gjitha kushtet financiare, te cilat jane metarializuar ne nje kontrate deri ne fund te sezonit futbollistik 2008-2009. Burime prane klubit verdheblu konfirmojne per “Sporti shqiptar” se kjo levizje ishte e nje karakteri taktik, pas arrestimit te presidentit Laze, i akuzuar per trafik droge, per te rritur moralin dhe entuziasmin ne radhet e Elbasanit. Sikurse dihet, Dede ka qene kapiteni qe e ka udhehequr skuadren verdheblu drejt titullit kampion para 3 sezonesh. Ai mbetet nje idhull per mjedisin futbollistik elbasanas, keshtu qe nje lider i tille ne fushe do te kompensonte sadopak mungesen e presidentit, i cili, per momentin gjendet pas hekurave, i arrestuar nga policia. Nevil Dede perflitej se mund te kalonte te Dinamo, por edhe Vllaznia kishte hyre ne loje. Sidoqofte, Elbasani u tregua me i shkathet dhe e beri te vetin lojtarin ne fjale. Kemi te bejme me nje rikthim te ish-kapitenit verdheblu ne “Ruzhdi Bizhuta”, dhurata me e bukur e drejtuesve te klubit per sportdashesit elbasanas, te tronditur jo pak pas arrestimit te presidentit Laze.