Adoleshentja padit njerkun 62-vjeçar: Më përdhunonte prej 1 viti

Berat Një denoncim i pazakontë ka tronditur Beratin pasditen e djeshme, ku një adoleshente ka akuzuar njerkun e saj se abuzonte seksualisht prej një viti me të. Lajmi bëhet i ditur nga burime të policisë lokale, të cilat bënë me dije se kanë arrestuar të akuzuarin për dhunë seksuale, emri i të cilit nuk bëhet i ditur për shkaqe hetimore. Vajza 14-vjeçare nga fshati Bilç i Beratit është paraqitur pasditen e djeshme në komisariat, e shoqëruar nga nëna e saj. Më pas ka nisur të rrëfejë dhunën seksuale të njerkut të saj 62-vjeçar, që sipas denoncimit kishte filluar 1 vit më parë. Vajza, nxënëse e klasës së tetë ka pohuar më tej se historinë e saj e kishin mësuar fillimisht mësueset e më pas psikologia e shkollës, të cilat e kishin bindur të denonconte njerkun në polici. Burimet nga policia e Beratit pohojnë se vajza ka thënë në dëshminë e saj se kishte frikë të dëshmonte që prej kohës që nisi dhuna seksuale mbi të, për shkak të ndonjë hakmarrjeje të dhunshme të njerkut ndaj nënës së saj. Pas dëshmisë tronditëse, vajza pritet t’i nënshtrohet ekspertizës mjeko-ligjore, përmes së cilës synohet të vërtetohet nëse është ushtruar dhunë seksuale mbi të. Menjëherë pasi kanë marrë denoncimin e vajzës dhe pohimin e nënës së saj, punonjësit e policisë së Beratit i janë drejtuar fshatit Bilç, ku edhe i kanë vënë prangat 62-vjeçarit të akuzuar për dhunë seksuale. Ky i fundit i ka mohuar akuzat para punonjësve të policisë, por ekspertiza mjeko-ligjore pritet t’i japë një përgjigje akuzave të ngritura nga adoleshentja.