Letër nga Mid'hat Frashëri zotit Berati, në vitin 1925.

nga **Morena** Tue Nov 08, 2011 9:01 am

Çfarë ju kujton/ngjall kjo letër????

Athinë, 15 tetor 1925

I dashur Zoti Berati,

...
Në Tiranë munda që të hedh themelet për krijimin e një drejtorie të
përgjithshme për ekonominë nacionale - tregti dhe industri. Në mos më
gënjefshin edhe këtë radhë, ashtu siç kanë bërë tre vjet e tëhu, besonj
që të bëhet një gjë e mirë. Sa për krijimin e njé drejtorije identike
për instalim të refugjatëvet dhe rikonstruktim të visevet të shkretuar,
edhe ajo hyri me një farë udhe, po akoma edhe jo fare afër pjelljes.
Ndryshe, kam edhe shpresë që Musa Juka, ministri i ri i Punëve Botore
dhe i Bujqësisë, të kujdeset pakë për bujqësinë tonë se, sot për sot,
gjithë sytë janë qepur te vajguri dhe gojët e stomakët janë çelurë për
të gëlltitur katranin e zi të skëterrës.
Puna e nënshtetësisë këtu në Greqi është krejt fëlliqur prej
ish-ministrit tonë*, ashtu si kundër që ju shkrova, jam ngarkuar që të
hynj në bisedime për një marrëveshje ose traktat. Të shohim Tirana a do
t'i japë këtë radhë rëndësinë e duhur çështjes.
Për profesorët e Korçës, Maliqi i vogël kishte telegrafuar në
ministri, duke thënë se 'nesër' vijnë që të bëjnë kontraktin. Nuk di për
ç'datë është ajo ''nesër'', po dhëntë Zoti dhe mos daltë si telegrafi
që na hiqte i mjeri Xhemil Dino për faljen e atyre hapsanikëve të gjorë
në Francë. Mua në Tiranë më kishte dalë gjumi për Liceun e Korçes, se
nuk dua të ma pranojë mendja që të mos jemi të zotët, ose të mos duam që
të rregullojmë punët e një shkolle të varfër.
Më bënë fjalë për Shën Naumin. Më 1 të gushtit i telegrafova
Ministrisë, Senatit dhe Kryesisë së Republikës, për t'u thënë se, unë e
shoh si rrezik të madh për pritmin tonë dhënien e Shën Naumit me dashkën
tonë; ky telegraf do të këndohesh në Senat; më 12 Ct, hoqa një telegraf
të dytë për ato tri zyra, plus për kryesinë e Parlamentit, duke
përsëritur edhe një herë akoma idenë time. Kjo ide, ep-më leje t'jua
kujtonj, i dashur zoti Berati, është ajo që ndiqja edhe në Paris, më
1920, për çështjen e Vlorës. Asgjë të japim nga trupi i vogël i
mëmëdheut tonë!
Më kujton Mario Roques-un. E di fort mirë rëndësinë e një udhëtimi
të tij dhe dobin 'e madhe, me qenë se arsimi (si pas një teorije, të
cilën ta kisha zhvilluar një herë) nuk ka dhe nuk duhet të ketë asnjë
rëndësi!?
Më bën edhe fjalë mbi hezitimin që paske ndjerë për të vajtur në
Tiranë. Pas atyre që ju kam shkruar gjer tani, më duket se më nuk duhet
t'ju mbesë as më i pakti i dyshimevet.

Të fala me shëndet.

Mid'hati

* Myfit Libohovës.