Deborë në Kukës, bllokohet lëvizja e 40 makinave

Rrethi i Kukësit është zgjuar sot i zbardhur nga dëbora e parë e këtij viti. Reshjet kanë shkaktuar probleme në akset nacionale si dhe bllokimin e 9 komunave. Mësohet se 40 makina janë bllokuar në aksin Kukës- Qafë Mali pikërisht te Kthesa e Kalimaashit, ku trashësia e dëborës ka arritur në 40 cm. Forca të policisë së qarkullimit rrugor ndodhen në vendngjarje për të monitoruar situatën dhe për t’i ardhur në ndihmë shoferëve të automjeteve. Sipas policisë makinat e bllokuara janë pa zinxhirë dhe lëvizja e tyre është pamundur. Një borëpastruese po punon për hapjen e rrugës.

Bora ka bllokuar akset nacionale që lidhin qytetin e Kukësit me 9 komunat e rrethit verilindor. Mësohet se trashësia e dëborës ka arritur në 40-50 cm. Komunat e bllokuara janë Kalis, Arrën Zapot, Curraj, Grykëcaj Ujmishti, Bushtrica, Topojani dhe Shishtaveci.
Trashësia e dëborës në aksin që lidh Kukësin me Hasin arrin në 30 cm. Policia informon se është i bllokuar qarkullimi në Qafën e Toblit, si dhe aksi rrugor Has- Qafë Prush.

Mësohet se disa komuna si Bicaj dhe dy lagje, nr 2 dhe nr 3, të qytetit të Kukësit nuk po furnizohen me energji. Stuhia me reshje shiu që në orët e para të mëngjesit është kthyer në borë dhe erërat e forta kanë rrëzuar disa shtylla elektrike duke shkaktuar dhe avari në furnizimin me energji të qytetit. Gjithashtu nga stuhia janë dëmtuar edhe disa cati shtëpish banimi.

Moti i keq ka shënuar dhe incidentin e parë në këtë qytet. Për shkak të erës së fortë një cisternë ka rënë nga një pallat dhe ka dëmtuar një kalimtar të rastit. I plagosuri Haxhi Tota 70 vjec është dërguar menjëherë në spital ku ndodhet në gjendje të rëndë shëndetësore.

Në rrethin e Mirditës mësohet se moti i keq me erëra të forta dhe reshje bore, në disa komuna, ka dëmtuar disa shtylla elektrike.

Në aksin Librazhd- Elbasan ka rrëshqitje toke dhe qarkullimi është vetëm me një kalim. Ndërsa në të gjithë qytetin e Fier mungon furnizimi me energji elektrike. Stuhia e mbrëmshme me reshje të dendura shiu ka prishur fibrat e transmetimit.