> Greqia nis kerkimet ne detin Jon, Aleanca Kuqezi reagon ndaj Greqis.

Greqia ka njoftuar për një program kërkimesh të naftës dhe gazit në
Detin Jon, në zonën detare të Korfuzit, qytetit fqinj me Shqipërinë.
“Zëri i Amerikës” në shqip bën të ditur sot se ky Program pritet të
përfshijë vitin e ardhshëm kompani të huaja për kërkime në këtë zonë.
Ndërkohë, Greqia dhe Shqipëria nuk kanë arritur ende të finalizojnë një
marrëveshje për kufijtë detarë mes të dy vendeve.

Sipas burimeve
të shtypit grek, që i referohen zyrtarëve të Ministrisë greke të
Mjedisit dhe Energjisë, ky program kërkimi nafte dhe gazi pritet të
përfshijë vitin e ardhshëm angazhimin e kompanive ndërkombëtare në
kërkimet në këtë zonë detare. Kërkimet, sipas njërës prej gazetave
kryesore greke “To Vima”, bazohen në parimin e “vijës së mesit”, apo
distancës së baras-larguar në mes të të gjitha territoreve të vendeve të
interesuara për të vendosur kufijtë e zonës detare të Detit Jon.

Burimet
e shtypit grek pohojnë se Qeveria greke nuk do të marrë pjesë në
shpenzimet për studimet sizmike. “Qeveria greke synon të nxjerrë në pah
struktura gjeologjike dhe burimet e mundshme të naftës, për të nisur në
vitin 2012 një seri dhëniesh me koncesione në fusha të caktuara detare”,
shkruan “To Vima”.

Hapat vijnë pas një serie reformash në
privatizime dhe koncesione që qeveria e Jorgo Papandreut ka ndërmarrë
kohët e fundit për të zbutur efektet e krizës së rëndë ekonomike që ka
mbërthyer vendin.

Mbas këtij lajmi ka reaguar “Aleanca Kuqezi”,
duke i bërë apel institucioneve shqiptare që të reagojnë për këtë rast,
për të mbrojtur integritetin territorial të Shqipërisë. Aleanca Kuqezi
ka shprehur qëndrimin kundër kërkimeve për naftë dhe gaz në detin Jon,
pa përcaktuar më parë kufijtë detarë mes Shqipërisë dhe Greqisë.
Përfaqësues të Aleancës Kuqezi kërkuan që institucionet shqiptare të
hetojnë këto kërkime që shteti grek synon të ndërmarrë në afërsi të
bregdetit shqiptar dhe të garantojë që i gjithë ky proces të jetë
transparent pasi ekziston shqetësimi që këto kërkime mund të zhvillohen
edhe në ujërat shqiptare, duke cenuar kështu sovranitetin shtetëror
Shqiptar.

Aleanca Kuqezi shprehu gjithashtu qëndrimin se kufijtë
detar duhet të përcaktohen sipas standardeve evropiane, bazuar në të
drejtën dhe praktikën ndërkombëtare dhe në asnjë mënyrë në shkelje të
Kushtetutës së Shqipërisë