Terapia ndaj sëmundjes kronike

Kjo sëmundje ndikon gjithashtu në ekonominë familjare të vetë pacientit dhe të kujdesit shëndetësor. Artriti Rheumatoid është një sëmundje inflamatore autoimune kronike, e cila prek artikulacionet, por edhe organet e tjera.






Shkaqet

Shkaku i kësaj sëmundjeje nuk është konfirmuar dhe ende është i paqartë, megjithatë është parë se ndikojnë një sërë faktorësh ku ndër më kryesore janë trashëgimia, përdorimi i duhanit, alkoolit, kafesë etj. Sëmundja fillon të dëmtojë gradualisht si artikulacionet e vogla të duarve dhe këmbëve, ashtu dhe ata të mëdha, në të gjithë trupin duke rezultuar klinikisht në skuqje, ënjtje, dhimbje dhe paaftësi për të lëvizur këto artikulacione. Por përveç kësaj mund të shfaqen edhe shenja ekstra-artikulare si manifestime kardiovaskulare, uro-genitale, respiratore, gastrointestinale, të cilat mund të kenë një ndikim të rëndësishëm në uljen e jetëgjatësisë së pacientit.

Sëmundja

Në këtë sëmundje ka shumë rëndësi trajtimi sa më i hershëm i saj pas vendosjes së diagnozës në mënyrë që të parandalohen ndryshimet e parikthyeshme në artikulacion. Ky trajtim ka si objektiva kryesorë parandalimin ose kontrollin e dëmtimit të artikulacioneve parandalimin e paaftësisë eliminimin ose reduktimin e dhimbjes. Artriti Rheumatoid është trajtuar dhe vazhdon të trajtohet me një sërë preparatesh. Ndër ta mund të përmendim antiinflamator jo steroidë të cilët veprojnë më tepër në trajtimin e simptomave sesa të mekanizmit bazë të sëmundjes, glukokortikoidët që janë preparate kundër inflamacionit, si dhe një grup i madh preparatesh të quajtur DMARD që janë modifikues të sëmundjes. Në këtë grup të fundit bëjnë pjesë një numër i konsiderueshëm preparatesh të cilët kanë aftësinë të veprojnë në një pjesë të caktuar të mekanizmit kompleks të sëmundjes duke e mbajtur atë nën kontroll.