Kush janë 10 njerëzit më të pushtetshëm në Shqipëri

nga capkenja Thu Dec 10, 2009 8:35 pm

Kush janë 10 njerëzit më të pushtetshëm në Shqipëri

Nga Berisha, Rama, Meta e deri tek guvernatori Ardian Fullani

Pushteti nuk është vetëm një term. Për shqiptarët akoma edhe më shumë. Ai është një instrument për të siguruar një jetëgjatësi sa më të madhe në krye masave. Megjithatë ai mbetet fushëbeteja ku takohen shumë personazhe të cilat në një farë mënyre influencojnë direkt apo indirekt në jetët tona. Duke marrë shkas nga publikimi i listës në revistën prestigjoze amerikane “Forbes” mbi njerëzit më të pushtetshëm në botë, gazeta “Tirana Observer”, po boton nnjë listë të personave më të pushtetshëm në Shqipëri. Sigurisht në pamundësi për të përdorur të gjitha kriteret dhe parametrat e “Forbes” për të përkufizuar pushtetin, kjo listë ka për qëllim të bëjë për herë të parë një klasifikim, se kush janë sot njerëzit më të pushtetshëm. Në vend të parë, është rënditur njeriu që ka më shumë influencë me vendimarrjen e tij. Ai është kryeministri Sali Berisha i cili ndodhet në politikën shqiptare prej 20 vjetësh dhe madje ka lëshuar rrënjë brenda saj. Prej tij varen drejpërsëdrejti fatet e të gjithë shqiptarëve brenda kufijve. Vendin e dytë e pason njeriu i cili ndodhet ekzaktësisht në krahun e kundërt të tij. Por edhe Edi Rama, paçka se nuk ndodhet në të njëjtat pozicione praseprapë kontrollon bashkinë më të madhe në vend dhe kryeson partinë më të madhe opozitare e cila në votimet e fundit numëroi 700 mijë simpatizantë të cilët votuan për të. Në treshen e parë nuk kishte se si të mungonte ministri i Jashtëm dhe kreu i Lëvizjes Socialiste për Integrim i cili falë një marrëveshje të minutës së fundit me Berishën arriti të kalonte nga opozita në pushtet. Aktori tjetër që rënditet në vendin e katërt është presidenti Bamir Topi i cili është garantuesi dhe arbitri i institucioneve. Më poshtë vjen Prokuroria e Përgjithshme Ina Rama e cila ndodhet gjithmonë nën presionin e politikës për shkak se disa prej të pandehurve vijnë nga e njëjta familje. Dy proceset ndaj ministrave Lulzim Basha dhe Fatmir Mediu tashmë i ka humbur me gjykatën, por nuk është ende e thënë se tashmë institucioni i akuzës ka mbyllur sytë. Mesin e zë kryetarja e Kuvendi Jozefina Topalli e cila tani drejton një parlament të përgjysmuar dhe pa një opozitë. Pas saj rënditet një grua tjetër e sapo emëruar në krye të Gjykatës së Lartë e cila ka nisur një debat për zgjedhjen e anëtarëve të rinj të Këshillit të Lartë të Drejtësisë. Vendet e fundit të listës, jo për nga rëndësia, e mbyllin ministri i Brendshëm Lulzim Basha, ai i Financave Ridvan Bode dhe guvernatori i Bankës së Shqipërisë Ardian Fullani.

1. Sali Berisha
Kryeministër i Shqipërisë
Vjeç:65
Sali Berisha, njeriu më i pushtetshëm në Shqipëri. Qëndron në krye të qeverisë dhe partisë më të madhe e cila ndodhet aktualisht në pushtet prej 20 vjetësh. Në dorën e tij ndodhen projektet më të mëdha të Shqipërisë dhe prej vullnetit dhe punës varen fatet e hyrjes së Shqipërisë në Bashkimin Europian. Është politikani më karizmatik në vend dhe po aq kontrovers në të njëjtën kohë. Arriti të anëtarësojë vendin në Aleancën Atlantike por në të njëjtën kohë është i rrethuar gjithmonë nga polemika. Është i akuzuar për trazirat e vitit 1997 dhe së fundmi opozita e akuzon edhe për afera korruptive dhe përgjegjës në tragjedinë e Gërdecit ku humbën jetën 26 persona dhe u plagosën mbi 300 të tjerë. Ndërkohë ka arritur të vendosë me mjeshtri nën të njëjtën çadër qeverisëse edhe ish-kundërshtarin e tij të betuar Ilir Meta.

2. Edi Rama
Kryetar i Bashkisë së Tiranës dhe i Partisë Socialiste
Vjeç:45 vjeç
Lideri politik i një populli prej 83 mijë socialistësh, drejton dhe infuencon partinë më të madhe opozitare në vend. Gëzon mbështetjen e 700 mijë simpatizantëve të majtë që e votuan në zgjedhjet e fundit parlamentare. Është njeriu që ka në dorë pothuajse gjysmën tjetër të fateve të vendit. Qëndron prej nëntë vitesh në krye të bashkisë më të madhe në vend. Në mandatin e tij të parë i ndryshoi fytyrën një kryeqyteti të katandisur me kioska, falë një vizioni rinovues urbanistik. Aktualisht ndodhet në opozitë dhe është rikonfirmuar lider i saj. Ka vendosur të bojkotojë parlamentin dhe i ka prishur të gjitha urat e një dialogu me mazhorancën me të cilën ka nisur një betejë politike. Është përfolur dhe akuzuar nga mazhoranca për afera në lidhje me lejet e ndërtimit por deri tani për të nuk është hapur ende një proces gjyqësor.

3. Ilir Meta
Zv/kryeministër dhe ministri i jashtëm, kryetar i LSI
Vjeç:42
Lideri i Lëvizjes Socialiste për Integrim njihet ndryshe edhe si pragmatisti më i madh në politikë. Aktualisht në vendimarrje është gjërësisht më i pushtetshëm se rivali i tij politik Edi Rama. Drejton një parti e cila me katër deputetët e zgjedhur në zgjedhjet e fundit parlamentare në vend, arriti të shmangë një ngërç politik. Ish-kryeministër dhe ish-socialist në të njëjtën kohë, ka drejtuar vendin dhe ka ushtruar pa frikë pushtetin e tij për tre vjet me rradhë, deri në momentin kur vendosi të largohej nga partia mëmë. Tani drejton një parti e cila deri dje ishte kundërshtare e përhershme e Sali Berishës, ndërsa tani ndodhet përkrah tij. Ka qënë zëri më i fuqishëm që kundërshtoi miratimin e Kodit Elektoral dhe ishte aq i vendosur sa të shkonte deri në grevë urie dhe ngriu përfundimisht marrëdhëniet me liderin e PS, Edi Rama.

4. Bamir Topi
President i Shqipërisë
Vjeç:52
President prej më shumë se dy vjetësh, vjen nga rradhët e partisë Demokratike. Ishte numri dy pas Berishës, dhe tani drejton institucionin më të lartë të shtetit shqiptar. Edhe pse me kompetenca të kufizuara praseprapë është kthyer më shumë në një zë kundër kryeministrit dhe kryetares së parlamentit e cila është një kundërshtare e flaktë e tij. Raportet me këta dy të fundit janë vetëm institucionale. Ka një influencë mbi politikën shqiptare. Në mjaft raste opozita e majtë i ka kthyer sytë nga Bamir Topi duke i kërkuar të tregohet i kujdesshëm përpara se të japë një verdikt përfundimtar mbi ligje të veçanta që i interesojnë vendit. Është i njohur si një ekuilibrist i madh dhe në ato situata të cilat kanë kërkuar një vendim. Gjithashtu drejton edhe Këshillin e Lartë të Drejtësisë dhe është aktiv në vendimet mbi drejtësinë.

5. Ina Rama
Prokurore e Përgjithshme
Vjeç:38
Është kryeprokurja më e re së cilës i ka rënë mbi supe procese të rëndësishme për ti menaxhuar. Drejton institucionin më delikat të vendit që ka për detyrë vetëm të akuzojë. Ndodhet në mënyrë konstante nën presionin e politikës dhe deri tani ka përballuar proceset më të vështira të këtij dhjetëvjeçarit të fundit. Humbi dy betejat me gjykatën ndaj dy ministrave të qeverisë Berisha. Lulzim Bashës, për abuzimet me rrugën Durrës-Kukës dhe Fatmir Mediut për përgjegjësinë mbi tragjedinë e Gërdecit. Megjithatë kjo nuk e ka disinkurajuar dhe aktualisht ka ndërmarrë një fushatë kundër korrupsionit në këtë institucion. Ka krijuar marrëdhënie të mira me homologët europianë dhe është e besuara e ambasadës amerikane në Shqipëri. Shpeshherë krah saj ndodhet ambasadori Uidhers. Njihet si një grua që nuk pranon kompromise.

6. Jozefina Topalli
Kryetare e Kuvendit
Vjeç:46
Kryetare e Kuvendit për të dytën herë, po drejton një parlament të përgjysmuar. Është një nga besniket e kryeministrit Berisha dhe udhëton në të njëjtën gjatësi valësh me këtë të fundit. Ka influencë në parlamentin shqiptar si gjatë mandatit të kaluar dhe këtë aktual. Në mjaft raste ka debatuar me opozitën dhe në rastin e deputetit socialist Taulant Balla nxiti truprojat ta nxirrnin prjashtë me frazën e famshme në dialekt “Nxirreni prej zhelesh këtë”. Megjithatë në mandatin e kaluar nuk është kufizuar vetëm me aktivitetin e një kryeparlamentareje por nisi edhe një tur intensiv diplomatik për anëtarësimin e Shqipërisë në NATO dhe në BE. Tani pozita e saj është reduktuar nga ardhja në krye të diplomacisë të Ilir Metës.

7. Shpresa Beçaj
Kryetare e Gjykatës së Lartë
Vjeç: 58 vjeç
E sapozgjedhur në krye të Gjykatës së Lartë nga presidenti Bamir Topi, Shpresa Beçaj ka hapur një debat, i cili e ka origjinën e tij nga bojkoti parlamentar i opozitës socialiste. Zgjedhjen e anëtarëve të rinj të Këshillit të Lartë të Drejtësisë. Ajo i ka kërkuar politikës që të gjejë një gjuhë të përbashkët për ta kaluar sa më shpejt emërimet e anëtarëve të rinj. Ndërkohë që kjo e fundit i ka kërkuar që ta kalojë këtë proces pa nevojën e kartonave jeshil. Por në të njëjtën kohë asaj i duhet të menaxhojë edhe procese të tjera të rëndësishme si ajo Gërdecit. Gjithashtu ndodhet në mesin e një reformimi të shpallur në tërë sistemin gjyqësor shqiptar.

8. Ridvan Bode
Ministër i Financave
Vjeç: 50
Drejton ekonominë shqiptare në rritje deri para krizës që mbërtheu të gjitha tregjet ndërkombëtare. Me një karrierë të gjatë në politikë dhe në ekonomi menaxhon të gjithë të ardhurat dhe arkën e shtetit. Është i besuari i Berishës dhe gjatë vitit të fundit është përballur me kritikat e Fondit Monetar Ndërkombëtar në shumë raste, duke nisur që nga debati për rritjen ekonomike e duke përfunduar tek ai i djeshmi mbi buxhetin e vitit 2010. Megjithatë mbetet njëri nga ekonomistët më të vjetër në vend dhe në kabinetin e kaluar të qeverisë mbante postin e ministrit të ekonomisë. Politikat fiskale që ndiqen dhe orientimi i ekonomisë shqiptare varen drejpërsëdrejti nga Ridvan Bode.

9. Lulzim Basha
Ministër i Brendshëm
Vjeç:35
Padyshim është numri dy dhe pasardhësi i Sali Berishës. I njohur nga të gjithë më shumë si ministri i rrugës Durrës-Kukës sesa posti i ministrit të Brendshëm që mban aktualisht, Lulzim Basha bën pjesë tek prurjet e reja në partinë Demokratike e cila e katapultoi në ministrinë e Transporteve. Por shumë shpejt ai do të bëhej shënjestër kryesore i opozitës si mbartës i korrupsionit në shifra që arrijnë miliona euro. Atë që nuk arriti dot si ministër i Transporteve do ta realizonte si ministër i Jashtëm, në momentin kur do të bëhej dëshmitar i anëtarësimit të Shqipërisë në NATO. Gjatë kësaj periudhe do të ndërmerrte një aktivitet të ngjeshur diplomatik. Shumë thonë se ai së shpejti do të jetë alternativa e partisë Demokratike për bashkinë e Tiranës.

10. Ardian Fullani
Guvernator i Bankës Qëndrore
Vjeç:54
Është numri një i Bankës së Shqipërisë. Njeriu që drejton monedhën shqiptare është më i paguari në Shqipëri, me një pagë mujore që kap vlerën e 5 milion lekëve. Njohës i mirë i politikave monetare vendos dhe influencon mbi taksat e interesit dhe menaxhimin e lekut. Supervizon raportet dhe bankat e nivelit të dytë duke pasur një ndikim të drejpërdrejtë mbi financën në vend. Në vendimin e tij të fundit vendosi ta ulë taksën e interesit dhe raportoi se shqiptarëve u është kthyer besimi tek bankat, falë rritjes së depozitave. Megjithatë edhe atij i duhet ti bëjë mirë llogaritë me një krizë financiare dhe një ekonomi shqiptare e cila noton akoma në informalitet.