Ja si mund të përgjigjet Kushtetuesja për çështjen e mandatarit!?

Publikuar: 18:17 / 21.06.2014



Burime nga Gjykata Kushtetuese kanë thënë për Gazetën Blic se Gjykata Kushtetuese e Kosovës i ka tri opsione se si të përgjigjet presidentes së vendit, Atifete Jahjaga, për çështjen e mandatarit për formimin e qeverisë së re.

Sipas këtij burimi, opsioni i parë ka të bëjë me atë se Gjykata Kushtetuese mund t’i rekomandojë presidentes Jahjaga që mandatar të caktohet kandidati i partisë që ka fituar më së shumti vota në zgjedhje, në këtë rast kandidatit të PDK-së, Hashim Thaçit.

Sipas këtij opsioni, në rast se brenda 15 ditësh ky kandidat nuk mund ta formojë qeverinë, atëherë propozohet kandidati tjetër që i ka 10 ditë afat ta bëjë qeverinë, sipas të njëjtës procedurë. Pra, që prapë partia e parë ta ketë të drejtën ta bëjë qeverinë.

Ky, ndërkaq, ka qenë edhe argumenti i vazhdueshëm i njerëzve të Partisë Demokratike të Kosovës. Edhe juristët e kësaj partie, si Arsim Bajrami e Hajredin Kuçi, vazhdimisht janë thirrur në këtë pikë.

Opsioni i dytë, sipas këtij burimi brenda Gjykatës Kushtetuese, ka të bëjë me një interpretim të “ndërmjetëm”. Ky opsion nënkupton që mandatari i parë të jetë partia e parë, pra PDK, e cila ka 15 ditë kohë të bëjë qeverinë, dhe nëse nuk arrin, atëherë të drejtën e formimit të qeverisë e ka partia e dytë, që ka afat 10 ditë.

“Ky është opsioni më i mundshëm që të ndodh, për faktin se është një lloj ‘kompromisi’ dhe në anën tjetër është një praktikë parlamentare thuajse në shumicën e vendeve, ku ka sistem parlamentar të qeverisjes. Prandaj, edhe anëtarët e Gjykatës Kushtetuese mund të thirren në praktika të ndryshme parlamentare”, tha ky burim i Gazetës Blic.

Dhe, opsioni i tretë, sipas këtij burimi, Gjykata Kushtetuese mund ta interpretojë çështjen e mandatarit për formimin e qeverisë që kush e ka shumicën në Kuvend, pra edhe ta bëjë qeverinë.

“Në këtë situatë, Gjykata Kushtetuese mund të mbështetet në nenin 84, pika 14 të Kushtetutës së Kosovës, duke ia dhënë mundësinë që partitë e koalicionit LDK- AAK-Nisma ta formojnë qeverinë, sepse e kanë edhe shumicën në Kuvend, natyrisht edhe me mbështetjen e Vetëvendosjes”, shton burimi.

Pas zgjedhjeve të parakohshme parlamentare të 8 qershorit, PDK doli si partia e parë, duke fituar 30 qind, mirëpo, partitë tjera, LDK, AAK e Nisma, e bënë një marrëveshje për bashkëqeverisje, duke e nominuar për kryeministër Ramush Haradinajn dhe duke e lënë kështu jashtë loje PDK-në e Hashim Thaçit.

Presidentja e vendit, Atifete Jahjaga, që sipas Kushtetutës së vendit duhet ta caktojë kandidatin për ta bërë qeverinë, nuk e bëri këtë veprim krye në veti, por kërkoi interpretim të kësaj çështjeje nga ana e Gjykatës Kushtetuese të vendit.

Ndërkohë, para disa kohësh kryetari i Gjykatës Kushtetuese, Enver Hasani, e kishte botuar një komentuar, ku shpjegohet më detajisht Kushtetuta e Kosovës dhe në bazë të këtij komentuari, mandati për ta formuar qeverinë i takon vetëm partisë apo koalicionit që ka fituar më shumë vota në zgjedhje. Mirëpo, neni 84, pika 14 e Kushtetutës së Kosovës, e thotë të kundërtën, ku thuhet se presidenti e cakton mandatarin e partisë apo koalicionit që ka shumicën në Kuvend. /Gazeta Blic/