Burgim i përjetshëm për ish-presidentin turk - shqiptarin Kenan Evren

Publikuar: 14:25 / 18.06.2014



Mediat turke raportojnë se ish-presidenti Kenan Evren dhe ish-komandanti i Forcës Ajrore, Tahsin Sahinkaya, janë dënuar me burgim të përjetshëm për shkak të rolit të tyre në grushtshtetin ushtarak të vitit 1980.

Evren, 96 vjeç, dhe Sahinkaya, 89, janë akuzuar për organizimin e kushteve për ndërhyrje ushtarake dhe më pas për kryerjen e grushtshtetit.

Ata janë të vetmit liderë të gjallë të grushtshtetit, i cili ka sjellë në pushtet regjimin ushtarak.

Ndjekja e tyre penale është bërë e mundur pasi qeveria e kryeministrit Recep Tayyip Erdogan ka bërë ndryshimet kushtetuese në vitin 2010, të cilat u kanë marrë imunitetin.

Ata janë gjykuar qysh në vitin 2012, por asnjëri prej tyre nuk i ka ndjekur seancat për shkak të gjendjes shëndetësore.

Evren e ka shpëtuar vendin nga sulmet terroriste dhe rreziku për luftë civile. Ai është promotori i parë i zhvillimit ekonomik të Turqisë.

Kenan Evren (i lindur më 1917), presidenti i shtatë i Republikës së Turqisë, kishte origjinë shqiptare.

Kur në vitet ‘80 të shekullit të kaluar, ai viziton ish-Jugosllavinë, i pyetur nga zyrtarët jugosllavë nëse ka ndonjë kërkesë, ai thotë se do të ishte shumë i lumtur nëse i vendosej në dispozicion një helikopter dhe dy kurora me lule. Kur e pyetën përse dhe për ku, ai tha se donte t‘i vendoste dy kurorat mbi varret e gjyshërve të tij në Kumanovë!

Nuk harroi të shtonte se në dejet e tij rridhte gjak shqiptar, gjë që i çuditi dhe ndoshta nuk i bëri të ndihen mirë zyrtarët serbë të ish-Jugosllavisë.

Ndërkaq, në një intervistë të vitit 1992 për mediat e Kosovës, ai ka thënë: "Po, është e vërtetë se jemi me prejardhje nga e Presheva e Kosovës. Babai im Hajrullahu u lind në një fshat afër Preshevës që quhet Bilac". /REL/Telegrafi/