Ndalet të blejë fruta, shitësja ia vjedh 35 mijë franga

Publikuar: 19:54 / 26.05.2014



Një shtetas kosovar ka rënë pre e vjedhjes, në kryqëzimin e Rrugës së Kombit me superstradën Fushë-Krujë – Lezhë. Sipas burimeve zyrtare nga policia, kosovari ka ndaluar në vendin e quajtur Fushë-Milot të rrethit të Kurbinit, tek një dyqan ambulant për të blerë fruta, por ka lënë autoveturën e tij të hapur.

Në momentin që ai është kthyer në makinë, ka vënë re se i mungonin portofoli i gruas dhe një celular Iphone-5. Pas debatit me shitësen, e dyshuar prej kosovarit për vjedhjen, ai ka njoftuar policinë, e cila, pasi ka mbërritur në vendin e ngjarjes, ka arrestuar 49-vjeçaren Bukurije Zeneli, me banim në fshatin Shullaz, transmeton BW.

Arrestimi i saj është kryer pasi dyshohet se në Fushë-Milot, Kurbin, duke qenë shitëse frutash tek një kioskë, brenda në veturë i ka vjedhur çantën me shumën prej 35.000 (tridhjetë e pesë mijë) franga zvicerane dhe një IPHONE-5, shtetases N.Z., 54 vjeç, banuese në Randobravë, Prizren, Kosovë.

49-vjeçarja Zeneli nuk e ka pranuar vjedhjen, ndërkohë që policia vijon hetimet. Materialet i kanë kaluar Prokurorisë së Rrethit Gjyqësor Kurbin për veprën penale të “Vjedhjes”. /Telegrafi/