I moshuari, u shkruan tre fëmijëve që e braktisën

Publikuar: 15:17 / 6.05.2014



Tomor Kalo, pensionist dhe poet në shpirt, rrëfen braktisjen nga fëmijët e tij dhe jetën në vetmi. U bën apel fëmijëve të kujtohen dhe të mbështesin të moshuarit.

Është i moshuar dhe burrë sa i ëmbël, po aq edhe fisnik. Autor i mbi 30 mijë vargjeve, një “det poetik” do thoshte një shkrimtar i njohur, por edhe një mik i tij.

Ai është Tomor Kalo, i “thyer” në moshë, por vargu i tij është një frymëzim tejet befasues. E takojmë te Qendra Sociale Multidisiplinare Tiranë, e njohur dikur si shtëpia e të moshuarve.

Teksa hymë në portën e madhe të qendrës shikojmë dhe përpiqemi të evidentojmë zotërinë që na pret.

Vëmë re grupe të moshuarish që qëndrojnë bashkë, diskutojnë, qeshin dhe duket që këtu në këtë qendër çdo gjë është në harmoni.

Duket sikur je në një shtëpi të madhe dhe plot gjallëri. I përpiktë në orar, dallojmë Tomorin. Kërkonte të na rrëfente për jetën e tij dhe të veçantën që ky njeri ka.

“Fëmijë zgjohuni” janë fjalët e para që thotë Tomor Kalo sapo të takon, por nuk është vetëm thirrje, pasi është një nga poezitë që ua ka dedikuar fëmijëve të tij.

Ka tre fëmijë, dy prej tyre në emigracion dhe i sheh rrallë. Ka dëshirë t’u thurë vargje, të flasë me ta, por nëpërmjet gjuhës së shpirtit. Çdo rrugë tjetër komunikimi është prerë.

"E vetmja kënaqësi për mua, është se kur shkruaj mendoj se u bëj apel që të kujdesen për mua, për sa jam gjallë".

Pastaj na tregon për qendrën dhe me krenari thotë se është “i pari që e ka frekuentuar dhe është ndjerë shumë mirë, ndoshta dhe më mirë se në shtëpinë e tij”.

Me krenari edhe pse jeta e ka përballur me shumë vështirësi, na tregon për librat (vëllimet me poezi, siç i quan) që ka shkruar. Dhe janë plot pesë vëllime me poezi, si; “Flas me vargje”, Vetja s’më ngjan mua” “Degë të trungut tim”, “Takimi i parë”, dhe “Puthja”.

Në çdo varg të poezive ai shkruan për fëmijët, harresën, kujdesin e munguar, për sakrificat e tij dhe jetesa në vetmi.

"Kam sakrifikuar shumë për ta, na thotë Kalo, dhe kërkoj vetëm pak vëmendje, pasi tani i kam 81 vjet dhe ndjehem i vetmuar, edhe pse kam tri fëmijë". /Shekulli/