“Dashuri” përmes internetit, përfundon tmerrshëm"

nga **Morena** Mon Aug 16, 2010 9:23 pm

Historia e gjermanes, e cila kishte vendosur ta lë Gjermaninë dhe të
vijë të jetojë në Kosovë me të dashurin e saj shqiptar, kishte
përfunduar keq. Vetëm pak muaj pas fillimit të bashkëjetesës së saj me
të dashurin e saj, F. Gj. nga Gjakova, lidhja mes tyre kishte filluar të
marrë një drejtim krejt tjetër, nga ajo që kishin krijuar përmes
internetit, shtatë muaj më parë.

Sipas gazetën Kosova Sot,
viktima M. V., shtetase gjermane, kishte krijuar lidhje me 29-vjeçarin,
dhe pas shtatë muajsh, ajo kishte vendosur të vijë të jetojë në Kosovë
me të dyshuarin. Viktima i kishte rrëfyer burimit të gazetës se pas një
kohe të shkurtër të bashkëjetesës së saj me të dyshuarin, ai kishte
filluar të ndryshonte sjelljet e tij ndaj saj dhe djalit të saj
4-vjeçar. Sipas këtij burimi, i dyshuari F. Gj. kishte tentuar ta
trafikojë atë dhe me refuzimin e saj për ta kryer këtë vepër, i dyshuari
kishte “dalë” nga kontrolli dhe kishte filluar ta rrihte atë dhe djalin
e saj, në mënyrën më brutale. Pas kësaj, ajo rastin e kishte denoncuar
në polici dhe pas ndihmës së parë që kishin marrë viktimat, ishin
dërguar në QKUK dhe pas katër ditësh qëndrimi në Klinikën e
Neurokirurgjisë në Prishtinë dhe konstatimit të mjekëve se gjendja e
viktimës M. V. dhe djalit të saj N. V. është përmirësuar. Viktimat janë
liruar dje nga tretmani dhe gjenden nën mbikëqyrjen e Ambasadës Gjermane
në Kosovë.

Edhe policia pohonte se më 9 gusht të këtij viti.
rreth orës 20.30, përmes një thirrje telefonike nga një qytetar, policia
ishte njoftuar se në një lokacion është duke u zhvilluar një dhunë
familjare. Zëdhënësi i Zyrës për Informim në Policinë e Kosovës, Brahim
Sadriu, ka pohuar se pas marrjes së kësaj telefonate, patrulla dhe
njësiti i hetimeve, menjëherë kishin shkuar në atë drejtim. “Me të
arritur në atë lokacion, i dyshuari është arrestuar ndërsa viktimat janë
dërguar në emergjencë për tretman mjekësorë. Të dy viktimat (nëna dhe i
biri), kishin pësuar lëndime në shumë pjesë të trupit”, ka pohuar
Sadriu. Sipas tij, fëmija kishte lëndime edhe në fytyrë, kokë dhe i
dyshimti i kishte sulmuar fizikisht dhe rrahur pa ndonjë pretekst. Sipas
Sadriut, pas ndihmës së parë mjekësore, fëmija ishte dërguar menjëherë
në QKU-Prishtinë për tretman të mëtutjeshëm.

I dyshimti dhe
viktima, sipas policisë, nuk janë bashkëshortë, por kanë lidhje
shoqërore të krijuar përmes internetit. Pas intervistimit, me urdhër të
prokurorit komunal, i dyshimti F. Gj., është ndalur në dhomën e ndalimit
dhe rasti është nën hetime.